ဘေꩻသွံစွိုးမွိုးပိုကယ်ႏလꩻတဝ်း
"ဘယသုတ် (ဘေꩻမျိုꩻသွံစွိုး၊ မွိုးပို ကယ်ႏလို့ဝင်ꩻလꩻတောဝ်း)"
"ရဟန်ꩻသီးဖုံႏဟွေး- 'မွိုးတဲ့ ကယ်ႏပိုလꩻတဝ်း၊ ပိုတဲ့ ကယ်ႏမွိုးတလꩻတဝ်း'နဝ်ꩻ အဝ်ႏသွံမျိုꩻ၊ သွံမျိုꩻကရိုꩻနဝ်ꩻ- ၁။ မေႏခိုးဒုံ၊ မေႏခိုးဝေင်ꩻတဲင် ငမ်းထာꩻသီတွော့ꩻ နီလွင်း၊ ဝင်ꩻလွင်း၊ မွိုးဖေႏကလွင်းဗာႏမွုန်း ပိုကယ်ႏလꩻတဝ်း၊ ပိုဖေႏကလွင်းဗာႏမွုန်း မွိုးကယ်ႏလꩻတဝ်း၊ လွင်းဗာႏမေႏအန္တရာယ်ႏ ပငါပရာꩻ၊ ယိုနောဝ်ꩻ 'ပဌမ အမာတာပုတ္တိကာ-ဘေꩻရန်ႏ'နောဝ်ꩻသွူ။
၂။ တလီꩻသန်၊ ခမ်းလော့တန်၊ ထီမွူး၊ ထီအီထိုꩻလိုꩻဖုံႏ၊ ခွေလွင်း၊ နာꩻလွင်း၊ မွိုးဖေႏကလွင်းဗာႏမွုန်း ပိုမာꩻဖေႏဒါႏတဝ်း၊ ပိုဖေႏကလွင်းဗာႏမွုန်း မွိုးမာꩻဖေႏဒါႏတဝ်း၊ လွင်းဗာႏထီအန္တရာယ်ႏ ပငါပရာꩻ၊ ယိုနောဝ်ꩻ 'ဒုတိယအမာတာပုတ္တိက-ဘေꩻရန်ႏ'နောဝ်ꩻသွူ။
၃။ စူခွုမ်လက်နက်သား နိစ္စက်လိုꩻဒုံ၊ နိစ္စက်လိုꩻဝေင်ꩻ၊ ထူႏသီမ်ꩻတခြိုꩻ၊ ထူႏထိုꩻဥစ္စာႏ၊ ခွေလွင်းဗာႏ၊ နာꩻလွင်းဗာႏ တစွိုꩻတွမ်ႏတစွိုꩻ တွိုက်ꩻခꩻလို့ဝင်ꩻ၊ ခွန်နင်ꩻ ငမ်းတနတ်တရာႏဗာႏ၊ နေးအာႏလွင်းညာꩻ၊ လဲဉ်းဖြာꩻထွောင်းထွောင်း၊ မွိုးဖေႏကလွင်းဗာႏမွုန်းနဝ်ꩻ ပိုရဲးခါꩻဖေႏဒါႏတဝ်း၊ ပိုဖေႏကလွင်းဗာႏမွုန်းနောဝ်ꩻတဲ့ မွိုးရဲးခါꩻဖေႏဒါႏတဝ်း၊ လွင်းဗာႏလိုꩻကုဲင်အန္တရာယ်ႏ၊ ဖင်းဗာႏလက်နက် အန္တရာယ်ႏ ပငါပရာꩻ၊ ယိုနောဝ်ꩻ 'တတိယ အမာတာပုတ္တိက-ဘေꩻရန်ႏ'နောဝ်ꩻသွူ။
