ဘ/မ

(ဘ) ၁။ ဘဝပန်ယို နမ်းပန်ယို ခံႏစံႏ၊ ဘဝပန်ငါ နမ်းပန်ငါ ခံႏစံႏ။ ၂။ ဘဝလိုꩻလမ်း လုဲင်ꩻငတ်ꩻအောင်၊ ဘဝလိုꩻကျောင်ꩻ နီရျာꩻနီဆီနွိုတ်ꩻ။(သီႏလ ၅-ပါꩻ၊ သိက္ခာႏပုဒ်တောႏ ၂၂၇-ပါꩻ။) (မ) ၁။ မဟာနီꩻ စီ၊ ဟန်ႏနီꩻ မွံꩻ၊ မွူးရောဝ်ꩻ ဖုံꩻ၊ တရူꩻ တုဲင်၊ တရာꩻဆူꩻ အီႏဟူႏပြုဲင်။ ၂။ မာငထောဝ်းနုဲင်းဝင်ꩻ ထွာလိုꩻသိုႏ၊ ပိုငထဝ်းနုဲင်းဝင်ꩻ ထွာလိုꩻဖျင်ꩻ။(လိုꩻလမ်းသီးအတွက်တာႏ မွေးမဲဉ်ႏဒျာႏ။) ၃။ မာမူႏနံꩻ ဝါꩻခိုဗင်ႏ။(တောႏလမ်းတောႏပါႏ တအွဉ်ႏကုဲင်ဖိုဖိုတောဝ်းလွဝင်ꩻ။) ၄။ မာꩻကေꩻဇူꩻ မာꩻကေꩻစောက်ꩻ၊ လူႏ(ကရွပ်) ထွာတꩻဒုဲင်။(မာꩻဖေႏ ဒေါ့ꩻဖေႏထာꩻဟောဝ်လဲ့ ပါꩻကေꩻဇူꩻတတင်ႏတဝ်း၊ ပါꩻအဝ်ႏယူႏလွယ်ꩻထင်းကုဲထဲင်း။) ၅။ မာꩻထာꩻတကုဲင်တဲင်ငမ်း-ငွိုးတဗျ၊ အေႏဆဲစ်ꩻဆီႏလ သောင်တဟျာႏ။ ၆။ မာꩻဖေႏ ဝင်ꩻကထင်းတန်၊ မီႏတယံတောဝ်း ဝင်ꩻငထဲင်း။ ၇။ မာꩻလို့ဟူ မာꩻထွူႏဟံႏ။(လိုꩻခွဉ်ႏဆေ့ꩻ လိုꩻလွꩻလေႏဖျင်ꩻ နုတ်ꩻတွူ ဒေါ့ꩻသွဉ်ယပ်ꩻ။) ၈။ မာꩻသွတ်ꩻနေင်ႏလာ အုံသူႏနွေႏ၊ အုံထံအုံဝွေႏ တဖေင်ꩻနမ်း။ ၉။ မာꩻအတꩻသာ ထွာအလီꩻ။ ၁၀။ မာႏနတန်တွမ်ႏ ထာꩻငမ်းတန်ယိုနဝ်ꩻ တသီႏကုꩻယာလုမ်ꩻလာꩻအီအဲဉ်ထောဝ်း။ ၁၁။ မာႏမꩻကော့ꩻနမ်း၊ ကုဲင်မꩻ နန်းလꩻ၊ ပꩻမꩻ ယူႏလꩻဆုဲင်ꩻ။ ၁၂။ မာႏလူꩻနောဝ်ꩻယိုꩻ၊ မာꩻလိုꩻနောဝ်ꩻယပ်ꩻ။(မဉ်ႏမာႏလူꩻနဝ်ꩻ ကိုꩻကွယ်ႏပသ ရိုႏသေႏချာယင်းခါ ဟဝ်ရေꩻခွိုန်ꩻယင်းဒါႏ၊ မဉ်ႏမာႏလိုꩻနောဝ်ꩻ တယိုꩻတောဝ်း၊ တွိုႏဒါႏ ထာꩻသီ။) ၁၃။ မီꩻတွမ်ႏယာကြွဉ်ႏ ထျꩻအီဆွဉ်ႏ၊ အွဉ်ႏပြုံႏစံႏစိုꩻ မတ်ထာꩻခြိုꩻ။ ၁၄။ မီႏကုဲင်လဲ့ ခံႏ၊ မီႏဟောဝ်လဲ့ စံႏ။ ၁၅။ မီႏကွမ်းဟို့ꩻပေႏတထာနဝ်ꩻ အုံဒျာႏကျောင်ꩻ၊ ကွပ်ဟို့ꩻပေႏတစွမ်ꩻတဲင် သဲင်ꩻဗာႏလမ်း။ ၁၆။ မီႏကျွိုက်နစ်သက်နောဝ်ꩻ ထွာထာꩻတရေꩻ၊ မီႏဗွိုႏလွꩻထီႏနောဝ်ꩻ ထွာထာꩻတကုဲင်။ ၁၇။ မီႏစေꩻနဲ့ꩻနဝ်းလဲ့ နန်ꩻခြွေ၊ မဉ်ႏစေꩻနွေတဝ်းလဲ့ နန်ꩻခြာႏ၊ မဉ်ႏပရာႏလွဉ်ꩻငါႏလဲ့ ဟို့ꩻကို စင်းအောဝ်ႏငွေါ်ခြေင်ဒါႏ။ ၁၈။ မီႏစွပ်ꩻလိုꩻမူႏ သတိကုဲင်၊ မဉ်ႏမုဲင်လိုꩻမူႏ ပညာႏဖင်း။ ၁၉။ မီႏတသေတဝ်း ပကျောက်ꩻကာႏ၊ မီႏသေနောဝ်ꩻ ဖေါႏထန်ႏအံႏဗာႏ တသီႏတာႏ။ ၂၀။ မီႏထီႏတဖြေစော့ꩻဗန် သေနန်းဝါꩻဆရာႏ၊ မဉ်ႏထီႏမီꩻငဲႏစာႏ သေနန်းဝါꩻမော်၊ မဉ်ႏထီႏပသီႏရော် သေနန်းဝါꩻစင်းလေက်ꩻ။ ၂၁။ မီႏထီႏပါꩻရွို့ꩻလွဝင်ꩻ ထိုꩻညာꩻညာꩻ၊ မဉ်ႏထီႏပါꩻဟော်ꩻတရာꩻ အုံဗော့ꩻဗော့ꩻ။ ၂၂။ မီႏထီႏရီးထာꩻဆꩻငါ တပဲ့ꩻနောဝ်ꩻ ထာꩻဆင်ꩻရယ်ꩻအဲဉ်ထောဝ်း။ ၂၃။ မီႏထီႏအဖေ့ꩻ သေအမွူး၊ အထီမီႏစွူ သေကောင်းကို။ ၂၄။ မီႏထုမ်ꩻလဲ့ ဆာ၊ မီႏလျာလဲ့ သာႏ။(ထွာဝင်ꩻလိုꩻဝင်ꩻသွဉ်း အောဝ်ႏဝင်ꩻခင်ႏဆꩻလ ဝင်ꩻစူကိုနောဝ်ꩻ ဝင်ꩻမဉ်ႏထုမ်ꩻစူလဲ့ ဆာ၊ ဝင်ꩻမဉ်ႏလျာစူခါ သက်သာႏ၊ ဝင်ꩻလိုꩻလင် မာꩻပီးမုဲင်ꩻလဲ့ ခမ်ႏဗာႏထာꩻဒုက္ခတေ့ꩻတေ့ꩻ ဗွီႏဗွီႏနောဝ်ꩻသွူ။) ၂၅။ မီႏထုမ်ႏထာꩻဒါႏ ချꩻမာႏန၊ မဉ်ႏထုမ်ႏသုတ ပမာႏန လိုꩻကွီအံႏ။ ၂၆။ မီႏထွာဝါးလဲ့ အုံဒင်ႏညီꩻ သေင်ႏတပင်၊ မီႏထွာဆင်လဲ့ အုံသော့ꩻညီꩻ ဟံႏတကြွန်၊ မီႏထွာခွန်လဲ့ စိုꩻစံႏညီꩻတခမ်း။ ၂၇။ မီႏဒေါ့ꩻဟုတ်ꩻငေါဝ်း ရွဉ်လို့တောဝ်း၊ မီႏအံႏဟုတ်ꩻခါ ရွဉ်လို့အာ။ ၂၈။ မီႏဒင်ႏငါပညာႏနောဝ်ꩻ ထွာဒါႏလိုꩻဒါႏ၊ မီႏဒင်ႏငါမေတ္တာႏနောဝ်ꩻ သꩻချမ်ꩻသာႏ၊ မဉ်ႏဒင်ႏငါထာꩻရက်နောဝ်ꩻ ထွာဒါႏလိုꩻဗား။ ၂၉။ မီႏနေးလဲ့ ခုဲင်ႏ၊ မီႏအုဲင်ႏလဲ့ ယပ်ꩻ။ ၃၀။ မီႏနွုမ်ꩻဟွမ် တရေ့ꩻ၊ မီႏနွုမ်ꩻဟေ့ꩻ ဝန်ꩻခန်း။(မဉ်ႏကျွိုက်နိစ်သက် ဗာႏသꩻလဲ့ နေးထူႏသွုံꩻဆောင်ႏသွော့၊ မီႏတကျွိုက်နိစ်သက် ဗာႏသꩻတောဝ်းလဲ့ တွမ်ႏနေးထူႏသွုံꩻဆောင်ႏမွော့။) ၃၁။ မီႏဖေြꩻဖိုး ထွားအကတူႏ၊ မဉ်ႏဖြေꩻလိုꩻမူႏ ထွားအခင်ႏလောင်ꩻ။ ၃၂။ မီႏဖြေꩻဟံႏ ဖြေꩻသွော့ယိုခါ၊ မဉ်ႏအုဲင်ႏမာ ကဉ်ꩻစာꩻသွော့ယွယွ။(ဟံႏယာႏအခန် အောဝ်ႏကားသဲင်ꩻတိတ်ꩻတိတ်ꩻတဲင် ဖြေꩻသွော့မွိုင်င်။) ၃၃။ မီႏဖွီလွဉ်ꩻငါႏ တလီꩻအီကျောင်ႏဒါႏ။(နီလိုꩻသီးသꩻယို ဖွီမွိုင်ငါႏလဲ့ ကိလေႏသာႏအာႏရုံႏ ယားကုဲင်ဒါႏ။) ၃၄။ မီႏဗွိုႏ သဲ့ꩻသွမ်ꩻ၊ မဉ်ႏစွမ်ꩻ အံႏဖြာႏ။ ၃၅။ မီႏမာꩻထာꩻဟဝ် ထွာမွူးနီꩻမျတ်၊ မဉ်ႏမာꩻထာꩻတကုဲင် ထွာမွူးနီꩻပျတ်။(မွူးနီꩻတနီꩻချင်ႏစွဉ်ႏလဲ့ ဟောဝ်ကုဲင်လꩻလို့နီမျိုꩻ။) ၃၆။ မီႏမာꩻမွေးမွေး လိုꩻပေႏငွိုး၊ မဉ်ႏမာꩻပဆိုး လိုꩻပေႏနွောင်ꩻ။ ၃၇။ မီႏမဲဉ်တသီး သော့ꩻသွော့မေ့၊ မဉ်ႏမဲဉ်ဖြေင်းလဲ့ သူႏသွော့သီ၊ မဉ်ႏမဲဉ်တနျာႏ ဒို့ꩻကောဝ်ႏဗဲ့ꩻ။(ဖန်းဆီအုပ်။) ၃၈။ မီႏမဲဉ်ဒေါ့ꩻဝင်ꩻမဉ်ꩻတငွါ၊ ပွေါ့ꩻချာခွိုန်ꩻဒွိုန်း နာꩻငွဉ်ꩻအော့ꩻ။ ၃၉။ မီႏမဲဉ်ေပျာႏထာꩻ တဆူးတဆင်ႏ အွꩻသွော့ဒဝ်၊ မဉ်ႏမဲဉ်ႏပျောႏထာꩻ တနီꩻတွမ်ႏတနာꩻ အုဲင်ႏသွော့မာ၊ မဉ်ႏမဲဉ်ပျောႏထာꩻ တစိုးတသက် ဆို့ꩻသွော့အူꩻယေန်ႏခြံ။ ၄၀။ မီႏမဲဉ်ရက်လဲ့ ရက်သꩻကိုနေးဗာႏ၊ အထန်ႏနောဝ်ꩻ ဟမ်းသန်သန်နေးဗာႏ။(အုပ်ချုပ်ထွားထိန်ꩻ လိုꩻပေႏအတွက်။) ၄၁။ မီႏမဲဉ်လꩻခံꩻ ခူႏခံꩻအောင်၊ မီႏမဲဉ်လꩻရွဉ် ထွုမ်ႏသွော့စီꩻပွါꩻ။ ၄၂။ မီႏမဲဉ်သျုတ် မာꩻပွယ်ꩻပင်ꩻ၊ မဉ်ႏမဲဉ်သျင်ꩻ လွေꩻဝင်ꩻပွယ်ꩻ။ ၄၃။ မီႏမဲဉ်အံႏထဲင်းဒဲဉ်ရောဝ်ꩻ လင်ꩻလုံးဒါ၊ မီႏမဲဉ်အံႏထဲင်းဒဲဉ်ဟာ ထင်ႏပဆျာႏကြိုႏ။(ဒုံလုံးဒါနဝ်ꩻ အဝ်ႏဖွိုႏထာꩻအုံႏကိုတဲင် မွူးနန်ꩻထန်ႏ နန်ꩻတောင်ႏ၊ ပဆျာႏကြိုႏနောဝ်ꩻ အောဝ်ႏထိုတဲင် မွူးထန်ႏယိုꩻ မွူးနန်ꩻဟာ။) ၄၄။ မီႏမွန်လဲ့ မွန်ညီꩻ၊ မဉ်ႏသီလဲ့ သီနုဲင်း။(လိုꩻအံႏလွဝင်ꩻသစ္စာႏ တခံႏဖြတ်ꩻဖဖြယ် ထိုꩻနꩻတောဝ်းလွဝင်ꩻ၊ ရေႏအန်ꩻလင်ꩻ အုံအောဝ်ႏ သီညီꩻမွန်ညီꩻဝင်ꩻ တစိုးသက်လွုမ်း။) ၄၅။ မီႏယွမ်ꩻလဲ့ ဖို့ꩻ၊ မီႏလို့လဲ့ တင်။ ၄၆။ မီႏရဲ့လား ဗွူ ထွာဖိုးဆာႏ၊ မဉ်ႏအုဲင်းလားမာ ထွာပိုသွဉ်း။(စင်းလꩻဒါႏ ကုဲင်းမော့ꩻဒါႏ လိုꩻမူႏပိုသား ပိုအောဝ်ႏထွူသား။) ၄၇။ မီႏရုဲင်းလဲ့ တွူႏ၊ မဉ်ႏရွူႏလဲ့ ဆွတ်ꩻ။ ၄၈။ မီႏရော့ꩻတဖြာꩻ မာႏတရျာꩻ။ ၄၉။ မီႏသီ နွို့ဟံႏ၊ မွန်စံႏ ထီခံꩻ။ ၅၀။ မီႏသေတောဝ်း ကာဗꩻ၊ သေတဲင် သျောဝ်းထူႏယꩻ။ ၅၁။ မီႏသေ ထူႏယꩻ၊ မဉ်ႏသေတောဝ်း ကာတဗꩻ။ ၅၂။ မီႏသေရီးထာꩻ တပယ်ꩻနောဝ်ꩻ တဆင်ꩻရယ်ꩻဗာႏတောဝ်း။ ၅၃။ မီႏသေအွီႏမွေး ခွေဆျာပေႏနောဝ်ꩻ ခွေအေႏငါလဲ့ ဖေႏအံႏတဝ်း။ ၅၄။ မီႏဟဲ့ꩻထင်ႏကျောင်ꩻ ရိုꩻခင်ႏဆာ၊ မဉ်ႏဟဲ့ꩻလော်တခြာ ရိုꩻ"အွိုးအွိုး"။(သꩻမနော်ꩻ ကဗွို့ꩻထာꩻဟောဝ်နောဝ်ꩻဆေ့ꩻ၊ ဗွို့ꩻအာဒျာႏအကုဲင်ဖဲ့ꩻ။) ၅၅။ မီႏဟောဝ်လဲ့ စံႏ၊ မဉ်ႏကုဲင်လဲ့ ခံႏ။ ၅၆။ မီႏအုဲင်ႏညာꩻညာꩻ တော်ဒါႏတနာ၊ မဉ်ႏအုဲင်ႏတငါငါ တော်ဒါႏတလွေး။(ထင်းတန်လိုꩻညာꩻတဲင် နေးထူႏအုဲင်ႏတောႏလမ်းတောႏပါႏ ေတာ်တနꩻဒျာႏ လိုꩻကဲက်ꩻလိုꩻလဲဉ် လိုꩻမွိုက်လိုꩻတွူ လိုꩻဖျင်ꩻလိုꩻလွꩻ။) ၅၇။ မီႏအုဲင်ႏဆရာႏ ဗေင်ႏဗာႏခေါ်၊ မီႏအုဲင်ႏမော် ဗေင်ႏဗာႏခွꩻ၊ မီႏအုဲင်ႏလိုꩻလွꩻ ဗေင်ႏဗာႏလုမ်ꩻ။ ၅၈။ (က) မီႏအံႏတာ သမ်းပါတွမ်ႏသုဲင်ꩻ၊ မီႏနုဲင်ႏဝန်ꩻ နမ်းမန်ꩻသမ်းပွိုမ်း၊ (ခ) မီႏအံႏ သမ်းပသဲ့ꩻ၊ မဉ်ႏနုဲင်ႏခန်း သမ်းအဗဲ့ꩻ။(မီႏအံႏထွဉ်ႏတောဝ်း သမ်းအဝ်ႏလိုႏအံႏထွဉ်ႏ၊ မဉ်ႏအံႏထွဉ်ႏလဲ့ စေႏတနာႏ သမ်းအဲဉ်ထောဝ်း၊ သမ်းမာꩻတငီႏတငါထာꩻ။) ၅၉။ မီႏအံႏထာꩻဆျာႏ ဟဲ့ꩻ"သေနန်းမွိုး"၊ မဉ်ႏအံႏထာꩻနွိုး ဟဲ့ꩻ"သေနန်းဖါ"၊ မဉ်ႏအံႏတရီခါ ဟဲ့ꩻဗာႏနုဲင်းမုဲင်ꩻဟောင်း။ ၆၀။ မီႏအောဝ်ႏညာꩻ ကော့ꩻ၊ မီႏအောဝ်ႏဗော့ꩻ စင်ꩻ။(မီႏအောဝ်ႏဖြတ်ꩻဖြယ်ညာꩻလွဝင်ꩻခါ သေနန်းယူႏလꩻ မဲဉ်မော့ꩻမဲဉ်ခွဲး ဒေါ့ꩻရီလွဝင်ꩻ၊ မဉ်ႏအဝ်ႏဗော့ꩻ အုံညီꩻလွဝင်ꩻခါ ရွို့ꩻရန်ႏထေင်ညင်ꩻလွဝင်ꩻ။) ၆၁။ မီႏအောဝ်ႏဖွိုႏ ဒေါ့ꩻထို၊ မဉ်ႏအောဝ်ႏထို မဲဉ်မာꩻဖွိုႏထာꩻ။(အဝ်ႏထွာလိုꩻပေႏတွင်ꩻ ဒေါ့ꩻဖြောဝ်ꩻသဲ့ꩻသား လိုꩻတန်မဉ်ꩻ၊ ထွိုင်ႏထွာလိုꩻတန် သမ်းမဲဉ်မာꩻတောဝ်းထာꩻမာꩻ။) ၆၂။ မီႏအုံအွိုးဒုံ တရေꩻတွမ်ႏလမ်း၊ မဉ်ႏလွေꩻဝင်ꩻခမ်း တရေꩻတွမ်ႏခွမ်ꩻလာꩻ။ ၆၃။ မုꩻရျာꩻတေင်၊ မုꩻရေင်တွိုး။(ထာꩻမာꩻကိစ္စအာငါႏ။) ၆၄။ မူႏနံꩻတဆင်ႏ၊ ခိုဗင်ႏတပွိုင်။ ၆၅။ မူႏလအောဝ်ႏမꩻ ဘူတထွာ၊ အထျꩻအောဝ်ႏမꩻ အနာပေါႏ။ ၆၆။ မေႏခိုးဖုဲင်ဒုံႏ တထီႏတောဝ်းအအွူ၊ မေႏခိုးထူ တထီႏတောဝ်းအဖါႏ။(အသွုံꩻတလꩻတောဝ်းမျိုꩻ တွမ်ႏဒေါ့ꩻသွဉ်ပုဲင်ႏ၊ တွမ်ႏခွုမ်မာꩻပုဲင်ႏ။) ၆၇။ မေႏငထောဝ်း အလူး၊ လိုꩻမူႏငထဝ်း ပိုဝါꩻ၊ ရထာꩻငထဝ်း အလံႏ၊ ရဟန်ꩻငထဝ်း တပဲ့ꩻ၊ တဖုဲင်ႏမဲ့တဝ်းနေား။ ၆၈။ မေႏတွမ်ႏယံꩻ၊ နမ်းမန်ꩻတွမ်ႏခဲဉ်ႏ တမဲဉ်ႏတောဝ်းလွဝင်ꩻ။ ၆၉။ မေႏလို့ꩻရောင်ႏ တခြေင်ႏနွောင်ꩻတောဝ်း မွူးလာရောင်ႏ။ ၇၀။ ေမႏလုံးကိန်ꩻမုဲင်ႏ၊ မေႏပုဲင်ႏကိန်ꩻတောင်။(ကိန်ꩻတုံ)။ ၇၁။ မေႏအမျိုꩻနောဝ်ꩻ ထာꩻပသို့ꩻအဲဉ်ထောဝ်း။ ၇၂။ မေႏအာ မေႏနွောင်ꩻ၊ ထီအာ ထီနွောင်ꩻ။(အယံအကျ အဟောဝ်မဉ်ႏအာ အယံအကျအဟ၀်နွောင်ꩻ၊ အကုဲင်မဉ်ႏမာ အကုဲင်နွောင်ꩻ၊ ပါꩻမုဲင်ꩻအာႏတလာ ပါꩻမုဲင်ꩻနွောင်ꩻ။) ၇၃။ မေႏအဲဲဉ်ထဝ်းသိုႏ စောင်းအီႏတင်ႏ၊ ဝါႏအဲဉ်ထဝ်းအရွီး စောင်းအီႏဗင်ႏ။ ၇၄။ မဲ့ခူꩻဖြုံႏသဉ်သဉ် တလဉ်လဉ်၊ အမဉ်အမို တသေယူႏတောဝ်း။ ၇၅။ မဲ့ငါပေႏ တရေႏကုဲင်၊ မဲ့ငါပေႏ တရေႏလင်ꩻ။ ၇၆။ မဲ့ငါမေတ္တာႏ ကတန်တပေႏဗာႏ နမ်းမာꩻထွာဒျာႏ။ ၇၇။ မဲ့ငါလောင်ႏလွိုး ဖြောင်းအွီႏငါႏ၊ နလုံꩻသꩻရာႏ သင်ႏလꩻဗေ့ဗေ့။ ၇၈။ မဲ့တအဲဉ်ထောဝ်းလိုꩻနောဝ်ꩻ တောင်ꩻတွမ်ႏနား၊ နားတအဲဉ်ထောဝ်းလိုꩻနဝ်ꩻ တောင်ꩻတွမ်ႏမဲ့၊ စူတအဲဉ်ထဝ်းလိုꩻနဝ်ꩻ ခင်ႏထွာစူ။ ၇၉။ မဲ့တမို့ နားတအွိုင် နားတကောင်ႏ၊ မဲ့တယိပ်ꩻတောဝ်း ပီနုဲင်းညာꩻ၊ ဗေင်ႏထာꩻတလꩻတောဝ်း ပီနုဲင်းဆွေႏ။ ၈၀။ မဲ့ထီလဲ့ ဖြောင်းတွမ်ႏထီႏပုဲင်ႏ။(အုံညီꩻအဝ်ႏရောဝ်းလွဝင်ꩻ နီလိုꩻပြေင်သွိုန်ချင်ꩻချင်ꩻ တွမ်ႏဒေါ့ꩻမွိုန်းဝင်ꩻမဉ်ꩻ၊ တွမ်ႏဖေါႏပုဲင်ႏ ဝင်ꩻအပဲစ်၊ ဝင်ꩻချို့ꩻယွင်ꩻမုꩻ အွိုးလိုꩻတန်ထျꩻ။) ၈၁။ မဲ့ထွား နားနာႏ။ ၈၂။ မဲ့ ဗေင်ႏအွီႏမွေး တမာယိုꩻ၊ လိုꩻအွဉ်ႏဗေင်ႏမဲ့ တမာယပ်ꩻ။ ၈၃။ မဲ့ဗေင်ႏအွီႏဟာ ထာꩻလေစောဝ်း၊ မဲ့ဗေင်ႏတောဝ်းဟာ မွူးနာꩻဆွာꩻ။ ၈၄။ မဲ့ယို