မဉ်ႏရက်မွေးလိုꩻမျိုꩻ

'"မဉ်ႏရက်မွေးလိုꩻမျိုꩻတွမ်ႏခမ်းထီ" မဉ်ႏဒေါ့ꩻခြုဲင်းနယ်ဗာႏ စင်္ကာပူခမ်း အခရာႏအဲဉ်ႏအဲဉ်ႏပေႏနောတ်ꩻ စင်္ကာပူခမ်းယို ပေႏကဲꩻလဲဉ်းထဲင်းက ပအိုဝ်ႏနမ်းပဲင်ႏအုပ်ချွုတ်ခွင်ꩻလꩻ ဟံႏနယ်ႏနောဝ်ꩻသွူ။ စင်္ကာပူခမ်းအအဲဉ်ႏအလုဲင်းနောဝ်ꩻ အနားဆွာꩻဖဲ့ꩻ (အလျား)အောဝ်ႏ ၄၂-ကီလိုမီတာ (၂၅)မဲင်ႏ၊ အနာႏဒွေါင်ႏဖဲ့ꩻ (အနံ)အောဝ်ႏ ၂၃-ကီလိုမီတာ (၁၄)မဲင်ႏနောဝ်ꩻသွူ၊ တခမ်းလွုမ်း အအဲဉ်ႏအလုဲင်းနောဝ်ꩻ အနားဆွာꩻဖဲ့ꩻ(အလျား)အောဝ်ႏရန်ႏကွုန်ႏ ဗꩻလွေꩻလှည်းကူး၊ အောဝ်ႏသန်လျင် ဗꩻလွေꩻမှော်ဘီနောဝ်ꩻသွူ၊ စင်္ကာပူခမ်း ပင်ႏလယ်ႏဖင်ႏအဆွာꩻနဝ်ꩻ အောဝ်ႏ ၁၃၇၇-ကီလိုမီတာတဲင် စုစုခြွဉ်း တခမ်းလွုမ်း ဧရိယာႏအအဲဉ်ႏအလုဲင်းနောဝ်ꩻ အောဝ်ႏစတုရန်းကီလိုမီတာပေါင်ꩻ ၆၂၃-၆ (၂၀၇-စတုရန်းမဲင်ႏ)နောဝ်ꩻသွူ။ စင်္ကာပူခမ်းနောဝ်ꩻ သဘာဝအရွီးအခိုႏ ထာꩻမုဲင်ꩻမုဲင်ꩻထန်ႏတောဝ်း၊ မဉ်ႏဒေါ့ꩻဗာႏငေါဝ်းလို့လို့နောဝ်ꩻ ပေါႏလွိုတဲင်"လိုꩻ"နောဝ်ꩻ ထာꩻမုဲင်ꩻမုဲင်ꩻထန်ႏတဝ်း၊ စင်္ကာပူခမ်းယို "ဟံႏကိုဟံႏထန်ႏ"သယံဇာတ အရွီးအခိုႏယို အွဉ်ႏထွာစွဉ်ႏ"လိုꩻ"တွော့ꩻ အဟဝ်သွတ်ꩻ ဖေႏကထွာလွဉ် ကွန်ႏချော်ꩻနောဝ်ꩻ လိုꩻတွိုင်ꩻစွုမ်ႏဖြာꩻ ဖေႏနေးကဒါႏလိတ် ကထွာခေါင်းဆောင်တန် လီကွမ်ယုယို ဖေႏအာႏအွဉ်ႏသွဉ်မွေးစွဉ်ႏလိတ်၊ ယိုခါ အခေါဝ်ကွဉ်ႏနောဝ် အာရှ(၁၀)နဲင်ႏငံႏကိုနောဝ်ꩻ စင်္ကာပူခမ်းယို တိုꩻတက်ထင်ႏထိုလဲဉ်းဝင်ꩻသွူ။ နီပအိုဝ်ႏဒေႏသဟံႏနယ်ႏယိုနောဝ်ꩻ လုဲင်းလဲဉ်းထဲင်းက စင်္ကာပူခမ်းသွူတကာႏတောဝ်း ဟံႏယာႏလုပ်ꩻမာꩻသော့ꩻလဲ့ လွိုင်ႏ၊ သယံဇာတယိုလဲ့ ထန်ႏအာတဲင် နီပအိုဝ်ႏလိုꩻမျိုꩻယို ဖေႏကတိုꩻတက်နုဲင်း စင်္ကာပူခမ်းနဝ်ꩻ အောဝ်ႏလိုႏသွဉ်မွေးမွေးပညာႏ၊ အောဝ်ႏလိုႏကျိုꩻစာꩻလုပ်ꩻမာꩻဖြေꩻစာကူꩻကားယံယံသွော့ စီꩻပွာꩻရေꩻဖုံႏနောဝ်ꩻသွူ။ ကွပ်နောဝ်ꩻမꩻ မဉ်ႏရက်ချာနီခမ်းနောဝ်ꩻ သွဉ်ကုဲင်းကုဲင်းသွော့လိတ်၊ ဟော်ꩻကုဲင်းကုဲင်းသွော့လိတ်၊ မဉ်ႏရက်မွိုးဖါနောဝ်ꩻ သွဉ်ကုဲင်းကုဲင်းသွော့လိတ်၊ ဟော်ꩻကုဲင်းကုဲင်းသွော့လိတ်၊ မဉ်ႏရက်လိုꩻမျိုꩻတွမ်ႏခမ်းထီနောဝ်ꩻ သွဉ်ကုဲင်းကုဲင်းသွော့လိတ်၊ ဟော်ꩻကုဲင်းကုဲင်းသွော့လိတ်၊ လိုꩻတဖြာꩻအနေႏတရိုꩻတောဝ်း၊ လိုꩻမျိုꩻတမျိုꩻအနေႏတရိုꩻတောဝ်း အောဝ်ႏလိုႏဒါႏငါႏလိတ်သွူ။ လိုꩻယို ကွပ်စွဉ်ႏထာꩻသေပညာႏအောဝ်ႏတဲင် ထွဉ်ႏအံႏလꩻတိရစ္ဆာန်ႏသွူတကာႏတောဝ်း လိုꩻအချင်ꩻချင်ꩻကိုလဲ့ ပညာႏတန်သားနောဝ်ꩻ ဒို့ꩻတခြို့နွောင်ꩻပညာႏဆေ့ꩻသား၊ မဉ်ႏမဲဉ်ပင်ႏတသွောင်းထိုမွေး၊ မဉ်ႏမဲဉ်ထိန်ꩻထွားမွေး နီလိုꩻမျိုꩻတွမ်ႏခမ်းထီနောဝ်ꩻ ကျိုꩻစာꩻသွဉ်ထူႏ ဖေႏအာႏမွေးမွေးသွော့ပညာႏရေꩻကရိုꩻနောဝ်ꩻ ဒင်ႏပျꩻနယ်လွေꩻဗာႏ တွမ်ႏရွမ်ဖြုဲင်ꩻယိုနောဝ်ꩻသွူ။