မုသာဝါဒ
ဗွောင်နယ် မုသာဝါဒါ ဝေရမဏိခရာႏ
မွဉ်းဖျင်- မုသာ - ထာꩻ တမွေးတောဝ်း၊
- ဝါဒ - အွဉ်ႏဒေါ့ꩻ၊
- မုသာဝါဒ - အွဉ်ႏဒေါ့ꩻထာꩻတမွေးတဝ်း (ဒေါ့ꩻလဲဉ်ထာꩻ)။
"မုသာဝါဒ - အွဉ်ႏဒေါ့ꩻလဲဉ်ထာꩻ"ကရိုꩻနောဝ်ꩻ-
မွဉ်းဖျင်- တထီႏတဝ်းတဲ့ ရိုꩻထီႏ
- အောဝ်ႏထီႏသွူတဲ့ ရိုꩻထီႏတောဝ်း
- တဟွိုန်တောဝ်းရိုꩻဟွိုန်
- အောဝ်ႏဟွိုန်သွူတဲ့ ရိုꩻဟွိုန်တောဝ်း
- တအံႏလဲဉ်ဗာႏတောဝ်းတဲ့ ရိုꩻအံႏလဲဉ်ဗာႏ
- အံႏလဲဉ်ဗာႏသွူတဲ့ ရိုꩻအံႏလဲဉ်ဗာႏတောဝ်း
- တမာꩻဗာႏတောဝ်းတဲ့ ရိုꩻမာꩻဗာႏ
- အောဝ်ႏမာꩻဗာႏသွူတဲ့ ရိုꩻမာꩻတောဝ်း
- တသေတောဝ်းတဲ့ ရိုꩻသေ
- အောဝ်ႏသေသွူတဲ့ ရိုꩻသေတောဝ်း။
ဝင်ꩻအကျိုꩻစီꩻပွါꩻ ဖေႏနေးကကုဲင်တဲင် ဒေါ့ꩻလဲဉ်ထာꩻစတဲင်နုဲင်းနဝ်ꩻဖုံႏနဝ်ꩻဖုံႏ ထွာမုသာဝါဒ (အကုသိုလ်ႏကံႏ)လွဉ်းလွဉ်းနဝ်ꩻသွူ။
"ဝေရမဏိ-သျောင်ႏထိုꩻ (ဒေါ့ꩻလဲဉ်ထာꩻထာꩻ)"ကရိုꩻနောဝ်ꩻ-
မွဉ်းဖျင်နမ်း(ကိုႏတဲင်ႏ)တဲ့ ဒေါ့ꩻလဲဉ်တဝ်းထာꩻ၊ ဝင်ꩻတဲ့ ဝွေꩻတထွဉ်ႏဒေါ့ꩻလဲဉ်ထောဝ်းထာꩻ၊ မဉ်ႏသေ မဉ်ႏဟွိုန် ဝင်ꩻဒေါ့ꩻလဲဉ်ထာꩻတဲ့ ဆီꩻခါꩻရဲခါꩻ၊ ဖေႏဒေါ့ꩻလဲဉ်တောဝ်းထာꩻ၊ ဒေါ့ꩻလဲဉ်ထာꩻနုဲင်းနဝ်ꩻနဝ်ꩻ သꩻရေꩻတဝ်း၊ သဖော်ꩻတူႏတဝ်း၊ နစ်သက်တောဝ်း၊ ဟွိုန်ဟောဝ်တဝ်း၊ ကျွိုက်တဝ်း၊ ဝင်ꩻအကျိုꩻဖေႏနေးကကုဲင်တဲင် ပေါႏဒေါ့ꩻလဲဉ်ထာꩻနဝ်ꩻ ခံႏဗာႏအပဲစ်နုဲင်းယိုနုဲင်းယို သွဉ်သင်ဆွုံꩻမꩻ ချꩻနားဖေႏစတဲင်နုဲင်းနဝ်ꩻဖုံႏနဝ်ꩻ ထွာသျောင်ႏထိုꩻ (ထွာဒေါ့ꩻလဲဉ်တဝ်းထာꩻ)နောဝ်ꩻသွူ။
ဒေါ့ꩻလဲဉ်ထာꩻ(အံႏလဲဉ်ဝင်ꩻ)နဝ်ꩻ ဟောဝ်တောဝ်း၊ ထွာမုသာဝါဒ ဒုစရဲက်၊ ထွာအကျင်ꩻဟောဝ်တောဝ်း၊ ဒေါ့ꩻလဲဉ်တောဝ်းထာꩻ (အံႏလဲဉ်တောဝ်းဝင်ꩻ)နဝ်ꩻ ဟောဝ်၊ ထွာမုသာဝါဒ ဝေရမဏိ သုစရဲက်၊ ထွာအကျင်ꩻဟောဝ်နောဝ်ꩻသွူ။ "ဟောဝ်တောဝ်းနုဲင်းမုဲင်ꩻ၊ ဟောဝ်နုဲင်းမုဲင်ꩻ"နဲးတဲင်- လိုꩻကဒေါ့ꩻလဲဉ်ဒါႏထာꩻ (လိုꩻကအံႏလဲဉ်ဒါႏဝင်ꩻ)နဝ်ꩻ ဂုဏ်ႏသိက္ခာႏအဲဉ်ထဝ်း၊ ဝင်ꩻရိုႏသေႏတဝ်း၊ ဝင်ꩻကေႏညိုႏတဝ်း၊ ဒေါ့ꩻထာꩻတဲ့ ဩဇာႏအာႏဏာႏအဲဉ်ထဝ်း၊ ဒေါ့ꩻထာꩻတဲ့ ဝင်ꩻထီႏဖွီ၊ ဝင်ꩻသွင်ꩻဖွီ၊ ဝင်ꩻလွꩻထီႏအာ၊ သွꩻခွခြေား၊ ကွပ်ထာꩻဒေါ့ꩻ (ကွပ်ငေါဝ်း)တဲင် အဗွေႏတဲ့ မော့ꩻအီဒါႏ ထာꩻဒုက္ခ၊ ဝင်ꩻလင်တဲ့ မော့ꩻလွဉ်ꩻအီဒါႏ ထာꩻဒုက္ခ၊ ဘဝငါသူꩻတဲ့ ထဲ့ဗာႏငါးရုဲင်ꩻ စတဲင်နုဲင်းနဝ်ꩻဖုံႏသွူ၊ ကွပ်နောဝ်ꩻမꩻ ဒေါ့ꩻလဲဉ်ထာꩻ (အံႏလဲဉ်ဝင်ꩻ)နောဝ်ꩻ ဟောတ်တောဝ်းနောဝ်ꩻသွူ။
မဉ်ႏဒေါ့ꩻလဲဉ်တောဝ်းထာꩻ (မဉ်ႏအံႏလဲဉ်တောဝ်းဝင်ꩻ)နောဝ်ꩻ ဂုဏ်ႏသိက္ခာႏတဲ့အောဝ်ႏ၊ ဝင်ꩻရိုႏသေႏ၊ ဝင်ꩻကေႏညိုႏ၊ ဒေါ့ꩻထာꩻတဲ့ ဩဇာႏအာႏဏာႏအောဝ်ႏ၊ ဒေါ့ꩻထာꩻတဲ့ ဝင်ꩻယွုမ်း၊ ထွာနွောင်ꩻ အဓိပတိ လိုꩻတန်တဖြာꩻ၊ ဝင်ꩻထီႏဖွီတောဝ်း၊ ဝင်ꩻအံႏသွင်ꩻ၊ လိုꩻစိုမ်ꩻအာ သွꩻခွလွိုင်ႏ၊ ကွပ်ထာꩻဒေါ့ꩻ (ကွပ်ငဝ်းမွေးငွါမဲဉ်ႏ)တဲင် နမ်းတဲ့ တမော့ꩻဗာႏတဝ်း ထာꩻဒုက္ခ၊ ဝင်ꩻတဲ့ မော့ꩻလွဉ်ꩻဗာႏတဝ်း ထာꩻဒုက္ခ-စတဲင်နုဲင်းနဝ်ꩻသွူ။
