ဗွေႏမဟာကစ္စာနဟော်ꩻ

"ဗွေႏမဟာကစ္စာန ဟော်ꩻဖေႏ အာရာမဒဏ္ဍပုဏ္ဏာꩻတရာꩻ"

အွိုးခꩻတလဲင်ႏ ဗွေႏမဟာကစ္စာနနဝ်ꩻ အဝ်ႏအုံ 'ဝေင်ꩻဝရဏ၊ ဘဒ္ဒသာရီ-ထီနောင်'ထျꩻ၊ အတွင်ꩻနဝ်ꩻခါ အာရာမဒဏ္ဍပုဏ္ဏာꩻတဖြာꩻ ဖျော်လွဉ် ဗွေႏမဟာကစ္စာနထျꩻ၊ သꩻရေꩻစွော့ꩻတက် ဒေါ့ꩻငေါဝ်းနစ်သက်ထွူတဲင် ပုဏ္ဏာꩻရီနုဲင်းယို- "ဩဗွေႏ မဟာကစ္စာန- ခွန်ချင်ꩻချင်ꩻ ကထေင်ကအာငေါဝ်းဗာႏလို့ဝင်ꩻ၊ ပုဏ္ဏာꩻချင်ꩻချင်ꩻ ကထေင်ကအာငေါဝ်းဗာႏလို့ဝင်ꩻ၊ လိုꩻခြွေသဌေꩻချင်ꩻချင်ꩻ ကထေင်ကအာငေါဝ်းဗာႏလို့ဝင်ꩻနဝ်ꩻ အထျꩻအထောင်ꩻ အကျောင်ꩻအခရာႏ အဝ်ႏနုဲင်းမုဲင်ꩻဗွေႏ" "တကာႏပုဏ္ဏာꩻဟွေး- - ပြွန်သော့ꩻ ကာမရာဂဟံႏဗော့ꩻကို - ကာမရာႏဂဘီလူꩻ နွို့ပူꩻအသꩻရာႏတဲင် ဝွေꩻသီးချင်ꩻချင်ꩻ ထေင်ဗာႏလို့ဝင်ꩻ၊ အာငေါဝ်းဗာႏလို့ဝင်ꩻနဝ်ꩻသွူ၊ တကာႏပုဏ္ဏာꩻ နာႏစဲင်းစဲင်းနော- မဲ့ထီႏတရေꩻတဲင် အဝ်ႏမဲ့ထွာလွဉ် ကာမရာႏဂ၊ လောဘတဏှာႏ၊ နားဟွူန်တလေ့တွော့ꩻ အဝ်ႏနားထွာလွဉ် ကာမရာႏဂ လောဘတဏှာႏ၊ နေ့ꩻဖူနွုမ်ꩻဟွမ်တဲင် အဝ်ႏနေ့ꩻဖူထွာလွဉ် ကာမရာႏဂ လောဘတဏှာႏ၊ ဖြေꩻဟွုန်အွီႏတွော့ꩻ အဝ်ႏဖြေꩻထွာလွဉ် ကာမရာႏဂ လောဘတဏှာႏ၊ နမ်းခွေါင်းချော်ꩻပြေတဲင် အဝ်ႏနမ်းသာႏယာႏမုꩻ ထာꩻခံႏစာꩻထွာလွဉ် ကာမရာႏဂ လောဘတဏှာႏ၊ ကွပ်ပွိုးအာႏရွုံႏငတ်ꩻပါꩻ နွို့မာꩻရူꩻရာꩻ အသꩻတွော့ꩻ မာꩻထာꩻရော့ꩻတဝ်း၊ ဒေါ့ꩻထာꩻရောꩻ့တဝ်း၊ ယူႏထာꩻရော့ꩻတဝ်း အာငေါဝ်းလို့ဝင်ꩻ၊ ထေင်ညင်ꩻလို့ဝင်ꩻနဝ်ꩻသွူ။ "ဩဗွေႏ မဟာကစ္စာနဗွေႏဩ- နီသွဉ်းသီး ရဟန်ꩻချင်ꩻချင်ꩻ ကထေင်ဗာႏလို့ဝင်ꩻ ကအာငေါဝ်းဗာႏလို့ဝင်ꩻနဝ်ꩻဟာ အထျꩻအထောင်ꩻ အကျောင်ꩻအခရာႏ အဝ်ႏနုဲင်းမုဲင်ꩻဗွေႏဩ" "တကာႏအာရာမဒဏ္ဍဟွေး- - ပြွန်သော့ꩻ ဒိဋ္ဌိဟံႏဗော့ꩻကို - ဒိဋ္ဌိရာႏဂ ဘီလူꩻနွို့ဗူအသꩻနဝ်ꩻနဝ်ꩻ ထေင်ဗာႏလို့ဝင်ꩻ၊ အာငေါဝ်းဗာႏလို့ဝင်ꩻနဝ်ꩻသွူ၊ (ဒိဋ္ဌိရာဂ-ကရိုꩻနဝ်ꩻ ဒိဋ္ဌိတရာꩻ ၆၂-ပါꩻဖုံႏနောဝ်ꩻသွူ။) "ဩဗွေႏ မဟာကစ္စာနဗွေႏဩ- အဝ်ႏဒိဋ္ဌိလွစ်လꩻ၊ ဒိဋ္ဌိရာႏဂဘီလူꩻ ကနွို့ပူꩻလꩻတဝ်းအသꩻ၊ အုံဗာႏခွꩻခွꩻ၊ အုံဗာႏရောင်းရောင်းတဲင် ဖြောင်းတောႏတငါကေင်၊ တထေင်ဗာႏဒွုမ်လို့ဝင်ꩻ၊ တအာငေါဝ်းဗာႏဒွုမ်လို့ဝင်ꩻ ပုဂ္ဂိုလ်ႏထူꩻပုဂ္ဂိုလ်ႏမျတ်စားနဝ်ꩻနဝ်ꩻ လောကကိုယို အဝ်ႏနေတပါꩻပါꩻဟောင်း ဗွေႏဩ" "အဝ်ႏအီ-တကာႏ" "ပါꩻမုဲင်ꩻအီဗွေႏ၊ အဝ်ႏမုဲင်ꩻကိုဗွေႏ" "တကာႏအာရာမဒဏ္ဍဟွေး- 'ဒိဋ္ဌိရာဂကင်ꩻညာꩻနဝ်ꩻ ဗွေႏဘုရာꩻနောဝ်ꩻသွူ' ယိုခါ ဗွေႏဘုရာꩻနဝ်ꩻ အဝ်ႏအွိုးခမ်းအခေါဝ်ကွဉ်ႏ၊ ဝေင်ꩻသာဝတ္ထိ၊ ကျောင်ꩻဇေႏတဝွန်ႏကိုသူꩻသွူ"။ တွိုႏနဝ်ꩻခါတွော့ꩻ အာရာမဒဏ္ဍပုဏ္ဏာꩻနဝ်ꩻ နီဗွေႏဘုရာꩻ အဝ်ႏရာꩻ ရေႏမိုးထွူတဲင်တဲင်- - နမော တဿ ဘဂဝတော အရဟတော သမ္မာသမ္ဗုဒ္ဓဿ - နမော တဿ ဘဂဝတော အရဟတော သမ္မာသမ္ဗုဒ္ဓဿ -နမော တဿ ဘဂဝတော အရဟတော သမ္မာသမ္ဗုဒ္ဓဿ ဝုဲင်ႏလွေꩻစွဉ်ႏ ဗွေႏဘုရာꩻသွံလဲင်ႏ နုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဒုကနိပါတ်၊ သမိစိတ္တဝဂ်-၃၈)