မဲ့ကုဲင်တပင်

"မဲ့ကုဲင်တပင် အဝ်ႏလိုႏဖျင်" နီပအိုဝ်ႏယိုနဝ်ꩻ မာꩻစွဉ်ႏထာꩻမာꩻအမျိုꩻမုဲင်ꩻတယဝ်း ပေါႏမာꩻညီꩻသွူဝင်ꩻနဝ်ꩻ ထာꩻမာꩻဗွိုန်ပီ အမဉ်ꩻကွာႏတရိုꩻတဝ်း၊ ထာꩻမာꩻဗွိုန်ပီ အမိဉ်ꩻပီ အခင်ႏလမ်းကွာႏတရိုꩻတဝ်းနဝ်ꩻ တဖြာꩻတွမ်ႏတဖြာꩻ၊ တစွိုꩻတွမ်ႏတစွိုꩻ၊ တထွောင်းတွမ်ႏတထွောင်းဖုံႏယို အကုဲင်းထီႏမာႏ ကုဲင်းထီႏတရွို့ꩻ၊ ထင်းမာႏဟဝ်ကုဲင်ဒါႏငါႏဝင်ꩻနဝ်ꩻသွူ။ နီပအိုဝ်ႏနဝ်ꩻ ပွိုင်းလဲင်ႏခါ ခံႏဗာႏအာငါႏ စဲ့ꩻဖေꩻစဲ့ꩻတံႏဖုံႏ၊ ဝေင်ꩻတက်ꩻနျꩻ ဝင်ꩻနွောင်ꩻအံႏအရန်းရန်းဖုံႏ၊ ဝင်ꩻချာႏတဗူႏတဗန်ႏမဲ့နား အဟဝ်ရိုꩻအကုဲင်၊ အကုဲင်ရိုꩻအဟဝ်ဖုံႏတဲင် မဲ့ခေ့ꩻနားအွိုင်ထိုꩻနဝ်ꩻမꩻ ထာယူႏထာꩻတွေꩻ ကအီႏမဲဉ်ႏစွိုꩻဗာႏယင်းယို ယိုꩻယိုꩻမာꩻမာꩻ တလꩻတဝ်းတွော့ꩻ ပေါႏမာꩻလဲဉ်းသွူထာꩻမာꩻနဝ်ꩻ အီႏဖေႏအာႏလူႏလုဲင်ꩻဝင်ꩻ အဲဉ်ထဝ်း၊ ကဲဉ်းအာအာ အဝ်ႏဒျာႏတေက်ꩻတဗျလူးလုဲင်ႏဝင်ꩻလွုမ်ꩻနဝ်ꩻသွူ။ (ယိုနဝ်ꩻ ယေဘုယျအနေႏသွူ။ "ပအိုဝ်ႏစရဲက် ထီႏဝင်ꩻပဲစ်၊ ခြွောင်စဲစ်တဝ်း မဲဉ်ႏမာႏ"ငဝ်းလင်္ကာႏအဝ်ႏအတွိုင်ꩻ နီပအိုဝ်ႏနဝ်ꩻ ကဲဉ်းအာထီႏတဝ်းဝင်ꩻအကျိုꩻ၊ ထီႏဒျာႏဝင်ꩻအပဲစ်တဲင် ခွိုင်းယိုမာꩻငါနဝ်ꩻ နီခွိုꩻနွယ်ႏပအိုဝ်ႏဖုံႏ မဉ်ႏမာꩻဒါႏစွိုးခွိုꩻအကျိုꩻ၊ ဘာႏသာႏအကျိုꩻ၊ သာႏသနာႏအကျိုꩻစတဲင် လိုꩻကမာꩻဖေႏဒါႏ စွိုးခွိုꩻအကျိုꩻသားချင်ꩻချင်ꩻနဝ်ꩻ တဖြာꩻတွမ်ႏတဖြာꩻ၊ တစွိုꩻတွမ်ႏတစွိုꩻ အဝ်ႏလိုႏထီႏတရွို့ꩻတဝ်းလွဝင်ꩻ၊ အဝ်ႏလိုႏယူႏမာႏထင်းကွင်တဝ်းလွဝင်ꩻ၊ အဝ်ႏလိုႏဆွန်ꩻစွီႏညီꩻဒျာႏဝင်ꩻစူ၊ အဝ်ႏလိုႏသေနာႏလူႏလုဲင်ႏဖေႏဒါႏငါႏဝင်ꩻနဝ်ꩻသွူ။ တွိုႏယိုမွေးတဝ်း၊ "နီမာꩻမꩻယံ၊ နီမာꩻမꩻမဲဉ်ႏ၊ နီဒေါ့ꩻမꩻမွေး၊ နီစွိုꩻမꩻဝင်ꩻအုပ်ꩻ၊ နီစွိုꩻမꩻ ထာꩻမာꩻထွာ"ပေါႏပဒေႏသရာဇ်သꩻ အဝ်ႏဗွို့ꩻခြꩻနေက နမ်းလောင်းနဝ်ꩻ လိုꩻလင်၊ အစွိုꩻလင်ဖုံႏ ကအီႏထွိုင်ႏခွုမ်မာꩻကိုဒါႏ စွိုးခွိုꩻ ဘာႏသာႏ သာႏသနာႏထာꩻမာꩻဖုံႏယို အာႏအဲဉ်ထဝ်းဒွုမ်၊ အီႏထွိုင်ႏခွုမ်မာꩻလဲ့ ရွူႏရုဲင်းထိုꩻလို့တွော့ꩻ ကွဲးညညနဝ်ꩻ ခေတ်လိုꩻယွဲးဖုံႏ ဒါႏသွူပညာႏလဲ့ အဝ်ႏပျင်ႏလွင်ꩻလို့ဒျာႏထာꩻနဝ်ꩻသွူ၊ ခေတ်လိုꩻပေႏ ယိုခါ ပေါႏဟဲ့ꩻမာꩻစွိုးခွိုꩻထာꩻမာꩻလဲ့ "တဝ်း၊ မာꩻဗွိုန်ႏတဝ်း၊ မဲ့ꩻပါꩻလွꩻထီႏလိုꩻ"ရိုꩻတေားဒျာႏနုဲင်းနဝ်ꩻတွော့ꩻ နဲင်ႏငံႏရေꩻနဝ်ꩻ အဝ်ႏထင်းတေားဒျာႏ စဲ့ꩻတစွိုးလွုမ်ꩻနုဲင်းနဝ်ꩻသွူ။ "စဲ့ꩻ"ကရိုꩻနဝ်ꩻ ကာႏကွယ်ႏရေꩻသားဒျာႏကရိုꩻယို ခေတ်လိုꩻပေႏ တသေနာႏထွꩻတဝ်း၊ တသေဖꩻအွဉ်ႏခေါတဝ်း ပဉ်စွိုးစွိုးတွော့ꩻ ဟွုန်ငမ်းသꩻဝꩻတေားဒျာႏဝင်ꩻဖုံႏနဝ်ꩻသွူ၊ နဝ်ꩻမꩻ နီခွိုꩻပအိုဝ်ႏသီးဖုံႏ အွဉ်ငါပွုံႏတာႏ ကအဝ်ႏဒါႏသားဖုံႏ၊ လိုꩻသေလိုꩻဒါႏ ပညာႏဒါႏသားဖုံႏ၊ စွိုးခွိုꩻဆꩻကီ ကအွဉ်မာꩻလဲဉ်းဒါႏ ပုဂ္ဂိုလ်ႏသားဖုံႏနဝ်ꩻ ခေတ်လိုꩻပေႏ ဖေႏကသေမာꩻ စွိုးခွိုꩻထာꩻမာꩻတဲ့မွေးမွေး၊ ခမ်းထီထာꩻမာꩻ ရုမ်ꩻတဲ့မွေးမွေး၊ သꩻမဲဉ်အွဉ်ငါဝင်ꩻ ဖေႏကအဝ်ႏတဲ့မွေးမွေးတွော့ꩻ အဝ်ႏလိုႏဗွောင်နယ်ဖေႏစဲင်းစဲင်းငါႏ ခေတ်လိုꩻပေႏနဲင်ႏငံႏရေꩻမဲ့နား၊ ကာႏကွယ်ႏရေꩻ အခရာႏဖုံႏသွူတကာႏတဝ်း တစွိုꩻတွမ်ႏတစွိုꩻတဲ့ အဝ်ႏလိုႏထီႏတရွို့ꩻတဝ်းဒွုမ်ဝင်ꩻ၊ တဖြာꩻတွမ်ႏတဖြာꩻ မဲ့ငါလဲ့ အဝ်ႏလိုႏခွယ်ႏတောႏလဲဉ်းသွူဝင်ꩻ၊ ခွဲးဝင်ꩻမုဲင်ꩻခါလဲ့ အဝ်ႏလိုႏပယွုမ်းထေ့လဲဉ်းသွူဝင်ꩻ၊ အဝ်ႏလိုႏယံနယ်ဖေႏငါႏလဲဉ်း ခေတ်လိုꩻပေႏဖုံႏနဝ်ꩻသွူ။ နဝ်ꩻမဉ်ႏမွေးတဝ်းနဝ်ꩻ အစုပ်မုဲင်ꩻမုဲင်ꩻ၊ အစွိုꩻမုဲင်ꩻမုဲင်ꩻ၊ လိုꩻတန်အဖြာꩻမုဲင်ꩻမုဲင်ꩻလဲ့ မဉ်ႏအဝ်ႏလောက်ꩻအံႏ၊ မဉ်ႏအဝ်ႏဆွမ်ꩻအံႏဒျာႏ ခမ်းသားသꩻယဝ်ꩻလုမ်ꩻနဝ်ꩻ နီခေတ်လိုꩻပေႏဖုံႏ သꩻကအီႏထွိုင်ႏခွုမ်မာꩻကိုဒါႏ စွိုးခွိုꩻထာꩻမာꩻယို မုဲင်ꩻခါစွဉ်ႏလဲ့ မျိုꩻနွောင်ꩻဒွုမ်တမွေးတဝ်းနဝ်ꩻသွူ၊ ခေတ်လိုꩻပေႏ သꩻမဉ်မာꩻ စွိုးခွိုꩻထာꩻမာꩻ မဉ်ႏအဲဉ်ထဝ်းလဲ့ အနာႏဂတ်နီစွိုးခွိုꩻတွမ်ႏ လိုꩻမျိုꩻယို အရောင်ႏခေ့ꩻတမဝ်းထံထိမ်ထိုꩻစွဉ်ႏတဲင် တွမ်ႏနီစွိုးခွိုꩻ လိုꩻမျိုꩻကမဉ်လꩻချာဒါႏ ခမ်းထီတသာယို အဝ်ႏညာꩻထိုꩻစွဉ်ႏဝင်ꩻ၊ ဌာႏနဆဲင်ႏရာꩻကိုသူꩻလဲ့ ခေတ်လိုꩻပေႏဖုံႏ ကအီႏနွို့ထူႏသော့ꩻဒါႏ ခင်ႏလမ်းဖုံႏယို ထွာအီထိုစွဉ်ႏဒျာႏ ထာꩻယွုန်းထွို့ꩻခရာႏ တမျိုꩻတန်နဝ်ꩻသွူ။ နုဲင်းယိုခါ နီပအိုဝ်ႏစွိုးခွိုꩻဆꩻကီ ကအဝ်ႏထွားအုပ်ထိန်ꩻလွေꩻဖေႏဒါႏ စွိုးခွိုꩻအွဉ်ငါ အစွုမ်ꩻစွိုꩻဖုံႏနဝ်ꩻ အဝ်ႏဗဟိုႏသံႏဃာႏ၊ ပအမဖ၊ PNA PNO PLNO အစွိုꩻအာႏဏာႏကအဝ်ႏနဝ်ꩻ အဝ်ႏယိုလစ်ꩻစွိုꩻလုမ်ꩻနဝ်ꩻသွူ၊ အစွိုꩻဖြယ်ဖုံႏတဲ့ အဝ်ႏနဝ်ꩻအဝ်ႏဒျာႏ၊ လွိုဆန်အစွိုꩻတန်ကီနဝ်ꩻ အာႏဏာႏတလꩻတဝ်း၊ အဝ်ႏဗာႏဝွေꩻသီးစူယာꩻဆꩻလလွဉ်းလွဉ်းနဝ်ꩻသွူ။ ကွဲးတွော့ꩻ အရေꩻတန်မဉ်ႏတွိုႏသွူ နုဲင်းဒျာႏနီဒုံဆောင်ႏကို