ပွိုးတမုဲင်ꩻ ပါႏတမုဲင်ꩻဟောင်း

ယူႏယူႏဒျာႏပအိုဝ်ႏလိုꩻမျိုꩻဘဝနဝ်ꩻ သꩻပေႏတဲ့အဝ်ႏနေနေသွူ။ ယိုဖိုင်ႏနဝ်ꩻခွေေသွောန်းတဖြာꩻ ခံႏစာꩻချက်ဒျာႏသွူ။ ပအိုဝ်ႏဘဝꩻအခေႏအနေႏနဝ်ꩻ ခွေသွောန်းတဖြာꩻကထီႏကဟွိုန်ဗာႏဖိုင်ႏယို ထွာအီခွေေသွောန်းအတာႏ ခံႏစာꩻအီဗာႏ ဝွေႏဒနာႏတမျိုꩻ ရိုꩻဗာႏသꩻပေႏတနဲင်ႏနဝ်ꩻတဲ့တမာႏတဝ်းနဝ်ꩻသွူ။ ကောပ်ပွိုးနဲင်းမုဲင်ꩻနဲးတဲင် အဝ်ႏဒျာႏခမ်းကောင်ကိုသား ပအိုဝ်ႏဖိုင်ႏအတာႏလဲ့ ဝင်ꩻရိုꩻဒျာႏသီနဝ်ꩻလိုꩻထဉ်ႏဒျာႏ သဲင်ꩻချာသီခမ်းသထုင်ႏသူꩻဟုဲင်းတဲ့ အဝ်ႏဒျာႏခမ်းဒေါမ်သထုင်ႏကို ပအိုဝ်ႏဖိုင်ႏအတာႏလဲ့ အွိုးသူꩻသားရိုꩻဒျာႏ ယိုနဝ်ꩻမဲင်ꩻခမ်းဒျာႏတဲ့။

အဝ်ႏဒျာႏဒေႏသလင် ပအိုဝ်ႏဖိုင်ႏတဲ့ ဗွိုန်ဗွိုန် ဝင်ꩻအဝ်ႏဒေါ့ꩻဒျာႏ ခမ်းတအဝ်ႏတဝ်းလိုꩻမျိုꩻ နဲင်းနဝ်ꩻဖိုင်ႏသွူ။ ပအိုဝ်ႏလိုꩻမျိုꩻအတာႏ လꩻလွေꩻနမ်းပဲင်ႏအိုပ်ချွုက်ခွင်ꩻ ရိုꩻကီလဲ့ ပအိုဝ်ႏလိုꩻမျိုꩻတာႏအစဲစ်အမဲဉ်ႏ အိုပ်ချွုတ်ခွင်ꩻတမွေးတဝ်းစွောန်ႏလဲ့ ဝင်ꩻသမ်းအဝ်ႏတကေးနေကဒျာႏနဝ်ꩻသွူ။ ပအိုဝ်ႏအတာႏ သထွူႏခရာႏနဝ်ꩻ ပအိုဝ်ႏဒေႏသကို ဟမ်ႏဖိုင်ႏခံႏဗာႏဝင်ꩻသိမ်ꩻတွော့ꩻလို့ထိုꩻတဖဲ့ꩻ လိုပ်ꩻဒါႏကွန်ႏဖိုင်ႏအငိုꩻအဝ်ႏတဝ်းတွော့ꩻ စာရောင်ဟမ်ႏယာႏတဖဲ့ꩻ နေးထူႏအုဲင်ႏထိုꩻအာလိုꩻမျိုꩻလင် ခံႏဒေါ့ꩻချာတဝ်းငဝ်းပအိုဝ်ႏဖိုင်ႏတဲ့ အဝ်ႏအာတန်နဝ်ꩻသွူ။

ယဟန်ႏသား မွိုးပအိုဝ်ႏ ဖာပအိုဝ်ႏဒျာႏလဲ့ ပိုနဝ်ꩻတအုဲင်ႏဒေါ့ꩻရီပအိုဝ်ႏတဝ်း မဉ်ႏလွေꩻကျောင်ꩻနဝ်ꩻ သွောန်ဒျာႏလိတ်မန်း ပိုနဝ်ꩻဒါႏခါꩻမန်းမꩻထဲ့မဲဉ်ႏ သꩻယူႏနုဲင်းနဝ်ꩻသားဖိုင်ႏတဲ့အဝ်ႏနဝ်ꩻသွူ။ ထဲင်းယင်းနဝ်ꩻ ပအိုဝ်ႏပေႏဖိုင်ႏခေတ်ယိုခါ တမဲဉ်ဒေါ့ꩻတဝ်းငဝ်းပအိုဝ်ႏ ပအိုဝ်ႏပေႏအချင်ꩻချင်ꩻခွဲးဝင်ꩻတရိုꩻတဝ်း ဝင်ꩻမူႏဝင်ꩻခိုဝင်ꩻဖိုင်ႏတဲ့နဝ်ꩻ တလွောန်ꩻဒေါ့ꩻတဝ်းငဝ်းပအိုဝ်ႏ ဒေါ့ꩻမန်းနေးမꩻ ရထွꩻခေတ်ယူႏဒျာႏနဝ်ꩻစားသားဖိုင်ႏမကောင်တဲ့ သေလွောန်ꩻတဝ်းနဝ်ꩻသွူ။ ကွဲးတွော့ꩻနမ်းတောမ်ႏနမ်းတဲ့ ခံႏထူႏဒျာႏပအိုဝ်ႏ ဝင်ꩻမဉ်ႏခွိုင်းပအိုဝ်ႏနဝ်ꩻတဲ့ သꩻဆာကိုဒျာႏဖိုင်ႏနဝ်ꩻသွူ။ ဝွေꩻသီးယိုဖိုင်ႏနဝ်ꩻ ရက်တဝ်းလိုꩻမျိုꩻတဲ့တမွေးတဝ်းနဝ်ꩻသွူ။

နမ်းတောမ်ႏနမ်း သေချာတဝ်း ဝင်ꩻမျောႏထိုꩻလဲဉ်းနီပအိုဝ်ႏနုဲင်းနဝ်ꩻဒျာႏသွူ။ နမ်းနဝ်ꩻအဝ်ႏရက်ဒျာႏ ပအိုဝ်ႏအတွိုင်ꩻ ငဝ်းတဲ့အဝ်ႏသေနာႏဒျာႏ နေးထူႏတောႏလမ်းတဲ့ လွိုက်ချာဒျာႏပအိုဝ်ႏနုဲင်းနဝ်ꩻလဲ့ တမာဝါꩻအခါႏမဉ်းတဲ့ ဒေါ့ꩻရီထွာတဝ်း ငဝ်းပအိုဝ်ႏနဝ်ꩻ ပိုယိုအီႏဒါႏဗာႏငဝ်းပအိုဝ်ႏယို စောင်းမꩻအီႏယိုနဲ့ဟောင်း? ပိုဖိုင်ႏသꩻရက်ပအိုဝ်ႏဖေႏကအဝ်ႏတာႏ အီႏသွောန်ဆုင်ꩻမꩻနွောင်ꩻနေဟောင်း? ကထွာဗာႏနုဲင်းယိုဖိုင်ႏနဝ်ꩻ ကောပ်ပွိုးတမုဲင်ꩻသေလွောန်လို့တဝ်ႏလဲ့ ပါႏဒျာႏဝွဋ်လီꩻဒျာႏဟောင်ႏ? ပါႏဒျာႏလိုꩻဟောင်ႏ? ပွိုးတမုဲင်ꩻ ပါႏတမုဲင်ꩻဟောင်ႏ? မဉ်ႏထွားချာသမဲင်ꩻကိုနဝ်ꩻ ကရီးခါပျူလိုꩻမျိုꩻနဝ်ꩻ တင်ႏသျာꩻဒျာႏလိုꩻမျိုꩻတမျိုꩻလဲ့ ယိုခါထိုမ်းတမွော့ꩻတဝ်းဒွုမ် အဗွိုန်ပီနုဲင်းနဝ်ꩻနေနေ ပအိုဝ်ႏလိုꩻမျိူꩻတဲ့ တနီꩻခါမဲ့ ထိုꩻမားတဝ်းနုဲင်းပျူကရိုꩻနဝ်ꩻ တမုဲင်ꩻလဲ့ အာႏမခံႏနွောင်ꩻတဝ်းနဝ်ꩻမꩻ တယ်ႏယိုမာꩻငါ တယ်ႏယိုခါမာꩻလွေꩻ သေချာခန်းသွော့နမ်းပငါပရာꩻမꩻအီႏထဲ့မဲဉ်ႏအကျောင်ꩻနဝ်ꩻသွူ။