ဗွေႏသံႏဃာႏတောမ်ႏ

"ဗွေႏသံႏဃာႏတောမ်ႏ တကာႏသီး အဝ်ႏလိုႏသုင်ꩻသပ်လွေꩻလဲဉ်း ခေတ်အခေႏနေႏတောမ်ႏ ထာꩻအုံထွိုင်ႏမု" အခိန်ႏခမ်းသဲင်လာယို ထွာဒျာႏအစိုႏရသွဉ်လိတ်ကျောင်ꩻပေ့ꩻလာနဝ်ꩻသွူ၊ အခိန်ႏယိုနဝ်ꩻ မျန်မာခမ်းထီကို ကျောင်ꩻသားသီးဖုံႏအတာႏ ထွာအုံပဆားအလာနဝ်ꩻသွူ၊ ယဟန်ႏသားနဝ်ꩻ တောမ်ႏမွိုးတောမ်ႏဖါ တောမ်ႏဖူးဝေး တောမ်ႏလမ်းနားဟွိုန်ꩻတစွိုꩻတဗူႏတဲင် လွေꩻလယ်ႏပျောႏထန်ႏတဖူꩻဖုံႏတဲ့အဝ်ႏ၊ သဲင်ꩻချာရပ်ဒုံ သဲင်ꩻအုံထေ့ ဖူးဝေးစွိုးခွိုꩻတဲ့ အဝ်ႏနဝ်ꩻသွူ။ အခိန်ႏအစိုႏရသွဉ်လိတ်ကျောင်ꩻ ပေ့ꩻလာကိုယို ကထွာဒါႏ ပအိုဝ်ႏပိုမူႏ ပအိုဝ်ႏပိုခို ပအိုဝ်ႏပိုလီꩻသီးအတာႏနဝ်ꩻ သွဉ်ထူႏဗာႏယင်းလုဲင်ႏ ပအိုဝ်ႏလိတ် ပအိုဝ်ႏလုဲင်ꩻ ပအိုဝ်ႏဘာႏသာႏငေါဝ်းငွါနဝ်ꩻသွူ၊ နဝ်ꩻမꩻ စုမ်ႏရပ်စုမ်ႏဒုံနဝ်ꩻ အဝ်ႏသွဉ်ထူႏလွေꩻ လိတ်ပအိုဝ်ႏနဝ်ꩻလဲ့ အဝ်ႏထီႏဗာႏနဝ်ꩻသွူ။

ဟန်ႏသနီꩻ ပအိုဝ်ႏလိုꩻပေႏလိုꩻယွဲးသီး၊ ပအိုဝ်ႏခွန်နင်ꩻသီး ကအဝ်ႏသွဉ်ထူႏဒါႏ လိတ်ပအိုဝ်ႏယိုတဲ့နဝ်ꩻ၊ ပအိုဝ်ႏလိုꩻမျိုꩻသိး ကအဝ်ႏသွဉ်လွေꩻဒါႏ သွဉ်လိတ်ယန္တရားယိုတဲ့နဝ်ꩻ၊ ပအိုဝ်ႏလိတ်အသုင်ꩻဝင်ႏမု ဖေႏကယိန်းလုဲင်း(အသိအမှတ်ပြု)ဖေႏကအဝ်ႏတဲ့နဝ်ꩻ မိဉ်းတဲက်ထွားတောမ်ႏ ခေတ်ကရီး နေင်ႏသိုမ်ဆီလဲဉ်းခိုႏနဝ်ꩻ ထင်ႏထိုဖဲ့ꩻအဝ်ႏလွဉ်ယို အဝ်ႏထီႏဒျာႏဝင်ꩻနဝ်ꩻသွူ။ ပွိုင်းဝွို့တောမ်ႏ ပအိုဝ်ႏလိုꩻမျိုꩻသီး ကအဝ်ႏထိန်ꩻသိမ်ꩻဒါႏ ပအိုဝ်ႏလိတ်လုဲင်ꩻယို မိဉ်းထွားဒျာႏ ရုဲင်ꩻတသွိုးမုဖဲ့ꩻဖုံႏတဲ့နဝ်ꩻ၊ သွဉ်ထူႏလိတ်ပအိုဝ်ႏပွယ်ꩻတဲ့နဝ်ꩻ တိုꩻတက်ပြွူႏဖြိုလွိုလွဉ်မွေး တနီꩻထွူတနီꩻ တနေင်ႏထွူတနေင်ႏနဝ်ꩻသွူ၊ နုဲင်းဒျာႏ နေင်ႏခေါပ်ပအိုဝ်ႏလိတ်စောင်ႏဖုံႏယို နယ်ႏစုမ်ႏ၊ လိုꩻယွဲးစုမ်ႏသီး ကျိုꩻစာꩻထေထန်ႏရောင်တဲင် ဟန်ႏသနီꩻ ပအိုဝ်ႏမဂ္ဂဇင်းလိတ်စောင်ႏဖုံႏ အဝ်ႏထန်ႏအာဗာႏနဝ်ꩻသွူ။ မိဉ်းထွားယင်းနုဲင်းသွဉ်ထူႏဖဲ့ꩻ သွဉ်ဖေႏဖဲ့ꩻ သွဉ်လိတ်ပအိုဝ်ႏကဏ္ဍယိုလဲ့ တရပ်ယို အဆေ့ꩻသွတ်ꩻ တနေင်ႏတလဲင်ႏ အဝ်ႏသွဉ်ဗာႏဒျာႏနဝ်ꩻသွူ၊ လိတ်ပအိုဝ်ႏဗဟိုႏသွဉ်တန်ꩻ၊ ဝေင်ꩻနယ်ႏ/အွိုင်ႏအရန်း ထွာနွောင်ꩻဆရာႏ လိတ်ပအိုဝ်ႏသွဉ်တန်ꩻ၊ အွိုင်ႏ/ရပ်ဒုံအရန်း သွဉ်ထူႏလိတ်ပအိုဝ်ႏရီ/စေပွယ်ꩻဖုံႏနဝ်ꩻ အဝ်ႏမာꩻလွေꩻ၊ အဝ်ႏသွဉ်လွေꩻနဝ်ꩻသွူ။

ကွဲတွော့ꩻ ဟန်ႏသနီꩻ တဲမ်းဒါႏဖြုဲင်ꩻဒါႏ လိတ်ပအိုဝ်ႏသားယို ကွဲးဆေ့ꩻဆေ့ꩻသဲင်ꩻဒျာႏနဝ်ꩻသွူ၊ ပွိုင်းဝွို့တောမ်ႏလိတ်ပအိုဝ်ႏယို လိုꩻကသွဉ်ထူႏသား၊ ကောသွဉ်ထူႏသား၊ လိုꩻသွဉ်ဒါႏတဲမ်းဒါႏလိတ်ပအိုဝ်ႏသား ကွဲးဆေ့ꩻဆေ့ꩻသဲင်ꩻလွဉ် အချက်ယိုနဝ်ꩻလဲ့ ဟန်ႏသနီꩻ ပအိုဝ်ႏလိုꩻယွဲးသီး အသောင်အရင်ꩻ တဲမ်းဒါႏဒေါ့ꩻဒါႏ အခေႏနေႏအလꩻတဲ့နဝ်ꩻ၊ ဟန်ႏသနီꩻ ဝေင်ꩻနယ်ႏအလွောက်ꩻ သွဉ်လိတ်ပအိုဝ်ႏကျောင်ꩻသားသီးစာႏရင်ꩻ အလꩻတဲ့နဝ်ꩻ သေထွꩻလွေꩻဗာႏနဝ်ꩻသွူ။ ဟန်ႏသနီꩻ ပအိုဝ်ႏလိုꩻယွဲးသီး သွဉ်ဒါႏ တဲမ်းဒါႏ သုင်ꩻဒါႏ လိတ်ပအိုဝ်ႏအခေႏနေႏယို ထွားတဝ်းဒမ်အလောင်ႏလင် ထွားချာလိုꩻယွဲးသီး အသောင်အရင်ꩻခါႏကိုလဲ့ အဝ်ႏသေနွောင်ꩻဒျာႏနဝ်ꩻသွူ၊ ဟန်ႏသနီꩻ ပအိုဝ်ႏလိတ်အလောင်း ပအိုဝ်ႏလိုꩻယွဲးသီး ကဝါႏသနာႏဆေ့ꩻသဲင်ꩻဗာႏ၊ လိုꩻတဲမ်းဒါႏ သုင်ꩻဒါႏသား ကယောမ်ꩻသဲင်ꩻဗာႏယို ကောပ်ပွိုးအကျောင်ꩻမုဲင်ꩻနဝ်ꩻ ပအိုဝ်ႏသီး ဗွေႏရဟန်ꩻသံႏဃာႏတောမ်ႏတကာႏ (လိတ်ယေန်ႏ/လိုꩻလမ်း)သီး အဝ်ႏလိုႏသုင်သပ်လွေꩻလဲဉ်း ခေတ်အခေႏနေႏ တောမ်ႏထာꩻအုံထွိုင်ႏမုဖုံႏယိုနဝ်ꩻသွူ။

