ဗေင်ႏငါႏမွုန်းတဝ်းထာꩻ

"သောပ္ပသုတ် (ဗေင်ႏငါႏမွုန်းတဝ်းထာꩻ၊ အားထွုတ်ဗဲင်းသွော့တရာꩻ)" အွိုးခꩻတလဲင်ႏ- မွူးခွယ်တန်ခိန်ႏနဝ်ꩻ ဗွေႏဘုရာꩻကျွꩻလွဉ် အုံကွံခင်ႏလမ်းစရွပ်ကို၊ ဗွေႏသာရိပုတ္တရာႏ၊ ဗွေႏမဟာႏမောဂ္ဂလာန်ႏ၊ ဗွေႏမဟာကဿပ၊ ဗွေႏမဟာကစ္စည်ꩻ၊ ဗွေႏမဟာကောဋ္ဌိက၊ ဗွေႏမဟာစုန္ဒ၊ ဗွေႏမဟာကပ္ပိန၊ ဗွေႏအနုရုဒ္ဓါႏ၊ ဗွေႏရေဝတ၊ ဗွေႏအာနန္တာႏ-သီးဖုံႏတဲ့ ကျွꩻလွဉ်။ ထာꩻတိန်ႏခေ့ꩻပသာႏတဲင် နီဗွေႏဘုရာꩻကျွꩻသဲင်ꩻကျောင်ꩻ၊ အဝ်ႏကုဲင်ဗွေႏရဟန်ꩻတန်သီးဖုံႏနောဝ်ꩻတဲ့ ကျွꩻသဲင်ꩻနုဲင်းနုဲင်းအကျောင်ꩻ ပငါပရာꩻနောဝ်ꩻသွူ။ စရွပ်ကိုနဝ်ꩻ အဝ်ႏကုဲင်ဒျာႏ ရဟန်ꩻကဗုဲင်တသာ၊ ရဟန်ꩻကစအုံသားဖုံႏလွုမ်ꩻ၊ ဗွေႏစင်ꩻတသာဖုံႏနဝ်ꩻ ကိန်ꩻဗော့ꩻနဝ်ꩻကို၊ ရဟန်ꩻတသာဖုံႏနဝ်ꩻ မွူးလိန်ꩻထန်ႏ၊ ထာꩻလိန်ꩻလေသွူတဲ့ အဝ်ႏကိန်ꩻကထာꩻ၊ သမ်းတခြော့သန်ပါထာꩻ နုဲင်းစောက်အာႏ။ နိဗွေႏဘုရာꩻ နေးတွမ်ႏဒိဗ္ဗစက္ခု-မဲ့တဲင် ထီႏလွေꩻရဟန်ꩻသီး အဝ်ႏကိန်ꩻနေထာꩻ၊ အဝ်ႏတခြော့သန်ေနထာꩻ နုဲင်းစောက်အာႏ၊ မွူးလိန်ꩻထန်ႏသွူတဲ့ ထွိုင်ႏတဝ်းဒွိုန်းတွော့ꩻ နီဗွေႏဘုရာꩻ ကျွေꩻလွေꩻစရွပ်ကို၊ လွေꩻဟဲ့ꩻထွိုင်ႏ ရဟန်ꩻတသာသီးဖုံႏနောဝ်ꩻသွူ။ "ရဟန်ꩻသီးဖုံႏဟွေး- သာရိပုတ္တရာႏ အဝ်ႏမုဲင်ꩻကို၊ မဟာႏမောဂ္ဂလာန်ႏ အဝ်ႏမုဲင်ꩻကို၊ ရဟန်ꩻတန်သီးဖုံႏ မဟာနဝ်ꩻ အဝ်ႏမုဲင်ꩻကို၊ အလွေꩻလို့ မုဲင်ꩻကိုဖုံႏဟောင်း" "ဝွေꩻဗွေႏသီးဖုံႏနဝ်ꩻ အကျွꩻသဲင်ꩻဒျာႏအကျောင်ꩻ အွိုးမဟာကာႏ၊ ဟန်ႏရောဝ်ꩻယိုနဝ်ꩻ ထီႏတဝ်း အဖျော်လွဉ်ယိုကို တပါꩻပါꩻ ဗွေႏဩ" "ရဟန်ꩻသီးဖုံႏဟွေး- 'ရဟန်ꩻတန်သီးဖုံႏ လွဉ်တဝ်း'သီယူႏနုဲင်းနဝ်ꩻမꩻ သီထွိုင်ႏလေထာꩻ၊ သီဗေင်ႏတွီꩻထာꩻ၊ သီတခြော့သန်ထာꩻ နုဲင်းစောက်အာႏနဝ်ꩻသနယ်။ 'ကအုပ်ခမ်း စိုꩻထီ ခွန်တန်တပါꩻနဝ်ꩻ အမဉ်ႏဗေင်ႏချမ်ꩻသာႏမွိုင်းထာꩻ၊ အမဉ်ႏဗေင်ႏတလွာꩻမွိုင်းထာꩻ၊ အမဉ်ႏတခေင်ꩻမွိုင်းထာꩻ၊ အမဉ်ႏထွိုင်ႏလေမွိုင်းထာꩻ၊ မာꩻဖေႏတောဝ်း ခမ်းသားထီသားတာႏ ထမုဲင်ꩻမုဲင်ꩻ၊ ခွန်နဝ်ꩻနဝ်ꩻ 'ခမ်းသား ထီသားရက်နာႏ၊ ဟွူန်ဟောဝ်ငါႏ'ကရိုꩻနဝ်ꩻ သီဟွူန်ဖိုနေဟောင်း" "ဟွူန်ဖိုတောဝ်း ဗွေႏဩ" ခွန်ဖုံႏတဲ့နဝ်ꩻ၊ အမတ်ဖုံႏတဲ့နဝ်ꩻ၊ စဲ့ꩻပိုႏတန်ဖုံႏတဲ့နဝ်ꩻ၊ ရပ်လိုꩻတန် ဒုံလိုꩻတန်ဖုံႏတဲ့နဝ်ꩻ ပေါႏဗေင်ႏချမ်ꩻသာႏမွိုင်းထာꩻ၊ ပေါႏထွိုင်ႏလေမွိုင်းထာꩻ၊ ပေါႏလွꩻမာꩻထာꩻမာꩻနဝ်ꩻ ခမ်းသားတဟွူန်ဟောဝ်တောဝ်း၊ ရပ်သားတနစ်သက်တဝ်း၊ ဒုံသားတရက်ပဲင်ꩻတောဝ်းနောဝ်ꩻသွူ။ အနုဲင်းနဝ်ꩻနေနေ 'ရဟန်ꩻသီးဖုံႏတဲ့ ပေါႏဗေင်ႏမွိုင်းထာꩻ၊ ပေါႏထွိုင်ႏလေမွိုင်းထာꩻ၊ ပေါႏအားထွုတ်တဝ်းတရာꩻ၊ မာꩻတဝ်းကုသိုလ်ႏနဝ်ꩻ ဝင်ꩻတကေႏညိုႏတဝ်း၊ ကွပ်နဝ်ꩻမꩻ ဗေင်ႏငါႏမွုန်းထာꩻ၊ ထွိုင်ႏလေမွုန်းထာꩻ၊ ထိန်ꩻသွော့မဲ့နား-စတဲင်ဣန္ဒြေႏသူပါꩻ၊ အားထွုတ်သွော့တရာꩻ၊ မာꩻသွော့ကုသိုလ်ႏနော"ဗုဒ္ဓေါဗွေႏဘုရာꩻ မိန်းခါꩻနုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ သောပ္ပသုတ်)