မဉ်နာႏခမ်းငေါဝ်းငွါတွော့ꩻ

"မဉ်နာႏခမ်းသားငေါဝ်းငွါတွော့ꩻ လင်ꩻခွဲးခမ်းသားနဲ့၊ ထာꩻမဉ်လꩻ မဉ်ဒေါ့ꩻငေါဝ်းအဝ်ႏတွော့ꩻ လင်ꩻခွဲးခမ်သားနဲ့" ၂၀၁၅-လွိုက်ရွေꩻပွယ်ꩻကို ခမ်းသားသီး နွန်ႏထွာႏမုအာႏတဲင် ခမ်းထီယို လဲဉ်းပြောင်ꩻသော့ꩻတေားလုဲင်ႏ လိုꩻတစွိုꩻတစုတဗူႏစူကိုနဝ်ꩻသွူ။ အာႏဏာႏဗွေႏသီးစူကိုယို ကွပ်ခမ်းသားသီး ဗွိုႏအန်ꩻတစူꩻနွောင်ꩻတဝ်းဒွုမ်တဲင် ဒီမိုကရေသီစနစ် ကရိုꩻဒါႏ ခမ်းသားလွိုက်ဒင်ႏချာ ခမ်းသားအစိုႏရစနစ်ယို ခမ်းသားသီးလဲ့ မဉ်လꩻမဉ်ထွာ၊ ခမ်းကိုခမ်းထန်ႏ နဲင်ႏငံႏရေꩻသားသီး၊ ခမ်းပေါင်ꩻစွုမ်ႏအသောင်အရင်ꩻသီး နွန်ႏထွာႏအာႏတဲင် လွေꩻငါပြောင်ꩻလုဲင်ႏလွဉ်ခန်းဒျာႏ တရန်းတစိꩻစိꩻနဝ်ꩻသွူ။ အမျိုꩻသာꩻလွတ်တောႏကိုတွမ်ႏ ခမ်းသားလွတ်တောႏကို ခင်ႏလမ်းကဲဉ်းအာအာယို ကထွာအမျိုꩻသာꩻဒီမိုကရေသီအစွိုꩻချုပ် (NLD)ပါတီနဝ်ꩻ နွောင်ꩻတဲင် ထွို့ꩻဗူႏလွေꩻလꩻ အစိုႏရစွိုꩻနဝ်ꩻသွူ၊ နဝ်ꩻမꩻ (NLD)အစိုႏရယိုနဝ်ꩻ ထွာခမ်းသားထုလွိုက်ဒင်ႏချာ၊ ထွာခမ်းသားအစိုႏရနဝ်ꩻသွူ။ ခမ်းသားအစိုႏယို ကွပ်ခမ်းသားလွိုက်ဒင်ႏမꩻ ထွာထင်ႏလွဉ်တဲင် သေချာဗာႏခမ်းသားကေꩻဇူꩻ၊ အံႏသွင်ꩻချာဗာႏခမ်းသား ထွာဗာႏနုဲင်းနဝ်ꩻသွူ၊ အွဉ်ႏရေꩻဗာႏ ခမ်းသားဆန္ဒနဝ်ꩻသွူ။ ယဟန်ႏ အာႏဏာႏဗွေႏသားနဝ်ꩻ ခမ်းသားလွိုက်ဒင်ႏ ထွာထင်ႏလွဉ်ဒျာႏလဲ့ သေတဝ်းခမ်းသားကေꩻဇူꩻ၊ အံႏသွင်ꩻတဝ်းခမ်းသား၊ အွဉ်ႏရေꩻတဝ်းခမ်းသားဆန္ဒထွူတကာႏတဝ်း ထင်းဒျာႏနုဲင်းခေတ်အလီꩻတဲင် လောက်ꩻထဲင်းခမ်းသား၊ ဒိုႏထဲင်းခမ်းသား၊ ခမ်းသားသꩻဆန္ဒတပါတဝ်းလဲ့ မာꩻနွိုင်ႏနွိုင်ႏနေးနဝ်ꩻ ဒီမိုကရေသီစနစ်အစိုႏရကို