ဖရုသ+သမ္ဖပ္ပလာပ

သမ္ဖပ္ပလာပ

နီထင်ႏကျောင်ꩻ ဟန်ႏနီꩻယို ဟမ်းပေါင်းစောဝ်း၊ ဆရာႏလꩻဖျော်တဝ်းဒွိုန်းတဲင် အသေစ်တွမ်ႏ အနေစ်နဝ်ꩻ အံႏသွမ်ꩻလို့ဝင်ꩻတွော့ꩻ တယွို့မွေးစွဉ်ႏထာꩻ။ အသေစ်ရိုꩻ- "နာꩻမဲ့ နုဲင်းစွဉ်ႏတဖြို့ꩻတို" အနေစ်သွမ်ꩻချာ- "နာꩻနေ့ꩻဖူအို နုဲင်းစွဉ်ႏထꩻဗုတ်ꩻ" အမျာꩻင- "ဟား ဟား ဟား ဟား" အသေစ်ရိုꩻ- "နာꩻကတူႏနုဲင်းစွဉ်ႏ ဟန်ႏနွန်းသီး" အနေစ်ဒေါ့ꩻချာ- "နာꩻတဝီး နုဲင်းစွဉ်ႏမီꩻဆုံꩻ" အမျာꩻင - "ဟား ဟား ဟား ဟား" အသေစ်ရိုꩻ- "နာꩻဖြောင်းနုဲင်းစွဉ်ႏ ဝါးပေႏယာ" အနေစ်ရိုꩻချာ- "နာꩻတငါ နုဲင်းစွဉ်ႏတောင်ꩻခြွꩻ" အမျာꩻငါ - "ဟား ဟား ဟား ဟား" ဝွေꩻသီးအံႏသွမ်ꩻလို့ဝင်ꩻတွင်ꩻ နုဲင်းနဝ်ꩻထွူတဲင် အံႏခေးတောလို့ဝင်ꩻနုဲင်းယို- အသေစ်ရိုꩻ- "နီဖါလုတ်ဖုဲင်ꩻ တန်မွေးစွဉ်ႏထာꩻ၊ အဒွေါင်ႏအဆွာꩻနဝ်ꩻ အဝ်ႏစွဉ်ႏ တဆီနီသောင်ꩻခြေင်းခြေင်း၊ ကွပ်နဝ်ꩻမꩻ နီဖါလုတ်ဖုဲင်ꩻ တန်မွေးစွဉ်ႏထာꩻ၊ ကယ်ꩻလဲန်းပါꩻ၊ သွꩻပေႏသီး မဉ်ႏယွုမ်းတဲ့ တဗꩻစူဟုဲင်း" "ဗြပ် ဗြပ် ဗြပ် ဗြပ်" အဝ်ႏနဝ်ꩻတွော့ꩻ အနေစ်ဖုတ်သော့ꩻတော တလီꩻဆျာႏနုဲင်းယို- "နီဖါဝါႏမွူး ခꩻတမွူးတန်နဝ်ꩻ တန်မွေးစွဉ်ႏထာꩻ၊ ကီလအဝ်ႏစွဉ်ႏ သောင်ꩻသွစ်ꩻဆီ၊ ကွပ်နဝ်ꩻမꩻ နီဖါဝါႏမွူးနဝ်ꩻ တန်မွေးစွဉ်ႏထာꩻ၊ ကယ်ꩻလဲန်းပါꩻ၊ သွꩻပေႏသီး မဉ်ႏယွုမ်းတဲ့ ထောက်ခံႏအနေႏ တဗꩻဖေႏစူဟုဲင်း" "ဗြပ် ဗြပ် ဗြပ် ဗြပ်" အဝ်ႏနဝ်ꩻထွူတွော့ꩻ အခေတ် ဖုတ်ꩻသော့ꩻတောနုဲင်းယို- "နီဖါမောက်ကြင်ꩻမွူးနဝ်ꩻ တန်မွေးစွဉ်ႏထာꩻ၊ ကီလအဝ်ႏစွဉ်ႏ အသောင်ꩻကွတ်ꩻဆီ၊ ကွပ်နဝ်ꩻမꩻ နီဖါမောက်ကြင်ꩻမွူးနဝ်ꩻ တန်မွေးစွဉ်ႏထာꩻ၊ ကယ်ꩻလဲန်းပါꩻ၊ သွꩻရက်သီး မဉ်ႏယွုမ်းတဲ့ ထောက်ခံႏအနေႏ တဗꩻဖေႏစူဟုဲင်း" "ဗြပ် ဗြပ် ဗြပ် ဗြပ်" နီအဝ်ႏတဗꩻစူတွင်ꩻ ဆရာႏပေါက်လွဉ်စွော့ꩻစွဉ်ႏဒျာႏ၊ ဟွုန်လꩻဝွေꩻသီး ဖုတ်ꩻတလီꩻဆျာႏ။ "ယိုသေစ်- သီဖါလုတ်ဖုဲင်ꩻတာနဝ်ꩻ အီႏလွေꩻထူႏအွိုးမုဲင်ꩻကို" "ခွ အနေစ်သီးဖါ ဝါႏမွူးနဝ်ꩻအော်" "ဝါး ဟား ဟား ဟား ဟား" "မွေးသွူ အီႏလွေꩻကင်းမုဲင်ꩻကို" "လွေꩻကင်း အခေတ်သီးဖါ မောက်ကြင်ꩻမွူးနဝ်ꩻအော်" "ဝါး ဟား ဟား ဟား ဟား" နီဆရာႏတဲ့ ငပယွုမ်းစွဉ်ႏဒျာႏထာꩻ။ "တပဲ့ꩻသီးဖုံႏဟွေး- ဟန်ႏနီꩻ ဆရာႏကအီႏသွဉ်ဖေႏယိုနဝ်ꩻ ဒုစရဲက်အမုဲင်နွုတ်ꩻ၊ ပေါႏမာꩻထာꩻမာꩻဟဝ်နဝ်ꩻ ထွို့ꩻမွုန်းအခိန်ႏ၊ မာꩻမွိုင်မွိုင်၊ ပေါႏမာꩻထာꩻမာꩻကုဲင်နဝ်ꩻ မာꩻသွော့ယွယွ။ "သမ္ဖပ္ပလာပ- ဒေါ့ꩻငေါဝ်းခွဉ်ႏဆေ့ꩻခရာႏ"။ သမ္ဖ-ကရိုꩻနဝ်ꩻ ငေါဝ်းယားကုဲင်ချမ်ꩻသာႏ ငေါဝ်းယားကုဲင် စီꩻပွါꩻ။ (ပလာပ- ကရိုꩻနဝ်ꩻ ဒေါ့ꩻငေါဝ်း။) ကွပ်နဝ်ꩻမꩻ "သမ္ဖပ္ပလာပ"ကရိုꩻနဝ်ꩻ ဒေါ့ꩻဖြဝ်ႏငေါဝ်း ယားကုဲင်ချမ်ꩻသာႏ၊ ဒေါ့ꩻဖြဝ်ႏငဝ်းယားကုဲင်စီꩻပွါꩻ၊ ဒေါ့ꩻဖြဝ်ႏငေါဝ်းတလꩻအီတဝ်း မဂ်ဖိုလ်ႏနိဗ္ဗာန်ႏ၊ ဒေါ့ꩻငေါဝ်းခွဉ်ႏဆေ့ꩻ အဓိပ္ပါယ်ႏရိုꩻနုဲင်းနဝ်ꩻ။ + လောကလိုꩻခမ်းယိုနဝ်ꩻ 'အခိန်ႏ'ယိုနဝ်ꩻ အငိုꩻတန်ႏလဲန်းဝင်ꩻ၊ (လိုꩻနဝ်ꩻ အုံပွေါးအခိန်ႏတဲ့ အခိန်ႏနဝ်ꩻ အုံပွေါးတဝ်းလိုꩻ)၊ ကွပ်နဝ်ꩻမꩻ ဖုတ်ꩻတလီꩻဆျာႏ၊ ဒေါ့ꩻငဝ်းခွဉ်ႏဆေ့ꩻဖုံႏနဝ်ꩻ အခိန်ႏလို့ခြေင်လွုမ်ꩻ၊ တွိုႏကလိုႏနဲစ်မာꩻ ကုသိုလ်ႏရေꩻ၊ စီꩻပွါꩻရေꩻနဝ်ꩻ တမာꩻတဝ်းတဲင် တွမ်ႏကယားကုဲင် ကုသိုလ်ႏရေꩻ၊ စီꩻပွါꩻရေꩻနဝ်ꩻ ပီဝင်ꩻ။) ခါးလား ကဖုတ်ꩻတလီꩻဆျာႏ၊ ခါးလား ကဒေါ့ꩻငဝ်းခွဉ်ႏဆေ့ꩻ၊ ခါးလား ကယားအခိန်ႏနုဲင်းနဝ်ꩻနဝ်ꩻ မဉ်ႏထွာကျောင်ꩻသားတဲ့ (မဉ်ႏထွာ လိတ်သွဉ်သားတဲ့) မဉ်ႏကျိုꩻစာꩻမွိုင်လိတ်မွိုင် အီႏဒါႏအာတခွုင်းမုဲင်ꩻ၊ အီႏအောင်ႏယိုꩻ တခွိုင်းမုဲင်ꩻ။ (မဉ်ႏထွာ ထာꩻလိုပ်ꩻသားတဲ့) မဉ်ႏကျိုꩻစာꩻ ခွုမ်မာꩻမွိုင် ထာꩻလိုပ်ꩻဖဲ့ꩻမွိုင် အီႏထွူယိုꩻ တကားမုဲင်ꩻ၊ အီႏလꩻအာ တကားမုဲင်ꩻ။ (မဉ်ႏထွာ ထာꩻကူꩻကားသားတဲ့) မဉ်ႏကျိုꩻစာꩻမွိုင် အဖြေꩻအစာမွိုင် အီႏမျတ်အာ တကားမုဲင်ꩻ၊ (မဉ်ႏထွာအားထုတ်ရာꩻသားတဲ့) မဉ်ႏအားထုတ်မွိုင် တရာꩻအီႏထင်ႏတကားမုဲင်ꩻ။ ကွပ်နဝ်ꩻမꩻ ထာꩻတမွေးတဝ်းတဲ့ ဒေါ့ꩻနုဲင်းအမွေးပုံႏ၊ ဒေါ့ꩻဝွေႏဒေါ့ꩻဝက်၊ ဒေါ့ꩻပျက်ဒေါ့ꩻသော်ꩻထာꩻဖုံႏ၊ ဒေါ့ꩻငဝ်းခွဉ်ႏဆေ့ꩻ၊ ဒေါ့ꩻငဝ်းအကျိုꩻ တအဲန်ထဝ်းဖုံႏ၊ ဘဝယိုခါ ကောဒေါ့ꩻသားယင်၊ ကောနာႏသားယင် အခိန်ႏလို့ခြေင်ဒျာႏ၊ အကျိုꩻထမုဲင်ꩻတဲ့ တအဲန်ထဝ်း၊ မဉ်ႏသီသူꩻတဲ့ လင်ꩻထဲ့ဗာႏငါးရုဲင်ꩻ။ (မဉ်ႏသဲင်ꩻထွာဗာႏယင်း လိုꩻပိုတဲ့ ကောရက်ကောပဲင်ꩻသား အဲန်ထဝ်း၊ ထွာဒျာႏလိုꩻဖွီဖုဲင်တန်၊ ဒေါ့ꩻထာꩻတဲ့ ဝင်ꩻတယွုမ်းတဝ်း၊ ဘုံꩻအဲန်ထဝ်း၊ အနုဘောႏအဲန်ထဝ်း၊ ထွာဗာႏနုဲင်းနဝ်ꩻ။) နီဆရာႏ သျင်ꩻနယ်နီနုဲင်းနဝ်ꩻ။ ဒေါ့ꩻမွုန်းငေါဝ်းခွဉ်ႏဆေ့ꩻအကျောင်ꩻ ဖေႏနေးကတောင်ꩻတဲင် နီဗွေႏစင်ꩻတဲမ်းဖေႏ ကဗျာနုဲင်းယို- + အကျိုꩻအဲန်ထဝ်း - ဒေါ့ꩻငေါဝ်းလွဉ်ꩻမာႏ ငါးရုဲင်ꩻထဲ့ဗာႏ - ချမ်ꩻသာႏကင်ꩻညာꩻ သဲင်ꩻကွုတ်လိုꩻပို - ဘုံꩻထိုတောဝ်းငါႏ ဒေါ့ꩻပျင်ႏမွုန်း - မဉ်ႏယွုန်း ကျင်ꩻဟဝ်ထွာ။

ကဗျာယို မဉ်ႏပြန်ႏငေါဝ်းရိုꩻရိုꩻနောဝ်ꩻ-

(အကျိုꩻအဲန်ထဝ်း ငေါဝ်းခွဉ်ႏဆေ့ꩻယို မဉ်ႏဒေါ့ꩻ၊ မဉ်ႏလွဉ်ꩻမာႏနဝ်ꩻ လင်ꩻထဲ့ဗာႏငါးရုဲင်ꩻ၊ မဉ်ႏလင်ꩻထဲ့ငါးရုဲင်ꩻ၊ မဉ်ႏလင်ꩻခံႏငါးရုဲင်ꩻသူꩻနဝ်ꩻ ထာꩻချမ်ꩻသာႏအဲန်ထဝ်းတစိꩻစိꩻ၊ မဉ်ႏသဲင်ꩻကွုတ်ချာလိုꩻပိုတဲ့ ဘုံႏကံႏတထိုတဝ်း၊ (ကွပ်နဝ်ꩻမꩻ) ဒေါ့ꩻပျင်ႏမွုန်းထာꩻ၊ ဒေါ့ꩻမွုန်းငေါဝ်းခွဉ်ႏဆေ့ꩻ၊ မဉ်ႏယွုန်းထိုꩻနဝ်ꩻ ထွာလိုꩻအကျင်ꩻဟဝ်။) ပြန်ႏဗာႏနုဲင်းနောဝ်ꩻ။ "တပဲ့ꩻသီး ဖေႏနေးကထွာ လိုꩻအကျင်ꩻဟဝ်၊ ဖေႏနေးကထွာလိုꩻယံနဝ်ꩻ ဒေါ့ꩻမွုန်းငေါဝ်းခွဉ်ႏဆေ့ꩻနော" "မွေးဒျာႏ ဗွေႏအော်" "ယိုတလဲင်ႏတဲ့ အခိန်ႏလို့လဲန်း၊ အုံပဆားဒွိုန်းက၊ မင်္ဂလာႏဒျာႏ တပဲ့ꩻဖုံႏ" "မင်္ဂလာႏဒျာႏ ဆရာႏဗွေႏအော်"