ဗျဉ္ဇန်(၃၃)ဖြိုင်ႏ ငဝ်းပစိုႏ
က(ကဒလီ)-အလမ်ႏဝီ ခ(ခလီန)-သေစဝ်းကျ ဂ(ဂဇတာ)-ဆင်ဖိုင်ႏအာ ဃ(ဃရ)-လောင်ꩻ တရောပ်ကျောင်ꩻ င(ငးတဗာႏ)-ဖြေꩻထျꩻတာႏ စ(စတု)ယို-လိတ်ꩻဗာႏကို ဆ(ဆဒနာ)-မီꩻသေင်ႏလာႏ ဇ(ဇဝန)-မွိုင်ကျးကျး ဈ(ဈသ)လဲ့-ထပေႏတဲ့ ည(ညးမီႏပါ)-ဝိဇ္ဇာႏထွာ ဋ(ဋလန)-နန်းခီကျ ဌ(ဌကီ)ဖေႏ-ပြူးအဲပ်ꩻဗွေႏ ဍ(ဍမယာ)-မာꩻငမ်းပါꩻ ဎ(ဎါလီ)-စဲ့ꩻပꩻသီ ဏ(ဏဘယံ)-ဘေꩻရန်ႏကင်ꩻ တ(တဒါ)-တွိုႏနဝ်ꩻခါ ထ(ထပနာ)-အောန်ႏခါꩻဒျာႏ ဒ(ဒဗ္ဗိ)ဖြောင်-စေားမောင်းဒေါင် ဓ(ဓဇ)အောန်ႏ-ယွိုင်ႏတမ်ꩻခေါန်ႏ န(နလိနီ)-ဗိုနောင်ထီ ပ(ပဋိညာဉ်ႏ)-ငဝ်းဝုန်ႏခံႏ ဖ(ဖါတိ)ယို-တန်ပွါꩻထို ဗ(ဗကုလာ၀-ကဝ်ႏသာႏယာႏ ဘ(ဘဂဝါ)-ဗွေႏဘုရာꩻ မ(မဓု)ရိုꩻ-အနွိုးမျိုꩻ ယ(ယတ္တကာ)-ခွုင်းကဒါႏ ရ(ရစနာ)-စန်ႏကဗျာ လ(လကာရော)-လင်ꩻယန်ႏနေား ဝ(ဝဏ္ဏနာ)-ငဝ်းအံႏဖြာႏ သ(သက္က)တန်-လိုꩻစိုန်ꩻယမ် ဟ(ဟတ္ထကော)-လိုꩻဒါႏနေား ဠ(ဠးတန်ပုင်ႏ)-ဝါးကဠုင်ႏ "လေက်းဟော်ꩻ" ကာꩻရာႏ၊ ဗာႏကေ၊ သေထီး၊ ကီႏယော့ꩻ၊ မောꩻသွူး၊ လွူးကဝ်ႏ၊ သဝ်ႏပီ၊ ခီယီꩻ၊ နီနာꩻ၊ မာꩻကုဲး၊ ရုဲးသꩻ၊ လꩻဟဝ်၊ မဝ်ဗွို့ꩻ၊ သွို့ꩻကို၊ ဗိုလာႏ၊ ဝါႏမွူး၊ ယွူးပါꩻ၊ လာꩻယုဲꩻထီ၊ မဟာမစာႏ၊ ကမာꩻသေꩻခါꩻ၊ သတိꩻလꩻဗာႏ၊ တနီꩻနီနီꩻ၊ ကုဒါႏတသီႏ၊ ယူႏဗာႏခူခူ၊ ယူးတဝီႏသီထာꩻတဖူꩻကို၊ ဖွိုႏထို၊ ဆေ့ꩻအာ၊ ယသာ၊ ခေ့ꩻလေ၊ သေတသေတဝ်း၊ လားစဝ်းနီပါꩻ၊ ယူႏလꩻပငါပရာꩻ။ "လေက်ဟော်ꩻ" ထူႏချာ၊ တကျားဗွူတဖျ၊ တလီꩻမာꩻရျူးသျူးကို၊ တဖျူဟျူႏထာꩻ၊ နꩻလျောꩻနာစျူ အဗာႏတရျောနဝ်ꩻတရုဲ၊ ထာꩻလျားလာ ကဝ်ႏတနျာႏတုဲအာ၊ ပျူလိုꩻမျိုꩻ ကျူႏပအိုဝ်ႏထာꩻ၊ ငျဝ်ႏဒါဆျာ၊ ငဝ်းတအျာ၊ ထီလျော့သားပျောႏထာꩻ၊ တပျားနျꩻဗာႏ တမျူးကတူႏ၊ ဗျို့စူꩻတငါ၊ ဖျိုးကုဲးထာꩻအီႏ အကျိုꩻပျုဒါႏ။ "ငဝ်းပစိုႏ" တလီꩻမာꩻ၊ တခါꩻဗွောင်၊ တဒေါင်ထို့၊ တနို့ဝုဲꩻ၊ ထွီႏလုဲꩻအူႏ၊ ဇမ္ဗူႏဖြေင်ꩻ၊ စမ်ႏဖေင်ꩻကျောင်ႏ၊ ဟမ်ႏလောင်ႏပွီ၊ တဒွီရာႏ၊ မောက်ꩻကီကာႏ၊ ဗျို့ဗျ။ "လေက်ဟော်ꩻ" ဖေါႏတသီးလျား အမီႏအဝ်ႏဒျာႏတခြာကို၊ လိုꩻဖြားခြုဲးနယ်ဖေႏ လိုꩻပေႏထာꩻလူႏကျိုꩻ၊ တခြာသားဒျꩻနꩻ၊ ဖြုဲꩻဖြီထီကို၊ ထာꩻလျားလာ တခြေ့အာ၊ မုဲးခြေားရာႏ ဆျာႏငါႏ၊ ထူႏထာꩻဒို့ꩻ တခြို့ခါꩻငျဝ်ႏပေႏနဝ်ꩻလုဲး၊ ပျားသီးမွိုး တခြော့ထာꩻ။ "ငဝ်းလဲင်းဖြေꩻ" ခမ်းလော့ကြိုႏကြိုႏ၊ ကောင်လောင်းခိုႏနဝ် ခူးခြဝ်ႏခဝ်၊ ချို့ချောတ့်ကြေ့ꩻ၊ ကြေ့ꩻချောတ်ချို့ꩻ၊ လိုꩻခြွေနဝ်ꩻအာ ရောန်သားဆေ့ꩻ၊ မွူးပြေ့ꩻတွိုင်ꩻ လာတထန်ႏတဝ်း။ "လေက်ဟော်ꩻ" ထွို့ꩻဗွူကြား၊ ဖြားပသာႏ၊ ပြာႏဒေ့ꩻစျူ၊ ဖျူတခြီႏ၊ မုဲးတရီႏပြာꩻ၊ ကလာꩻကြော့ꩻ၊ မော့ꩻသွူကြုဲ၊ ပြုဲထိုꩻဒါႏ၊ တသာႏကြိုႏ၊ ထတိုႏဖြီ၊ တခြီမဲ့၊ ပြဲ့ငဝ်းတေ့ꩻ၊ ကြေ့ꩻငဝ်းငျာꩻ၊ မာꩻကြွို့ꩻမွော့၊ ထီႏစွော့ꩻပြွူ၊ စွူဖြိုးနေး၊ ပြေးပြဲ့ငီႏ၊ ဒေါ့ꩻဖြီႏလုဲး၊ ဒေါ့ꩻရုဲးဖျော၊ အီႏလျောသွူ။ "ငဝ်းမေႏဖါႏထျꩻ" ကြေ့ꩻအုံသော့ꩻသီ မရဏဖြား အဝ်ႏထီႏလောန်ꩻ၊ ဗွေႏဗိုန်အုံကျောင်ꩻ မရဏဖြား အဝ်ႏထီႏတွိုႏ၊ ခေါင်းသားခွေယို နာꩻကဗွိုႏ။ "လေက်ဟော်ꩻ" သွီႏမိုထွာဒွေ၊ တွေတလီꩻထွာႏ၊ သွာႏအလျားဟဝ်၊ ဒဝ်ခွꩻဆုဲꩻထာꩻ၊ တလွာꩻထဲ့ဖွိုႏ၊ မီႏဗွိုႏလွꩻထီႏ၊ မီႏအွီႏရိုꩻဟဝ်၊ မီႏခဝ်းရိုꩻထီႏ၊ တဒွီႏဖျꩻ၊ ကြꩻလွေꩻမုဲꩻ၊ တွိုႏဆုဲꩻမွေး၊ ယွေးသွေငါႏ၊ သွာႏမုဲးခြေား၊ ထီဗျေားခွꩻ၊ ခွေသꩻကြုဲꩻ၊ ငွီႏသုဲꩻစျူ၊ တခြွူမွူး၊ လွူးအိုအွီႏ၊ ထွီႏအူႏဆျာ၊ ခွါဆေႏသိုႏ၊ အဝ်ႏလိုႏသွꩻ၊ ထာꩻခွꩻလာ၊ ဖီးအွာကဲး၊ ကွဲးငျကွဲးလုဲး၊ ထွာဒါႏပါꩻခဝ်းသွဲး။ "ငဝ်းဒေါ့ꩻယပ်ꩻ" တသီႏသꩻဆာ၊ ယာလာႏယွေး၊ ဟန်ႏဆွေးလာႏတုမ်၊ ယာလာႏအုမ်၊ နီဖါမီႏရက် နီမွိုးကြက်ꩻ၊ နီမွိုးမီႏရက် နီဖါကြက်ꩻ၊ နီဖူသူႏဒီႏ အွီႏလဲန်းနီဖီနွေႏ၊ နီဖီနွေႏဒီႏ အွီႏလဲန်းနီဖူသူႏ၊ ဆွတ်ꩻအဝ်ႏအထန်ႏနုဲးငွီႏ၊ သွီႏအဝ်ႏအထန်ႏနုဲးဆွေႏ။ "လေက်ဟော်ꩻ" ချာချာငါငါ တွိုႏတခြာ၊ တကြီစီႏ၊ တသီႏတငါ၊ တကြူရာႏ၊ အဝ်ႏတဖြာꩻ ကျွꩻလွေꩻထေ့ပါꩻ၊ ကျွားတဖြာꩻထျꩻ၊ မာꩻတဒွီခြွꩻ၊ ကတူႏတကြွꩻ၊ ကျူႏထာꩻထွူ နာႏအကျိုꩻ၊ ကြော့ꩻကတူႏဒျာႏ၊ ပါꩻခြဝ်၊ ကြွဲဒီႏထွာတသီႏအာ၊ လိုꩻခြွေလိုꩻခြာ၊ နꩻမွူးတကြွား၊ အစွိုးအခြွီ၊ ဖြွေႏလူးတသာႏ၊ တကွီးထဲ့ထာꩻ၊ ဟို့ꩻငွိုးထာꩻကြွုကြွု။ "လေက်ဟော်ꩻ" အေင်ဆီႏဗုင်ꩻလျား၊ ပိက်လေက်းသားပျောႏ၊ ဆွေႏဗိတ်ꩻဖျောႏထီ ထွာတသီႏ၊ ဗေန်းဝင်ꩻကစေန်းသေင်ႏ လꩻတနေင်ႏသွူ၊ ကဝ်ႏသိန်ခြွူအွꩻ၊ ဖင်းလေပ်ထာꩻထွန်ႏ၊ နာꩻဟောမ်ခွေဗေင်ႏဒါ၊ ခွေထာꩻဒါ နာꩻဗေင်ႏဒို့ꩻ။ "လေက်ဟော်ꩻ" ပနားအဲက်ꩻ၊ ထဲက်ꩻဝါႏ၊ ဖါႏကဲန်၊ မဲန်ထီႏ၊ ရီစဲတ်၊ လဲပ်လျော၊ ကျောဆဲမ်ႏဗာႏ တသာႏအဲပ်ꩻ၊ နဲပ်ꩻကလူꩻဗွာ၊ ကွာငဝ်းသင်ႏဝဲင်ꩻဝဲင်ꩻ၊ လွေꩻစဲန်ႏပျꩻတရိင်း၊ တသိင်းမာꩻခိုးတဲမ်၊ ထဲမ်ပါႏရမီႏ၊ ယမ်ထီႏကဲတ်ꩻစဲင်းစဲင်း၊ လဲင်းထာꩻလိုႏတဖူ၊ တမူဖဲန်ဒွိုႏတရꩻ၊ သဲမ်ထꩻလိုႏပလဲင်ꩻ။ တုက်တလုင်ꩻဆင်ခင်ႏ၊ ဗွောင်သိုမ်ဆင်ႏ၊ အမွထန်ႏငတ်ꩻစွိုး၊ ဖေႏဗဲင်းနီပြူးအဲပ်ꩻမွိုင် စင်ꩻသီးမွိုး။ "လေက်ဟော်ꩻ" နောင်ပေတ်ꩻသားဖိတ်ခါꩻ၊ စဲတ်ခါꩻပါ မုဲးရေန်းခြွူထီ၊ မီႏအွꩻဗာႏနဝ်ꩻ အဖိန်းရောႏဂါႏဟဝ်၊ ပါꩻကတောင်စဲက်း ဖတ်လေက်း ငပါထာꩻခိက်ခိက်၊ စိက်ပတီꩻခိင်ႏ တခေင်ꩻမွော့ထာꩻ၊ ကျူႏလေပ်ဘုရာꩻ လေမ်းလွေꩻနေးလုဲꩻ၊ ခင်ႏအဝ်ႏလိမ်ꩻဝင်ꩻ၊ တဲပ်လဲပ်ဟဝ်ငါႏ။ "လေက်ဟော်ꩻ" အိုင်တကိုက်ꩻထာꩻ၊ ဗွေႏဗိုန်နမ်းကိုတ်၊ ထိုမ်းခင်ႏဖါႏဗိုတ်၊ ခူးကိုင်ႏတသိုက်ꩻ၊ ကူဖေႏစူစိုပ်ꩻ၊ အိုက်ခုက်ကပ်နေး၊ လွဲမိုတ်သားနွန်ႏ၊ ခုန်ယိုန်ꩻခွန်ထုဲႏ၊ ဖေါတ်စင်ထာꩻအီႏ အွိုးရုမ်ꩻကို။ "ငဝ်းပစိုႏ" ဗိုက်ဆိက်ဆိုက်- ဆိုက်နောင်ဗောန် လင်ꩻကြွီႏဆိုမ်ႏ၊ စောက်ꩻဖါးနောင်လိုမ်ႏ လင်ꩻဒိုင်ႏထီ၊ ထဝဝ်ꩻထီစွူ လင်ꩻဒိုင်ႏတိင်ႏ၊ တိင်ႏတရောꩻ၊ တကြော်ꩻသဲး၊ တနွဲးဒိုင်ႏ၊ တကိုမ်ꩻသီးကျူႏပိန်ဖိုင်ႏင်ႏ။ "လေက်ဟော်ꩻ" သေင်ႏတအောက်ꩻ၊ စောက်ꩻခမ်းကောင်၊ ဒေါင်တပွတ်ꩻ၊ မုတ်ꩻအငေါန်ꩻ၊ ကောန်ꩻခုင်ႏခေင်ႏ၊ ဝါႏဗေင်ႏစောမ်၊ ဟောမ်တောင်ꩻကေား၊ စေားသေင်ႏလာႏ၊ ပါႏတရောပ်၊ ကောပ်မွန်ꩻဒဝ်၊ ဟဝ်စုမ်ႏမျိုꩻ၊ အရိုꩻငိမ်ꩻ၊ ကိမ်ꩻဝါႏပင်၊ ဗင်ဝါႏယွား၊ ထွားဒေါမ်သူꩻ၊ စိန်ႏဖူႏဟွဲး၊ ရောန်စွဲးကင်ꩻ၊ ခမ်ꩻစွဲးလို့၊ ဟို့ꩻမီႏပေါတ်ꩻ၊ စောတ်ꩻတနမ်၊ ဟမ်ႏငမ်အွီႏ၊ ထွီႏမောတ်ဖျိုး၊ တရျိုးခွနန်၊ တဗုန်ဆောင်ႏ၊ ထီကောင်ႏဝါႏ၊ တသာႏသုဲꩻ၊ ကြုဲꩻကွုတ်သော့ꩻ၊ ဟံႏဗော့ꩻအုန်၊ တလုန်တောမ်ႏ၊ ကွဲးငျကွဲးသောမ်ႏ ထွာပနားနဲးနေား။ "ငဝ်းပစိုႏ" ဖိုးဖုံႏသဲင်ꩻ၊ ကီးလဲင်ꩻဝါး၊ ကားကွို့ꩻဖိုးနောင်ဟွိုꩻဒင်ႏအွတ်ꩻ၊ ဖိုးလွဲပွတ်ꩻ ဒင်ႏသုဲꩻ၊ ဖိုးမုဲးဟုဲꩻ ဒင်ႏသေင်ႏ၊ လိုꩻနမ်းနေင်ႏ ကေားဝါး၊ လိုꩻဖက်ꩻဟား ကေားစွီႏꩻ လိုꩻနောင်ငွီႏ ကေားထိုမ်း၊ လိုꩻဖက်ꩻပိုမ်း