သွိုန်ႏသိုႏ၊ နားအိုႏ သွိုန်ႏထီ။(သွိုန်ႏသိုႏ မဉ်ႏဟဝ်တဝ်း မဲ့ဆာ၊ သွိုန်ႏထီ မဉ်ႏဟဝ်တဝ်း နားဆာသွူ။) ၈၅။ မဲ့အောဝ်ႏ ထွား၊ နားအောဝ်ႏ နာႏ။ ၈၆။ မဲ့ဆွော့ꩻတင်ႏသီ နုဲင်းစွဉ်ႏဆွေႏ။ ၈၇။ မုဲင်းတင်ႏတသာ အောဝ်ႏသွူဒုံသောင် နီသွံနေင်ႏလဲ့ ဖိုးအံႏမွစ်ꩻလွဉ်ꩻဒွိုန်း။(လꩻငရီး အမျိုꩻမုဲင်လဲ့ အဗွေႏအဝ်ႏရက် အဝ်ႏအာႏရꩻဒျာႏ၊ အဝ်ႏစွဲꩻလံꩻဗွို့ꩻခြꩻဒျာႏ။) ၈၈။ မော့ꩻတောဝ်း တဗီႏဗီႏ၊ ထီႏတောဝ်း တပယ်ꩻပယ်ꩻ။ ၈၉။ မော့ꩻထွီႏ သော့ꩻ၊ မော့ꩻထော့ သဲမ်။ ၉၀။ မော့ꩻမိုသဲင်ဟောဝ် ထင်းဖူစီႏ၊ အွဉ်ႏထဲ့ထိုꩻရီႏ တနေးတောဝ်း။ ၉၁။ မော့ꩻသွူထီနောင် ပေါႏတသို့တောဝ်းနောဝ်ꩻ ပနားဗား။(ပနားနီးနွာ။) ၉၂။ မို့ꩻတွမ်ႏဟံႏ၊ နိဗ္ဗာန်ႏတွမ်ႏငါးရုဲင်ꩻ။(ညာꩻငါႏလွဝင်ꩻ။) ၉၃။ မို့ꩻတွမ်ႏဟံႏ အဆင်ႏရန်း ကွာႏအီ၊ မေႏတွမ်ႏထီ ဖွုံꩻကံႏတပီတဝ်း။ ၉၄။ မဉ်စွဉ်ႏထာꩻ နီသွံခြွိုက်နုဲင်းငခဲဉ်ႏ၊ မဉ်စွဉ်ႏထာꩻ နီသွံလဲင်ႏ နုဲင်းဗေသေင်။ ၉၅။ မဉ်ꩻပေႏထိုꩻမား၊ မဉ်ꩻဖြားပေါႏလွဉ်။(အခိန်ႏအခါႏ တွိုႏလွဉ်တဲင် ထိုꩻလဲ့ꩻတလꩻတဝ်း၊ တလွစ်တဝ်း၊ ပိုလီꩻသီး ဝင်ꩻအမျာꩻသီး ဟဲ့ꩻခန်း မွိုးဖြားဖါဖြားလဲ့ အဝ်ႏခံႏဗာႏဒျာႏ။) ၉၆။ မုံꩻသွိုꩻချို့ꩻသွဉ်၊ ဆရာႏ လိုꩻအာသွဉ်။ ၉၇။ မဲဉ်ခြွေခြွေ မဲဉ်ခြာႏခြာႏ၊ မဲဉ်ချမ်ꩻသာႏ ပြဲ့ꩻဝခန်းတယောဝ်း၊ ပေါ်ꩻထီႏပေႏ ထင်းဖွီချာ လိုꩻကေန်ꩻခြေားဖြန်နောဝ်ꩻ ဟဲ့ꩻထွိုက်တဝ်းလိုꩻခြွေ။ ၉၈။ မဲဉ်ခွဲးမဲဉ်မော့ꩻ၊ မဲဉ်စွော့ꩻမဲဉ်တက်၊ မဲဉ်ယောင်းဆက်ငါႏ ငေါဝ်းရက်ပေႏတငွါ။ ၉၉။ မဲဉ်ထီႏတောဝ်း ပိုမူႏစွီႏပနား၊ မဲဉ်ထွားဒျာႏ ပိုမူႏထွုမ်းသဲင်ꩻကာꩻ။ ၁၀၀။ မဲဉ်ထီႏတောဝ်း ပိုမူႏဝါးလေား ထောင်ကာခင်ႏ၊ မဲဉ်ထီႏဒျာႏ ပိုမူႏသေရံႏ ထွုမ်းဆင် ထွိုက်ဟော်နန်ꩻ။ ၁၀၁။ မဲဉ်ထွာဝင်ꩻဖူ ထွာရီးသွော့ဝင်ꩻမ၊ မဉ်ထွာဝင်ꩻဆရာႏ ထွာရီးသွော့ ဝင်ꩻတပဲ့ꩻ။ ၁၀၂။ မဲဉ်ထွားဒွုမ်ဖြီႏဖြီႏ၊ မဲဉ်ထီႏဒွုမ်လာꩻလာꩻ၊ နင်ꩻအုဲင်ႏကလာꩻ ဘာႏသာႏချာꩻ။ ၁၀၃။ မဲဉ်ဒေါ့ꩻဝင်ꩻမဉ်ꩻ သိမ်ꩻရီးသွော့ နီနမ်း။(နီနမ်း အုံအဝ်ႏကံကျင်ꩻဟဝ်ဟဝ်ရီးအွဉ်မꩻ ဒေါ့ꩻဖြောဝ်ႏသွဉ်သင်ဆွုံꩻမꩻဝင်ꩻနောဝ်ꩻ ယိုꩻမာꩻ၊ ဩဇာႏအာႏဏာႏတဲႏသွူ။) ၁၀၄။ မဲဉ်မာꩻခွန် မာꩻခွန်ဖြောဝ်ꩻ၊ မဉ်ႏမာꩻဗွေႏဗွန် မာꩻဗွေႏဗွန်ပအိုဝ်ႏ။ (ေြဖာဝ်ꩻလိုꩻမျိုꩻသီး နေးရေꩻရိုႏသေႏလွအခွန်တဲင် ပအိုဝ်ႏလိုꩻမျိုꩻသီး နေးရေꩻရိုႏသေႏလွ အဗွေႏဗွန်နောဝ်ꩻသွူ။) ၁၀၅။ မဲဉ်မွ သော့ꩻထီ၊ မဲဉ်သီ နွို့စဲ့ꩻ။(မဲဉ်သီဖေါက်သစ္စာႏ။) ၁၀၆။ မဲဉ်ယပ်ꩻ အုဲင်ႏမာ၊ မဲဉ်ဆာ သံꩻကီႏ။ ၁၀၇။ မဉ်လꩻခံꩻ ခြေင်းလွဉ်ꩻခံꩻဆꩻချာ၊ မဉ်လꩻရွဉ် ခြေင်းလွဉ်ꩻရွဉ်ဆꩻချာ။ ၁၀၈။ မဲဉ်လꩻပိုခို ပိုခိုထွိုင်ႏအောဝ်ႏ မဲဉ်လꩻဖျင်ပိုမူႏ။(သတ္တဝါႏသီး ခြယ်ꩻပက်ခါꩻ ထာꩻလောဘ တနွောင်ꩻတောဝ်းခရာႏ။) ၁၀၉။ မဲဉ်လꩻဝင်ꩻရွဉ်တံႏ၊ မဲဉ်အံႏဝင်ꩻရွဉ်မွဉ်။ ၁၁၀။ မဲဉ်လꩻအဒီႏ ရိုႏသေႏအမွူး။(မဉ်ႏမဲဉ်လꩻဝင်ꩻတခြိုꩻ ဝင်ꩻပိုမူႏနဝ်ꩻ ရိုႏသေႏခံႏနွမ်ꩻသွော့ အဗွေႏအမွိုးအဖါ။) ၁၁၁။ မဲဉ်လꩻအယာႏ ကွီအဆွတ်ꩻ။(မဉ်လꩻအဟောဝ်အယံတဲင် အညံးအဖျင်ꩻ အကုဲင်။) ၁၁၂။ မဲဉ်အံႏ ဝွေါ့သွေ၊ မဲဉ်ခြွေ လူႏတန်ꩻ။ ၁၁၃။ မဲဉ်အုံကွူႏအဟေ့ꩻ၊ ပွေါးသွော့ ယာခိုးကို။ ၁၁၄။ မဲဉ်အုံတွိုက်ဗော့ꩻ မဲဉ်လောဝ်းစွော့ꩻတက်။ ၁၁၅။ မောင်ꩻတောဝ်းလဲ့ မော့ꩻ၊ ကော့ꩻတောဝ်းလဲ့ ခွဲး၊ ကံႏဖန်ႏနဲး။ ၁၁၆။ မောင်းတန် ထံႏထွူႏ၊ လိုꩻတန် ဒေါ့ꩻရွူႏ။ ၁၁၇။ မောင်းတန် ဒုံႏယပ်ꩻ၊ လိုꩻတန် ဒေါ့ꩻယပ်ꩻ။(ကီယိုနီပွုတ်နဝ်ꩻ လိုꩻတန်ထွူနဝ်ꩻ အာႏနာႏဒျာႏလဲ့ တဖဲ့ꩻ၊ ဒေါ့ꩻထွမ်ထေင်ချာဒါႏထာꩻလဲ့တမျိုꩻ၊ ရွို့ꩻရန်ႏချာဒါႏလိုꩻတဲ့ တစား၊ နောဝ်ꩻမꩻ ဒေါ့ꩻသွဉ်ဆွုံꩻမꩻတရုဲင်းတောဝ်း၊ တဗွိုန်ႏတောဝ်းသွူ။) ၁၁၈။ (က) မောင်းတန်သင်ႏစွဉ်ႏလဲ့ မောင်းပေႏ မဉ်ႏသင်ႏလွဉ်ꩻမꩻ အငဝ်းတလေ့လꩻ။ (ခ) မောင်းပေႏသင်ႏစွဉ်ႏလဲ့ မောင်းတန်မဉ်ႏသင်ႏလွဉ်ꩻမꩻ အငဝ်းတလေ့လꩻ။(လိုꩻပေႏတွမ်ႏလိုꩻတန် ခွန်ကွဉ်တွမ်ႏထံꩻသာꩻ လိုꩻပစ္စေꩻအဝ်ႏတွမ်ႏလိုꩻထာꩻရာꩻငထဝ်း မဉ်ႏညီႏညွတ်လွဝင်ꩻမꩻ ထာꩻမာꩻအောင်ႏမျင်ႏ ထွူသောဝ်ꩻလꩻသွူ။) ၁၁၉။ မောင်းပေႏလဲ့ ထူႏမောင်းတွီႏပေႏပေႏ ဒုံႏလေတ်ꩻ၊ မောင်းတန်လဲ့ ထူႏမောင်းတွီးတန်တန် ဒုံႏလေတ်ꩻ။(ထာꩻမာꩻအင်ႏတန်နောဝ်ꩻ လိုꩻတန်မဉ်ႏမာꩻမꩻ ထွာ၊ မာꩻမာꩻအင်ႏပေႏနဝ်ꩻ လိုꩻပေႏမာꩻငါလဲ့ အောဝ်ႏထွူဒျာႏ။)(တနဲꩻ- လိုꩻပေႏမာႏလဲ့သင်၊ လိုꩻတန်မာႏလဲ့သင် ထွားအခေႏအနေႏ ချင်းဖေႏပဲစ် ဖေႏတံႏဗာႏ။) ၁၂၀။ မောင်းမွူးတဆွိုင်ꩻ မောင်းတွန်ꩻတဖြုံႏ။(လိုꩻတဖြာꩻ မဉ်ႏကျ မဉ်ႏယံ မဉ်ႏဒါႏနောဝ်ꩻ တန်ႏလိုꩻအမျာꩻတဖုံႏ။) ၁၂၁။ မောင်းမွူးတသင်ႏတောဝ်း မောင်းဗဲင်ႏသင်ႏ။(ဆွိုင်ႏရာꩻလိုꩻတန် တဒေါ့ꩻသွဉ်တဝ်း၊ အုံယေန်တေ့ꩻထာꩻ၊ လိုꩻပေႏသမ်းလွေꩻဒေါ့ꩻသွဉ်ဝင်ꩻနောဝ်ꩻ အရေꩻအခြောင်ꩻ တတွိုႏတောဝ်း။) ၁၂၂။ မောင်းမွူးအဲဉ်ထောဝ်း သꩻအောဝ်ႏဟွိုင်ꩻ၊ မောင်းဆွိုင်ꩻအဲဉ်ေထာဝ်း