ဘုရာꩻဟော်ꩻနယ်စဲ့ꩻပိုႏသီဟ

"သီဟသုတ် (ဗွေႏဘုရာꩻဟော်ꩻနယ် စဲ့ꩻပိုႏတန်သီဟတရာꩻ)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ ဝွေႏသာႏလီႏခမ်း၊ မဟာဝုန်ကျောင်ꩻတန် ပျသာဒ်လောင်းအတွင်ꩻ ခွန်လိစ္ဆဝီႏသီးဖုံႏနဝ်ꩻ အဝ်ႏအုံကွံ စီꩻဝွေꩻလို့ဝင်ꩻ ခွန်သီးအုံကွံခင်ႏလမ်းကို၊ (ပေါႏအုံပဆားခိန်ႏနဝ်ꩻ) အံႏဖြာႏနီဗွေႏဘုရာꩻဂွုဏ်ႏတောႏအမျိုꩻမျိုꩻꩻ အံႏဖြာႏတရာꩻဂွုဏ်ႏတောႏအမျိုꩻမျိုꩻ၊ အံႏဖြာႏသံႏဃာႏဂွုဏ်ႏတောႏအမျိုꩻမျိုꩻနဝ်ꩻသွူ။ အတွင်ꩻနဝ်ꩻခါ စဲ့ꩻပိုႏတန်သီဟနဝ်ꩻ အဝ်ႏအုံလင်ꩻ နာႏတေ့ꩻနဝ်ꩻကို၊ စဲ့ꩻပိုႏတန်သီဟ ယူႏစဉ်ꩻစာꩻနုဲင်းယို- "နီဗွေႏဘုရာꩻနဝ်ꩻ 'ပူႏဇောႏထွိုက်၊ နမ်းတွမ်ႏနမ်းဒျာႏ သေနာႏတရာꩻ ထွာဘုရာꩻမျတ် တဆူႏမွေးသနယ်'၊ ကွပ်နဝ်ꩻမꩻ ခွန်လိစ္ဆဝီႏဖုံႏယို အံႏဖြာႏနီဗွေႏဘုရာꩻဂွုဏ်ႏတောႏအမျိုꩻမျိုꩻ၊ ခွေမဉ်ႏလွေꩻဝုဲင်ႏဗာႏ ဘုရာꩻသူꩻနဝ်ꩻ ရယံငါႏမွော့ဟွေး"ယူႏစွေးစဉ်ꩻစာꩻတေ့ꩻနုဲင်းနဝ်ꩻ၊ အဝ်ႏပွယ်ꩻအုံကွံသဲင်ꩻနဝ်ꩻ စဲ့ꩻပိုႏတန်သီဟ လွေꩻထေ့စွဉ်ႏ ဝွေꩻဆရႏတက္ကတွဉ်ꩻ (နိဂဏ္ဌနာဋပုတ္တ)ထျꩻ၊ ဝွေꩻရိုꩻ- "ဩဗွေႏ- ခွေသွဉ်းဟွူန် ဝင်ꩻအံႏဖြာႏ ဗွေႏဘုရာꩻဂွုဏ်ႏတောႏအမျိုꩻမျိုꩻꩻ တရာꩻဂွုဏ်ႏတောႏအမျိုꩻမျိုꩻ၊ သံႏဃာႏဂွုဏ်ႏတောႏအမျိုꩻမျိုꩻတဲင် ခွေသွဉ်းမဉ်လွေꩻထေ့ငါႏ ရဟန်ꩻဂေါတမဗွေႏဩ" ကွီအခွင်ꩻနုဲင်းနဝ်ꩻ၊ အဆရာႏတက္ကတွဉ်ꩻရိုꩻ- "သီဟ- နာꩻမွော့-မဉ်လွေꩻထေ့တွိုး ရဟန်ꩻဂေါတမတန်နဝ်ꩻ ထွာထမုဲင်ꩻဟောင်း၊ နာꩻနဝ်ꩻ 'ကိရိယဝါဒ-မာꩻထွိုက်မာꩻသင်ꩻ'၊ ရဟန်ꩻဂေါတမသူꩻနဝ်ꩻ 'အကိရိယဝါဒ-မာꩻထွိုက်မာꩻသင်ꩻတဝ်း'၊ ဝါႏဒ-တခေါဝ်းတဝ်းလို့ဝင်ꩻ၊ မာꩻထမုဲင်ꩻ မမဉ်လွေꩻထေ့တွိုးဟောင်း၊ ရဟန်ꩻဂေါတမသူꩻနဝ်ꩻ 'မာꩻယိုထွိုက်တဝ်း၊ မာꩻနဝ်ꩻသင်ꩻတဝ်း'အဝ်ႏဆွုံꩻမꩻအတပဲ့ꩻဖုံႏ တွမ်ႏ'အကိရိယဝါဒ'တရာꩻနဝ်ꩻကွေး၊ (လွေꩻမွုန်းဟုဲင်း)"ရိုꩻနုဲင်းနဝ်ꩻတဲင် အလဲင်ႏနောဝ်ꩻ စဲ့ꩻပိုႏတန်သီဟ လွေꩻထွာတောဝ်း။ ဒုတိယအလဲင်ႏ ဟွူန်ဖျင်ခွန်လိစ္ဆဝီႏသီး အံႏဖြာႏဘုရာꩻဂွုဏ်ႏတောႏ၊ တရာꩻဂွုဏ်ႏတောႏ၊ သံဃာႏဂွုဏ်ႏတောႏ အမျိုꩻမျိုꩻတွော့ꩻ ဝွေꩻမဉ်လွေꩻထေ့မွေး ဗွေႏဘရာꩻ၊ အဝ်ႏပွယ်ꩻအုံကွံသဲင်ꩻနဝ်ꩻ ဝွေꩻလွေꩻထေ့ယင်း တက္ကတွဉ်ꩻ၊ ကွီယင်းအခွင်ꩻ၊ အဆရာႏဒေါ့ꩻဖေႏအမျိုꩻမျိုꩻတွော့ꩻ ဖေႏလွေꩻတဝ်းဖျင်။ တတိယအလဲင်ႏတဲ့ ဟွူန်ယင်းခွန်လိစ္ဆဝိႏသီး အံႏဖြာႏဘုရာꩻဂွုဏ်ႏတောႏ၊ တရာꩻဂွုဏ်ႏတောႏ၊ သံဃာႏဂွုဏ်ႏတောႏ အမျိုꩻမျိုꩻတဲင်တွော့ꩻ ဝွေꩻမဉ်လွေꩻထေ့မွေး ဗွေႏဘရာꩻ၊ အဝ်ႏပွယ်ꩻအုံကွံသဲင်ꩻနဝ်ꩻ ဝွေꩻလွေꩻထေ့တဝ်းဒွုမ် တက္ကတွဉ်ꩻ၊ ကွီတဝ်းဒူမ်အခွင်ꩻ၊ မွူးပင်ꩻအခိန်ႏ၊ ထိုမ်းတွမ်ႏသေလောရထာꩻ အဝ်ႏဝေင်ꩻဝွေႏသာႏလီႏ ထန်ႏလွေꩻစွဉ်ႏ နီဗွေႏဘုရာꩻထျꩻ၊ သေလောလွေꩻကလꩻတဲ့ လွေꩻတွမ်ႏသေလော၊ သေလောလွေꩻတလꩻတဝ်းဒွုမ်မꩻ အဝ်ႏသေလောလောင်းလင်ꩻ၊ လွေꩻခင်ႏနေးနောဝ်ꩻသွူ။ တွိုႏလွေꩻဗွေႏဘုရာꩻထျꩻ- ဂါႏရဝရိုႏသေႏ ဝုဲင်ႏဗွေႏဘုရာꩻထွူခါ လောဝ်းရီပါနုဲင်းယို- "ဩဗွေႏ- ရဟန်ꩻဂေါတမနဝ်ꩻ 'အကိရိယဝါဒ-မာꩻထွိုက်တဝ်း အယူႏဝါႏဒ အောဝ်ႏနုဲင်းနောဝ်ꩻ'၊ 'ဖေႏကမာꩻမွုန်း'တဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ-တဲ့၊ ခွေသွဉ်းဟွူန်ဖိုနုဲင်းနဝ်ꩻ၊ မွေးနေဟောင်း ဗွေႏဩ၊ ဝင်ꩻစွတ်စွယ်ꩻထွူသွူး-ဝင်ꩻယွူးယားဒျာႏ နီဗွေႏနဲ့၊ ဝါလွော်တွော့ꩻ အမွေးဒျာႏနဲ့ ဗွေႏဩ" စဲ့ꩻပိုႏတန်သီဟ လောဝ်းရီနီဗွေႏဘုရာꩻနုဲင်းနဝ်ꩻ၊ နီဗွေႏဘုရာꩻရိုꩻ- "တကာႏသီဟ- ၁။ နေးတွမ်ႏ ငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင် 'ရဟန်ꩻဂေါတမနဝ်ꩻ အကိရိယဝါဒ-မာꩻထွိုက်တဝ်း'၊ အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကတွမ်ႏမာꩻမွုန်းတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ'၊ နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင် မီႏမဉ်ရိုꩻခွေ 'အကိရိယဝါဒ-မာꩻထွိုက်တဝ်း၊ ဗွေႏဘုရာꩻ အယူႏဝါႏဒအဝ်ႏနုဲင်းနဝ်ꩻ'မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻ အဝ်ႏဒျာႏ။ တကာႏသီဟ- ၂။ နေးတွမ်ႏပရိယာယ်ႏ-ရေႏရွယ်ႏဒျာႏ ခွေဝါႏဒတွော့ꩻ 'ရဟန်ꩻဂေါတမနဝ်ꩻ ကိရိယဝါဒ-မာꩻထွိုက်ဒျာႏ'၊ အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကမာꩻတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉိꩻနုဲင်းနဝ်ꩻ'၊ နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတွော့ꩻ မီႏမဉိရိုꩻခွေ 'ကိရိယဝါဒ-မာꩻထွိုက်ဒျာႏ'၊ ဗွေႏဘုရာꩻ အယူႏဝါႏဒအဝ်ႏနုဲင်းနဝ်ꩻ'မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနောဝ်ꩻတဲ့ အဝ်ႏဒျာႏ။ တကာႏသီဟ- ၃။ နေးတွမ်ႏပရိယာယ်ႏ-ရေႏရွယ်ႏဒျာႏ ခွေဝါႏဒတဲင်တွော့ꩻ 'ရဟန်ꩻဂေါတမနဝ်ꩻ ဥစ္ဆေဒဝါဒ-မာꩻဖြတ်ꩻထဲ့ဗာႏ'၊ အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကမာꩻဖြတ်ꩻထဲ့တဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ'၊ နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင်တွော့ꩻ မီႏမဉ်ရိုꩻခွေ 'ဥစ္ဆေဒဝါဒ-မာꩻဖြတ်ꩻထဲ့ဗာႏ'၊ ဗွေႏဘုရာꩻ အယူႏဝါႏဒအဝ်ႏနုဲင်းနဝ်ꩻ'မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနောဝ်ꩻတဲ့ အဝ်ႏဒျာႏ။ တကာႏသီဟ- ၄။ နေးတွမ်ႏပရိယာယ်ႏ-ရေႏရွယ်ႏခွေဝါဒတဲင် 'ရဟန်ꩻဂေါတမနောဝ်ꩻ ဇေဂုစ္ဆီ-ပသို့ꩻဗာႏ'၊ အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကပသို့ꩻတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ'၊ နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင် မီႏမဉ်ရိုꩻခွေ 