ပအိုဝ်ႏလိတ်ယိုနဝ်ꩻ သွဉ်နဝ်ꩻအဝ်ႏသွဉ်ဖေႏဒျာႏသွူ၊ ပအိုဝ်ႏလိုꩻယွဲးသီးအတာႏ သွဉ်မိဉ်းဒါႏထွူသွူ ဖေႏကသုင်ꩻလꩻစုမ်ႏနီꩻနီꩻ၊ ဖေႏကမော့ꩻခွဲးတသေႏသေႏဗာႏ လိတ်ပအိုဝ်ႏစုမ်ႏနီꩻနီꩻ အဝ်ႏလိုႏမာꩻလွေꩻနဝ်ꩻသွူ၊ နုဲင်းဒျာႏ ပအိုဝ်ႏလိတ်သေသင်ꩻ (သတင်ꩻစာႏ)တဲ့နဝ်ꩻ၊ ပအိုဝ်ႏခမ်းသားသီးအတာႏ အကျိုꩻကထူꩻအီဒါႏ စီꩻပွါꩻရေꩻ၊ နယ်ꩻပညာႏရေꩻ၊ သိပ္ပံပညာႏရေꩻ၊ ခမ်းထီရေꩻ၊ ရွဉ်ရေꩻတောင်ꩻရေꩻဖုံႏယို လိုꩻသီးသꩻကဝင်ႏစာꩻ၊ ဟော်ꩻဗာႏတဝ်း အုံဒါႏတဝ်းနဝ်ꩻ သွဉ်လိတ်ပအိုဝ်ႏတဲင် စုမ်ႏနီꩻနမ်းအကျိုꩻစီꩻပွါꩻတာႏ သုင်ꩻအီလွေꩻချာနွောင်ꩻဗာႏနဝ်ꩻသွူ။ နုဲင်းနဝ်ꩻ မိဉ်းတမွေးတဝ်း လိတ်ပအိုဝ်ႏယို သွဉ်တဲ့အဝ်ႏသွဉ်ဒျာႏ၊ လိုꩻသီးအတာႏ အကျိုꩻစီꩻပွါꩻရေꩻ စုမ်ႏနီꩻအရေꩻ အသုင်ꩻဝင်ႏအီ မိဉ်းတအဲဉ်ထဝ်း၊ မိဉ်းအဝ်ႏဗော့ꩻလုမ်ꩻဒျာႏ မဂ္ဂဇင်းလိတ်စောင်ႏဖုံႏလုမ်ꩻ နုဲင်းဟန်ႏသနီꩻယိုနဝ်ꩻ လိတ်ပအိုဝ်ႏအလောင်း ကမိဉ်သွဉ်ထူႏသား၊ ကဝါႏသနာႏသား၊ ကတဲမ်းဒါႏဖြုဲင်ꩻဒါႏသားယို အဆေ့ꩻသဲင်ꩻထဲင်းဒါႏသွူ။

ဟန်ႏသနီꩻယိုနဝ်ꩻ ထွာဖုန်းခေတ်၊ အင်တာနဲစ်ခေတ်တဲင် ပအိုဝ်ႏလိုꩻမျိုꩻသီး လိတ်လုဲင်ꩻရေꩻ အာႏပေႏလုမ်ꩻမွေးတဝ်း၊ မြန်မာခမ်းထီလိတ်လုဲင်ꩻရေꩻဒျာႏတယဝ်း၊ ခမ်းအဒေါဝ်ႏဒေါဝ်ႏ လိတ်လုဲင်ꩻရေꩻဒျာႏတယဝ်း လိတ်စောင်ႏဖဲ့ꩻနဝ်ꩻ အာႏပေႏလွဉ်ဗာႏလွဉ်းလွဉ်းနဝ်ꩻသွူ၊ နဝ်ꩻမꩻ ဟန်ႏသနီꩻ ပအိုဝ်ႏလိုꩻယွဲးသီးလဲ့ အဝ်ႏသုင်ꩻအာနေနေ အင်တာနဲစ်ဖုံႏ၊ ဖုန်းဖုံႏတဲင် ပအိုဝ်ႏလိတ်လုဲင်ꩻယို မိဉ်းသုင်ꩻလꩻ၊ မိဉ်းသုင်ꩻအာလွေꩻနွောင်ꩻပါ ဖုန်းလောင်း အင်တာနဲစ်လောင်းနဝ်ꩻ ပအိုဝ်ႏလိတ်ယို တောမ်ႏပအိုဝ်ႏလိုꩻယွဲးသီး အီႏတညာꩻဗာႏတဝ်းဒုမ်ဝင်ꩻသွူ။ ယိုနဝ်ꩻ ပွိုင်းဝွို့တောမ်ႏဖုန်း၊ အင်တာနဲစ်တဲင် သꩻဝင်ႏစာꩻဖုန်း၊ အင်တာနဲစ်နဝ်ꩻမꩻ မိဉ်းသုင်ꩻလွေꩻပါလိတ်ပအိုဝ်ႏနဝ်ꩻ ရျာꩻခေါင်ꩻနုံꩻအဗွေတဗာႏ တလꩻနွောင်ꩻတဝ်းလဲ့ ယင်ဟန်ႏသားနဝ်ꩻ အီႏသုင်ꩻလွေꩻထွာအီ လိတ်ပအိုဝ်ႏနဝ်ꩻသွူ။ ယင်းဟန်ႏသနီꩻ ပအိုဝ်ႏဒေႏသကို ကအဝ်ႏမာꩻတမွိုꩻတမာꩻဒါႏ ဘောလုံးတခေးပွယ်ꩻဖုံႏယို လိတ်ပအိုဝ်ႏယိုလဲ့ တနယ်ꩻ(မွေးတဝ်း)တနယ်ꩻ၊ တပွယ်ꩻ(မွေးတဝ်း)တပွယ်ꩻ မိဉ်းမာꩻလွေꩻနုဲင်းနဝ်ꩻနဝ်ꩻ ပအိုဝ်ႏလိုꩻယွဲးသီးယို သꩻဝင်ႏစာꩻပအိုဝ်ႏလိတ်အလောင်း အီႏသန်လွဉ်နွောင်ꩻနဝ်ꩻသွူ၊ အပေႏတဲ့ အပေႏစား လိတ်ပအိုဝ်ႏစံꩻဉာဏ်ႏတခေးပွယ်ꩻ၊ အတန်တဲ့ အတန်စား လိတ်ပအိုဝ်ႏစံꩻဉာဏ်ႏတခေးပွယ်ꩻ၊ လိတ်ပအိုဝ်ႏထာꩻခုမ်ပဆိုးပွယ်ꩻ၊ လိုꩻပေႏဖြောင်းဖြေꩻကိုငါ လိတ်ပအိုဝ်ႏငေါဝ်းရွစ်ပဆိုးတာႏ ဖေႏကအဝ်ႏ လိတ်ပအိုဝ်ႏငေါဝ်းသချင်ꩻစတဲင် တောမ်ႏတခေးပွယ်ꩻအမျိုꩻမျိုꩻ၊ တောမ်ႏပုံႏစံႏအမျိုꩻမျိုꩻ မိဉ်းမာꩻလွေꩻနဝ်ꩻ လိတ်ပအိုဝ်ႏယို ပေႏပေႏတန်တန်ဖြောင်းပစိုႏ ငေါဝ်းပအိုဝ်ႏယို ဒါႏဗာႏနဝ်ꩻသွူ။

ဟန်ႏသနီꩻ တောမ်ႏရွဉ်ဘဏ္ဍာႏအစွိုးစွိုး အဒေါဝ်ႏဒေါဝ်ႏ၊ ရွဉ်ဘဏ္ဍာႏအဖဲ့ꩻဖဲ့ꩻအခဝ်ခဝ်ဖုံႏတဲင် ကအဝ်ႏမာꩻဒါႏ ဘောလုံးပွယ်ꩻအတွိုင်ꩻ လိတ်ပအိုဝ်ႏယိုလဲ့ မိဉ်းမာꩻလွေꩻနွောင်ꩻနုဲင်းပုံႏစံႏနဝ်ꩻအတွိုင်ꩻနဝ်ꩻ တညတဝ်း လိတ်ပအိုဝ်ႏယို ထင်ႏထိုနွောင်ꩻဗာႏအကျောင်ꩻ ခမ်းသားငေါဝ်း အယ်အီတာစွိုꩻအနေႏ တဲမ်းဖြုဲင်ꩻတမာလွေꩻနယ်ဗာႏသွူ။