ကေားနွန်ႏ၊ လိုꩻပင်တုန်ႏ ကေားဖြေꩻ၊ အအီႏဖေႏ အပိုမူႏပေႏနင်ႏယောင်ꩻရေꩻ။ "လေက်ဟော်ꩻ" မာꩻငဝ်းကွုက်၊ ဗွုက်မွိုင်ꩻကွုင်၊ ကွုတ်ချာခွုန်ꩻ၊ စွုန်ꩻထွူႏတုမ်၊ မဲန်ႏနုဲးတမွုန်ႏ၊ အဝ်ႏကျိုႏဆွုမ်ႏဒျာႏ၊ သွုပ်ဆွာꩻဆွာꩻသꩻ၊ အဝ်ႏသော့ꩻတွိုက်ကို၊ စွိုင်တောမ်ႏတဖြွီꩻ၊ ပနားဝွေါက်ꩻလိုꩻ၊ ဗေင်ႏထာꩻသွောင်နာႏ။ "လေက်ဟော်ꩻ" ကျက်သာႏချင်ꩻ၊ ဟေင်ကျန်သီး၊ ဗျတ်တလုဲꩻ၊ မာꩻကျပ်မꩻ ထာꩻကျမ်ႏအောင်ႏ၊ တချုင်အဝ်ႏခမ်အချုက်၊ တချုန်းငျောင်ႏကွိုင်ꩻ ဖြေꩻကာꩻကျုတ်၊ ဗျိုင်းသီးလမ်းလွူးဆန်ပျိုက်၊ မခွိုက်ကကျုင်ႏ၊ လင်ꩻကျုန်ꩻတောင်ꩻ၊ လျောက်လဝ်းလိုꩻကျောင်ꩻ၊ တင်ꩻကျောတ်လာ၊ ကျောန်နဝ်သားပျောႏထာꩻ၊ မေႏကျောင်ႏနဝ်ꩻ မေႏကျောမ်ꩻခန်းတဲ့ အကျိုꩻအဝ်ႏဒျာႏ။ "လေက်ဟော်ꩻ" ထာꩻခြုက်ခြက်၊ တခြင်ခြုင်း၊ ခြဲက်ꩻခူꩻခြေင်င်၊ အဖြေင်းပါတဖြိုင်ႏ၊ ထီခြောင်ခြောက်အာ၊ ခမ်းခြွိုင်ꩻငဝ်းခြွောင်း၊ ရောန်ယွဲးခြုက်ꩻခြိက်ꩻ၊ ဟန်ႏသလဲင်ႏတခြွိုက်၊ ခြုင်းခြင်းဗွို့ꩻထာꩻဆင်း။ "လေက်ဟော်ꩻ" ခြောတ်ꩻခြဲတ်ꩻစင်ဖြွိုး၊ လိုꩻဖြန်ထွို့ꩻဖြတ်ꩻ၊ ဖြိတ်ꩻတောမ်ႏနံႏသာႏထီ၊ ကတူႏတခြုတ်ꩻ၊ ခြဲတ်းခြွုတ်တောင်းလုဲ၊ အထီဖြဲတ်ꩻထန်ႏ၊ အခင်ႏအဝ်ႏဖြဲန်၊ ခြောန်ႏထီလိုင်းခြောတ်၊ ခြေင်းခြဲ့ထာꩻဖြေင်း ဖြောန်နီဖဲ့ꩻ၊ ထီလျားတဖြုတ်ꩻ၊ ကီႏကိုက်ငဝ်းဆက်- လွေꩻထာꩻဒါႏ ကာꩻမွေးတဝ်း၊ ကျောင်ႏဒါႏထာꩻ ဝါးမွေးတဝ်း၊ အငဝ်းသင်ႏ သင်္ဘောꩻကွင်ႏမွေးတဝ်း၊ ဟမ်ႏဒိုစီꩻ ယူးဝီꩻမွေးတဝ်း၊ အဖြေင်းစား ပနားမွေးတဝ်း၊ အဝ်ႏပိန်ဒူႏ လိုင်းတူႏမွေးတဝ်း။ "လေက်ဟော်ꩻ" ခြမ်ထီအဝ်ႏခြပ်၊ ဆေ့ာꩻထာꩻထွူလူးခြိမ်ထီ၊ ထိုမ်းခင်ႏဖါႏခြဲပ်၊ အခြဲမ်တရျာꩻ ဖြဲန်ထင်ႏထာꩻ၊ ခိုင်ႏခြိုမ်ႏနဝ်ꩻပူႏ၊ ခြောမ်ရာႏနဝ်ꩻဖြဲမ်ႏ၊ ဖြောမ်းဝင်ꩻလဲမ်ႏဖြုမ်။ "တိင်ႏထပေႏမေႏ(ဗျတ်စောင်း)ငဝ်းဆက်" အမေးထို မဲင်ꩻငေါ်ꩻမွေးတဝ်း၊ အငဝ်းသင်ႏ ယာကင်ႏမွေးတဝ်း၊ ကလူꩻတဖြွူ နင်ꩻလူꩻမွေးတဝ်း၊ ယွော့နမ်းကို ပိုမွေးတဝ်း၊ အဟို့ꩻပီ ဖြီမွေးတဝ်း။ "လေက်ဟော်ꩻ" စံႏပြင်ꩻနွောင်ꩻရူးစွူႏ၊ မောက်ကြင်ꩻပွို့ꩻရွီး တသီႏမာႏဆာႏ၊ ကြောင်ႏကြောင်ႏ၊ ကြေ့ꩻကတူႏအံႏမာႏသွန်ꩻတသီႏဖြေႏ၊ လိုꩻပြိင်ꩻအလူးကြုင်ႏ၊ ထာꩻကြေင်းတကြန်ႏတျက်ꩻ၊ မောက်ကြဲင်ႏလာႏသေင် ပြိုက်ꩻအမွူးထျꩻ၊ ကြောက်ꩻခြောင်၊ ဖြောက်ဝါႏပြောင်း၊ လိုꩻယွောင်ကျွိုက်ခမ်းပြွိုင်း၊ လိုꩻပြွောင်ႏကျွိုက်ခမ်းလော့။ "ငဝ်းပစိုႏ" မွိုင်ꩻပျိုꩻနောင်ဟဲင်း ငဝ်းပညာႏသျင်ႏ၊ စခြွီငဝ်းခိုဗင်ႏ၊ ဆောင်ႏပြောင်းပင်ပိုမ် ငဝ်းမူႏနမ်ꩻ။ "လေက်ဟော်ꩻ" ပါꩻငင်းတပြတ်ꩻ၊ ကတူႏတကြန်ႏ၊ ကြောန်လမ်းကြောန်ကျောင်ꩻ၊ ပြုတ်ဆဲင်ꩻခေါမ်ꩻလာꩻ၊ လိုꩻထာꩻကြဲတ်ယမ်၊ မောက်ꩻမူးမွူးပြောတ်ꩻ၊ ယာကြောန်ႏခမ်းခါ၊ မောက်ကီꩻကြုတ်မွူး အွိုးကြုန်ကိုသူꩻ။ "ငဝ်းပစိုႏ" လမ်းလော့ကြိုႏကြိုႏ၊ ကောင်လောင်းခိုႏနဝ် ခူးခြဝ်ႏခဝ်၊ ဒဲန်ဆောခြိုင်း တကြွီႏကောင်၊ ကီႏဗွာဗွာ ကီႏဖေါ့သိုႏ၊ ကီႏကြိုႏကြိုႏ ကီႏလင်ꩻထီ၊ ကီႏဖြေင်းနုဲးနီ ကီႏထုဲလုဲး၊ စူလောင်ꩻတဒုက် ထောင်းခဲန်ႏဟတ်ꩻ၊ ငင်းဒေင်တပြတ်ꩻ ဗပိုတိန်ႏ၊ ယာႏမိန်ႏဖြေင်းနဝ်ꩻ အိုင်နို့ꩻထာꩻဗိန်ႏ၊ ဖြေင်းနေင်းသဲင် အမျာꩻအမ်ႏ၊ တကမ်ႏနေင်းသဲင် အမျာꩻသုင်ꩻ။ "လေက်ဟော်ꩻ" တောင်းလျက်ꩻကြပ်ꩻ၊ ဖက်ꩻခေါ်ကြိပ်ꩻ၊ ကြုမ်ရွီး။ "ငဝ်းပစိုႏ" ခိုးခိုး ဖေႏနာꩻဖိုးတဗာႏ၊ စိန်ႏဆျာႏတလောမ်၊ စူပြောမ်တခိုႏ၊ ဖက်ꩻဗိုႏတစွဲး၊ နမ်းအွဲးတဗိုက်ꩻ၊ ခိုးနိုက်ꩻက်ꩻ။ ဖိုးဒင်ႏသိုမ်ဆီ ဝါးလေပ်ကောင်ပန်ꩻတင်ႏ၊ ဖိုးဒင်ႏသိုမ်ဆီ ဝါးလေပ်ကောင်လွဲမောꩻ၊ ကောင်လွဲမောꩻ သော့ꩻအခင်ႏ၊ ကောင်ပန်ꩻတင်ႏ သော့ꩻအနုံꩻ။ ပေါးဖြားပမွိုင်ꩻ ကွောက်ꩻသဲင်ꩻလဲန်းသွူထော့ꩻယာႏ၊ ပေါးဖြားပမာႏ ကွောက်ꩻသဲင်ꩻလဲန်းသွူဒဝ်ကောင်ႏ၊ ကကွောက်ꩻသဲင်ꩻထော့ꩻယာႏနဝ်ꩻ တွိုႏလွေꩻနောင်သန်ထောင်ႏ၊ ကကွောက်ꩻသဲင်ꩻဒဝ်ကောင်ႏနဝ်ꩻ တွိုႏသဲင်ꩻလဲန်းသွူနောင်ညောင်ႏရွီႏ၊ နောင်သန်ꩻထောင်ႏနဝ်ꩻ ထီသိုမ်တဗွီႏ၊ နောင်ညောင်ႏရွီႏနဝ်ꩻ ထီသိုမ်တကောက်ꩻ၊ ထီနောင်မီႏသေ့ꩻ ကြေ့ꩻခံꩻပေါႏ။ "ငဝ်းရံꩻ" သဲန်ꩻအငေါန် စိုက်ꩻအသွီႏ (ထီဆေ့)၊ သျင်ႏပေႏတပါꩻ ကျောင်ꩻတရျာꩻ (ယူးဝီꩻ)။ "လိတ်ဟော်ꩻ" လိုꩻသွင်ႏ၊ ကွက်ꩻထီ၊ နီစလဲႏတခွက်။ နာꩻသေကီးကူꩻတဝ်း ရွန်သားပင်လျမ်ꩻထျမ်ႏလိုꩻတတျတျနဲ့၊ နာꩻသေစိက်ကူꩻတဝ်း ရောန်သားပင်လဲမ်ꩻ ဆဲမ်ႏလိုꩻတစျꩻစျꩻနဲ့၊ ဒျန် ဒဲန် ဒျဲန်၊ ရွန် ရောန် ရွောန်၊ ဗွေႏဗိုန်-တဗွိုန်၊ ယော့ဆိုင်းစေႏတျတ်(တဲတ်)၊ တောႏထာꩻ-တွောႏထာꩻ။ "ငဝ်းပစိုႏ" ပွင်း - လွင်းထင်ႏသေင်ႏ၊ တဝေင်ꩻလင်ꩻနောင်၊ မောင်းခြောင်လင်ꩻဆေꩻ၊ မူႏနမ်ꩻတရေꩻ အုံပွေါဆေꩻငွါ။ ဖတ်လွူꩻခန်ꩻ(၁) သူရိယာႏခွန်မွူး၊ နီသောန်းဝုဲင်ႏဒျာႏ၊ ကေꩻဇူꩻတင်ႏငါႏ၊ နီဗွေႏယိုမꩻ၊ လိုꩻမဲန်ႏသꩻသားတွက်တာႏလဲ့၊ မွူးတန်ယို တလေညခေါဖေႏတဝ်း။ လွꩻထီႏငါႏမွူး ပထိုယုဲꩻထီ၊ ခꩻကီတနတ်၊ လဲမ်ꩻနယ်တဲက်နယ်၊ ဒေါ့ꩻသူႏသေဒုမ်၊ မဲန်ꩻသꩻဝꩻသား၊ လွꩻထီႏသားတာႏ၊ ဝင်ꩻသꩻငါႏတဲင်၊ မွူးယိုတပြေ့ꩻစဝ်းခေါ်ဖေႏတဝ်း။ အဝ်ႏဒျာႏအရင်ꩻ၊ ထင်ꩻနဝ်တွို့ꩻကောန်ႏ၊ လွေꩻစွောန်ႏလဲန်း၊ တသွင်ꩻဗဲင်းတဝ်း၊ ဝုဲင်ႏတဝ်းတယဝ်း ဝွေꩻသီးနဝ်ꩻတာႏ၊ သူရိယာႏယို အဝ်ႏလေဖေႏဒျာႏအတွိုင်ꩻတွိုင်ꩻ။ စင်ꩻစဲတ်အမန်ႏ၊ ခွိုက်မွူးထန်ႏတဲင်၊ လွေꩻသဲင်ꩻချာငါ၊ ကလိုꩻမာꩻမျိုꩻ၊ လောႏမာꩻထိုꩻထွူ၊ အာႏကွိုꩻမွူးရောင်ႏ၊ သုင်ꩻမွူးရောင်ႏတဲင်၊ ထာꩻမာꩻထွာအီ၊ ဝွေꩻသီးနဝ်ꩻခါ၊ လိုꩻထွာမွူးခွိုꩻ၊ နေနတ်နွဲႏလိုꩻယမ်မွေးမန်ႏ၊ ဝွေꩻသီးအမ်ႏလောန်ꩻ၊ မွူးရောင်ႏသားတာႏ၊ ခွန်မွူးမဲ့ငါ ပယွုမ်းယဲ့။ ဖတ်လွူꩻခန်ꩻ(၂) ဥစ္စာႏရောန်ခံꩻ၊ အဖိုꩻတန်ႏယို၊ ထွာအီလိုꩻသီး ဂုဏ်ႏပကာႏ၊ စုမ်ႏဖြာꩻနီယို ဟဝ်ထိုမ်ႏငါႏ၊ ပညာႏထာꩻသေ၊ ထာꩻလုဲင်းလေယို ထွာနီမဲ့နား၊ ကန်ꩻနမ်းဒါႏအီ၊ စုမ်ႏဖြာꩻနီယို ဟဝ်ထိုမ်ႏငါႏ၊ ဒါႏနဖေႏလူႏ၊ သီႏလဟဝ်ကျင်ꩻ၊ သꩻရင်ꩻအောန်ႏဒါႏ၊ ကုသလာႏကမ်ႏ၊ မီႏသမ်းယမ်တဲင်၊ ဗိုန်တတွိုင်ꩻ၊ မရွိုင်ꩻမသိတ်၊ လိုႏရာꩻလꩻအီ၊ စုမ်ႏဖြာꩻနီလိုꩻ ဟဝ်ထိုမ်ႏစဲတ်။ ဖတ်လွူꩻခန်ꩻ(၃) လမ်းကိုလိုꩻအဝ်ႏ၊ အဖြာꩻ(၁၀)တဖြာꩻထိုမ်ႏ၊ တဖွိုင်ꩻအံႏ၊ တကမ်းနွောင်ꩻတဝ်း၊ ထာꩻမာꩻအဝ်ႏပငါပရာꩻ၊ ဗိုန်နုဲးလေက်တန်၊ သရဗျဉ္ဇန်ဖုံႏနဝ်ꩻမꩻ ကမ်းနွောင်ꩻဝင်ꩻ။ ဖတ်လွူꩻခန်ꩻ(၄) လိုꩻမွိုက်လိုꩻထွိုက်၊ လိုꩻမွိုက်သီးမျိုꩻ၊ ရန်ႏလောန်ထေ့သွူ၊ ရိုꩻကငျာꩻဒွိုန်း အုံပရာႏ၊ နီတွိုက်ခါမꩻ၊ အေႏလဆီႏလီ အငမ်းဒါႏ၊ လိုꩻထွိုက်သီးမျိုꩻ သေထွူရန်ႏလောန် အဝ်ႏငျာꩻခန်းတဲ့ ကထိုမ်ႏရဲ့နမ်း၊ အုံခြေင်ထာꩻခိင်ႏ၊ အဲန်ထဝ်းဗဲင်းဒုမ်၊ ထွူႏတွုမ်အရေꩻ အောန်ႏတသေႏဗာႏက၊ မီႏတွိုက်နမ်းခါ၊ ငဖါးပယွုမ်း၊ ငမ်းတဝ်းဒုမ်။ [၁][၂]