မဟာပဒေသလစ်ꩻပါꩻ

ဗွေႏဘုရာꩻတွမ်ႏသံႏဃာႏ အပါꩻပေါင်ꩻအာအာ ကျွꩻတွိုႏလွေꩻ ဘောဂဝေင်ꩻ၊ ဗွေႏဘုရာꩻသတင်ꩻသုံꩻအုံခန်း အာနန္ဒာႏစေႏတီႏ၊ ဗွေႏဘုရာꩻ ဟဲ့ꩻရဟန်ꩻဖုံႏထွူတဲင် “ရဟန်ꩻသီးဖုံႏ- အီႏဟော်ꩻနယ်ဖေႏ မဟာပဒေသလစ်ꩻပါꩻဖုံႏ၊ နာႏလွသွော့ဟုဲင်း၊ သွင်ꩻသော့ꩻသꩻကို လုဲင်း၊ အီႏဟော်ꩻဖေႏယို”၊ ရဟန်ꩻဖုံႏလဲ့ “မွေးသွူ ဗွေႏဩ”လဝ်းချာဗွေႏဘုရာꩻနုဲင်းနဝ်ꩻသွူ။ ရဟန်ꩻသီးဖုံႏဟွေး- သာႏသနာႏတောႏယိုအကို ရဟန်ꩻတပါꩻနဝ်ꩻ အရိုꩻနုဲင်းယိုတဲ့ “ဩဗွေႏသီးဖုံႏဟွေး- တရာꩻယိုနဝ်ꩻ ခွေသွဉ်း နာႏဗာႏဗွေႏဘုရာꩻငါ၊ (ဗွေႏဘုရာꩻထျꩻ)၊ တောင်ꩻခါꩻဗာႏဘုရာꩻထျꩻ၊ (ခွေသွဉ်းကနာႏခါꩻဒါႏ တရာꩻယိုနဝ်ꩻ) ဓမ္မအစဲစ် ဒျာႏဗွေႏဩ၊ ဝိနယ်ꩻ အစဲစ်ဒျာႏဗွေႏဩ၊ ဘုရာꩻအသွဉ်အသင် အဆုံꩻမꩻစဲစ်ဒျာႏဗွေႏဩ”ဒေါ့ꩻခန်းနုဲင်းနဝ်ꩻ။ (ရဟန်ꩻသီးဖုံႏဟွေး- ရဟန်ꩻနဝ်ꩻကဒေါ့ꩻဒါႏငဝ်းယို နစ်သက်တဲ့ တွမ်ႏနစ်သက်စွဉ်ႏမွုန်းတဝ်းဒွိုန်း၊ ရဲတဲ့တွမ်ႏရဲစွဉ်ႏမွုန်းတဝ်း ဒွိုန်း၊ နစ်သက်စွဉ်ႏဒွိုန်း’ ရဲးစွဉ်ႏမွုန်းဒွိုန်းတဲင် တောင်ꩻခါꩻဟဝ်ဟဝ်အငဝ်းရာႏ’ အဓိပ္ပါယ်ႏဖုံႏထွူတွော့ꩻ နေးတွမ်ႏဉာဏ်ႏ သွင်ꩻသော့ꩻစံꩻ သုတ္တန်ႏပါဠိတောႏကို’ အဘိဓမ္မာႏပါဠိတောႏကို၊ ဝိနယ်ꩻပါဠိတောႏကိုထွူတဲက် ခိဉ်ႏတဲက်ထွားစံꩻဗာႏ၊ တွမ်ႏဉာဏ်ႏ သွင်ꩻသော့ꩻ သုတ္တန်ႏ’ သွင်ꩻသော့ꩻအဘိဓမ္မာႏ’ သွင်ꩻသော့ꩻဝိနယ်ꩻကိုထွူ မဉ်ႏတပါသော့ꩻတဝ်း၊ မဉ်ႏတစဲင်းထင်ႏသျာꩻသော့ꩻတဝ်းနဝ်ꩻ ဆုံꩻဖျတ် သွော့နုဲင်းယို “ငဝ်းယိုနဝ်ꩻ ဗွေႏဘုရာꩻငဝ်းလဲ့ တမွေးတဝ်း၊ ရဟန်ꩻယိုတပါꩻ အနာႏစဲင်းစဲင်းခါꩻတဝ်းဒျာႏ”အွဉ်ႏ ထွော့နုဲင်း နဝ်ꩻထွူတွော့ꩻ ငဝ်းနဝ်ꩻနဝ်ꩻ (ဝွေꩻဗွေႏကဒေါ့ꩻနဝ်ꩻ) စွဉ်ꩻထိုꩻလွသွော့နော။ သုတ္တန်ႏ’အဘိဓမ္မာႏ’ဝိနယ်ꩻဖုံႏအကို မဉ်ႏအဝ်ႏပါဒျာႏ၊ မဉ်ႏထင်ႏသျာꩻဒျာႏက ရိုꩻနဝ်ꩻလဲ့ “ယိုနဝ်ꩻ ဘုရာꩻငဝ်းမွေးဒျာႏ၊ ရဟန်ꩻယို နာႏစဲင်းစဲင်းသေꩻခါꩻ ဟဝ်ဟဝ်ဒျာႏမွော့ဟွေး”အွဉ်ႏထွော့ နုဲင်းနဝ်ꩻတွော့ꩻ ရဟန်ꩻသီး ဖုံႏ အီပါတောင်ꩻခါꩻလွသွော့ငဝ်းနဝ်ꩻဖုံႏနေား။ (ပထမမဟာပဒေသ) ရဟန်ꩻသီးဖုံႏဟွေး- သာႏသနာႏတောႏယိုအကို ရဟန်ꩻတပါꩻနဝ်ꩻ အရိုꩻနုဲင်းယိုတဲ့ “ဩဗွေႏသီးဖုံႏဟွေး- ကျောင်ꩻမဉ်ꩻနုဲင်း ယိုကို တွမ်ႏမထေရ်ႏတန်ဖုံႏ’ တွမ်ႏအတန်အကဲႏ သံႏဃာႏဖုံႏအဝ်ႏအုံ၊ တရာꩻယိုနဝ်ꩻ ခွေသွဉ်း နာႏဗာႏသံဃာႏနဝ်ꩻအငါ၊ (ဗွေႏသံႏဃာႏ နဝ်ꩻထျꩻ)၊ တောင်ꩻခါꩻဗာႏသံႏဃာႏနဝ်ꩻထျꩻ၊ (ခွေသွဉ်းကနာႏခါꩻဒါႏ တရာꩻယိုနဝ်ꩻ) ဓမ္မအစဲစ်ဒျာႏဗွေႏဩ၊ ဝိနယ်ꩻအစဲစ်ဒျာႏဗွေႏဩ၊ ဘုရာꩻအသွဉ်အသင် အဆုံꩻမꩻစဲစ်ဒျာႏဗွေႏဩ”ဒေါ့ꩻခန်းနုဲင်းနဝ်ꩻ။ (ပ) (ဒုတိယမဟာပဒေသ) ရဟန်ꩻသီးဖုံႏဟွေး- သာႏသနာႏတောႏယိုအကို ရဟန်ꩻတပါꩻနဝ်ꩻ အရိုꩻနုဲင်းယိုတဲ့ “ဩဗွေႏသီးဖုံႏဟွေး- ကျောင်ꩻမဉ်ꩻနုဲင်း ယိုကို ဗဟုသုတလဲ့ကအာလွဒါႏ၊ ဒါႏအိုမ်လွစွဉ်ႏ ပရိယတ္တိဓမ္မဖုံႏ၊ ဆောင်ႏအိုမ်နွောင်ꩻစွဉ်ႏ သုတ္တန်ႏ’အဘိဓမ္မာႏဖုံႏ၊ ဆောင်ႏအိုမ်နွောင်ꩻ ဝိနယ်ꩻဖုံႏ၊ ဆောင်ႏနွောင်ꩻမာတိကာႏ မထေရ်ႏအာတန်ဖုံႏနဝ်ꩻ အဝ်ႏအုံသော့ꩻလွ၊ တရာꩻယိုနဝ်ꩻ ခွေသွဉ်း နာႏဗာႏသံဃာႏနဝ်ꩻအငါ၊ (ဗွေႏသံႏဃာႏနဝ်ꩻထျꩻ)၊ တောင်ꩻခါꩻဗာႏသံႏဃာႏနဝ်ꩻထျꩻ၊ (ခွေသွဉ်းကနာႏခါꩻဒါႏ တရာꩻယိုနဝ်ꩻ) ဓမ္မအစဲစ်ဒျာႏဗွေႏဩ၊ ဝိနယ်ꩻအစဲစ် ဒျာႏဗွေႏဩ၊ ဘုရာꩻအသွဉ်အသင် အဆုံꩻမꩻစဲစ်ဒျာႏဗွေႏဩ”ဒေါ့ꩻခန်းနုဲင်းနဝ်ꩻ။ (ပ) (တတိယမဟာပဒေသ) ရဟန်ꩻသီးဖုံႏဟွေး- သာႏသနာႏတောႏယိုအကို ရဟန်ꩻတပါꩻနဝ်ꩻ အရိုꩻနုဲင်းယိုတဲ့ “ဩဗွေႏသီးဖုံႏဟွေး- ကျောင်ꩻမဉ်ꩻ နုဲင်းယိုကို ဗဟုသုတလဲ့ကအာဒါႏ၊ ဒါႏအိုမ်စွဉ်ႏ ပရိယတ္တိဓမ္မဖုံႏ၊ ဆောင်ႏအိုမ်နွောင်ꩻစွဉ်ႏသုတ္တန်ႏ’အဘိဓမ္မာႏဖုံႏ၊ ဆောင်ႏအိုမ်နွောင်ꩻ ဝိနယ်ꩻဖုံႏ၊ ဆောင်ႏနွောင်ꩻမာတိကာႏ မထေရ်ႏတပါꩻနဝ်ꩻ အဝ်ႏအုံသော့ꩻ၊ တရာꩻယိုနဝ်ꩻ ခွေသွဉ်း နာႏဗာႏမထေရ်ႏနဝ်ꩻအငါ၊ (ဝွေꩻဗွေႏနဝ်ꩻထျꩻ)၊ တောင်ꩻခါꩻဗာႏဝွေꩻဗွေႏနဝ်ꩻထျꩻ၊ (ခွေသွဉ်းကနာႏခါꩻဒါႏ တရာꩻယိုနဝ်ꩻ) ဓမ္မအစဲစ်ဒျာႏဗွေႏဩ၊ ဝိနယ်ꩻအစဲစ်ဒျာႏ ဗွေႏဩ၊ ဘုရာꩻအသွဉ်အသင် အဆုံꩻမꩻစဲစ်ဒျာႏဗွေႏဩ”ဒေါ့ꩻခန်းနုဲင်းနဝ်ꩻ။ (ပ) (စတုတ္ထမဟာပဒေသ)