ရဟန်ꩻသီးဖုံႏဟွေး- မေႏခိုးဒုံ မေႏခိုးဝေင်ꩻတဲ့ ခွေလွင်းနာꩻလွင်းခိန်ႏနဝ်ꩻနဝ်ꩻ အမွိုးလောႏကယ်ႏအပို၊ အပိုလောႏကယ်ႏအမွိုးနုဲင်းနဝ်ꩻနဝ်ꩻ ညညတလဲင်ႏ အဝ်ႏနွောင်ꩻနေက၊ တလီꩻသန်၊ ခမ်းလော့တန်တဲင် သေင်ႏဝꩻ ထီအီခြွဉ်ႏ၊ ခွေလွင်းနာꩻလွင်း အခိန်ႏနဝ်ꩻနဝ်ꩻ အမွိုးလောႏကယ်ႏအပို၊ အပိုလောႏကယ်ႏအမွိုးနုဲင်းနဝ်ꩻနဝ်ꩻ ညညတလဲင်ႏ အဝ်ႏနွောင်ꩻဒျာႏ၊ စူခွုမ်လက်နက်သားနိစ္စက်၊ တွိုက်ꩻနက်လို့ဝင်ꩻတဲင် ဒုံသားရပ်သားဖုံႏ ခွေလွင်းနာꩻလွင်း အခိန်ႏနဝ်ꩻနဝ်ꩻ အမွိုးလောႏကယ်ႏအပို၊ အပိုလောႏကယ်ႏအမွိုးနုဲင်းနဝ်ꩻနဝ်ꩻ ညညတလဲင်ႏ အဝ်ႏဒါႏနေနေ။ ရဟန်ꩻသီးဖုံႏဟွေး- ကထင်ႏတွိုႏ 'ထာꩻဖြားဒုက္ခ၊ ထာꩻဆာယပ်ꩻခုဲင်ႏ၊ ထာꩻသီဘေꩻရန်ႏ'ယိုနဝ်ꩻ အမွိုးကယ်ႏအပို၊ အပိုကယ်ႏအမွိုးနဝ်ꩻ မုဲင်ꩻခါခန်းတဲ့ယဝ်း တလꩻနွောင်ꩻတဝ်း၊ ယူႏစ့ꩻမွိုင်- မွိုးဆာဖေႏပို၊ မွိုးသီဖေႏပို၊ မွိုးနဝ်ꩻ ဖြားမွုန်း၊ ဆာမွုန်း၊ သီမွုန်း၊ ပိုဖြားဖေႏဒျာႏ၊ ပိုဆာဖေႏဒျာႏ၊ ပိုသီဖေႏဒျာႏနုဲင်းနဝ်ꩻနဝ်ꩻ တလꩻတဝ်းလာꩻလာꩻနောဝ်ꩻသွူ။ ရဟန်ꩻသီးဖုံႏဟွေး- မွိုးမွိုးပိုပို ဖေႏကလွစ်လꩻ ထာꩻဖြား ထာꩻဆာ ထာꩻသီနဝ်ꩻ- နေးတွမ်ႏ 'ထာꩻဒေါ့ꩻမဲဉ်ႏမွေး၊ ထာꩻမာꩻမဲဉ်ႏမွေး၊ လွူးနမ်းကြောင်းစင်မွေး၊ ကျိုꩻစာꩻမဲဉ်ႏမွေး၊ အွဉ်ႏသတိꩻမဲဉ်ႏမွေး၊ သꩻစွူမဲဉ်ႏမွေး၊ ထာꩻယူႏမဲဉ်ႏမွေး၊ သေလွဉ်ꩻမဲဉ်ႏမွေး'တဲင် ထူႏခွုမ်တွမ်ႏ မဂ္ဂင်ႏတရာꩻဖုံႏနဝ်ꩻသွစ်ꩻပါꩻ၊ မဉ်ႏအားထွုတ်မွေးတရာꩻ၊ မဉ်ႏထွာရဟန္တာႏနဝ်ꩻမꩻ ဘဝသွတ်ꩻထွူ၊ ကွုတ်ထဲင်းဒွုမ်၊ ဖြားဗာႏဒွုမ်၊ ဆာဗာႏဒွုမ်၊ သီဗာႏဒွုမ်နောဝ်ꩻသွူ။[၁][၂]