မော့ꩻခွဲဘုရာꩻ ပုဏ္ဏာꩻမာႏန
"မာနတ္ထဒ္ဓသုတ် (မော့ꩻခွဲးဘုရာꩻ ပုဏ္ဏာꩻမာႏန ထို့ထိုꩻစွဉ်ႏ)"
အတွင်ꩻနဝ်ꩻခါ ကမဉ်ꩻဒါႏ "မာနတ္ထဒ္ဓ"ပုဏ္ဏာꩻတဖြာꩻနဝ်ꩻ အဝ်ႏအုံသာဝတ္ထိခမ်းကို၊ ဝွေꩻနဝ်ꩻ 'ဝုဲင်ႏတဝ်းမွိုး၊ ဝုဲင်ႏတောဝ်းဖါ၊ ဝုဲင်ႏတဝ်းဆရာႏ၊ ဝုဲင်ႏတဝ်းဝေးခို'နောဝ်ꩻသွူ။ ခꩻတလဲင်ႏ နီဗွေႏဘုရာꩻ အောဝ်ႏဟော်ꩻဖေႏ ပရိသတ်တန်ပေႏတရာꩻ၊ မာနတ္ထဒ္ဓပုဏ္ဏာꩻ ယူႏနုဲင်းယို- "ရဟန်ꩻဂေါတမ အဝ်ႏဟော်ꩻဖေႏ ပရိသတ်တန်ပေႏတရာꩻ၊ ခွေမဉ်ႏလွေꩻထေ့ ရဟန်ꩻဂေါတမနဝ်ꩻ ရဟောဝ်မွော့ဟွေး၊ ရဟန်ꩻဂေါတမ မဉ်ႏဒေါ့ꩻရီခွေတဲ့ ခွေအီႏဒေါ့ꩻရီက ရဟန်ꩻဂေါတမ"ယူႏတေ့ꩻနုဲင်းနဝ်ꩻသွူ။ မာနတ္ထဒ္ဓပုဏ္ဏာꩻ လွေꩻထေ့ဗွေႏဘုရာꩻထျꩻ၊ အုံလင်ꩻထွူခါ ထွားငါလွေꩻဗွေႏဘုရာꩻ၊ ဗွေႏဘုရာꩻ တဒေါ့ꩻရီတဝ်း၊ ပုဏ္ဏာꩻနဝ်ꩻ ယူႏဖျင် 'ရဟန်ꩻဂေါတမနဝ်ꩻ အတသေတဝ်းထမုဲင်ꩻမုဲင်ꩻ'၊ ဝွေꩻစငါကျံႏထွိုင်ႏသဲင်ꩻလွုမ်ꩻ ဗွေႏဘုရာꩻသေထွꩻ အသꩻကျံႏထွိုင်ႏသဲင်ꩻတဲင် ဗွေႏဘုရာꩻရိုꩻ- "ပုဏ္ဏာꩻ- လောကကိုယိုနဝ်ꩻ သꩻဖြုံႏထို မာႏနတန် ဟောဝ်တဝ်း၊ မဉ်လꩻအကျိုꩻစီꩻပွာꩻတဲင် လွဉ်ထေ့သွူ ဘုရာꩻဟ ဖေႏကလꩻသဲင်ꩻ အကျိုꩻစီꩻပွာꩻနဝ်ꩻမꩻသနယ်၊ ကျံႏထွိုင်ႏသဲင်ꩻထိုꩻမွုန်းဟုဲင်း" တွိုႏနောဝ်ꩻတွော့ꩻ- ပုဏ္ဏာꩻနဝ်ꩻ သꩻဝꩻစွော့ꩻစွဉ်ႏဒျာႏ "ရဟန်ꩻဂေါတမနဝ်ꩻ သေထွꩻပါစွဉ်ႏ ခွေသꩻနဝ်ꩻဟွေး၊ ခွေထင်းရဟန်ꩻဂေါတမနဝ်ꩻ သေတဝ်းထမုဲင်ꩻမုဲင်ꩻ မွေးတဝ်းဗာႏ" ဟွုန်ကော့ꩻမာႏအနမ်းတဲင် ထွိုင်ႏငါလွေꩻစွဉ်ႏ ဗွေႏဘုရာꩻထျꩻ၊ ဝွေꩻတသက်ယို စဝုဲင်ႏဖိုဖိုဝင်ꩻ ယိုတလဲင်ႏလွုမ်ꩻ၊ ဝုဲင်ႏနေးသွူ အာႏရꩻအတဝ်း၊ အာႏလꩻတဝ်းတွော့ꩻ တွမ်ႏအကတူႏ အွဉ်ႏတွစ်စွဉ်ႏ ဗွေႏဘုရာꩻခင်ႏ၊ အံႏစုတ်ꩻစွဉ်ႏ ဗွေႏဘုရာꩻခင်ႏခိုႏ၊ တွမ်ႏစူထိုမ်ႏဖြွꩻဗွေႏဘုရာꩻခင်ႏထွူခါ လောဝ်းပါနုဲင်းယို- "ဩဗွေႏ- ခွေသွဉ်းယိုနဝ်ꩻ 'မာနတ္ထဒ္ဓ'ပုဏ္ဏာꩻဗွေႏဩ၊ 'မာနတ္ထဒ္ဓ'ပုဏ္ဏာꩻကရိုꩻနဝ်ꩻ ခွေသွဉ်းတန်ယိုသွူ ဗွေႏဩ'စတဲင်အွဉ်ႏအွီႏအငေါဝ်း အဝ်ႏလောဝ်းနုဲင်းနဝ်ꩻတွင်ꩻ ခွန်နင်ꩻပရိသတ်ဖုံႏ သꩻရောင်းသꩻရေꩻ ဒေါ့ꩻလွနုဲင်းယို- "ထွားငါလွေꩻ ပုဏ္ဏာꩻသူꩻမွိုင်ႏ- 'မာနတ္ထဒ္ဓ'ပုဏ္ဏာꩻသူꩻနဝ်ꩻ သꩻဖြုံႏထို၊ မာႏနတန်တန်၊ ဝုဲင်ႏတဝ်းမွိုး၊ ဝုဲင်ႏတဝ်းဖါ၊ ဝုဲင်ႏတဝ်းဆရာႏ၊ ဝုဲင်ႏတဝ်းဝေးခို၊ တွိုႏယိုနဝ်ꩻ ဝုဲင်ႏဗာႏစွဉ်ႏ ဗွေႏဘုရာꩻနဝ်ꩻဟွေး၊ ဝုဲင်ႏရိုꩻရိုꩻလွုမ်ꩻမွေးတဝ်း 'ကတူႏအွဉ်ႏခွေါင်း၊ ဖြောင်းနဝ်ꩻလဲင်ꩻအိုမ်၊ စူနဝ်ꩻလဲင်ႏထိုမ်ႏပဒိုမ်နေးစွဉ်ႏ ဘုရာꩻခင်ႏ'နဝ်ꩻဟွေး"ဒေါ့ꩻလွစတဲင်နုဲင်းနဝ်ꩻဖုံႏသွူ။ "ဗွေႏဘုရာꩻရိုꩻ- အွဉ်ႏထွူခန်းလုဲင်း ပုဏ္ဏာꩻ၊ နာꩻဝုဲင်ႏဘုရာꩻကွို့ꩻသွူ၊ အာႏရꩻသွူမတောဝ်"ထွိုင်ႏလုဲင်း၊ လွေꩻအုံယင်း နာꩻခင်ႏလမ်းသူꩻဟုဲင်း" 'မာနတ္ထဒ္ဓ'နဝ်ꩻ ဝွေꩻကမဉ်သေသေနဝ်ꩻ ရီဗွေႏဘုရာꩻတဲင် ဗွေႏဘုရာꩻရိုꩻ- "မွိုးလောင်း၊ ဖါလောင်း၊ ဝေးလောင်း၊ ဆရာႏလောင်းဖုံႏနဝ်ꩻ အွဉ်ႏမွုန်းမာႏန၊ ဝုဲင်ႏရိုႏသေႏသွော့ ဝွေꩻသီးဖုံႏနဝ်ꩻနော"စတဲင် ဟော်ꩻဖေႏနုဲင်းနဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ မာနတ္ထဒ္ဓသုတ်) [၁][၂]