'ဇေဂုစ္ဆီ-ပသို့ꩻဗာႏ'၊ ဗွေႏဘုရာꩻ အယူႏဝါႏဒအဝ်ႏနုဲင်းနဝ်ꩻ'မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻတဲ့ အဝ်ႏဒျာႏ။ တကာႏသီဟ ၅။ နေးတွမ်ႏပရိယာယ်ႏ-ရေႏရွယ်ႏခွေဝါႏဒတွော့ꩻ 'ရဟန်ꩻဂေါတမနောဝ်ꩻ ဝေနယိကော-ယားကုဲင်ဗာႏ'၊ အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကယားကုဲင်တဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ'၊ နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတွော့ꩻ မီႏမဉ်ရိုꩻခွေ 'ဝေနယိကော-ယားကုဲင်ဗာႏ'၊ ဗွေႏဘုရာꩻ အယူႏဝါႏဒအဝ်ႏနုဲင်းနဝ်ꩻ'မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနောဝ်ꩻတဲ့ အဝ်ႏဒျာႏ။ တကာႏသီဟ- ၆။ နေးတွမ်ႏပရိယာယ်ႏ-ရေႏရွယ်ႏခွေဝါဒတဲင်တွော့ꩻ 'ရဟန်ꩻဂေါတမနဝ်ꩻ တပဿီ-မာꩻခိုးလျားဗာႏ'၊ အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကခိုးလျားတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ'၊ နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင်တွော့ꩻ မီႏမဉ်ရိုꩻခွေ 'တပဿီ-မာꩻခိုးလျားဗာႏ'၊ ဗွေႏဘုရာꩻ အယူႏဝါႏဒအဝ်ႏနုဲင်းနဝ်ꩻ'မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻတဲ့ အဝ်ႏဒျာႏ။ တကာႏသီဟ- ၇။ နေးတွမ်ႏပရိယာယ်ႏ-ရေႏရွယ်ႏခွေဝါဒတဲင် 'ရဟန်ꩻဂေါတမနဝ်ꩻ အပဂဗ္ဘော-အုံတဝ်းဒွုမ်သန္ဓေႏ'၊ အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကအုံဗာႏမွုန်းသန္ဓေႏတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ'၊ နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင် မီႏမဉ်ရိုꩻခွေ 'အပဂဗ္ဘော-အုံတဝ်းဒွုမ်သန္ဓေႏ'၊ ဗွေႏဘုရာꩻ အယူႏဝါႏဒအဝ်ႏနုဲင်းနဝ်ꩻ'မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻတဲ့ အဝ်ႏဒျာႏ။ တကာႏသီဟ- ၈။ နေးတွမ်ႏပရိယာယ်ႏ-ရေႏရွယ်ႏခွေဝါဒတဲင် 'ရဟန်ꩻဂေါတမနောဝ်ꩻ အဿာသကော-ထိုမ်ႏထာꩻသက်သာႏ'၊ အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကထိုမ်ႏ ထာꩻသက်သာႏတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ'၊ နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင် မီႏမဉ်ရိုꩻခွေ 'အဿာသကော-ထိုမ်ႏထာꩻသက်သာႏ'၊ ဗွေႏဘုရာꩻ အယူႏဝါႏဒအဝ်ႏနုဲင်းနဝ်ꩻ'မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻတဲ့ အဝ်ႏဒျာႏနောဝ်ꩻသွူ။ တကာႏသီဟ- ၁။ 'ရဟန်ꩻဂေါတမနဝ်ꩻ အကိရိယဝါဒ-မာꩻထွိုက်တဝ်း' အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကတွမ်ႏမာꩻမွုန်းတဲ့ ခွေဟော်ꩻဖေႏတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻအတပဲ့ꩻဖုံႏနုဲင်းနောဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ' နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင် မီႏမဉ်ရိုꩻခွေ နုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻ အဝ်ႏဒျာႏ၊ အဝ်ႏနုဲင်းမုဲင်ꩻနဲတဲင်- (က) မာꩻသီဝင်ꩻသက်၊ ထူႏတခွန်ꩻဝင်ꩻတခြိုꩻ၊ ပဲစ်မာႏဝင်ꩻပိုမာ (ပဲစ်မာႏဝင်ꩻပိုဝါꩻ)၊ 'နမ်းကျင်ꩻကုဲင်-ကာယဒုစရဲက် ယိုသွံပါꩻနဝ်ꩻ-မာꩻထွိုက်တဝ်း'၊ ဒေါ့ꩻလဲဉ်ထာꩻ၊ ဒေါ့ꩻငေါဝ်းကျံꩻထမ်ꩻ၊ ငေါဝ်းအံႏစာဝင်ꩻမဉ်ꩻ၊ ငေါဝ်းသိုႏဖျင်ꩻ 'ဖြောင်းကျင်ꩻကုဲင်-ဝစီꩻဒုစရဲက် ယိုလစ်ꩻပါꩻနောဝ်ꩻ ဒေါ့ꩻထွိုက်တောဝ်း'၊ မဉ်လꩻခြေင်ဝင်ꩻတခြိုꩻ၊ ကျံႏတကုဲင်ဝင်ꩻ၊ ထာꩻယူႏမာႏ (မိစ္ဆာဒိဋ္ဌိ) 'သꩻကျင်ꩻကုဲင်-မနော်ꩻဒုစရဲက် ယိုသွံပါꩻနဝ်ꩻ ကျံႏထွိုက်တောဝ်း'ခွေအယူႏဝါႏဒ အဝ်ႏနုဲင်းနဝ်ꩻ။ (ခ) ဖေႏကတွမ်ႏမာꩻမွုန်း ကာယဒုစရဲက်၊ ဝစီꩻဒုစရဲက်၊ မနော်ꩻဒုစရဲက်တဲ့ ခွေဟော်ꩻဖေႏတရာꩻ၊ (ဂ) ဖေႏကတွမ်ႏမာꩻမွုန်း ကာယဒုစရဲက်၊ ဝစီꩻဒုစရဲက်၊ မနော်ꩻဒုစရဲက်တဲ့ ခွေဆွုံꩻမꩻတပဲ့ꩻဖုံႏနုဲင်းနဝ်ꩻ၊ (ဃ) ခွေတပဲ့ꩻဖုံႏတဲ့ မာꩻထွိုက်တဝ်း ကာယဒုစရဲက်၊ ဝစီꩻဒုစရဲက်၊ မနော်ꩻဒုစရဲက် ဟော်ꩻလွဉ်ꩻနုဲင်းနဝ်ꩻ၊ (င)'အကိရိယဝါဒ-မာꩻထွိုက်တောဝ်း'ကရိုꩻနဝ်ꩻ မာꩻထွိုက်တဝ်း ကာယဒုစရဲက်၊ ဝစီꩻဒုစရဲက်၊ မနော်ꩻဒုစရဲက်ဒျာႏ၊ ကွပ်နဝ်ꩻမꩻ မီႏမဉ်ရိုꩻခွေ 'အကိရိယဝါဒ'နုဲင်းနဝ်ꩻတဲ့ လꩻဒျာႏနောဝ်ꩻသွူ။ တကာႏသီဟ- ၂။ 'ရဟန်ꩻဂေါတမနဝ်ꩻ ကိရိယဝါဒ-မာꩻထွိုက်ဒျာႏ' အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကမာꩻတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻအတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ' နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတွော့ꩻ မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻ အဝ်ႏဒျာႏ၊ အဝ်ႏနုဲင်းမုဲင်ꩻနဲတဲင်- (က) မာꩻသီတဝ်းဝင်ꩻသက်၊ ထူႏတခွန်ꩻတောဝ်းဝင်ꩻတခြိုꩻ၊ ပဲ့စ်မာႏတဝ်းဝင်ꩻပိုမာ (ပဲ့စ်မာႏတဝ်းဝင်ꩻပိုဝါꩻ)၊ 'နမ်းကျင်ꩻဟောဝ်-ကာယသုစရဲက် ယိုသွံပါꩻနဝ်ꩻ-မာꩻထွိုက်ဒျာႏ'၊ ဒေါ့ꩻလဲဉ်တဝ်းထာꩻ၊ ဒေါ့ꩻတောဝ်းငေါဝ်းကျံꩻထမ်ꩻ၊ အံႏစာတဝ်းဝင်ꩻမဉ်ꩻ၊ ဒေါ့ꩻတဝ်းငေါဝ်းသိုႏဖျင်ꩻ ဖြောင်းကျင်ꩻဟောဝ်-ဝစီꩻသုစရဲက် ယိုလစ်ꩻပါꩻနဝ်ꩻ ဒေါ့ꩻထွိုက်ဒျာႏ'၊ မဉ်လꩻခြေင်တဝ်း ဝင်ꩻတခြိုꩻ၊ ကျံႏတကုဲင်တောဝ်းဝင်ꩻ၊ ထာꩻယူႏမဲဉ်ႏ 'သꩻကျင်ꩻဟောဝ်-မနော်ꩻသုစရဲက် ယိုသွံပါꩻနဝ်ꩻ ကျံႏထွိုက်ဒျာႏ'ခွေအယူႏဝါႏဒ အဝ်ႏနုဲင်းနဝ်ꩻ။ (ခ) ဖေႏကမာꩻ သုစရဲက် အပါꩻတဆီတဲ့ ခွေဟော်ꩻနုဲင်းနဝ်ꩻ၊ (ဂ) ဖေႏကမာꩻ သုစရဲက် အပါꩻတဆီတဲ့ ခွေဆွုံꩻမꩻတပဲ့ꩻနုဲင်းနဝ်ꩻ၊ (ဃ) ခွေတပဲ့ꩻဖုံႏတဲ့ သုစရဲက် အပါꩻတဆီနဝ်ꩻ မာꩻထွိုက်ဒျာႏ ဟော်ꩻလွဉ်ꩻနုဲင်းနဝ်ꩻ၊ (င)'ကိရိယဝါဒ-မာꩻထွိုက်ဒျာႏ'ကရိုꩻနဝ်ꩻ သုစရဲက်အပါꩻတဆီနဝ်ꩻ မာꩻထွိုက်ဒျာႏ၊ ကွပ်နဝ်ꩻမꩻ မီႏမဉ်ရိုꩻခွေ 'ကိရိယဝါဒ'နုဲင်းနဝ်ꩻတဲ့ လꩻဒျာႏနောဝ်ꩻသွူ။ တကာႏသီဟ- ၃။ 'ရဟန်ꩻဂေါတမနဝ်ꩻ ဥစ္ဆေဒဝါဒ-မာꩻဖြတ်ꩻထဲ့ဗာႏ' အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကမာꩻဖြတ်ꩻထဲ့တဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻအတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ' နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင်တွော့ꩻ မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻ အဝ်ႏဒျာႏ၊ အဝ်ႏနုဲင်းမုဲင်ꩻနဲတဲင်- (က) 'ရာဂ ဒေါသ မောဟ-ဖုံႏယိုနဝ်ꩻ မာꩻဖြတ်ꩻထဲ့ဗာႏ၊ အကုသိုလ်ႏတရာꩻဖုံႏယိုနဝ်ꩻ မာꩻဖြတ်ꩻထဲ့ꩻဗာႏ'ခွေအယူႏဝါႏဒ အဝ်ႏနုဲင်းနဝ်ꩻ။ (ခ) ဖေႏနေးကမာꩻဖြတ်ꩻထဲ့ နဝ်ꩻဖုံႏတဲ့ ခွေဟော်ꩻနုဲင်းနဝ်ꩻ၊ (ဂ) ဖေႏနေးကမာꩻဖြတ်ꩻထဲ့ နဝ်ꩻဖုံႏတဲ့ ခွေဆွုံꩻမꩻ တပဲ့ꩻဖုံႏနုဲင်းနဝ်ꩻ၊ (ဃ) ခွေတပဲ့ꩻဖုံႏတဲ့ ဖေႏနေးကမာꩻဖြတ်ꩻထဲ့နဝ်ꩻဖုံႏ ဟော်ꩻလွဉ်ꩻနုဲင်းနဝ်ꩻ၊ (င)'ဥစ္ဆေဒဝါဒ-မာꩻဖြတ်ꩻထဲ့ဗာႏ'ကရိုꩻနဝ်ꩻ မာꩻဖြတ်ꩻထဲ့ ရာဂ ဒေါသ မောဟ၊ အကုသိုလ်ႏတရာꩻဖုံႏဒျာႏ၊ ကွပ်နဝ်ꩻမꩻ မီႏမဉ်ရိုꩻခွေ 'ဥစ္ဆေဒဝါဒ'နုဲင်းနဝ်ꩻတဲ့ လꩻဒျာႏနောဝ်ꩻသွူ။ တကာႏသီဟ- ၄။ 'ရဟန်ꩻဂေါတမနဝ်ꩻ ဇေဂုစ္ဆီ-ပသို့ꩻဗာႏ' အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကပသို့ꩻတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻအတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ' နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင် မီႏမဉ်ရဉ်ꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻ အဝ်ႏဒျာႏ၊ အဝ်ႏနုဲင်းမုဲင်ꩻနဲတဲင်- (က) ကမာꩻတွမ်ႏနမ်း နမ်းကျင်ꩻတဟောဝ်တောဝ်း-ကာယဒုစရဲက်၊ ဒေါ့ꩻတွမ်ႏဖြောင်း ဖြောင်းကျင်ꩻတဟောဝ်တဝ်း-ဝစီꩻဒုစရဲက်၊ ယူႏတွမ်ႏသꩻ သꩻကျင်ꩻတဟောဝ်တဝ်း-မနော်ꩻဒုစရဲက်ဖုံႏနောဝ်ꩻ ပသို့ꩻဗာႏ၊ ယွုတ်ညမ်းမျိုꩻဖွိုႏ အကုသိုလ်ႏဖုံႏနဝ်ꩻတဲ့-ပသို့ꩻဗာႏ၊ ခွေအယူႏဝါႏဒ အဝ်ႏနုဲင်းနဝ်ꩻ။ (ခ) ဖေႏနေး ကပသို့ꩻဒုစရဲက်တွမ်ႏ-အကုသိုလ်ႏနဝ်ꩻ ခွေဟော်ꩻတရာꩻ၊ (ဂ) ဖေႏနေး ကပသို့ꩻဒုစရဲက်တွမ်ႏ-အကုသိုလ်ႏနဝ်ꩻတဲ့ ခွေဆွုံꩻမꩻတပဲ့ꩻဖုံႏ၊ (ဃ) ခွေတပဲ့ꩻဖုံႏတဲ့ ဖေႏနေး ကပသို့ꩻဒုစရဲက်တွမ်ႏ-အကုသိုလ်ႏနဝ်ꩻ ဟော်ꩻလွဉ်ꩻနဝ်ꩻအတွိုင်ꩻ၊ (င)'ဇေဂုစ္ဆီ-ပသို့ꩻဗာႏ'ကရိုꩻနဝ်ꩻ ပသို့ꩻဗာႏ ဒုစရဲက်တွမ်ႏ အကုသိုလ်ႏ၊ ကွပ်နဝ်ꩻမꩻ မီႏမဉ်ရိုꩻခွေ 'ဇေဂုစ္ဆီ-ပသို့ꩻဗာႏ'နုဲင်းနောဝ်ꩻတဲ့ လꩻဒျာႏနောဝ်ꩻသွူ။ တကာႏသီဟ- ၅။ 'ရဟန်ꩻဂေါတမနဝ်ꩻ ဝေနယိကော-ယားကုဲင်ဗာႏ' အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကယားကုဲင်တဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻအတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ' နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတွော့ꩻ မီႏမည်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻ အဝ်ႏဒျာႏ၊ အဝ်ႏနုဲင်းမုဲင်ꩻနဲတဲင်- (က) 'ရာဂ ဒေါသ မောဟ-ဖုံႏယိုနဝ်ꩻ ယားကုဲင်ဗာႏ၊ အကုသိုလ်ႏတရာꩻဖုံႏယိုနဝ်ꩻ ယားကုဲင်ဗာႏ' ခွေအယူႏဝါႏဒ အဝ်ႏနုဲင်းနဝ်ꩻ။ (ခ) ဖေႏကယားကုဲင် နဝ်ꩻဖုံႏတဲ့ ခွေဟော်ꩻနုဲင်းနဝ်ꩻ၊ (ဂ) ဖေႏကယားကုဲင် နဝ်ꩻဖုံႏတဲ့ ခွေဆွုံꩻမꩻ တပဲ့ꩻဖုံႏနုဲင်းနဝ်ꩻ၊ (ဃ) ခွေတပဲ့ꩻဖုံႏတဲ့ ဖေႏကယားကုဲင်နဝ်ꩻဖုံႏ ဟော်ꩻလွဉ်ꩻနုဲင်းနဝ်ꩻ၊ (င)'ဝေနယိကော-ယားကုဲင်ဗာႏ'ကရိုꩻနဝ်ꩻ ယားကုဲင် ရာဂ ဒေါသ မောဟ၊ အကုသိုလ်ႏတရာꩻဖုံႏဒျာႏ၊ ကွပ်နဝ်ꩻမꩻ မီႏမဉ်ရိုꩻခွေ 'ဝေနယိကော'နုဲင်းနဝ်ꩻတဲ့ လꩻဒျာႏနောဝ်ꩻသွူ။ တကာႏသီဟ- ၆။ 'ရဟန်ꩻဂေါတမနဝ်ꩻ တပဿီ-မာꩻခိုးလျားဗာႏ' အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကမာꩻခိုးလျားတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻအတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ' နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင်တွော့ꩻ မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻ အဝ်ႏဒျာႏ၊ အဝ်ႏနုဲင်းမုဲင်ꩻနဲတဲင်- (က) ယွုတ်ညမ်းမျိုꩻဖွိုႏ အကုသိုလ်ႏဖုံႏနဝ်ꩻ မာꩻခိုးလျားဗာႏ၊ ကမာꩻတွမ်ႏနမ်း နမ်းကျင်ꩻတဟောဝ်တဝ်း-ကာယဒုစရဲက်၊ ဒေါ့ꩻတွမ်ႏဖြောင်း ဖြောင်းကျင်ꩻတဟောဝ်တဝ်း-ဝစီꩻဒုစရဲက်၊ ယူႏတွမ်ႏသꩻ သꩻကျင်ꩻတဟောဝ်တဝ်း-မနော်ꩻဒုစရဲက်ဖုံႏနဝ်ꩻ မာꩻခိုးလျားဗာႏ၊ ခွေအယူႏဝါႏဒ အဝ်ႏနုဲင်းနဝ်ꩻ။ (ခ) ဖေႏနေးကမာꩻခိုးလျား အကုသိုလ်ႏတွမ်ႏ ဒုစရဲက်ဖုံႏနဝ်ꩻ ခွေဟော်ꩻတရာꩻ၊ (ဂ) ဖေႏနေးကမာꩻခိုးလျား အကုသိုလ်ႏတွမ်ႏ ဒုစရဲက်ဖုံႏနဝ်ꩻတဲ့ ခွေဆွုံꩻမꩻ တပဲ့ꩻဖုံႏ၊ (ဃ) ခွေတပဲ့ꩻဖုံႏတဲ့ ဖေႏနေးကမာꩻခိုးလျား အကုသိုလ်ႏတွမ်ႏ ဒုစရဲက်နဝ်ꩻ ဟော်ꩻလွဉ်ꩻနဝ်ꩻအတွိုင်ꩻ၊ (င)'တပဿီ-မာꩻခိုးလျားဗာႏ'ကရိုꩻနဝ်ꩻ မာꩻခိုးလျားဒျာႏ အကုသိုလ်ႏတွမ်ႏဒုစရဲက်ဖုံႏဒျာႏ၊ တကာႏသီဟ- ကပယ်ႏထိုꩻထွူ အကုသိုလ်ႏ၊ တဒွေါ့ꩻထိုꩻလဲဉ်း အဝိဇ္ဇာႏတွမ်ႏ တဏှာႏအရွီးတဲင် ဗဲ့ꩻထန်ႏထွူလဲဉ်း အဝိဇ္ဇာႏတွမ်ႏ တဏှာႏအရွီးတွော့ꩻ မာꩻသေင်ထိုꩻလဲဉ်း အဝိဇ္ဇာႏတွမ်ႏ တဏှာႏအရွီးတဲင်တွော့ꩻ မာꩻစွဉ်ႏနုဲင်းမုဲင်ꩻမုဲင်ꩻတဲ့ယဝ်း ထဲင်းတလဲင်ႏဆုဲင်ꩻချာ တထွာထဲင်းဒွုမ် ပုဂ္ဂိုလ်ႏနဝ်ꩻနဝ်ꩻ 'ပုဂ္ဂိုလ်ႏမာꩻခိုးလျား ကိလေႏသာႏ'ခွေဟော်ꩻဒျာႏနုဲင်းနဝ်ꩻ၊ တကာႏသီဟဟွေး- ဘုရာꩻခွေယိုနဝ်ꩻ ယွုတ်ညမ်းမျိုꩻဖွိုႏ-အကုသိုလ်ႏတရာꩻဖုံႏနဝ်ꩻ ပယ်ႏထွူလို့လဲဉ်း၊ အဝိဇ္ဇာႏတွမ်ႏ တဏှာႏအရွီးတဲ့ တဒွေါ့ꩻထဲ့ထိုꩻလဲဉ်း၊ အဝိဇ္ဇာႏတွမ်ႏ တဏှာႏအရွီးနဝ်ꩻ မာꩻသေင်ထိုꩻထွူလဲဉ်းတဲင်တွော့ꩻ မာꩻစွဉ်ႏနုဲင်းမုဲင်ꩻမုဲင်ꩻတဲ့ယဝ်း ထဲင်းတလဲင်ႏဆုဲင်ꩻချာ တထွာထဲင်းဒွုမ်၊ဩ တကာႏသီဟဟွေး- ကွပ်နောဝ်ꩻမꩻ နေးတွမ်ႏပရိယာယ်ႏ-ရေႏရွယ်ႏဒျာႏ ခွေဝါႏဒတဲင်တွော့ꩻ မီႏမဉ်ရိုꩻခွေ 'တပဿီ-မာꩻခိုးလျားဗာႏ'နုဲင်းနောဝ်ꩻတဲ့ လꩻဒျာႏနောဝ်ꩻသွူ။ တကာႏသီဟ- ၇။ 'ရဟန်ꩻဂေါတမနောဝ်ꩻ အပဂဗ္ဘော-အုံတဝ်းဒွုမ်သန္ဓေႏ'အယူႏဝါႏဒ အဝ်ႏနုဲင်းနဝ်ꩻ၊ 'ဖေႏကအုံဗာႏမွုန်းဒွုမ်သန္ဓေႏတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻအတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ' နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင် မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻ အဝ်ႏဒျာႏ၊ အဝ်ႏနုဲင်းမုဲင်ꩻနဲတဲင်- တဒွေါ့ꩻထိုꩻလဲဉ်း အဝိဇ္ဇာႏတွမ်ႏ တဏှာႏအရွီးတွော့ꩻ မာꩻသေင်ထိုꩻလဲဉ်း အဝိဇ္ဇာႏတွမ်ႏ တဏှာႏအရွီးတဲင်တွော့ꩻ မာꩻစွဉ်ႏနုဲင်းမုဲင်ꩻမုဲင်ꩻတဲ့ယဝ်း ထဲင်းတလဲင်ႏဆုဲင်ꩻချာ တထွာတဝ်းဒွုမ် (တကွုတ်တဝ်းဒွုမ်) ပုဂ္ဂိုလ်ႏနဝ်ꩻနဝ်ꩻ 'အုံတဝ်းဒွုမ်သန္ဓေႏ'ခွေဟော်ꩻဒျာႏနုဲင်းနဝ်ꩻ ခြုဲင်းနယ်ဟော်ꩻပျꩻ ခွေဆွုံꩻမꩻတပဲ့ꩻဖုံႏနုဲင်းနဝ်ꩻ။ တကာႏသီဟဟွေး- ဘုရာꩻခွေယိုနဝ်ꩻ အဝိဇ္ဇာႏတွမ်ႏ တဏှာႏအရွီးတဲ့ တဒွေါ့ꩻထဲ့ထိုꩻလဲဉ်း၊ အဝိဇ္ဇာႏတွမ်ႏ တဏှာႏအရွီးနဝ်ꩻ ဗဲ့ꩻထန်ႏထိုꩻထွူလဲဉ်း၊ အဝိဇ္ဇာႏတွမ်ႏ တဏှာႏအရွီးနဝ်ꩻ မာꩻသေင်ထိုꩻလဲဉ်းတဲင်တွော့ꩻ မာꩻစွဉ်ႏနုဲင်းမုဲင်ꩻမုဲင်ꩻတဲ့ယဝ်း (ဘုရာꩻခွေယိုနဝ်ꩻ) ထဲင်းတလဲင်ႏဆုဲင်ꩻချာ တထွာထဲင်းဒွုမ်၊ (တကွုတ်ထဲင်းဒူမ်) တကာႏသီဟဟွေး- ကွပ်နဝ်ꩻမꩻ နေးတွမ်ႏပရိယာယ်ႏ-ရေႏရွယ်ႏဒျာႏ ခွေဝါႏဒတဲင်တွော့ꩻ မီႏမဉ်ရိုꩻခွေ 'အပဂဗ္ဘော-အုံတဝ်းဒွုမ်သန္ဓေႏ'နုဲင်းနဝ်ꩻတဲ့ လꩻဒျာႏနောဝ်ꩻသွူ။ တကာႏသီဟဟွေး- ၈။ 'ရဟန်ꩻဂေါတမနောဝ်ꩻ အဿာသကော-ထုမ်ႏထာꩻသက်သာႏ'အယူႏဝါႏဒ အောဝ်ႏနုဲင်းနောဝ်ꩻ၊ 'ဖေႏကထုမ်ႏထာꩻသက်သာႏတဲ့ ဟော်ꩻတရာꩻနုဲင်းနဝ်ꩻ၊ တရာꩻဩဝါဒအနေႏတဲ့ ဆွုံꩻမꩻအတပဲ့ꩻဖုံႏနုဲင်းနဝ်ꩻ၊ အတပဲ့ꩻဖုံႏတဲ့ ဟော်ꩻလွဉ်ꩻနုဲင်းနဝ်ꩻ' နေးတွမ်ႏငေါဝ်းပရိယာယ်ႏ-ရေႏရွယ်ႏဒျာႏ ခွေဝါႏဒတဲင်တွော့ꩻ မီႏမဉ်ရိုꩻခွေနုဲင်းနဝ်ꩻတဲ့ လꩻဒျာႏ၊ အနယ်ꩻပရိယာယ်ႏနုဲင်းနဝ်ꩻ အဝ်ႏဒျာႏ၊ အဝ်ႏနုဲင်းမုဲင်ꩻနဲတဲင်- တကာႏသီဟ- 'ထာꩻသက်သာႏ'ကရိုꩻနဝ်ꩻ ခွေရေႏရွယ်ႏ မဂ်ဖိုလ်ႏဒျာႏ၊ (ပေါႏလꩻမဂ်ဖိုလ်ႏနဝ်ꩻ ကွုတ်ဒုက္ခ၊ ဖြားဒုက္ခ၊ ဆာဒုက္ခ၊ သီဒုက္ခ သက်သာႏအာတန်၊ ပေါႏလꩻတဝ်းလစ်ꩻမဂ်လစ်ꩻဖိုလ်ႏ ပေါႏထွာရဟန္တာႏနဝ်ꩻ ကွုတ်ဒွုမ်တဲင် ဒုက္ခကာႏတဝ်း သက်သာႏလို့စွဉ်ႏဒျာႏ) 'ထုမ်ႏထာꩻသက်သာႏ'ကရိုꩻနဝ်ꩻ ထိုမ်ႏဒျာႏမဂ်ဖိုလ်ႏဒျာႏ၊ ဟော်ꩻဒျာႏနုဲင်းနဝ်ꩻ၊ ဆွုံꩻမꩻဒျာႏနုဲင်းနဝ်ꩻ။ ကွပ်နဝ်ꩻမꩻ မီႏမဉ်ရိုꩻခွေ 'အဿာသကော-ထုမ်ႏထာꩻသက်သာႏ'နုဲင်းနဝ်ꩻတဲ့ လꩻဒျာႏနောဝ်ꩻသွူ။ စဲ့ꩻပိုႏတန်သီဟနဝ်ꩻ ကိုꩻကွယ်ႏဒျာႏ တိတ္ထိတက္ကတွဉ်ꩻတဲင် ဗုဒ္ဓဘာႏသာႏ မွေးတဝ်းတွော့ꩻ တွမ်ႏဝင်ꩻကဒေါ့ꩻ တွမ်ႏဝွေꩻကဟွုန်ဗာႏယိုနဝ်ꩻ အကွာႏညာꩻယော့ဒျာႏလို့ဝင်ꩻ၊ ဝွေꩻကထင်ႏဟွူန်ဗာႏနုဲင်းယို ဝွေꩻသဘော်ꩻ ကထင်ႏပေါက်တဲင်တွော့ꩻ- "ဩဗွေႏ ဘုရာꩻမျတ်ဗွေႏဩ- နီဗွေႏဘုရာꩻ တရာꩻတောႏနဝ်ꩻ ယံမွေးစွဉ်ႏထာꩻ၊ နစ်သက်ဟောဝ်ငါႏဗွေႏဩ၊ တဲႏဟန်ႏနီꩻယိုမာꩻငါ သွတ်ꩻစွဉ်ႏတသက် ခွေသွဉ်းဆယ်ꩻကပ်ဒျာႏ ရတနာႏသွံပါꩻ၊ ခွေသွဉ်းယိုနဝ်ꩻ မတ်သွော့ ဗုဒ္ဓဘာႏသာႏ ဥပါႏသကာႏတဖြာꩻ ဗွေႏဩ" လောဝ်းနီဗွေႏဘုရာꩻနုဲင်းနဝ်ꩻ။ နီဗွေႏဘုရာꩻရိုꩻ- "တကာႏသီဟ- ယူႏယွယွကဟုဲင်း၊ လိုꩻမဉ်ꩻတန် လိုꩻမဉ်ꩻကျောႏတဖြာꩻ လိုꩻနုဲင်းနာꩻယိုနဝ်ꩻ ယူႏချာယူႏငါဒွိုန်းက ယူႏယွယွနဝ်ꩻမꩻ ဟောဝ်ကွေး"နီဗွေႏဘုရာꩻ ထွဉ်ႏယူႏစဉ်ꩻစာꩻကနုဲင်းနဝ်ꩻ။ "ဩဗွေႏ- ခွေသွဉ်းထင်ႏဟွူန် နီဗွေႏငေါဝ်းယိုနဝ်ꩻ ယိန်းသꩻရေꩻရေꩻ၊ ယိန်းနစ်သက်သက်စွဉ်ႏ ဗွေႏဩ၊ တိတ္ထိတက္ကတွဉ်ꩻဖုံႏနဝ်ꩻ ခွေသွဉ်းမဉ်ႏရိုꩻ 'ခွေသွဉ်းယိုနဝ်ꩻ မတ်သွော့ နီဗွေႏတကာႏဗွေႏဩ' ခွေသွဉ်းမဉ်ႏလောဝ်းနုဲင်းနဝ်ꩻ မဉ်ႏလꩻမွိုင်တပဲ့ꩻ နုဲင်းခွေသွဉ်းယိုဟ ငအွီႏစွဉ်ႏထာꩻ၊ 'စဲ့ꩻပိုႏတန်သီဟနဝ်ꩻ ထွာလဲဉ်းနီတပဲ့ꩻ'လယ်ႏကေႏညာႏစွဉ်ႏဒျာႏ ဝွေႏသာႏလီႏတခမ်းလိုမ်းသနယ် ဗွေႏဩ။ တွိုႏနီဗွေႏဘုရာꩻနဝ်ꩻရိုꩻ- 'ယူႏယွယွကဟုဲင်း'တဲ့၊ နောဝ်ꩻသနယ် ခွေသွဉ်း ကယိန်းနစ်သက်နဝ်ꩻဗွေႏ၊ နီလဲင်ႏဗွေဗွေ ခွေသွဉ်းဆယ်ꩻကပ်ဒျာႏ ရတနာႏသွံပါꩻ ဗွေႏဩ၊ ခွေသွဉ်းယိုနဝ်ꩻ မတ်ဒျာႏသွော့ ဗွေႏဘုရာꩻတကာႏဖြာꩻ ဗွေႏဩ"လောဝ်းနီဗွေႏဘုရာꩻနုဲင်းနဝ်ꩻ။ နီဗွေႏဘုရာꩻရိုꩻ- "တကာႏသီဟ- နိဂဏ္ဌ တိတ္ထိတက္ကတွဉ်ꩻသီးဖုံႏနဝ်ꩻ စွုမ်ႏနီꩻစွုမ်ႏလာ အာႏကွိုꩻလွဉ်နာꩻညလဲဉ်း၊ နာꩻနဝ်ꩻ ထွာဝွေꩻသီး ထီအုံႏတန်တဲင်တွော့ꩻ (မဲ့ꩻဝွေꩻသီးမော့ꩻ အယပ်ꩻအခုဲင်ႏ)၊ 'ဝွေꩻသီးတာႏတဲ့ ခွေအီႏလူႏပါဒျာႏ'အွဉ်ႏသꩻနုဲင်းနဝ်ꩻလုဲင်း၊ လူႏသေႏသေႏပါ ဝွေꩻသီးနဝ်ꩻဟုဲင်း" "ဩဗွေႏ ဘုရာꩻမျတ်ဗွေႏဩ- တွိုႏကဟွုန်နဝ်ꩻ 'ရဟန်ꩻဂေါတမနဝ်ꩻ ထွဉ်ႏလူႏဒျာႏ ဝွေꩻတွမ်ႏဝွေꩻတပဲ့ꩻလွုမ်ꩻ-တဲ့'၊ ကထွိုင်ႏဟွူန်တွမ်ႏနားယိုနဝ်ꩻ တစားခေါ်တောဒျာႏ၊ ယိန်းကေႏညိုႏငါႏ ဗွေႏဘုရာꩻ၊ သွံလဲင်ႏဗွေဗွေ ခွေသွဉ်းဆယ်ꩻကပ်ဒျာႏ ရတနာႏသိုမ်ပါꩻဗွေႏဩ၊ သွတ်ꩻစိုးဝုဲင်ꩻပန် တသက်လိုမ်းလိုမ်း ဆယ်ꩻကပ်ဒျာႏဘုရာꩻ၊ ဆယ်ꩻကပ်ဒျာႏတရာꩻ၊ ဆယ်ꩻကပ်ဒျာႏသံဃာႏ၊ မတ်ဒျာႏသွော့ ဥပါႏသကာႏတဖြာꩻ ဗွေႏဩ" သꩻရောင်းသꩻရေꩻ လောဝ်းထဲင်းနုဲင်းနောဝ်ꩻသွူ။(သုတ္တန်ႏပိဋကတ်၊ အင်္ဂုတ္တရပါဠိ၊ အဋ္ဌကနိပါတ်၊ သီဟသုတ်)