သꩻအဝ်ႏပျောႏ။ ၁၂၃။ မောင်ႏတထမ်ႏ၊ မူႏတဗွိုတ်ꩻ။(မူႏတထေင်း) ၁၂၄။ မုံဆူႏ မုံေဗျာက်ꩻ၊ ဆုံဆူႏ ဆုံဗျောက်ꩻ။(နီလိုသတ္တဝါႏသီး သꩻသဖော်ꩻ အဟောဝ်အကုဲင် အညမ်းအဖျင်ꩻ အဖွီအထွူႏ အထင်အပုတ်ꩻနောဝ်ꩻ သဘာဝထွာလွဉ်ဒျာႏသွူ။) ၁၂၅။ မျင်ꩻမိုရ်ႏကောင်ဆွာꩻ၊ မာꩻကံတာ၊ ကောင်ႏကင်ꩻမို့ꩻဗွာ မတ်စေးလာႏ၊ ထီတန်သမုဒ္ဒရာႏ မာꩻမွိုက်ထီ။ ၁၂၆။ မွူးကဲင် ခွန်ပိုဆာ၊ လာကဲင် ခွန်ပိုသီ။ ၁၂၇။ မွူးခေ့ꩻ ထွာပြာ၊ မွူးယာ ထွာလီႏ။(နေးတွမ်ႏတံႏခိုꩻ၊ နောဝ်ꩻမွေးတဝ်းလဲ့ နေးတွမ်ႏဉာဏ်ႏတနျာႏ၊ ဉာဏ်ႏဖြေင်း၊ ဉာဏ်ႏကလိန်ႏကလဲ့တဲင် ဖန်ႏဆင်ꩻနမ်းအမျိုꩻမျိုꩻ ကြိုအစားစား၊ လွိုးအဒေါဝ်ႏဒေါဝ်ႏ။) ၁၂၈။ မွူးခေ့ꩻ မာꩻမွူးယာ၊ မွူးဟာ မာꩻမွူးရောဝ်ꩻ။(မေႏရောင်ႏ လေတဆောဝ် ထီႏစဲင်းငါႏတဲင် ဗွိုန်ပီစွဉ်ႏမွူးယာ၊ လိုꩻယဟန်ႏနောဝ်ꩻ မွူးယာနောဝ်ꩻဗေင်ႏ မွူးခေ့ꩻနောဝ်ꩻ မာꩻထာꩻမာꩻ။) ၁၂၉။ မွူးဒင်ႏလဲဉ်းကောင် အီႏပြေ့ꩻမုဲင်ꩻခါ တသေတောဝ်း။(ဖြားလဲဉ်းသွူ အီႏသီေစွာ့ꩻမုဲင်ꩻခါ တသေတဝ်း၊ အခိန်ႏအခါႏမွူးနီꩻ။) ၁၃၀။ မွူးနီꩻပေႏ တွိုက်ဒဲဉ်ကံ၊ မွူးနီꩻတန် တွိုက်ဝါႏဆိုႏ။ ၁၃၁။ မွူးပြေ့ꩻဆွူ တဗင်တာ၊ မွူးဟာဆွူ တဝါႏလာႏ၊ သဲင်ꩻတခါႏကနဲႏ။ ၁၃၂။ မွူးပြေ့ꩻသွူမꩻ ကွဲးလိုဗွူ၊ ပိတ်ထောင်ႏထွူလဲ့ တန်ꩻဒွိုႏတောဝ်း။(အရေꩻတွိုႏလဲဉ်း အခိန်ႏလွဉ်ꩻလဲဉ်းသွူမꩻ ကွဲးထွိုင်ႏဒေါ့ꩻငေါဝ်း၊ ကွဲးထွိုင်ႏမာꩻထာꩻမာꩻနောဝ်ꩻ တအောင်ႏမျင်ႏလꩻတောဝ်းသွူ။) ၁၃၃။ မွူးရောင်ႏထိုꩻမားပြေ့ꩻ၊ လာေရာင်ႏ ခေ့ꩻကရစ်ꩻ။ ၁၃၄။ မွူးရောင်ႏဗာႏတဲင် တဆံꩻထီသဲင်။ ၁၃၅။ မွူးဟာ ထွာဝါးစံꩻဖြောဝ်ꩻ၊ မွူးရောဝ်ꩻ ထွာဝါးတဗာ။(အဓိပ္ပါယ်ႏ ပီဗွိုန်ဝင်ꩻတွမ်ႏ နံပါတ်-၇၇ အွိုးကီနောဝ်ꩻသွူ။) ၁၃၆။ မွေးမꩻ ဒေါ့ꩻ၊ ရော့ꩻမꩻ ရိုꩻ၊ ဆိုꩻမꩻ အံႏ။ ၁၃၇။ မွိုးကဖေႏမဲ့နား အွဉ်ႏကုဲင်ချာ၊ ဖါကဖေႏစူခင်ႏ အွဉ်ႏကုဲင်ပြာႏ၊ နမ်းတွမ်ႏရွဉ် လုဲင်ႏအံႏဒျာႏ။ ၁၃၈။ မွိုးကဖေႏမဲ့ အွဉ်ႏထွား၊ ဖါကဖေႏနား အွဉ်ႏနာႏ၊ ထွားဒါႏဒါႏ နာႏခူခူ၊ ကျံႏစွဉ်ႏတခြွေခြာႏတောဝ်းလဲ့ တကေန်ꩻခြေားဗာႏတောဝ်းသွူ။ ၁၃၉။ မွိုးကရက်နဝ်ꩻ နေင်ႏပေါင်ꩻပနဲးအာ၊ ဖါကရက်နောဝ်ꩻ လာပေါင်ꩻပနဲးည၊ ယိုခါနောဝ်ꩻ ထုမ်ႏတခါႏခါႏခန်း နမ်းသွꩻနမ်းခွꩻ။(ဒါႏနသီႏလ) ၁၄၀။ မွိုးကလွူးလွဉ် ပေႏပေႏကို၊ ဖါကလွူးယို ပေႏပေႏတွင်ꩻ၊ မတ်စွဉ်ႏသဲင်ခမ်ꩻ ရက်လွိုသꩻ၊ ကအူꩻကနျꩻ ယွော့ဆဲင်ဖ၊ တန်လဲဉ်းသွူက ေသဖန်းနမ်း။ ၁၄၁။ မွိုးကလွူး ပိုဖုံႏအာ၊ ဖါကလွူး ပိုဖုံႏစွိုꩻ။ ၁၄၂။ မွိုးကလွူးနောဝ်ꩻ အောဝ်ႏတန်သဲင်ꩻစွုမ်ႏလာလာ၊ ဖါကလွူးနောဝ်ꩻ အဝ်ႏတန်သဲင်ꩻ စွုမ်ႏနီꩻနီꩻ၊ အရေꩻကကီꩻငါႏနောဝ်ꩻ အီႏဖြားတွက်။ ၁၄၃။ မွိုးငေါဝ်းခွန်းဆာ၊ ဖါေငါဝ်းခွန်းလျား။ ၁၄၄။ မွိုးထိုꩻနꩻနောဝ်ꩻ ဟဲ့ꩻတဆုဲင်၊ ဖါအွဉ်ႏကုဲင်နောဝ်ꩻ ဟဲ့ꩻတဆွူႏ။ ၁၄၅။ မွိုးဒေါ့ꩻတလာ၊ ဖါဒေါ့ꩻတနီꩻ။(မွိုးဖါသီး ဒေါ့ꩻသွဉ်ညစွဉ်ႏ ပဉ်လာလာတဲ့ တနေးနာႏတဝ်း၊ ပိုမာမဉ်ႏဒေါ့ꩻသွဉ်နောဝ်ꩻ တနီꩻတသာငါလဲ့ ကကျိုꩻစာꩻနေးနာႏ။) ၁၄၆။ မွိုးနောဝ်ꩻ လာ၊ ဖါနောဝ်ꩻ မွူး။ ၁၄၇။ မွိုးဖါ မီႏတရွို့ꩻနောဝ်ꩻ ပိုလီꩻသီးလဲ့ တစွို့ꩻတောဝ်းဒွုမ်။ ၁၄၈။ မွိုးဖါမဲ့ထီ မီႏရီႏလင်ꩻတစက်၊ ပိုလီꩻသီး အီႏယူႏပက်ဗာႏထာꩻတသက်။ ၁၄၉။ မွိုးဖြား ငင်းတကောင်ႏ ဒွိုႏဒါႏတဝ်းဒွုမ်ဒဲဉ်၊ ဖါြဖားငင်းတဖြဲင် ဒွိုႏဒါႏတောဝ်းဒွုမ်ဒဲဉ်ဟန်ႏ၊ အောဝ်ႏမဲဉ်လꩻလဲဉ်း ပနံပေႏ ဒွိုႏဒဲဉ်ဟန်ႏ။ ၁၅၀။ မွိုးမဉ်ႏခွန်း ဒေါ့ꩻချာ၊ ဖါမဉ်ႏခွန်း ဒေါ့ꩻပြန်ႏ၊ ခိုဗင်ႏမဉ်ႏခွန်း ပယွုမ်းတေ့ꩻ(ထဲင်း)။ ၁၅၁။ မွိုးမီႏခွန်း ဟွိုက်ꩻချာ၊ ဖါမီႏခွန်း ခြေင်ႏခွိုန်ꩻ။ ၁၅၂။ မီႏမဉ်ႏဟဲ့ꩻ ပဆဲမ်ႏတွာ၊ ဖါမဉ်ႏဟဲ့ꩻ ပဆဲင်ႏခင်ႏ၊ ခိုဗင်ႏမဉ်ႏဟဲ့ꩻ မာꩻသဲင်ꩻငေါဝ်းကျုက်ကျုက်။ ၁၅၃။ မွိုး ေမာက်ꩻဒံ၊ ဖါ မောက်ꩻလိန်ႏ၊ ပိုတစိန်ႏခွꩻ။(မွိုးဖါကျင်ꩻထွုံꩻစာရိတ္တ အဟောဝ်အကုဲင် အဝ်ႏနုဲင်းမုဲင်ꩻလဲ့ ပိုလီꩻသီးကျင်ꩻထွုံꩻစာရိတ္တ အောဝ်ႏလွဉ်ꩻနုဲင်းပီးနောဝ်ꩻ။) ၁၅၄။ မွိုးလုံးဒါ၊ ဖါလုံးခြဲက်။(လိုꩻပေႏမွိုးဖါ အဲဉ်ထောဝ်းနုဲင်းဝင်ꩻ၊ တဆွူႏတကျင်ပေႏ။) ၁၅၅။ မွိုးဝါးလွီး၊ ဖါဝါးကွူ၊ ပိုမူႏဝါးကဒီး။ ၁၅၆။ မွိုးအွဉ်ႏကုဲင်နောဝ်ꩻ ဟဲ့ꩻတဆွူႏ၊ ဖါအွဉ်ႏသူႏနောဝ်ꩻ ဟဲ့ꩻတဆုဲင်၊ ဝင်ꩻခိုဝင်ꩻမူႏ အွဉ်ႏကုဲင်နောဝ်ꩻ ဟဲ့ꩻထာꩻမုဲင်ꩻ။ ၁၅၇။ မွိုးအဲဉ်ထောဝ်း ဘဝဗွိုန်လာမား၊ ဖါအဲဉ်ထဝ်း ဘဗွိုန်ပါꩻကထောင်ယာလျား။ ၁၅၈။ (က) မွိုင်ꩻပျိုꩻကောလဲင်း နောင်ဟဲင်းကောယွိုႏ။ (ခ) မွိုင်ꩻပျိုꩻကောလဲင်း သီႏသဲင်ႏကေားယွိုႏ။ (လိတ်ပအိုဝ်ႏစခါဖုံႏနောဝ်ꩻ ဗွေႏဗွန်ဖြား ဆရာႏတောႏမွိုင်ꩻပျိုꩻ ဘွဲ့တောႏမဉ်ꩻ(ကဝိသာရ)ကောတဲမ်း အကျံꩻထွူတဲင်၊ ဗွေႏဗွန်ဖြား ဆရာႏတောႏနောင်ဟဲင်းလဲ့ဟဲ့ꩻ ဗွေႏဗွန်ဖြားသီႏသဲင်ႏလဲ့ဟဲ့ꩻနောဝ်ꩻ ကောတဲမ်းချော်ꩻ၊ ဖျင်ချော်ꩻဖေႏ လင်္ကာႏငေါဝ်းငွါ ဝေါဟာရဖုံႏ ရိုꩻပီးနောဝ်ꩻသွူ။)