နောဝ်ꩻလွုမ်ꩻတကာႏတဝ်း ကွပ်ဒေါ့ꩻလဲဉ်တောဝ်းထာꩻတဲင် (အံႏလဲဉ်တောဝ်းထာꩻ)တဲင် ကခံႏစာꩻဗာႏ အကျိုꩻဖုံႏနဝ်ꩻ-
- ဣန္ဒြေႏတဲ့ဟောဝ်
- ငေါဝ်းထီတဲ့ ဖြွောင်ႏဖြီႏအွီႏနွိုး
- တငါတဲ့ တွောင်းညီႏဗွာလွစ်ꩻ
- နမ်းကြိုတဲ့ မဲဉ်ႏညီႏယောင်ꩻရေꩻ
- ခွေါင်းမော့ꩻဗာႏဒျာႏ အချမ်ꩻသာႏမျိုꩻ
- ဖြောင်းကိုနွုမ်ꩻဟွမ် ဗိုကောဝ်ႏလွီး
- ဒေါ့ꩻထာꩻ ဝင်ꩻနာႏသားအာ
- ထာꩻဒေါ့ꩻဒါႏ ထာꩻဒေါ့ꩻယံ
- ဖြေꩻတဲ့ တနျာႏတဲက်ꩻ၊ ဗွိုပနဲဉ်ႏဖဲ့
- အုံထာꩻစွူ၊ ထိထိရရ လော်လယ်ဒေါတ်ꩻဒဲစ်ꩻတဝ်း-စတဲင်နုဲင်းနောဝ်ꩻဖုံႏသွူ။
ကွပ်နောဝ်ꩻမꩻ ဒေါ့ꩻလဲဉ်တောဝ်းထာꩻ၊ အံႏလဲဉ်တောဝ်းဝင်ꩻနဝ်ꩻ ဟောဝ်ငါႏမရေႏမရာႏနောဝ်ꩻသွူ။
မုသာဝါဒ အင်္ဂါႏ ၄-ပါꩻ
မွဉ်းဖျင်(ဒေါ့ꩻလဲဉ်ထာꩻ အချက် ၄-ချက်)"
- ထာꩻတမွေးတောဝ်း
- ထာꩻတမွေးတောဝ်းယို သꩻကိုမဉ်ဒေါ့ꩻ
- ကျိုꩻစာꩻကျံႏဒေါ့ꩻ
- ဝင်ꩻလဲ့သေနာႏ
အင်္ဂါႏယို ၄-ပါꩻ မဉ်ႏပြဲ့ꩻစွုံႏလို့မꩻ (အချက်ယို ၄-ချက် မဉ်ႏမဲဉ်ႏတနꩻသော့ꩻလို့မꩻ) ထွာမုသာဝါဒ အကုသိုလ်ႏကံႏနောဝ်ꩻသွူ။
ကဗျာလင်္ကာႏ
မွဉ်းဖျင်- ဒေါ့ꩻလဲဉ်လိန်ႏပါꩻ - မုသာလွဉ်ꩻမာႏ
- နုဲင်းနဝ်ꩻမာꩻမွိုန်း - မဉ်ႏယွိုန်းနောဝ်ꩻရာꩻ
- အကျင်ꩻဟဝ်မျတ် - စွုမ်ႏဇာတ်ချမ်ꩻသာႏ
- တအာႏတောဝ်း - ဒါႏငေါဝ်း ယံငါငါ။
ကဗျာယို မဉ်ႏပြန်ႏငေါဝ်းရိုꩻရိုꩻနောဝ်ꩻ- ဒေါ့ꩻလဲဉ်လိန်ႏပါꩻ မုသာလွဉ်ꩻမာႏ နုဲင်းနောဝ်ꩻနောဝ်ꩻ တွမ်ႏမာꩻမွိုန်း၊ မဉ်ႏယွိုန်းထိုꩻနောဝ်ꩻ ထွာအကျင်ꩻဟောဝ်၊ ထွာအကျင်ꩻမျတ် (ကွပ်အကျင်ꩻဟောဝ်၊ အကျင်ꩻမျတ်တဲင်) ချမ်ꩻသာႏဗာႏစွုမ်ႏဇာတ်ဇာတ်၊ စွုမ်ႏပန်ပန်၊ တအွိုင်တအာႏတောဝ်း၊ ဒါႏငေါဝ်းဒါႏငွါ၊ ယံလွေꩻတငါငါစွဉ်ႏနောဝ်ꩻသွူ။[၁]
