မဉ်ႏငမ်းထာꩻယူႏရတနာႏသွံပါꩻ
"ဓဇဂ္ဂသုတ် (ပေါႏမဉ်ႏငမ်းထာꩻ ယူႏဘုရာꩻတရာꩻသံႏဃာႏ)"
"ရဟန်ꩻသီးဖုံႏဟွေး- ခွေအီႏခြုဲင်းနယ်ကသီ မော့ꩻလဲင်ႏစခါ ကထွာဖိုဒါႏ 'လူꩻတွမ်ႏအသုရာႏ'သီး တွိုက်ꩻလို့တဝင်ꩻအကျောင်ꩻ၊ ခွန်သိကျာꩻနဝ်ꩻ ရိုꩻဖေႏ စဲ့ꩻသားပေႏလူꩻဖုံႏနုဲင်းယို- "သꩻအာႏဇာႏနီႏ အဝ်ႏသေႏသေႏ လူꩻစဲ့ꩻပေႏဖုံႏဟွေး- မဉ်ႏတွိုႏစဲ့ꩻတလင်ꩻကိုသူꩻ 'မဉ်ႏငမ်း၊ မဉ်ႏတနွော့ꩻ၊ တဒိုမ်ႏမဉ်ႏထွိုင်ႏစိန်ႏစွော့ꩻနဝ်ꩻ ထွားသွော့ ခွေအလံႏတောႏနဝ်ꩻလုဲင်း၊ ပေါႏထွားခွေအလံႏတောႏနဝ်ꩻ ထာꩻငမ်း၊ ထာꩻတနွော့ꩻ၊ တဒိုမ်ႏထွိုင်ႏထိုꩻမား'လို့။ မဉ်ႏထွားတဝ်း ခွေအလံႏတောႏတဲ့ ထွားတောသွော့ 'ခွန်လူꩻပဇာပတိ'အလံႏတောႏ၊ 'ခွန်လူꩻဝရုဏ'အလံႏတောႏ၊ 'ခွန်လူꩻဤသာန'အလံႏတောႏ၊ (တလံႏလံႏ)ဖုံႏနဝ်ꩻနော၊ ပေါႏသီထွားအလံႏတောႏ(တလံႏလံႏ)နဝ်ꩻ 'ထာꩻငမ်း၊ ထာꩻတနွော့ꩻ၊ တဒိုမ်ႏထွိုင်ႏထိုꩻမား'လို့ ဖေႏအာႏအလိုꩻ ရိုꩻနုဲင်းနဝ်ꩻသွူ။ "ရဟန်ꩻသီးဖုံႏဟွေး- ထွားခွန်သိကျာꩻ အလံႏတောႏတဲ့နဝ်ꩻ၊ ခွန်ခွန်လူꩻပဇာပတိ အလံႏတောႏတဲ့နဝ်ꩻ၊ ထွားခွန်လူꩻဝရုဏအလံႏတောႏတဲ့နဝ်ꩻ၊ ထွားခွန်လူꩻဤသာနအလံႏတောႏတဲ့နဝ်ꩻ ထာꩻငမ်း၊ ထာꩻတနွော့ꩻ၊ တဒိုမ်ႏထွိုင်ႏ-တထိုꩻမားတဝ်း၊ ကွပ်ပွိုးထမုဲင်ꩻနဲတဲင်- သက္ကော ဒေဝါနမိန္ဒော - ခွန်သိကျာꩻနဝ်ꩻ - အဝီတရာဂေါ - တပယ်ႏနွောင်ꩻတဝ်းဒွိုန်းရာဂ - အဝီတဒေါသော - တပယ်ႏနွောင်ꩻတဝ်းဒွိုန်းဒေါသ - အဝီတမောဟော - တပယ်ႏနွောင်ꩻတဝ်းဒွိုန်းမောဟ - ထာꩻငမ်း၊ နမ်းတနွော့ꩻ၊ သꩻဝꩻစွော့ꩻ-လွင်းဗာႏနေကပါꩻ။ ရဟန်ꩻသီးဖုံႏဟွေး- ခွေတဲ့း ရိုꩻဒျာႏနုဲင်းယို- တခြာကိုတရိုꩻတဝ်း၊ သေင်ႏမွူးဆလတရိုꩻတဝ်း၊ ထာꩻယေန်ယေန်ကိုတရိုꩻတဝ်း (သီအုံတရာꩻတွင်ꩻ) 'ထာꩻငမ်း၊ သꩻဝꩻ၊ တဒုမ်ႏထူ'မဉ်ႏထွာစိန်ႏစွော့ꩻနဝ်ꩻ ယူႏသွော့ဘုရာꩻခွေဂွုဏ်ႏ၊ ယူႏသွော့တရာꩻဂွုဏ်ႏ၊ ယူႏသွော့ သံဃာႏဂွုဏ်ႏဟုဲင်း၊ ပေါႏယူႏဘုရာꩻ တရာꩻသံဃာႏဂွုဏ်ႏနဝ်ꩻ 'ထာꩻငမ်း၊ သꩻဝꩻ၊ တဒုမ်ႏထူ ထိုꩻမားဗာႏ'၊ ကွပ်ပွိုးထမုဲင်ꩻနဲတဲင်- - အရဟံ သမ္မာသမ္ဗုဒ္ဓေါ - ဘုရာꩻခွေယိုနဝ်ꩻ - ဝီတရာဂေါ - ပယ်ႏနွောင်ꩻထိုꩻလဲဉ်း-ရာဂ - ဝီတဒေါသော - ပယ်ႏနွောင်ꩻထိုꩻလဲဉ်း-ဒေါသ - ဝီတမောဟော - ပယ်ႏနွောင်ꩻထိုꩻလဲဉ်း-မောဟ - ထာꩻငမ်း၊ သꩻဝꩻ၊ တဒုမ်ႏထွူအဲဉ်ထဝ်း၊ လွင်းဗာႏတဝ်းပါꩻနောဝ်ꩻသွူ။ ရဟန်ꩻသီးဖုံႏဟွေး- ယူႏလꩻသွော့ ဘုရာꩻတရာꩻ သံဃာႏ(ဂွုဏ်ႏတောႏ) 'ပေါႏသီယူႏလꩻနဝ်ꩻ-ထာꩻငမ်း၊ သꩻဝꩻ၊ တဒုမ်ႏထူ'ထွာတောဝ်း" ဗွေႏစောဝ်းဘုရာꩻ မိန်းခါꩻနုဲင်းနောဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ ဓဇဂ္ဂသုတ်)[၁][၂]