အဝ်ႏလိုႏထွာသင်ꩻတဝ်းဒွုမ်နဝ်ꩻသွူ။ ထွာမုဲင်ꩻနဲးတဲင် မန်းခမ်းထီယို မဉ်ႏလွေꩻသွုပ်သွုပ်သွူ တွမ်ႏဒီမိုကရေသီတဲ့နဝ်ꩻ၊ ၂၀၀၈-အခေႏခံႏဥပဒေႏကိုတဲ့နဝ်ꩻ လွိုက်ရွေꩻပွယ်ꩻဖုံႏယို ငတ်ꩻနေင်ႏတလဲင်ႏ မာꩻလွေꩻဗာႏပုံႏမဲဉ်ႏနဝ်ꩻသွူ၊ ခမ်းသားအစိုႏရယို ငတ်ꩻနေင်ႏတလဲင်ႏ ပြွတ်ဗာႏပုံႏမဲဉ်ႏနဝ်ꩻသွူ၊ ခမ်းသားသီး လွတ်တောႏနမ်းခြောင်ꩻယို ငတ်ꩻနေင်ႏတလဲင်ႏ လွိုက်ဒင်ႏဗာႏပုံႏမဲဉ်ႏနဝ်ꩻသွူ။ နဝ်ꩻမꩻ လွိုက်ဒင်ႏပွယ်ꩻယို ထွူတလဲင်ႏတမွေးတဝ်းတဲင် တွမ်ႏထာꩻယွုမ်းအံႏမုဗွေဗွေ ခမ်းသားသီးကအွဉ်ႏထွာ နမ်းခြောင်ꩻယို အဝ်ႏလိုႏထွာဖေႏမွေးမွေးငါႏ ခမ်းသားနမ်းခြောင်ꩻ အစဲစ်အမဲဉ်ႏနဝ်ꩻသွူ။ အဝ်ႏလိုႏထွာတဝ်း ခမ်းသားနမ်းခြောင်ꩻ အတုအယောင်ႏနဝ်ꩻသွူ၊ ခမ်းသားထာꩻထောက်ခံႏ လွိုက်ဒင်ႏယို နွို့ထူႏအီဒျာႏ လွတ်တောႏလာတာႏနုဲင်းနဝ်ꩻလဲ့ အဝ်ႏလိုႏထွာသင်ꩻတဝ်းသွူ။ ၂၀၁၅-လွိုက်ရွေꩻပွယ်ꩻထွူမာꩻလွဉ်ယို အစိုႏစွိုꩻတသာအနေႏ ထွာထင်ႏစတဲင် ဖျင်ဆင်မုဖုံႏ၊ မာꩻလွေꩻခမ်းထီညိမ်ꩻချမ်ꩻရေꩻဖုံႏနဝ်ꩻ အခြောင်ꩻလွေꩻအင်းတူႏအင်းတန်ႏဒျာႏနဝ်ꩻသွူ၊ အစိုႏရစွိုꩻတသာအနေႏ သက်တန်ꩻငတ်ꩻနေင်ႏကာလ အတောႏတွင်ꩻကို ခမ်းသားသီး ကအွဉ်ႏဒျာႏ ထာꩻယွုမ်းအံႏမုအတွိုင်ꩻ အီႏမာꩻလွေꩻဖေႏနွောင်ꩻတခွုင်းမုဲင်ꩻ၊ ခမ်းထီထင်ႏထိုရေꩻ အီႏတွိုႏခြောင်ꩻလွေꩻတခွုင်းမုဲင်ꩻကရိုꩻနဝ်ꩻ ပွေါးထွားလွေꩻဗာႏဒွုန်းကနဝ်ꩻသွူ။ နုဲင်းကတဲမ်းဒျာႏ လိတ်ပွိုက်ကီယိုဖုံႏအတွိုင်ꩻ ခမ်းသားတွမ်ႏခမ်းသားနမ်းခြောင်ꩻအခါႏ(မွေးတဝ်းလဲ့)ခမ်းသားတွမ်ႏ ခမ်းသားအစိုႏရအခါႏယို ဖေႏကတယ်ႏဆို့ꩻလꩻလꩻနွောင်ꩻ ထာꩻယွုမ်းအံႏမုနဝ်ꩻ အရေꩻတန်ငါႏသွူ၊ ခမ်းသားကလွိုက်ဒင်ႏဗာႏယို မဉ်ႏထီႏချာ မာꩻဖေႏခမ်းသားအကျိုꩻတဲင် ခမ်းသားကေႏနပ်မု ဖေႏကအဝ်ႏတဲ့နဝ်ꩻ၊ အတာႏဆွာꩻ လွိုက်ရွေꩻပွယ်ꩻအသွုပ်သွုပ်ယို ထာꩻယွုမ်းအံႏမု ဖႏေကအဝ်ႏလွေꩻတသေႏသေႏတဲ့နဝ်ꩻ တွမ်ႏသꩻစေႏတနာႏအမွေးအမဲဉ်ႏ မဉ်မာꩻဖေႏဒျာႏ ခမ်းသားအကျိုꩻတဲင် နွို့ပြဲင်ႏလꩻလွဉ်တွော့ꩻ မာꩻဖေႏတဲ့နဝ်ꩻ၊ လွတ်တောႏနမ်းခြောင်ꩻ ယဟန်ႏသားနဝ်ꩻ အုံခြေင်ဗာႏဒွုမ် လွေꩻစွုမ်ႏနီꩻနီꩻ၊ လင်ꩻခွဲးဒေႏသခံႏသား တရပ်ထွူတရပ်၊ တထွောင်းထွူတထွောင်း ခမ်းသားအတာႏ ထီႏချာဗာႏနဝ်ꩻ ဟွုန်အကျိုꩻအဝ်ႏငါႏသွူ။ နဝ်ꩻမꩻ ပါတီလင်၊ ဝင်ꩻနယ်ႏလင်၊ လွတ်တောႏနမ်းခြောင်ꩻအလင်သီးနဝ်ꩻ လင်ꩻမော့ꩻခွဲး ခမ်းသားသီးအခါႏတွော့ꩻ ခမ်းသားသီးအငေါဝ်းဖုံႏယို လင်ꩻနာႏဟွုန်ဖေႏနဝ်ꩻသွူ၊ ခမ်းသားသီး အလိုႏထမုဲင်ꩻကရိုꩻနဝ်ꩻ ဖေႏကသေထွꩻနွောင်ꩻ လင်ꩻခွဲးလင်ꩻအုံကိုမ် မာꩻလွေꩻနုဲင်းနဝ်ꩻသားလဲ့ အဝ်ႏထီႏဗာႏနဝ်ꩻသွူ။ ပအိုဝ်ႏနမ်းပဲင်ႏအုပ်ချုပ်ခွင်ꩻလꩻ သိုမ်ဝေင်ꩻနယ်ႏကို ခမ်းသားလွိုက်ဒင်ႏတွော့ꩻ ကထွာထင်ႏဒျာႏ ပအိုဝ်ႏလတ်တောႏနမ်းခြောင်ꩻသီး လင်ꩻခွဲးလဲဉ်းခမ်းသား ခမုဲင်ꩻလဲင်ႏ၊ မဉ်နာႏခမ်းသားငေါဝ်းတွော့ꩻ လင်ꩻနဲ့၊ မဉ်ဒေါ့ꩻငေါဝ်းတွော့ꩻ လင်ꩻနဲ့၊ ထာꩻမဉ်လꩻဒေႏသခံႏသားထျꩻအဝ်ႏတွော့ꩻ လင်ꩻနဲ့ဟောင်း။ ပအိုဝ်ႏခမ်းသားသီး လွိုက်ဒင်ႏဗာႏ ကေႏနပ်မု ဖေႏကအဝ်ႏတဲ့နဝ်ꩻ၊ အတာႏဆွာꩻ ထာꩻယွုမ်းအံႏမု ဖေႏကလꩻလွေꩻတသေႏသေႏတဲ့နဝ်ꩻ၊ တွမ်ႏစေႏတနာႏမဲဉ်ႏ မာꩻမွေးဒျာႏတဲ့နဝ်ꩻ မဉ်ႏအဝ်ႏလိုႏမꩻ လင်ꩻခွဲးခမ်းသား ဖေႏကထွာဗာႏမွုန်းနဝ်ꩻ အဝ်ႏလိုႏလင်ꩻနာႏဖေႏဗဲင်းငါႏ ခမ်းသားသီး သꩻရာႏငေါဝ်းငွါနဝ်ꩻသွူ။