ဗွေႏသာရိပုတ္တရာႏဒေါ့ꩻတျက်တျက်
"သီဟနာဒသုတ် (ဗွေႏသာရိပုတ္တရာႏ ဒေါ့ꩻဒျက်ဒျက်)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ သာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ ဗွေႏသာရိပုတ္တရာႏ လွဉ်ရီအခွင်ꩻ အီႏကျွꩻလွေꩻတဖူꩻညာꩻ၊ ဗွေႏဘုရာꩻဖေႏ အခွင်ꩻထွူ ဗွေႏသာရိပုတ္တရာႏ ထွိုင်ႏသဲင်ꩻတညတဝ်း စင်ꩻတပါꩻလွဉ်တောဝ်း ဗွေႏဘုရာꩻနုဲင်းယို- "ဩဗွေႏ- သာရိပုတ္တရာႏနဝ်ꩻ အခွေါင်းဗာႏသွူ ခွေသွဉ်းတဲ့ တောင်ꩻပြန်ႏချာတဝ်းခွေသွဉ်း၊ ဝွန်ႏခံႏတဝ်းအပဲ့စ် နဲ့စ်လွေꩻထိုꩻဒျာႏ ဗွေႏဩ"လောဝ်းနုဲင်းနောဝ်ꩻ။ တမွေးတဝ်းနဝ်ꩻ နီဗွေႏဘုရာꩻ အဝ်ႏသေသေဒျာႏ၊ ပေါႏမဉ်ႏတဖြေႏသျင်ꩻဖေႏတဝ်း ပျဿနာႏယိုနဝ်ꩻ စင်ꩻနဝ်ꩻ အီႏရိုꩻဝွေႏဘုရာꩻ အုံသာရိပုတ္တရာႏရေꩻ၊ အုံတဝ်းဝွေꩻရေꩻ၊ အီႏပဲ့စ်မာႏ နီဗွေႏဘုရာꩻနုဲင်းနဝ်ꩻ၊ မဉ်ႏပဲ့စ်မာႏ ဗွေႏဘုရာꩻနဝ်ꩻ စင်ꩻနဝ်ꩻနဝ်ꩻ အီႏလင်ꩻထဲ့ဗာႏငါးရုဲင်ꩻ၊ နီဗွေႏဘုရာꩻငမ်းငါႏ စင်ꩻနဝ်ꩻထဲ့ငါးရုဲင်ꩻနဝ်ꩻမꩻ ထွဉ်ႏစင်ꩻတပါꩻ လွေꩻပင်ꩻလွဉ် ဗွေႏသာရိပုတ္တရာႏ၊ "ဩဗွေႏ- နီဗွေႏနဝ်ꩻ ဗွေႏဘုရာꩻဟဲ့ꩻ၊ ကျွꩻလွဉ်ယိုခါခါတဲ့ ဗွေႏဩ" စင်ꩻတပါꩻလွေꩻလောဝ်း ဗွေႏသာရိပုတ္တရာႏ နုဲင်းနောဝ်ꩻသွူ။ သံဃာႏဖုံႏ အီႏကျွꩻလွေꩻလွဉ်ꩻ ဗွေႏသာရိပုတ္တရာႏတဲ့ အာတန်၊ တွိုႏနဝ်ꩻခါ ဗွေႏမောဂ္ဂလာန်ႏတွမ်ႏ ဗွေႏအာနန္တာႏသီးဖုံႏနဝ်ꩻ ဝဲခါꩻသော်ထွူတဲင်- "ဗွေႏသီးဖုံႏဟွေး- ရိုꩻနုဲင်းနဝ်ꩻတွော့ꩻ ဗွေႏသံဃာႏသီးဖုံႏတဲ့ ကျွꩻထင်ႏလို့ကျောင်ꩻကီ ဗွေႏဘုရာꩻထျꩻ၊ တွိုႏနဝ်ꩻခါ ဗွေႏသာရိပုတ္တရာႏနောဝ်ꩻ ဝုဲင်ႏရိုႏရိုႏသေႏသေႏ၊ ဝုဲင်ႏဘုရာꩻထွူခါ အုံလင်ꩻချာဗော့ꩻ ဗွေႏဘုရာꩻထျꩻနောဝ်ꩻသွူ။ ဗွေႏဘုရာꩻရိုꩻ- "သာရိပုတ္တရာႏ- သီသွꩻပေႏစင်ꩻတပါꩻရိုꩻ 'သာရိပုတ္တရာႏနဝ်ꩻ မာꩻဗာႏသွူဝွေꩻတဲ့ တောင်ꩻပြန်ႏချာတဝ်းဝွေꩻ၊ ဝွန်ႏခံႏတဝ်းအပဲ့စ်၊ နဲ့စ်လွေꩻထိုꩻဒျာႏ-တဲ့' အကေႏနပ်တဝ်း၊ အလွဉ်လောဝ်း ခွေနုဲင်းနဝ်ꩻ" ဗွေႏဘုရာꩻ ဒေါ့ꩻနုဲင်းနောဝ်ꩻတဲင် ဗွေႏသာရပုတ္တရာႏနဝ်ꩻ ရုဲင်းရုဲင်းဟန်ဟန် နုဲင်းစွဉ်ႏချင်ႏသေ့ꩻဖြေင်ꩻထာꩻ၊ လောဝ်းဘုရာꩻတျက်တျက်နုဲင်းယိုသွူ။ ၁။ လိုꩻမဉ်ႏထင်းတန် အနမ်းနဝ်ꩻမꩻ 'ခွေါင်းဗာႏသွူဝင်ꩻ တပါꩻပါꩻတဲ့ တောင်ꩻပြန်ႏချာတဝ်း၊ ဝွန်ႏခံႏတဝ်းအပဲ့စ် နဲ့စ်လွေꩻထိုꩻ'ကရိုꩻနဝ်ꩻ ရမွေးဒျာႏဗွေႏဩ၊ ကွဲႏတွော့ꩻ ခွေသွဉ်းယိုနဝ်ꩻ ထင်းတန်တဝ်းနမ်း၊ ခွေသွဉ်းနမ်းယို မတ်ဒျာႏနုဲင်းဟံႏ၊ ခွေသွဉ်းသꩻနဝ်ꩻ အွဉ်ႏဗွန်ဒျာႏနုဲင်းဟံႏ၊ ဟံႏသီးအမျိုꩻနဝ်ꩻ- ထာꩻကြောင်းမျိုꩻတဲ့ ဝင်ꩻဝေါင်းဒင်ႏ၊ ထာꩻဝွေႏမျိုꩻတဲ့ ဝင်ꩻဗေက်ꩻဒင်ႏ၊ အေႏတဲ့ ဝင်ꩻအေႏဒင်ႏ၊ ဆီႏတဲ့ ဝင်ꩻဆီႏလူး၊ တွမ်ႏယုဲင်ထီ ဝင်ꩻပထူလူး၊ ဝင်ꩻမဉ်မာꩻနုဲင်းမုဲင်ꩻမာꩻ ဟံႏတသောင်တခြင်ꩻတဝ်း၊ ဟံႏတဒေါ့ꩻတဝ်း ထမုဲင်ꩻမုဲင်ꩻ၊ ခွေသွဉ်းနမ်း ခွေသွဉ်းသꩻ၊ အွဉ်ႏချꩻပီဒျာႏ နုဲင်းဟံႏနောဝ်ꩻ ဗွေႏဩ" ဩဗွေႏ ဘုရာꩻမျတ်ဗွေႏဩ- ၂။ လိုꩻမဉ်ႏထင်းတန် အနမ်းနဝ်ꩻမꩻ 'ခွေါင်းဗာႏသွူဝင်ꩻ (တပါꩻပါꩻ)တဲ့ တောင်ꩻပြန်ႏချာတဝ်း၊ ဝွန်ႏခံႏတဝ်းအပဲ့စ် နဲ့စ်လွေꩻထိုꩻ'ကရိုꩻနဝ်ꩻ ရမွေးဒျာႏဗွေႏဩ၊ ကွဲႏတွော့ꩻ ခွေသွဉ်းယိုနဝ်ꩻ ထင်းတန်တဝ်းနမ်း၊ ခွေသွဉ်းနမ်းယို မတ်ဒျာႏနုဲင်းထီ၊ ခွေသွဉ်းသꩻနဝ်ꩻ အွဉ်ႏပီဒျာႏနုဲင်းထီ၊ ထီသီးအမျိုꩻနဝ်ꩻ- ထာꩻကြောင်းကြောင်းမျိုꩻတဲ့ ပသေစင်ဖေႏဒျာႏ၊ ထာꩻဝွေႏဝွေႏမျိုꩻတဲ့ ပသေစင်ဖေႏဒျာႏ၊ ထီကိုနဝ်ꩻ အေႏတဲ့ဝင်ꩻအေႏသော့ꩻဒျာႏ၊ (အေႏတဲ့ အဝ်ႏစဲသော့ꩻဒျာႏ) ထီကိုနဝ်ꩻ ဆီႏတဲ့ ဝင်ꩻဆီႏသော့ꩻဒျာႏ၊ (ဆီႏတဲ့ အဝ်ႏထွတ်ꩻသော့ꩻဒျာႏ)၊ ယုဲင်ꩻထီတဲ့ ဝင်ꩻပထူသော့ꩻဒျာႏ၊ ဒွေမဉ်၊ သွီႏအောက်ꩻ၊ သွီႏနွုမ်ꩻသေင်ဖုံႏနဝ်ꩻတဲ့ ဝင်ꩻပသေအီဒျာႏ၊ (ထီႏမာꩻကြောင်းစင်ဖေႏဒျာႏ)၊ ဝင်ꩻမဉ်မာꩻနုဲင်းမုဲင်ꩻမာꩻ ထီတသောင်တခြင်ꩻတဝ်း၊ ထီတဒေါ့ꩻတဝ်း ထမုဲင်ꩻမုဲင်ꩻ၊ ခွေသွဉ်းနမ်း ခွေသွဉ်းသꩻ အွဉ်ႏချꩻဗွန်နုဲင်းဒျာႏ ထီနောဝ်ꩻဗွေႏဩ။ ဩဗွေႏ ဘုရာꩻမျတ်ဗွေႏဩ- ၃။ လိုꩻမဉ်ႏထင်းတန် အနမ်းနဝ်ꩻမꩻ 'ခွေါင်းဗာႏသွူဝင်ꩻ (တပါꩻပါꩻ)တဲ့ တောင်ꩻပြန်ႏချာတဝ်း၊ ဝွန်ႏခံႏတဝ်းအပဲ့စ် နဲ့စ်လွေꩻထိုꩻ'ကရိုꩻနဝ်ꩻ ရမွေးဒျာႏဗွေႏဩ၊ ကွဲႏတွော့ꩻ ခွေသွဉ်းယိုနဝ်ꩻ ထင်းတန်တဝ်းနမ်း၊ ခွေသွဉ်းနမ်းယို မတ်ဒျာႏနုဲင်းမေႏ၊ ခွေသွဉ်းသꩻနဝ်ꩻ အွဉ်ႏဗွန်ဒျာႏနုဲင်းမေႏ၊ မေႏသီးအမျိုꩻနဝ်ꩻ- ထာꩻကြောင်းကြောင်းမျိုꩻတဲ့ ခိုးဖေႏဒျာႏ၊ ထာꩻဝွေႏဝွေႏမျိုꩻတဲ့ ခိုးဖေႏဒျာႏ၊ ခိုးဖေႏအေႏသဲင်တဲ့အဝ်ႏ၊ ဝင်ꩻအေႏသော့ꩻမေႏတဲ့ လꩻဒျာႏ၊ ဝင်ꩻဆီႏသော့ꩻမေႏတဲ့ လꩻဒျာႏ၊ တွမ်ႏယုဲင်ꩻထီထီပသူသော့ꩻမေႏတဲ့ လꩻဒျာႏ၊ ဒွေမဉ်၊ သွီႏအောက်ꩻ၊ သွီႏနွုမ်ꩻသေင်ဖုံႏနဝ်ꩻ ဝေါင်းသော့ꩻမေႏကိုတဲ့ လꩻဒျာႏ၊ မဉ်လဲ့ꩻထမုဲင်ꩻလဲ့ꩻ၊ မဉ်ဝေါင်းသော့ꩻ ထမုဲင်ꩻဝေါင်းသော့ꩻ မေႏခိုးဖေႏလို့လို့ဒျာႏ၊ ဝင်ꩻမဉ်မာꩻနုဲင်းမုဲင်ꩻမာꩻ မေႏတသောင်ခြင်ꩻတဝ်း၊ မေႏတဒေါ့ꩻတဝ်းထမုဲင်ꩻမုဲင်ꩻ၊ ခွေသွဉ်းနမ်း၊ ခွေသွဉ်းသꩻ အွဉ်ႏချꩻဗွန်ပီနုဲင်းမေႏနောဝ်ꩻ ဗွေႏဩ။ ဩဗွေႏ ဘုရာꩻမျတ်ဗွေႏဩ- ၄။ လိုꩻမဉ်ႏထင်းတန် အနမ်းနဝ်ꩻမꩻ 'ခွေါင်းဗာႏသွူဝင်ꩻ (တပါꩻပါꩻ)တဲ့ တောင်ꩻပြန်ႏချာတဝ်း၊ ဝွန်ႏခံႏတဝ်းအပဲ့စ် နဲ့စ်လွေꩻထိုꩻ'ကရိုꩻနဝ်ꩻ ရမွေးဒျာႏဗွေႏဩ၊ ကွဲႏတွော့ꩻ ခွေသွဉ်းယိုနဝ်ꩻ ထင်းတန်တဝ်းနမ်း၊ ခွေသွဉ်းနမ်းယို မတ်နုဲင်ဒျာႏတလီꩻ၊ ခွေသွဉ်းသꩻနဝ်ꩻ အွဉ်ႏပီဒျာႏနုဲင်းတလီꩻ၊ တလီꩻသီးအမျိုꩻနဝ်ꩻ- ထာꩻကြောင်းကြောင်းမျိုꩻတဲ့ တွူႏဖါႏဖေႏဒျာႏ၊ ထာꩻဝွေႏဝွေႏမျိုꩻတဲ့ တွူႏဖါႏဖေႏဒျာႏ၊ အေႏလွီးတဲ့ အီထိုꩻဖေႏဒျာႏ၊ ဆီႏလွီးတဲ့ အီထိုꩻဖေႏဒျာႏ၊ ယုဲင်ꩻထီ၊ ဒွေမဉ်၊ သွီႏအောက်ꩻ၊ သွီႏနွုမ်ꩻသေင်လွီးဖုံႏတဲ့ အီထိုꩻဖေႏဒျာႏ၊ မဉ်ထမုဲင်ꩻလွီးလွီးတဲ့ယဝ်း အီထိုꩻဖေႏလို့လို့ဒျာႏ၊ တလီꩻနဝ်ꩻ ဝင်ꩻမဉ်ထွိုင်ꩻနုဲင်းမုဲင်ꩻထွိုင်ꩻ၊ ဝင်ꩻမဉ်ဝင်းနုဲင်းမုဲင်ꩻဝင်း၊ တလီꩻတသောင်တခြင်ꩻတဝ်း၊ တလီꩻတဒေါ့ꩻတဝ်း ထမုဲင်ꩻမုဲင်ꩻ၊ ခွေသွဉ်းနမ်း ခွေသွဉ်းသꩻ အွဉ်ႏချꩻဗွန်ပီနုဲင်း တလီꩻနောဝ်ꩻ ဗွေႏဩ။ ဩဗွေႏ ဘုရာꩻမျတ်ဗွေႏဩ- ၅။ လိုꩻမဉ်ႏထင်းတန် အနမ်းနဝ်ꩻမꩻ 'ခွေါင်းသွူဝင်ꩻ (တပါꩻပါꩻ)တဲ့ တောင်ꩻပြန်ႏချာတဝ်း၊ ဝွန်ႏခံႏတဝ်းအပဲ့စ် နဲ့စ်လွေꩻထိုꩻ'ကရိုꩻနဝ်ꩻ ရမွေးဒျာႏဗွေႏဩ၊ ကွဲႏတွော့ꩻ ခွေသွဉ်းယိုနဝ်ꩻ ထင်းတန်တောဝ်းနမ်း၊ ခွေသွဉ်းနမ်းယို မတ်ဒျာႏနုဲင်း'ထာꩻဒွုတ်ꩻယ'၊ ထာꩻဒွုတ်ꩻယသီးအမျိုꩻနဝ်ꩻနဝ်ꩻ ထာꩻကြောင်းကြောင်းမျိုꩻတဲ့ ဝင်ꩻဒွုတ်ꩻအီဒျာႏ၊ ထာꩻဝွေႏဝွေႏမျိုꩻတဲ့ ဝင်ꩻဒွုတ်ꩻအီဒျာႏ၊ ယုဲင်ꩻထီ၊ အေႏ၊ ဆီႏ၊ ဒွေမဉ်၊ သွီႏအောက်ꩻ၊ သွီႏနွုမ်ꩻသေင်ဖုံႏနဝ်ꩻတဲ့ ဝင်ꩻဒွုတ်ꩻအီဒျာႏ၊ မဉ်ဒွုတ်ꩻထမုဲင်ꩻဒွုတ်ꩻ ထာꩻဒွုတ်ꩻယနဝ်ꩻ တသောင်တခြင်ꩻတဝ်း၊ ဝင်ꩻမဉ်မာꩻနုဲင်းမုဲင်ꩻမာꩻ၊ ထာꩻဒွုတ်ꩻယ တဒေါ့ꩻတဝ်းထမုဲင်ꩻမုဲင်ꩻ၊ ခွေသွဉ်းနမ်း ခွေသွဉ်းသꩻ အွဉ်ႏချꩻဗွန်ပီနုဲင်း ထာꩻဒွုတ်ꩻယနောဝ်ꩻ ဗွေႏဩ။ ဩဗွေႏ ဘုရာꩻမျတ်ဗွေႏဩ- ၆။ လိုꩻမဉ်ႏထင်းတန် အနမ်းနဝ်ꩻမꩻ 'ခွေါင်းသွူဝင်ꩻ (တပါꩻပါꩻ)တဲ့ တောင်ꩻပြန်ႏချာတဝ်း၊ ဝွန်ႏခံႏတဝ်းအပဲ့စ် နဲ့စ်လွေꩻထိုꩻ'ကရိုꩻနဝ်ꩻ ရမွေးဒျာႏဗွေႏဩ၊ ကွဲႏတွော့ꩻ ခွေသွဉ်းယိုနဝ်ꩻ ထင်းတန်တောဝ်းနမ်း၊ ခွေသွဉ်းနမ်းယို မတ်ဒျာႏနုဲင်း'ကွီအံႏထာꩻသား'၊ ကွီအံႏထာꩻသား ခိုဗင်ႏပေႏတတဲ့နဝ်ꩻ၊ ကွီအံႏထာꩻသား မူႏနံꩻပေႏတဲ့နဝ်ꩻ ပေါႏနွို့လွေꩻသွူ ဝင်ꩻဒုံနဝ်ꩻ ချꩻဖွိုႏဒျာႏအသꩻ၊ ခွေသွဉ်းတဲ့ ချꩻဖွိုႏဒျာႏ၊ ခွေသွဉ်းသꩻ နုဲင်းကွီအံႏထာꩻသားနုဲင်းနောဝ်ꩻ ဗွေႏဩ။ ဩဗွေႏ ဘုရာꩻမျတ်ဗွေႏဩ- ၇။ လိုꩻမဉ်ႏထင်းတန် အနမ်းနဝ်ꩻမꩻ 'ခွေါင်းသွူဝင်ꩻ (တပါꩻပါꩻ)တဲ့ တောင်ꩻပြန်ႏချာတဝ်း၊ ဝွန်ႏခံႏတဝ်းအပဲ့စ် နဲ့စ်လွေꩻထိုꩻ'ကရိုꩻနဝ်ꩻ ရမွေးဒျာႏဗွေႏဩ၊ ကွဲႏတွော့ꩻ ခွေသွဉ်းယိုနဝ်ꩻ ထင်းတန်တောဝ်းနမ်း၊ ခွေသွဉ်းနမ်းယို မတ်နုဲင်း'ဖိုးငဲးနုံꩻထို့'၊ ဖိုးငဲ့းနုံꩻထို့နဝ်ꩻ အပတ်ꩻဒါႏတဝ်းဝင်ꩻ၊ အထောင်းဒါႏတဝ်းဝင်ꩻ၊ ခွေသွဉ်းသꩻတဲ့ ချꩻဗွန်ပီဒျာႏ ဖိုးနငဲးနုံꩻထို့နဝ်ꩻ ဗွေႏဩ။ ဩဗွေႏ ဘုရာꩻမျတ်ဗွေႏဩ- ၈။ ခွေသွဉ်းနမ်းယို မတ်နုဲင်းဒျာႏ ထာꩻနွုမ်ꩻသေင်၊ မူႏနံꩻပေႏလူးထီထွူ၊ ခိုဗင်ႏလူးထီထွူ၊ ဒင်ႏမွန်းခြွိုင်းနမ်းထွူနဝ်ꩻ ဝွေꩻသီးထီႏ ရူးသီနွုမ်ꩻသေင်၊ ထွီႏသီနွုမ်ꩻသေင်၊ လိုꩻသီနွုမ်ꩻသေင်နဝ်ꩻ ဝွေꩻသီးပသို့ꩻမွေးစွဉ်ႏထာꩻ၊ ခွေသွဉ်းယိုတဲ့ ပသို့ꩻမွေးစွဉ်ႏ ခွေသွဉ်းနမ်း ဗွေႏဩ။ ဩဗွေႏ ဘုရာꩻမျတ်ဗွေႏဩ- ၉။ ခွေသွဉ်းနမ်းယိုနောဝ်ꩻ ခွေသွဉ်းမတ်ဒျာႏ အေႏပုံႏ၊ ဆီႏပုံႏ၊ အေႏအဝ်ႏရီႏ-ဆီႏအဝ်ႏရွဲသေႏသေႏတဲင် ထင်းတန်တဝ်း ခွေသွဉ်းနမ်း၊ ဗွိုႏစန်းမွေးစွဉ်ႏဒျာႏ ခန္ဓာႏယို ဗွေႏဩ" ဗွေႏသာရိပုတ္တရာႏ ကထင်ႏလောဝ်းတျက်တျက် နုဲင်းနဝ်ꩻတဲင် ရဟန်ꩻကပဲ့စ်မာႏသားနဝ်ꩻ သꩻဝီးသꩻဝꩻ နောင်ႏတလꩻ မရေႏမရာႏ၊ နုဲ့စ်ကွဉ်းတော့ꩻချာစွဉ်ႏဒျာႏ တလဲင်ႏချင်ꩻနောဝ်ꩻသွူ။ အဋ္ဌကထာႏဗွောင်နယ်နုဲင်းယို- ဗွေႏသာရိပုတ္တရာႏ သင်္ကန်ꩻမော့ခွေါင်းဗာႏ (ဗွေႏသာရိပုတ္တရာႏ သေတဝ်း)၊ တကေးသာရိပုတ္တရာႏတွော့ꩻ စွော်စွော်စွတ်စွယ်ꩻလောဝ်းဒျာႏ၊ အဋ္ဌကထာႏရိုꩻနုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ နဝကနိပါတ်၊ သီဟနာဒသုတ်)[၁][၂]