ဗွောင်နယ်သမ်းထဲင်း
မွဉ်းဖျင်"တပဲ့ꩻသီးဖုံႏဟွေး- မောင်ႏသွင်ႏတွမ်ႏ နင်ꩻခံꩻသီး တဖူးဝေးနဝ်ꩻ မွိုးသီငါဖါသီနꩻထိုꩻတဲင် မော့ꩻလဲဉ်းထာꩻဒုက္ခ၊ (နီလိုꩻသီးယိုနဝ်ꩻ တဖြာꩻတွမ်ႏတဖြာꩻ ရက်ဗာႏလို့ဝင်ꩻ၊ သညင်ꩻဗာႏလို့ဝင်ꩻ၊ တဖြာꩻမဉ်ႏမော့ꩻထာꩻဒုက္ခတဲ့ ထွားလွိုလꩻတဝ်း၊ ရော့ꩻကူႏညီႏ စွဲးကိုနုဲင်းမုဲင်ꩻတဲ့ ကူႏညီႏစွဲးကိုဗာႏ။) ကွပ်နဝ်ꩻမꩻ ကမ်းစေႏတနာႏ ကူႏညီႏစွဲးကိုသွော့ မောင်ႏသွင်ႏသီး တဖူးဝေးနဝ်ꩻဟုဲင်း၊ ထွန်းဖေတွမ်ႏ မောင်ႏကုဲင်နဝ်ꩻ ထူႏတာႏဝွန်ႏကေပ်ꩻဖေႏသွေ့ာနော"
"မွေးသွူ ဗွေႏအော်" ဟန်ႏနီꩻယိုနဝ်ꩻ နီကကူႏညီႏစွဲးကို ခွန်မောင်ႏသွင်ႏသီး တဖူးဝေးနဝ်ꩻ လꩻကားမုဲင်ꩻတဲ့ ဗွေႏစင်ꩻအီႏကေႏညာႏနယ်သွူတဲင် အီႏအပ်လွေꩻသွူ မောင်ႏသွင်ႏသီး တဖူးဝေး။ "တပဲ့ꩻသီးဖုံႏဟွေး- ခွန်မောင်ႏကုဲင် စာႏရင်ꩻအလꩻ တပဲ့ꩻသီး ကလူႏကကူႏညီႏကိုဒါႏရွဉ်နဝ်ꩻ လꩻသူစွဲဗွေဗွေ၊ မောင်ႏကုဲင် သော့ꩻအာလဲဉ်းဝင်ꩻ၊ ဝွေꩻသော့ꩻဟားခန်" "လꩻကွတ်ꩻစွဲဗွေဗွေဒျာႏ ဗွေႏအော်" "လꩻသူစွဲလွုမ်ꩻဒျာႏရင်ꩻ၊ ခွေသွဉ်းစာႏရင်ꩻအတွိုင်ꩻနဝ်ꩻသွူ ဗွေႏအော်" "မောင်ႏကုဲင် သွင်ꩻယွမ်ꩻထိုꩻလို့ဒျာႏ၊ ဝွေꩻစာႏ၇င်ꩻနောဝ်ꩻ တမဲဉ်ႏတဝ်း၊ ထွားဒျာႏသွော့ ခွေသွဉ်းစာႏရင်ꩻယို ဗွေႏအော်" ခွန်ထွန်းဖေ ကထင်ႏလွေꩻကပ်စာႏရင်ꩻ ဗွေႏစင်ꩻထျꩻတဲင် မောင်ႏကုဲင်တဖြာꩻ လောင်ႏလွိုးထို့ထွူထာစွဉ်ႏဒျာႏ။ "မောင်ႏကုဲင်စာႏရင်ꩻကိုနဝ်ꩻ လꩻသူစွဲ၊ ထွန်းဖေ စာႏရင်ꩻကိုနဝ်ꩻ လꩻကွတ်ꩻစွဲ၊ ပါꩻမုဲင်ꩻစာႏရင်ꩻမဲဉ်ႏဟောင်း ဗွေႏစင်ꩻအီႏရီစံꩻသီ၊ သီကသော့ꩻဗာႏအတွိုင်ꩻ လောဝ်းလွသွော့လုဲင်း" "မောင်ႏကုဲင်စာႏရင်ꩻကိုနဝ်ꩻ အဝ်ႏနီဆီငတ်ꩻ၊ ထွန်းဖေစာႏရင်ꩻကိုနဝ်ꩻ အဝ်ႏသွံဆီငတ်ꩻမွေး" "မောင်ႏကုဲင်စာႏရင်ꩻကိုနဝ်ꩻ ဝွေꩻသော့ꩻဟာႏခန်-တဲ့ ထွန်းဖေႏစာႏရင်ꩻကိုနဝ်ꩻ ဝွေꩻသော့ꩻငတ်ꩻဗီႏဒျာႏ" နီဆရာႏ စင်ꩻပညာႏ ကထင်ႏဒေါ့ꩻနုဲင်းနဝ်ꩻတဲင် နီတယွို့မွေးစွဉ်ႏထာꩻ၊ မောင်ႏကုဲင်နဝ်ꩻ ထူႏအမျာꩻရွဉ်တဲင် ဒင်ႏသဲင်တခြစ်ꩻအီတောဒျာႏ ဝွေꩻဂုဏ်ႏ။ "အောဝ်ႏကုဲင်နေ ရွဉ်ကွတ်ꩻစွဲနဝ်ꩻ နာꩻလွေꩻအွဉ်ႏမုဲင်ꩻကို မောင်ႏကုဲင်" "ခွေသွဉ်းဖေႏလဲဉ်း ခွေသွဉ်းဝင်ꩻမူႏ ဗွေႏအော်" "နာꩻဝင်ꩻမူႏနဝ်ꩻ ပါꩻမုဲင်ꩻမူႏ" မောင်ႏကုဲင်အွဉ်ႏဒေါ့ꩻတဝ်း၊ အွဉ်ႏတကုတ်ꩻကတူႏ၊ အုံတေ့ꩻဒျာႏထာꩻ။ "နာꩻဝင်ꩻမူႏနဝ်ꩻ ပါꩻမုဲင်ꩻမူႏ၊ အွဉ်ႏဒေါ့ꩻဟုဲင်း၊ ပေါႏနာꩻအွဉ်ႏဒေါ့ꩻတဝ်း နီအီႏသောက်ဗာႏနာꩻကွေး" "ခွေသွည်းဝင်ꩻမူႏ ဗွာစီ ဗွေႏအော်" ဗွေႏစင်ꩻတဲ့ ထွားလွေꩻစွဉ်ႏ ဗွာစီ၊ နီတဲ့ ထွားလွေꩻစွဉ်ႏ ဗွာစီ၊ ဗွာစီနဝ်ꩻ ဝင်ꩻသꩻငါႏဝင်ꩻမကောင်း၊ အသꩻလျားထာꩻမꩻကောင်း၊ အမဲ့ငါဗွာဗွာပေႏနဝ်ꩻ တနျာႏတဲက်တောစွဉ်ႏဒျာႏ။ "နာꩻယားတရေႏနွိုင်ႏမွုန်းတဝ်းခွေ မောင်ႏကုဲင်၊ နာꩻရွဉ်တွမ်ႏရိုꩻမွုန်း နာꩻစေးယငါတဲ့ ခွေလွစ်စံႏစံꩻနေဒွိုန်း၊ လိုꩻအံႏလဲဉ်ဒါႏဝင်ꩻ၊ လိုꩻအံႏပွစ်ဒါႏဝင်ꩻ နုဲင်းနာꩻနဝ်ꩻ ပါꩻမုဲင်ꩻမူႏခန်းတဲ့ တကျွိုက်တဝ်း၊ လိုꩻမူႏတွမ်ႏရိုꩻမွုန်း ထွီႏမွူးငါတဲ့ တကျွိုက်တဝ်းနာꩻ" "ဟား ဟား ဟား ဟား" နီသဖေါ်ꩻကျမွေးစွဉ်ႏ ဗွာစီအွဉ်ႏဒေါ့ꩻထာꩻ၊ တယွို့တဲ့တယွို့မွေးနဝ်ꩻမꩻ ယွုန်းတလꩻတဝ်းဒွုမ်၊ နီထာꩻငငေါဝ်း ဝေါက်သင်ႏထောက်ခံႏစွဉ်ႏ ဗွာစီနုဲင်းနဝ်ꩻသွူ။ (ပေါႏအံႏလဲဉ်ဝင်ꩻနဝ်ꩻ မဲ့ငါပေႏ တရေႏကုဲင်ဗာႏနုဲင်ယိုလွုမ်ꩻတကာႏတဝ်း၊ ဆုဲင်ꩻချာတဲ့ မဲ့ꩻအီႏမော့ꩻဗာႏ ထာꩻဒုက္ခအမျိုꩻမျိုꩻကရိုꩻနဝ်ꩻ မောင်ႏကုဲင်တဖြာꩻ သေငါꩻစဲင်းလဲဉ်းသွူမတဝ်။)
"ဟန်ႏနီꩻယို အီႏသွဉ်ဖေႏ ဒုစရဲက် အမုဲင်လစ်ꩻ မုသာဝါဒါ-ဒေါ့ꩻလဲဉ်ထာꩻခရာႏ" မုသာ- မွေးတောဝ်း၊ ဝါဒါ - အွဉ်ႏဒေါ့ꩻ မုသာဝါဒါ - ထာꩻတမွေးတဝ်းနဝ်ꩻ အွဉ်ႏဒေါ့ꩻ၊ "အွဉ်ႏဒေါ့ꩻလဲဉ်ထာꩻ"အဓိပ္ပါယ်ႏလꩻနုဲင်းနဝ်ꩻ။ (ပေါႏလိုꩻအံႏလဲဉ်ဒါႏဝင်ꩻနဝ်ꩻ ပါꩻမုဲင်ꩻတဲ့ တယွုမ်းတဝ်းအငေါဝ်း၊ ဒေါ့ꩻဝင်ꩻသွဉ်ဝင်ꩻတဲ့ ဝင်ꩻတနာႏတဝ်းအငေါဝ်း၊ ဩဇာႏအာႏဏာႏတဲ့ တအဲဉ်ထဝ်း၊ ဝင်ꩻထင်းဖွီ ဝင်ꩻထင်းပေႏ၊ ဝင်ꩻတရိုႏသေႏတဝ်း။) (ခန္ဓာႏကုဲင်လီ မဉ်ႏသီသူꩻတဲ့ လင်ꩻထဲ့ငါးရုဲင်ꩻ၊ တွိုႏဆုဲင်ꩻကာႏလ ဘဝလိုꩻဒုံ မဉ်ႏသဲင်ꩻအုံဗာႏယင်း ကရိုꩻလဲ့ သဲင်ꩻထွာဗာႏ လိုꩻတအာႏ၊ သဲင်ꩻထွာဗာႏ လိုꩻတငွို့၊ လိုꩻထွုင်းထွူ၊ ဒေါ့ꩻထာꩻဖြွောင်ႏတဝ်း၊ ကက်ꩻကက်ꩻကိက်ꩻကိက်ꩻ၊ တငါတငေါင်း၊ ဖြောင်းဗီႏတလဲ့၊ ဆော့ꩻမဲ့လောင်ႏလွိုး၊ တဗွိုးယောင်ꩻဆင်ꩻ၊ ဒေါ့ꩻဝင်ꩻမနာႏ၊ ဩဇာႏအဲဉ်ထဝ်း၊ ဒေါ့ꩻငဝ်းကျံꩻထံꩻ၊ လယ်ႏလွင်ꩻသꩻတရေင်၊ ဖြောင်းနွုမ်ꩻသေင်အာ၊ တငါညီႏတဝ်း ထွာဗာႏနုဲင်းနဝ်ꩻ။) "မဉ်ႏထွာနုဲင်းနဝ်ꩻနဝ်ꩻ ဟဝ်နဲ့၊ ဟဝ်တဝ်းနဲ့?" "ဟောဝ်တောဝ်း ဗွေႏအော်" 'ဒေါ့ꩻလဲဉ်ထာꩻ ဒါႏတဝ်း'ကရိုꩻနဝ်ꩻ စွုမ်ႏဖြာꩻတန်ပေႏ ယံဖေႏကတောင်ꩻတဲင် နီဗွေႏစင်ꩻ တဲမ်းဖေႏကဗျာနုဲင်းယို- + ဒေါ့ꩻလဲဉ်လိန်ႏပါꩻ - မုသာꩻလွဉ်ꩻမာႏ ငါးရုဲင်ꩻထဲ့ဗာႏ - ချမ်ꩻသာႏကင်ꩻညာꩻ သဲင်ꩻကွုတ်လိုꩻပို - ဝွေꩻယိုတအာႏ ဒေါ့ꩻလဲဉ်မွုန်း - မဉ်ႏယွုန်းကျင်ꩻဟဝ်ထွာ။
ကဗျာယိုတပွုတ် မဉ်ႏပြန်ႏပအိုဝ်ႏငဝ်းရိုꩻရိုꩻနဝ်ꩻ - (ဒေါ့ꩻလဲဉ်ဒေါ့ꩻလိန်ႏပါꩻ မုသာꩻအနေႏ ဖြောင်းလွဉ်ꩻဖြေꩻလွဉ်ꩻ မဉ်ႏဒေါ့ꩻမာႏနုဲင်းယိုနဝ်ꩻ လင်ꩻထဲ့ဗာႏငါးရုဲင်ꩻ၊ မဉ်ႏလင်ꩻခံႏဗာႏ ငါးရုဲင်ꩻသူꩻနဝ်ꩻ ချမ်ꩻသာႏအဲဉ်ထဝ်းတစိꩻစိꩻ၊ မဉ်ႏသဲင်ꩻကွုတ်ယင်းလိုꩻပိုတဲ့ ဝွေꩻယိုနဝ်ꩻ ထွာဗာႏလိုꩻတအာႏ၊ ကွပ်နဝ်ꩻမꩻ ဒေါ့ꩻလဲဉ်မွုန်းထာꩻ၊ မဉ်ႏယွုန်းထိုꩻနဝ်ꩻ ထွာအကျင်ꩻဟဝ်) ပြန်ႏဗာႏနုဲင်းနဝ်ꩻ။ "တပဲ့ꩻသီးဖုံႏဟွေး- တပဲ့ꩻသီးစွုမ်ႏဖြာꩻ ဖေႏနေးကထွာ လိုꩻအကျင်ꩻဟဝ်၊ ဖေႏနေးကထွာလိုꩻယံ ပငါပရာꩻနဝ်ꩻ ဒေါ့ꩻလဲဉ်မွုန်းထာꩻ၊ အံႏလိန်ႏမွုန်းပါꩻနော" "မွေးဒျာႏ ဗွေႏအော်' "ယိုတလဲင်ႏတဲ့ အခိန်ႏလꩻလဲန်း၊ အုံပဆားဒွိုန်းက၊ မင်္ဂလာႏဒျာႏ တပဲ့ꩻဖုံႏ" "မင်္ဂလာႏဒျာႏ ဆရာႏဗွေႏအော်"။[၂]