ဗွေႏဘုရာꩻထွဉ်ႏမာꩻဒျာႏကုသိုလ်ႏ

"နီဗွေႏဘုရာꩻ ဖေႏမာꩻတဝ်းအကုသိုလ်ႏ၊ ထွဉ်ႏမာꩻဒျာႏကုသိုလ်ႏ"

နီဗွေႏဘုရာꩻရိုꩻ- - အကုသလံ ဘိက္ခဝေ ပဇဟထ- ရဟန်ꩻသီးဖုံႏဟွေး ပယ်ႏထိုꩻလွ အကုသိုလ်ႏနောဝ်ꩻလုဲင်း။ - သက္ကာ ဘိက္ခဝေ အကုသလံ ပဇဟိတုံ- သီဖုံႏနဝ်ꩻ ရပယ်ႏထိုꩻနွောင်ꩻ အကုသိုလ်ႏမꩻ ခွေထွဉ်ႏပယ်ႏသီ၊ သီဖုံႏ မဉ်ႏတရပယ်ႏနွောင်ꩻတဝ်း အကုသိုလ်ႏနဝ်ꩻ ခွေတထွဉ်ႏပယ်ႏနွိုင်ႏတောဝ်းသီ။ ရဟန်ꩻသီးဖုံႏဟွေး- - အကုသလံ အဟိတာယ ဒုက္ခာယ သံဝတ္တေယျ- အကုသိုလ်ႏနဝ်ꩻ အကျိုꩻစီꩻပွါꩻအဲဉ်ထဝ်း၊ ထွာအီ ထာꩻဒုက္ခတာႏတန်ဒျာႏ၊ ကွပ်နဝ်ꩻမꩻ ပယ်ႏထိုꩻလွ အကုသိုလ်ႏဖုံႏနောဝ်ꩻဟုဲင်း၊ ပေါႏသီမာ အကုသိုလ်ႏနဝ်ꩻ ခန္ဓာႏကုဲင်လီ မဉ်ႏသီတွိုႏဆုဲင်ꩻ လင်ꩻထဲ့ဗာႏငါးရုဲင်ꩻသူꩻသွူ။ ရဟန်ꩻသီးဖုံႏဟွေး- - ကုသလံ ဘိက္ခဝေ ဘာဝေထ- မာꩻလွသွော့ (ဒါႏနကုသိုလ်ႏ၊ သီႏလကုသိုလ်ႏ၊ ဘာႏဝနာႏ)ကုသိုလ်ႏဖုံႏလုဲင်း၊ - သက္ကာ ကုသလံ ဘာဝေတုံ- သီဖုံႏနဝ်ꩻ ရမာꩻနွောင်ꩻကုသိုလ်ႏဖုံႏနဝ်ꩻမꩻ ခွေထွဉ်ႏမာꩻသီ၊ သီဖုံႏ မဉ်ႏတရမာꩻနွောင်ꩻတဝ်း ကုသိုလ်ႏနဝ်ꩻ ခွေတထွဉ်ႏမာꩻနွိုင်ႏတောဝ်းသီ၊ ရဟန်ꩻသီးဖုံႏဟွေး- - ကုသလံ ဘာဝိတံ ဟိတာယ သုခါယ သံဝတ္တတိ- မဉ်ႏမာꩻကုသိုလ်ႏနဝ်ꩻ ထွာအီအကျိုꩻစီꩻပွါꩻ၊ ထွာအီထာꩻချမ်ꩻသာႏ၊ ကွပ်နဝ်ꩻမꩻ မာꩻလွသွော့ (ဒါႏနကုသိုလ်ႏ၊ သီႏလကုသိုလ်ႏ၊ ဘာႏဝနာႏ)ကုသိုလ်ႏဖုံႏနောဝ်ꩻဟုဲင်း။ ပေါႏသီမာꩻကုသိုလ်ႏနဝ်ꩻ ခန္ဓာႏကုဲင်လီ မဉ်ႏသီသူꩻနဝ်ꩻ တွိုႏကီထင်ႏဒျာႏ လူꩻခမ်းသူꩻ၊ တွိုႏလင်ꩻဗာႏတဝ်း ငါးရုဲင်ꩻ၊ တိရစ္ဆာန်ႏ၊ အသူႏရကာယ်ႏ အပါယ်ႏလစ်ꩻခမ်းသူꩻသွူ။ ရဟန်ꩻသီးဖုံႏဟွေး- ကာယဒုစရဲက်၊ ဝစီဒုစရဲက်၊ မနော်ꩻဒုစရဲက်တဲ့နဝ်ꩻ၊ ကာယကံႏအကုသိုလ်ႏ၊ ဝစီကံႏအကုသိုလ်ႏ၊ မနော်ꩻကံႏအကုသိုလ်ႏတဲ့နဝ်ꩻ လိုႏမာꩻတဝ်းလာꩻလာꩻ၊ ပယ်ႏညာꩻညာꩻသွော့လုဲင်း။ ရဟန်ꩻသီးဖုံႏဟွေး- ကာယသုစရဲက်၊ ဝစီသုစရဲက်၊ မနော်ꩻသုစရဲက်တဲ့နဝ်ꩻ၊ ကာယကံႏကုသိုလ်ႏ၊ ဝစီကံႏကုသိုလ်ႏ၊ မနော်ꩻကံႏကုသိုလ်ႏတဲ့နဝ်ꩻ လိုႏမာꩻအာအာ၊ မာꩻလွသွော့ စွုမ်ႏနီꩻစွုမ်ႏဟာဟုဲင်း။ ရဟန်ꩻသီးဖုံႏဟွေး- - ဒုန္နိက္ခိတ္တ ပဒဗျဉ္ဇနံ-ပုဒ်ဗျည်းပါဠိ မဉ်ႏမာႏတဲ့နဝ်ꩻ - ပဒဗျဉ္ဇနဿ အတ္ထောပိ ဒုန္နယော ဟောတိ- ပုဒ်ဗျည်းအက္ခရာႏ အနက်အဓိပ္ပါယ်ႏ မဉ်ႏမာႏတဲ့နဝ်ꩻ သူႏတောႏကောင်ꩻတရာꩻ ထိုꩻမားအီဒါႏ၊ ကွပ်ပွိုးနဝ်ꩻမꩻ ပါဠိအက္ခရာႏတဲ့ ခံႏမာႏမွုန်း၊ အနက်အဓိပ္ပါယ်ႏတဲ့ ခံႏမာႏမွုန်းတဝ်းနေား။ (သုတ္တန်ႏပိဋကတ်၊ အင်္ဂုတ္တရပါဠိ၊ ဒုကနိပါတ်၊ အဓိကရဏဝဂ်-၁၉+၂၀)