ဘဒ္ဒန္တကလျာဏ

ဝေင်ꩻရန်ႏကုန်ႏ၊ တောင်ႏကီꩻပရိယတ္တိလိတ်သွဉ်တွိုက် ဘဒ္ဒန္တကလျာဏဓမ္မ (မဟာဂန္ထဝါစကပဏ္ဍိတ) ထေရုပ္ပတ္တိအအဲဉ်ႏ

ဇာႏတိလွူးဖွါꩻ ဒုံ/ရပ်ကွက် မွိုးဖါ

ဗွေႏကလျာဏဓမ္မယိုနဝ်ꩻ ဝေင်ꩻနယ်ႏသီႏသဲင်ႏ၊ အွိုင်ႏနောင်ကျောႏ၊ ဒုံဟော်ဆꩻထင်ꩻကို ကအဝ်ႏအုံဒါႏ စင်ꩻဖါပညာႏ+စင်ꩻမွိုးမတ်သီး လွူးဖွါꩻလင်ꩻ ၁၃၂၂-ဗာႏ၊ ဒဲဉ်ကံလာလောင်း (၉)နီꩻ၊ မွူးနီꩻ-တနင်လာႏ၊ မွူးရဝ်ꩻခိုႏ (၄)နားရီႏအခိန်ႏနဝ်ꩻသွူ။ အမိဉ်ꩻနဝ်ꩻ ဖန်ဖေႏ "ခွန်ညွန်း"နဝ်ꩻသွူ။

အုံကျောင်ꩻဗုဲင်သျင်ႏ ခံႏရဟန်ꩻ

၁၃၃၇-ဗာႏ၊ အသက်ကထင်ႏလꩻ (၁၄)နေင်ႏနဝ်ꩻ မွိုးဖါနီပါꩻ ထင်ႏအပ်ပသာခန်း ဝေင်ꩻသီႏသဲင်ႏ၊ ကျောင်ꩻဇဝနာရာမတွိုက်သွဉ်လိတ် ဗွေႏဗွန်ဘဒ္ဒန္တဇဝန (အဂ္ဂမဟာပဏ္ဍိတ၊ နွောင်ꩻဟံႏဩဝါဒါစရိယ)အထျꩻတဲင် အွဉ်ႏဗုဲင်ဖေႏခန်းသျင်ႏနဝ်ꩻသွူ။

သက်တောႏ (၂၀) ကထင်ႏဗွေ ဝေင်ꩻနယ်ႏသီႏသဲင်ႏ ဒုံဝေင်ꩻကဝ် (ဝေင်ꩻယ)ကို ကအဝ်ႏအုံဒါႏ စင်ꩻမွိုးနင်ႏသွိုꩻ ခံႏပစ္စေꩻလစ်ꩻပါꩻတကာႏတဲင် ဝေင်ꩻသီႏသဲင်ႏ ဇဝနာရာမတွိုက်သွဉ်လိတ် ဗွေႏဗွန်ဘဒ္ဒန္တဇဝန ထွာဥပဇ္ဈာယ်ႏဆရာႏ ဒင်ႏဖေႏသိက္ခာႏတဲင် သျင်ႏကလျာဏဓမ္မယို အဝ်ႏသျင်ႏဘဝ ထွာဗꩻလꩻခန်း ရဟန်ꩻဘဝနဝ်ꩻသွူ။

သွဉ်ထူႏဗာႏ လောကုတ်တရာႏပညာႏ

သျင်ႏကလျာဏဓမ္မ ကသွဉ်ထူႏသော့ꩻဗာႏပညာႏဖုံႏနဝ်ꩻ - ၁။ ညောင်တုန်း-ရွှေဟင်္သာတောရကျောင်ꩻတွိုက် ၂။ ဝေင်ꩻခမ်း- ကိုင်းကုန်းလုံးကျောင်ꩻတွိုက် ၃။ ဝေင်ꩻပဂိုꩻ- ကြတ်ခတ်ဝိုင်းကျောင်ꩻတွိုက် ၄။ ‌ဝေင်ꩻစစ်ကိုင်း- မဟာသုဗောဓာရုံကျောင်ꩻတွိုက် ၅။ ဝေင်ꩻပခုက္ကူ-မဟာဝိသုတာရာမ အလယ်တွိုက်ဖုံႏယို အုံဖို သွဉ်ထူႏလွေꩻဗာႏပညာႏနဝ်ꩻမꩻ အောင်ႏလꩻခန်း "အစိုးရ သာသနဓဇဓမ္မာစရိယ"တန်ꩻနဝ်ꩻသွူ။

၁၃၅၂-ဗာႏနဝ်ꩻ သွဉ်ထဲင်းပညာႏ တောင်ႏကီꩻအေးသာယာ ကျောင်းထိုင်ဘုန်းကြီးသွဉ်တန်ꩻကျောင်ꩻကိုနဝ်ꩻသွူ။ ၁၃၅၄-ဗာႏနဝ်ꩻ သဲင်ꩻအုံသတင်ꩻသွုံꩻထွူ ဝေင်ꩻရန်ႏကုန်ႏ၊ ဝေင်ꩻနယ်ႏဗဟန်း၊ တောင်ႏကီꩻကျောင်ꩻတွိုက်ကိုတဲင် ထိန်ꩻထွားသွဉ်သင်ဖေႏခန်းလိတ်နဝ်ꩻသွူ။

သွဉ်ထူႏလွေꩻထဲင်းယင်း "နိုင်ငံတကာထေရဝါဒ ဗုဒ္ဓတက္ကသိုလ်ႏ"ပညာႏနဝ်ꩻမꩻ (က) ၂၀၀၃-ဗာႏနဝ်ꩻ Disploma oF Buddha Dhamma ဘွဲ့၊ (ခ) ၂၀၀၅-ဗာႏနဝ်ꩻ Bachelor of Arts in Buddha Dhamma ဘွဲ့၊ (ဂ) ၂၀၀ရ-ဗာႏနဝ်ꩻ Master of Arts in Buddha Dhamma ဘွဲ့ လꩻလွေꩻဗာႏဘွဲ့ဖုံႏနဝ်ꩻသွူ။ ဗွေႏကလျာဏဓမ္မ ယိုခါနဝ်ꩻ ထူႏတာႏဝွန်ႏလွေꩻဗာႏ တောင်ႏကီꩻကျောင်ꩻတွိုက် (တွိုက်အုပ်) တာႏဝွန်ႏတဲ့နဝ်ꩻ၊ "နိုင်ငံတကာ ထေရဝါဒဗုဒ္ဓတက္ကသိုလ် နည်းပြဆရာ"တာႏဝွန်ႏယို အဝ်ႏထူႏလွေꩻဗာႏနဝ်ꩻသွူ။

နဲင်ႏငန်ႏတောႏလူႏကပ် ဘွဲ့တောႏမျတ်

ဗွေႏကလျာဏဓမ္မယို ပွိုးစွဉ်ႏဘာႏသာႏ၊ သာႏသနာႏအတွက် ဆောင်ႏရွက်သောင်ႏသာ ကေႏညိုႏခရာႏထွာငါႏနဝ်ꩻမꩻ ၁၃၆၃-ဗာႏ၊ ဒဲဉ်စေင်လာလောင်း(၅)နီꩻနဝ်ꩻ နွောင်ꩻဟံႏဗွေႏသီး ကပ်လူႏပူႏဇောႏလွေꩻ "မဟာဂန္ထဝါစကပဏ္ဍိတ"ဘွဲ့တောႏမျတ်နဝ်ꩻသွူ။