ဖြော်တွမ်ႏတရာꩻမꩻကေႏမꩻ

"မွိုးဖါကေꩻဇူꩻအာ ဖြော်ချာတွမ်ႏတရာꩻယင်မꩻကေႏလꩻ"

နီဗွေႏဘုရာꩻဟော်ꩻဖေႏ ဗွေႏရဟန်ꩻသီးဖုံႏ တရာꩻနုဲင်းယို- ရဟန်ꩻသီးဖုံႏဟွေး- - မာတုစ - မွိုးဗွေႏတဲ့နောဝ်ꩻ - ပိတုစ - ဖါဗွေႏတဲ့နောဝ်ꩻ ဝွေꩻသီးနီဖြာꩻ ကေꩻဇူꩻတရာꩻအာငါႏ၊ အီႏဖြော်ချာဗာႏယိုꩻတဝ်း၊ ရဟန်ꩻသီးဖုံႏဟွေး- - မွိုးဗွေႏနဝ်ꩻ အွဉ်ႏဒင်ႏပြေင်ပင်စေႏ - ဖါဗွေႏနဝ်ꩻ အွဉ်ႏဒင်ႏပြေင်ပင်ထွေ၊ ခေ့ꩻလေနီꩻနာꩻ နေင်ႏတရျာꩻအကို ပိုခိုတဲ့နဝ်ꩻ၊ ပိုမူႏတဲ့နဝ်ꩻ လွူးချာမွိုးဖါ၊ ဖြော်ချာမွိုးဖါကေꩻဇူꩻ၊ အထွူႏအဖွီပြေင်လောင်း၊ ဟွီညောင်ꩻစိမ်ႏဖေႏမွိုးဖါဗွေႏ နီပြေင်လောင်း၊ ဒေါ့ꩻဗာႏငေါဝ်းလို့နုဲင်းနဝ်ꩻ၊ အွဉ်ႏအုံသွူနုဲင်းနဝ်ꩻ၊ မာꩻဖေႏသွူနုဲင်းနဝ်ꩻ၊ ဖြော်ချာသွူကေꩻဇူꩻနုဲင်းနဝ်ꩻမဉ်ႏတဲ့ 'ကေႏလဲဉ်းနဲ့-လုမ်းလဲဉ်းနဲ့၊ 'လꩻကေႏတဝ်း-လꩻလိုမ်းတဝ်း'။ ကွပ်ပွိုးထမုဲင်ꩻအီ- 'မွိုးဖါကရိုꩻနဝ်ꩻ လွူးလွဉ်၊ ခွမ်ꩻလွဉ် ပိုခိုပိုမူႏသီး အွိုးကလွူးလင်ꩻစနဝ်ꩻကာႏ လွမ်ဖေႏဗီ၊ လူးဖေႏထီ၊ ဖျိုးဖေႏခွဉ်ႏပေႏခွဉ်ႏတန်၊ အွဉ်ႏနဲဉ်း၊ ဖေႏအံႏဒဲဉ်ဟန်ႏ၊ နဝ်ꩻမꩻ ပိုခိုပိုမူႏသီး ထွာလွဉ်လꩻလိုꩻ လောကကိုယို၊ ကွပ်ပွိုးနောဝ်ꩻသွူ။ ရဟန်ꩻသီးဖုံႏဟွေး- ဥပမာႏ- ပိုမူႏပိုခိုသီးနဝ်ꩻ ထွာခွန်တဲင် ခွုင်းကားတဲင် ခွန်အရာႏ၊ ခွန်သွဉ်းခွန်သယ်ႏ၊ ခွန်ထာꩻချမ်ꩻသာႏ၊ ခွန်တန်စေꩻစိန်ႏ၊ ခွန်ရွဉ်ခွန်ခံꩻ အွဉ်ႏတံꩻလို့လို့ဖေႏ၊ မွိုးဗွေႏဖါစောဝ်းတဲ့ယဝ်း ကေꩻဇူꩻနဝ်ꩻ တကေႏနွောင်ꩻတဝ်းနောဝ်ꩻသွူ။ ရဟန်ꩻသီးဖုံႏဟွေး- မွိုးဗွေႏဖါဗွေႏယို 'မဉ်ႏဖြော်တွမ်ႏတရာꩻ-မဉ်ႏမာꩻတွမ်ႏကုသိုလ်ႏ'နဝ်ꩻ ကေꩻဇူꩻကုဲင်းကေႏဒါႏကွေး၊ မာꩻဗာႏနုဲင်းမုဲင်ꩻနဲးတဲင်- - အဿဒ္ဓေ- သဒ္ဓါႏတရာꩻတအဲဉ်ထဝ်း မွိုးတဲ့ယဝ်း ဖါတဲ့ယဝ်းနဝ်ꩻ သဒ္ဓါႏတရာꩻ ဖေႏနေးကအဝ်ႏလွဉ်၊ ဖေႏကယွုမ်းအံႏလွဉ် ဘုရာꩻ တရာꩻ သံဃာႏ ရတနာႏမျတ်သွံပါꩻတွမ်ႏ ကံႏ-ကံႏအကျိုꩻ။ - ဒုဿီလေ- သီႏလတအဲဉ်ထဝ်း မွိုးတဲ့ယဝ်း ဖါတဲ့ယဝ်းနဝ်ꩻ သီႏလဖေႏကအဝ်ႏလွဉ် (မာꩻသီတဝ်းဝင်ꩻသက်၊ ထူႏတခွန်ꩻတဝ်းဝင်ꩻထာꩻ၊ ပဲစ်မာႏတဝ်းဝင်ꩻပိုမာ၊ ဒေါ့ꩻလဲဉ်တဝ်းထာꩻ၊ အွꩻတဝ်းဒေါဝ်၊ အကျင်ꩻဟဝ်ယိုငတ်ꩻချက်၊ အကျင်ꩻမျတ်ယိုငတ်ꩻမျိုꩻ ဖေႏကတဉ်ႏခွေါင်လွဉ်)။ - အစာဂေ- အဒါနေ- သေလူႏသေတန်ꩻတဝ်း မွိုးတဲ့ယဝ်း ဖါတဲ့ယဝ်းနဝ်ꩻ ဖေႏကစေꩻမွုန်း၊ ဖေႏနေး ကတကေးမွုန်းဝင်ꩻ၊ ဖေႏနေးကသေလူႏ၊ ဖေႏနေးကသေတန်ꩻလွဉ်၊ - ဒုပ္ပညေ- ထာꩻသူႏသေအဲဉ်ထဝ်း မွိုးတဲ့ယဝ်း ဖါတဲ့ယဝ်း ဖေႏနေးကသူႏသေထာꩻ' ဖေႏနေးကအားထွုတ်တရာꩻ၊ ဖေႏနေးကမာꩻကုသိုလ်ႏတွော့ꩻ ပိုခိုပိုမူႏ မဉ်ႏဒေါ့ꩻလꩻလꩻဖေႏနဝ်ꩻ' တွမ်ႏကဖြော်ကေႏချာ မွိုးဖါကေꩻဇူꩻနဝ်ꩻ ဗွန်ပီဝင်ꩻနောဝ်ꩻသွူ။