ဘုရာꩻဟော်ꩻဖေႏမဟာႏနာမ်ႏ

"ဂိလာနသုတ် (ဗွေႏဘုရာꩻဟော်ꩻဖေႏ မဟာႏနာမ်ႏတရာꩻ)"

အွိုးခꩻတလဲင်ႏ နီဗွေႏဘုရာꩻအဝ်ႏအုံ ကပိလဝတ်ခမ်း၊ ကျောင်ꩻ"နိဂြောဓါရုံ"ကိုအတွင်ꩻ စင်ꩻပေႏဖုံႏနဝ်ꩻရိုꩻ ဝါႏမဉ်ႏကျွစ်မဲ့ꩻ ဗွေႏဘုရာꩻအီႏကျွꩻညာꩻထာꩻ၊ နီအီႏလွေꩻလွဉ်ꩻဗာႏ ယူႏနုဲင်းနဝ်ꩻတဲင် ဆꩻသင်္ကန်ꩻ၊ စိုမ်ႏသင်္ကန်ꩻဖုံႏနောဝ်ꩻသွူ၊ တကာႏမဟာႏနာမ်ႏတဖြာꩻ ထင်ႏလောဝ်းဗွေႏဘုရာꩻနုဲင်းယို- ဩဗွေႏ- စင်ꩻပေႏဖုံႏရိုꩻ ဝါႏမဉ်ႏကျွစ်နဝ်ꩻ နီဗွေႏဘုရာꩻ အီႏကျွꩻလွေꩻညာꩻထာꩻတဲ့ ဟွုန်စဲင်းစဲ့နုဲင်းနဝ်ꩻမꩻ ထင်ႏထေ့ဗွေႏဘုရာꩻနုဲင်းယိုသွူဩ၊ ဩဗွေႏ- ကရီးနဝ်ꩻ ခွေသွဉ်းအုံဟောဝ်တဝ်း၊ အုံဟောဝ်တဝ်းတွင်ꩻနဝ်ꩻ နီဗွေႏဘုရာꩻဟော်ꩻဖိုတဝ်းဒွိုန်း ခွေသွဉ်းတရာꩻ၊ ရောႏဂါႏနိစ္စက် ဆာယူႏပက်ထာꩻတွင်ꩻနဝ်ꩻ မာꩻဗာႏနုဲင်းမုဲင်ꩻဗွေႏဩ" "တကာႏမဟာႏနာမ်ႏဟွေး- ရောႏဂါႏနိစ္စက် ဆာယူႏပက်ထာꩻတွင်ꩻနဝ်ꩻ ယူႏလꩻဗာႏဘုရာꩻ၊ နီဗွေႏဘုရာꩻသူꩻနဝ်ꩻ ဗွေစွုမ်ႏတွမ်ႏဂွုဏ်ႏတောႏကွတ်ꩻပါꩻ၊ ယူႏလꩻလꩻသွော့ဘုရာꩻ၊ ယွုမ်းအံႏမွေးမုဲင်းသွော့ ဗွေႏဘုရာꩻလုဲင်း၊ ပေါႏလောႏယူႏလꩻဘုရာꩻတွင်ꩻနဝ်ꩻ 'ခံႏစာꩻမုꩻဝွေႏဒနာႏ-သက်သာႏထိုꩻစွဉ်ႏသနယ်တကႏ'။ ရောႏဂါႏနိစ္စက် ဆာယူႏပက်ထာꩻတွင်ꩻနဝ်ꩻ ယူꩻလꩻဗာႏတရာꩻ၊ တရာꩻနဝ်ꩻ ဗွေႏဘုရာꩻနမ်းနမ်းဟော်ꩻခါꩻ၊ ဗွေတွမ်ႏဂွုဏ်ႏတောႏသူပါꩻ၊ ယွုမ်းအံႏခြောႏခြဲ့ꩻသွော့ တရာꩻဟုဲင်း၊ ရောႏဂါႏနိစ္စက် ဆာယူႏပက်ထာꩻတွင်ꩻနဝ်ꩻ ယူႏဗာႏသံႏဃာႏ၊ ဘုရာꩻတပဲ့ꩻ သံဃာႏသူꩻနဝ်ꩻ ဗွေတွမ်ႏဂွုဏ်ႏတောႏကွတ်ꩻပါꩻ၊ ယွုမ်းအံႏတဉ်ႏတွော့ꩻ သံဃာႏနုဲင်းနောဝ်ꩻလုဲင်းတကာႏ၊ ပေါႏယူႏလꩻ တရာꩻ၊ ယူႏလꩻသံဃာႏနဝ်ꩻ ထာꩻဆာသက်သာႏစွဉ်ႏသနယ်။ ရောႏဂါႏနိစ္စက် ဆာယူႏပက်ထာꩻတွင်ꩻနဝ်ꩻ သံယော်ꩻဇဉ်ႏ မွိုးလောင်းဖါလောင်း အွဉ်ႏမွုန်း၊ ထာꩻဝီႏဝွို့ပိုလောင်း မာလောင်း အွဉ်ႏမွုန်း၊ ထာꩻလောႏကာႏရွဉ်လောင်း ခံꩻလောင်း တခြိုꩻဥစ္စာႏလောင်း အွဉ်ႏမွုန်းတောဝ်လာꩻလာꩻနော။ ခွေယိုနဝ်ꩻ ယွုမ်းမွေးမုဲင်းဒျာႏ ဘုရာꩻ၊ ယွုမ်းခြေင်းခြဲ့ဒျာႏတရာꩻ၊ ယွုမ်းခြောႏခြဲ့ꩻဒျာႏ သံဃာႏ၊ ယွုမ်းအံႏသေႏသေႏဒျာႏ ရတနာႏသွံပါꩻ၊ အဝ်ႏမာꩻသေႏသေႏဒျာႏ ဒါႏနကုသိုလ်ႏ၊ အဝ်ႏထိန်ꩻဟောဝ်သေႏသေႏဒျာႏ သီႏလကုသိုလ်ႏ၊ အဝ်ႏပွါꩻမျာꩻသေႏသေႏဒျာႏ ဘာႏဝနာႏကုသိုလ်ႏ၊ ယူႏဒျာႏသွော့ ရတနာႏသွံပါꩻ၊ ယူႏလꩻဒျာႏသွော့ ကမာꩻခါꩻ ကုသိုလ်ႏဖုံႏနောဝ်ꩻနော။ ခွေယိုခါနဝ်ꩻ လꩻလယ်ႏကွို့ꩻ လိုꩻချမ်ꩻသာႏလွုမ်ꩻ၊ လိုꩻချမ်ꩻသႏယို ထွꩻတောဝ်း လူꩻချမ်ꩻသာႏသူꩻ၊ ခွေယို လိုꩻဟောဝ်တဖြာꩻ ဆယ်ꩻကပ်ကိုꩻကွယ်ႏ ရတနာႏသိုမ်ပါꩻ၊ မာꩻခါꩻကုသိုလ်ႏအာတန်၊ အကုသိုလ်ႏနဝ်ꩻ ခွေတမာꩻဖိုတဝ်း၊ ခွေယိုနဝ်ꩻ မဉ်ႏသီခန်းတဲ့ ငါးရုဲင်ꩻ၊ တိရစ္ဆာန်ႏ၊ ပိတ္တာႏ၊ အသူႏရကာယ်ႏ အပါယ်ႏလစ်ꩻခမ်း တတွိုႏဗာႏတောဝ်း၊ အီႏတွိုႏဗာႏဒျာႏ လူꩻခမ်း၊ ဗျဟ္မာႏခမ်း၊ အောဝ်ႏဗျဟ္မာႏခမ်းသူꩻ အီႏကူꩻတငါဒျာႏနိဗ္ဗာန်ႏ ယွုမ်းအံႏသွော့နမ်း နုဲင်းနဝ်ꩻနောတကာႏ" နီဗွေႏဘုရာꩻ ဟော်ꩻခါꩻအနယ်ꩻဟောဝ် စတဲင်နုဲင်းနောဝ်ꩻဖုံႏသွူ။ (သုတ္တန်ႏပိဋကတ်၊ မဟာဝဂ္ဂသံယုတ်ပါဠိ၊ ဂိလာနသုတ်)