ဘုရာꩻချွစ်ဘီလူꩻဆွဉ်ႏဆျူ
"သူစိလောမ (ဗွေႏဘုရာꩻချွစ်လꩻ ဘီလူꩻဆွဉ်ႏဆျူ)"
အွိုးလꩻတလဲင်ႏ- ဒုံ"ဂယာ"ထျꩻ၊ သေင်ႏမွူးတန် အဝ်ႏတမွူး၊ သေင်ႏမွူးလောင်းနဝ်ꩻ "သူစိလောမ-ဘီလူꩻဆွဉ်ႏဆျူ"အဝ်ႏအုံ၊ အနီꩻနဝ်ꩻ ဘီလူꩻနဝ်ꩻ အီႏလꩻနွောင်ꩻတရာꩻတဲင် နီဗွေႏဘုရာꩻ ကျွꩻလွေꩻအုံ ဘီလူꩻကူႏလောင်းနဝ်ꩻသွူ။ တွိုႏနဝ်ꩻခါ ခရလောမ-ဘီလူႏဆွဉ်ႏကျံꩻတွမ်ႏ သူစိလောမ-ဘီလူႏဆွဉ်ႏစျူ နီဖြာꩻနဝ်ꩻ အဝ်ႏအုံနီဗွေႏဘုရာꩻထျꩻ၊ ခရလောမဘီလူꩻရိုꩻ- "ပါꩻယိုနဝ်ꩻ ရဟန်ꩻဒျာႏ"၊ သူစိလောမဘီလူꩻရိုꩻ- "ပါꩻယိုနဝ်ꩻ ရဟန်ꩻမွေးတဝ်း၊ ရဟန်ꩻတုꩻတန်ဒျာႏ၊ ရဟန်ꩻစဲစ်ဟောင်း- ရဟန်ꩻတုꩻဟောင်း ဖေႏကသေ ခွေစံꩻကမꩻ"သူစိလောမဘီလူꩻရိုꩻနုဲင်းနဝ်ꩻထွူတဲင် လွေꩻအုံတွိုက်စွဉ်ႏ ဗွေႏဘုရာꩻ၊ ဗွေႏဘုရာꩻ အုံညာꩻထိုꩻပသာႏ။ သူစိလောမရီ- "ရဟန်ꩻ- နာꩻနဝ်ꩻ ငမ်းခွေနဲ့" "ဘီလူꩻဟွေး- နာꩻနဝ်ꩻ ခွေတငမ်းတဝ်းꩻ နာꩻအုံတွိုက်ခွေတွော့ꩻ နာꩻဆွဉ်ႏဆော့ꩻဆာငါ ခွေဒျာႏ" "ရဟန်ꩻဟွေး- ခွေအီႏရီနာꩻ ပျဿနာႏ၊ နာꩻမဉ်ႏဖြေႏဒါႏတဝ်းနဝ်ꩻ ခွေအီႏမာꩻဗား နာꩻသꩻ၊ ခွေအီႏမာꩻပꩻ နာꩻသွုန်ႏထီ၊ ခွေအီႏဝေါင်းသီထိုꩻနာꩻ ခြောင်ဂင်္ဂါႏဖဲ့ꩻသူꩻကွေး" "ဘီလူꩻဟွေး- လိုꩻခမ်း၊ လူꩻခမ်း၊ ဗျဟ္မာႏခမ်း ခွေငမ်းပါꩻတဖြာꩻဖြာꩻ အဲဉ်ထဝ်း၊ ပါꩻနွောင်ꩻခွေတဖြာꩻဖြာꩻ အဲဉ်ထဝ်း၊ နာꩻမဉ်ရီ အမျိုꩻမုဲင်ꩻ ရီလုဲင်း" "ရဟန်ꩻဟွေး- 'ကတထဲ့ꩻဒါႏထာꩻ-ရာႏဓ'တဲ့နောဝ်ꩻ၊ 'သꩻကလျားဒါႏထာꩻ-ဒေါသ'တဲ့နဝ်ꩻ၊ အထျꩻအထောင်ꩻ ကွပ်အကျောင်ꩻမုဲင်ꩻ ထွာလွဉ်ဟောင်း၊ တမွန်းပျောႏတဝ်းတဲ့နဝ်ꩻ၊ ကမွန်းပျောႏတဲ့နဝ်ꩻ၊ တဒိုမ်ႏကထွိုင်ႏတဲ့နောဝ်ꩻ၊ ပွိုးအကျောင်ꩻမုဲင်ꩻ၊ အဝ်ႏမုဲင်ကို ထွာလွဉ်ဟောင်း၊ 'သꩻထာꩻယူႏ-မနော်ꩻဝိတက်ဖုံႏ'နဝ်ꩻ အဝ်ႏမုဲင်ꩻကို ထွာလွဉ်ဟောင်း၊ အမာꩻတရေင် ထမုဲင်ꩻဟောင်း" "သူစိလောမဘီလူꩻဟွေး- 'ကတထဲ့ꩻဒါႏထာꩻ-ရာႏဂ'တဲ့နဝ်ꩻ၊ 'သꩻကလျားဒါႏထာꩻ-ဒေါသ'တဲ့နဝ်ꩻ၊ အထျꩻအထောင်ꩻနောဝ်ꩻ 'ဣတောနိဒါနာ-ကွပ်နမ်း(အတ္တဘော)ယို ထွာလွဉ်ဒျာႏ'၊ တမွန်းတပျောႏတဝ်းတဲ့နဝ်ꩻ၊ ကမွန်းကပျောႏတဲ့နဝ်ꩻ၊ တဒိုမ်ႏကထွိုင်ႏတဲ့နဝ်ꩻ 'ဣတောဇာ-ပွိုးနမ်း (အတ္တဘော)ယို ထွာလွဉ်ဒျာႏ၊ သꩻထာꩻယူႏ-မနော်ꩻဝိတက်ဖုံႏနဝ်ꩻ 'ဣတောသမုဋ္ဌာယ-ကွပ်ပွိုးနမ်း (အတ္တဘော)ယို ထွာလွဉ်ဒျာႏ၊ အမာꩻတရေင်သ'ဖုံႏနောဝ်ꩻသွူ။ ဘီလူꩻဟွေး- ရာဂ၊ ဒေါသ၊ အရတီ၊ ရတီ၊ လောမဟံသ-မနောဝိတက္ကဖုံႏနဝ်ꩻ ဗွန်ပီနုဲင်း သွီႏကလိမ်ꩻ သေင်ႏမွူးနောဝ်ꩻသွူ။
"သူစိလောမဘီလူꩻ ထွာသောႏတာႏပန်ႏပုဂ္ဂိုလ်ႏ" ဗွေႏဘုရာꩻရိုꩻ- "ဘီလူꩻ နာႏစဲင်းစဲင်းနော၊ သွီႏဖုံႏကလီမ်ꩻ သေင်ႏမွူးနောဝ်ꩻ ကွဲညည ဗဉ်ႏထံထိမ်စွဉ်ႏ သေင်ႏမွူးအနုဲင်းနဝ်ꩻနေနေ ရာဂဒေါသ-စတဲင်ကိလေႏသာႏ (ကဗွန်ပီဒါႏသွီႏ)ဖုံႏနဝ်ꩻတဲ့ လောႏမဲ့အာႏရွုံႏ၊ လောႏနားအာႏရွုံႏ၊ လောႏနေ့ꩻဖူအာႏရွုံႏ၊ လောႏဖြေꩻအာႏရွုံႏ၊ လောႏသာႏယာႏမုꩻ အခွေါင်းအရွ နမ်းအာႏရွုံႏဖုံႏတဲင် ဗဉ်ႏထံထိမ်စွဉ်ႏသꩻ၊ နမ်းအုံစွူလꩻဒွုမ်၊ နမ်းလွေꩻဖေႏဗာႏ၊ လောႏဖေႏဗာႏ၊ နမ်းဒုက္ခဗာႏ အစားစား၊ သꩻခိုးလျားဗာႏအမျိုꩻမျိုꩻ၊ အကျိုꩻထမုဲင်ꩻမုဲင်ꩻ အဲဉ်ထောဝ်း။ ကွပ်ထီႏသေ အထျꩻအထောင်ꩻ အကျောင်ꩻအခရာႏနုဲင်းနဝ်ꩻတဲင် လိုꩻကသူႏသေထာꩻဖုံႏနဝ်ꩻ အားထွုတ်ဝိပဿနာႏတွော့ꩻ ပယ်ႏလꩻထိုꩻကိလေႏသာႏ (လောဘ၊ ဒေါသ၊ မောဟ၊ မာန၊ ဒိဋ္ဌိ၊ ဝိစိကိစ္ဆာ၊ ထိန၊ ဥဒ္ဓစ္စ၊ အဟိရိက၊ အနောတ္တပ္ပ)ဖုံႏနဝ်ꩻမꩻ ကာႏလꩻဩဃ၊ ဖါႏလꩻဒုက္ခ၊ ကာႏမလွစ်ထန်ႏ၊ တွိုႏနိဗ္ဗာန်ႏ"နဝ်ꩻသွူ။ နီဗွေႏဘုရာꩻ ဟော်ꩻဖေႏတရာꩻနုဲင်းနဝ်ꩻတဲင် "သူစိလောမဘီလူꩻနဝ်ꩻ လꩻစွဉ်ႏတမဂ်တဖိုလ်ႏ၊ ထွာစွဉ်ႏသောႏတာႏပန်ႏပုဂ္ဂိုလ်ႏ (အဋ္ဌကထာႏရိုꩻ)နုဲင်းနဝ်ꩻသွူ။ "သူစိလောမ ကထွာဗာႏဘီလူꩻ အဆွဉ်ႏကစျူဗာႏအကျောင်ꩻ" အွိုးစခါ ဗွေႏဘုရာꩻကဿပစိုး- သူစိလောမဘီလူꩻနဝ်ꩻ ထွာရဟန်ꩻတပါꩻ၊ တွိုႏခꩻတလဲင်ႏ လွေꩻညာꩻထာꩻသဲင်ꩻ ခင်ႏတဲ့တဗော့ꩻလဲ့ꩻတဗော့ꩻလꩻ၊ နမ်းတဲ့ စောဝ်ႏပဲ့ꩻစောဝ်ႏပꩻတသိုꩻ၊ မရိုႏမသေႏ၊ ဝွေꩻဗွေႏလွေꩻကိန်ꩻတလွာꩻသော့ꩻ သံဃာႏခင်ႏလမ်းကိုနောဝ်ꩻသွူ။ သံဃာႏခင်ႏလမ်းကရိုꩻနဝ်ꩻ ဆဲင်ႏလို့သံဃာႏ၊ ဝင်ꩻဒါကြောင်းကြောင်း၊ ဝင်ꩻဒါဟောဝ်ဟောဝ်၊ ဝွေꩻလွေꩻဗွကိန်ꩻတလွာꩻသော့ꩻတဲင် သံဃာႏခင်ႏလမ်းနဝ်ꩻ တဗော့ꩻလဲ့ꩻ တဗော့ꩻလꩻ စောဝ်ႏပဲ့ꩻစောဝ်ႏပꩻထံထိမ်ထိုꩻစွဉ်ႏ၊ ဝွေႏဝုဲင်ႏထိုꩻစွဉ်ႏ၊ နွုမ်ꩻကုဲင်ထိုꩻစွဉ်ႏ၊ သံဃာႏခင်ႏလမ်း အဝ်ႏကြောင်းကြောင်း ကွပ်ပွိုးမာꩻတဗော့ꩻထိုꩻ အကုသိုလ်ႏအကျိုꩻဖေႏနဝ်ꩻမꩻ သဲင်ꩻထွာဗာႏစွဉ်ႏ ဘီလူꩻဆွဉ်ႏစျူနောဝ်ꩻသွူ။ "ခရလောမ ကထွာဗာႏဘီလူꩻ အဆွဉ်ႏကကျံꩻဗာႏအကျောင်ꩻ" ကဿပဗွေႏဘုရာꩻစိုး ဝွေꩻနဝ်ꩻ အဝ်ႏထွာလိုꩻသီႏလသား ဥပါသကာႏတဖြာꩻ၊ တွိုႏတနီꩻတွော့ꩻ ထူႏသံဃာႏထာꩻဒါကျောင်ꩻကိုနဝ်ꩻ တဖွူꩻတဲင် လွေꩻဒါဟံႏလောင်း၊ ဝွေꩻဗေင်ႏသော့ꩻဆောင်းနောဝ်ꩻသွူ။ ကွပ်နဝ်ꩻအကုသိုလ်ႏ၊ တွိုႏနွောင်ꩻဒွုမ်လူꩻခမ်း၊ ထွာတောခန်းဒျာႏ ဘီလူꩻဆွဉ်ႏကျံꩻနောဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ အဋ္ဌကထာ၊ သူစိလောမသုတ်)[၁][၂]