ဖြားဒုံခွင်ꩻတလꩻတဝ်း ဝင်ꩻနွို့ဆွမ်ꩻခေ့ꩻဆွမ်ꩻနာꩻဒါႏ နီလိုꩻဒုံဖုံႏတရိုꩻတဝ်း၊ တဖူꩻလောင်းကင်ကျို တွမ်ႏတရာꩻမဲ့ခေ့ꩻတွော့ꩻ ဝင်ꩻကအဝ်ႏအံႏစေ့ꩻဒါႏ နီခမ်းသားဖုံႏတရိုꩻတဝ်း၊ နုဲင်းတောင်ႏကီꩻဆꩻနဝ် ကွိုꩻအာႏဏာႏ သိမ်ꩻဝင်ꩻဟံႏ တွယ်ႏတံႏခြေင်ပျင်ႏဒါႏဝင်ꩻဖုံႏ နီခမ်းသားခံႏဗာႏပျင်ႏဒါႏဝင်ꩻဖုံႏ ပါꩻမုဲင်ꩻထွားကိုဖေႏဒါႏဟောင်း။ တဝ်းလဲ့ မုဲင်ꩻမာꩻမုဲင်ꩻခံႏ အွဉ်ႏဗော့ꩻလောကဓံႏတရာꩻနုဲင်းနဝ်ꩻဟောင်း၊ နုဲင်းဟောꩻထွားလိတ်သားနဝ်ꩻ အီႏဖြေႏနုဲင်းမုဲင်ꩻဟောင်း၊ ယာမားမေႏ ကအဝ်ႏခိုးဆောင်ႏဒါႏ နီဒုံရပ်ရာႏကိုယို ပါႏအခိုနဲ့၊ ပါႏအမူႏနဲ့၊ ပါႏအပေႏနဲ့၊ ပါႏအတန်နဲ့၊ ပါႏလိုꩻလမ်းနဲ့၊ ပါႏလိုꩻကျောင်ꩻနဲ့၊ ပါႏခွန်နဲ့၊ ပါႏခမ်းသားနဲ့ကရိုꩻနဝ်ꩻ- ပွိုင်းလဲင်ႏခါ ပေါႏယာဗွာတွမ်ႏယာမား လိုꩻမူႏလိုꩻပေႏ တသေငါꩻဖိုတဝ်း၊ အဝ်ႏမလေးသျား၊ ဂျပန်၊ အဝ်ႏဒျာႏခမ်းတန် အမေႏရိကန်ႏလွဉ်ဟောင်း တသေတဝ်း၊ တွိုႏအခိန်ႏယိုခါမွော့ လိုꩻပေႏဒုံခြင်ꩻခါႏငါတဲ့ လဲင်ꩻသေငါꩻနဝ်ꩻ အဝ်ႏမို့ꩻလောင်းထဲ့လင်ꩻဒျာႏဟောင်း၊ အဝ်ႏဆꩻလ ထွတ်ꩻထန်ႏဒျာႏနုဲင်းထီဟောင်း၊ အဝ်ႏဆꩻကီတုတ်ꩻလီဖေႏ အမိန်းဟောင်း၊ လဲင်ꩻမာꩻကွင်ဗာႏငါႏနီလိုꩻမျိုꩻ၊ အွဉ်ဝင်ꩻတွိုက်ꩻထိုꩻနဝ်ꩻ လꩻတဝ်းဟောင်း၊ တွိုက်ꩻထန်ႏတာႏ အမိန်းအာႏဏာႏ ဖေႏနွောင်ꩻတဝ်းရင်ꩻဟောင်း၊ မဉ်ႏမွေးတဝ်း ခွန်စဝ်းဝါႏသနာႏနုဲင်းယိုဒျာႏရင်ꩻဟောင်း၊ မဉ်ႏမွေးတဝ်း တယ်ႏထောင်ႏခမ်းထီ၊ ဆို့ꩻအီဟော်နန်ꩻ ရွဉ်ခံꩻဆေ့ꩻငါႏ၊ အံႏဆျာႏအီပဆိုးကြွို့ꩻ နီခမ်းသားတာႏဒျာႏရင်ꩻဟောင်း။ ပွိုးနဝ်ꩻမꩻ ပွိုင်းဝွို့တွမ်ႏယာမားကိစ္စယို လိုꩻကျောင်ꩻလိုꩻလမ်း၊ စွိုးခွိုꩻအွဉ်ငါသားဖုံႏ ထွူႏထွူႏတွုမ်တွုမ် အဝ်ႏလိုႏယူႏကိုငါႏလဲဉ်းသွူဝင်ꩻ ပငါပရာꩻနဝ်ꩻသွူ၊ ဗာႏထူႏရေꩻနုဲင်းမုဲင်ꩻလဲ့ ထူႏရေꩻခန်းဝင်ꩻ အရေꩻတပါꩻ၊ ဖြာꩻတဖဲ့ꩻဖဲ့ꩻ၊ ပေါႏအွဉ်ႏစွူစွူဗော့ꩻနုဲင်းယိုတဲ့ နီစွိုးခွိုꩻယို အီႏဌွာအီသွူ ယာသားတရာꩻခံႏ၊ စွိုးခွိုꩻလဲ့ စွိုးဖြွီꩻအီႏသွတ်ꩻတကြန်ႏလို့သွူ။ ပေါႏအဝ်ႏစွူစွူပွုံႏယိုတဲ့ လွိုက်ရွေꩻပွယ်ꩻမဉ်ႏတွိုႏနဝ်ꩻ နီပအိုဝ်ႏဖုံႏ ကွဲတရိမ်နွို့ꩻသော့ꩻစွဉ်ႏဝင်ꩻထောင်ႏ ပငါပရာꩻ၊ နီပအိုဝ်ႏမဲးလဲ့ မဲအီႏဆေ့ꩻသဲင်ꩻ၊ ကွဲညညနဝ်ꩻ နီလိုꩻမျိုꩻယို လိုꩻဖြာꩻပေါင်ꩻအာဒျာႏလဲ့ အရေꩻထွိုင်ႏတွိုႏ ဝင်ꩻအွဉ်ႏလိုႏသော့ꩻလို့ဒျာႏ အခြုံကိုနဝ်ꩻသွူ။ နဂါꩻသမ်းအဝ်ႏနီဗာႏ ကဖေႏမဲးဗွေႏခမ်းသားယို ဝင်ꩻချꩻသော့ꩻလို့လဲဉ်းထောင်ႏနဝ်ꩻ အနာႏဂတ်တာႏနီဒေႏသ ထိန်ꩻထွားရေꩻယို အီႏမာꩻနုဲင်းမုဲင်ꩻ၊ သꩻအဝ်ႏခွꩻဒျာႏဝင်ꩻဖုံႏနဲ့၊ အွဉ်ႏစွူစွူဗော့ꩻပွုံႏယိုနဲ့၊ အီႏဖျင်နဲ့ ချင်းယူႏတဲးတဲးဝါးဝါးခန်းဝင်ꩻလုဲင်း၊ ပေါႏအဝ်ႏယူႏဖွီနေကထာꩻတဲ့ ပါꩻစုဲင်သွူလိုꩻစဲပ်စဲပ်သနယ် ခွိုꩻပအိုဝ်ႏဖုံႏဟွေး။ ခါးလားဝင်ꩻကစုဲင်လꩻခိန်ႏတွင်ꩻနဝ်ꩻ အစွိုꩻပေႏအစွိုꩻတန်၊ ခမ်းကိုခမ်းထန်ႏ၊ ပအိုဝ်ႏလွောင်ႏဗူႏချာဖေႏကလꩻ ပအိုဝ်ႏစွုမ်ႏဖြာꩻ တောင်ꩻအီလွိုး(မှတ်ပုံတင်)ဖေႏကအဝ်ႏဗာႏ၊ သꩻရက်ချာမွေးမွေးစွိုးခွိုꩻ စွုမ်ႏဖြာꩻဖေႏကအဝ်ႏ၊ အဝ်ႏတွိုင်ꩻစွုမ်ႏဖြာꩻ ဖေႏကသေထွိုင်ႏမာꩻစွိုးခွိုꩻထာꩻမာꩻ၊ ဝင်ꩻသꩻမဲဉ်မာꩻ စွိုးခွိုꩻထာꩻမာꩻဖေႏကအဝ်ႏလွဉ်လဲ့ ဆꩻကီသားယံနယ်ဗာႏဝင်ꩻမꩻ၊ ဖေင်ꩻဖင်ꩻယာမားလဲ့ တွိုက်ꩻယားနွောင်ꩻနွောင်ꩻမꩻလꩻနဝ်ꩻသွူ။ နဝ်ꩻထွူကာႏတဝ်း လိုꩻယားပိုသား ဖေႏကအဝ်ႏမွိုန်းတဝ်းနဝ်ꩻလဲ့ အဝ်ႏလိုႏခွုမ်စံႏမွေးမွေး၊ အဝ်ႏလိုႏထိုမ်ႏဝင်ꩻအနယ်ꩻဆꩻဆꩻ၊ စွိုးခွိုကို မုဲင်းရင်းပေါႏရင်းဖေႏကဆေ့ꩻ၊ မူႏနံꩻတန်ခိုဗင်ႏတန်ဖေႏကဆေ့ꩻ၊ လိုꩻအုံခြေင်အဝ်ႏပျင်ႏထာꩻ ဖေႏကအဝ်ႏမွိုန်းတဝ်းနဝ်ꩻလဲ့ အဝ်ႏလိုႏခွုမ်စံႏဖေႏငါႏ တွမ်ႏအနယ်ꩻမဲဉ်ႏမဲဉ်ႏနဝ်ꩻသွူ။ နဝ်ꩻမိဉ်ႏမွေးတဝ်းနဝ်ꩻ နီလိုꩻယို ဝင်ꩻဆွမ်ꩻပျင်ႏလို့ဒျာႏတဖဲ့ꩻ၊ ကွုတ်တသိဉ်လို့ဒျာႏ ဝင်ꩻလိုꩻမျိုꩻတဖဲ့ꩻ၊ ထန်ႏလွေꩻညာꩻလို့ဒျာႏ ဝင်ꩻခမ်းတဖဲ့ꩻ၊ ယားမွိုင်းဒျာႏပိုတဖဲ့ꩻ၊ အုံမုဲင်းရင်း၊ အုံမဲးမုဲင်း အုံမူႏနံꩻတန်ဒျာႏထာꩻတဖဲ့ꩻတွော့ꩻ နီလိုꩻဖြာꩻပေါင်ꩻ ကွဲးယွမ်ꩻယွမ်ꩻထိုꩻလို့ဒျာႏ၊ အရေꩻမရာႏမိဉ်ႏတွိုႏလွဉ် မိဉ်ႏအဝ်ႏလိုႏသော့ꩻမဲးနဝ်ꩻ နီလိုꩻအဲဉ်ထဝ်းနဝ်ꩻသွူ။ နုဲင်းတဲမ်းလိတ်သားအနေႏနဝ်ꩻ ပအိုဝ်ႏစွုမ်ႏဖြာꩻ သꩻရက်ခွိုꩻဖေႏကအဝ်ႏဗာႏ၊ သစ္စာႏကုဲင်လိုꩻမျိုꩻ ဖေႏကအဝ်ႏမွိုန်း၊ သꩻမဲဉ်မာꩻစွိုးခွိုꩻထာꩻမာꩻ ဖေႏကအဝ်ႏဗာႏ၊ သꩻမဲဉ်နွို့ရုမ်ꩻ၊ သꩻမဲဉ်မာꩻစဲ့ꩻ၊ သꩻမဲဉ်မာꩻယဲꩻ ဖေႏကအဝ်ႏနဝ်ꩻ အဝ်ႏလိုႏအွဉ်ႏဖေႏငါႏ သွဉ်တန်ꩻကျောင်ꩻခေါခေါနဝ်ꩻသွူ။ သွဉ်တန်ꩻကျောင်ꩻနဝ်ꩻစားနဝ်ꩻ အဝ်ႏလိုႏအဝ်ႏညာꩻညာꩻဒျာႏ နုဲင်းနောင်တရား-သုဲင်ꩻခဝ်ရပ်ဖုံႏသွူ။ နီမဲးနဝ်ꩻ မဲဉ်လꩻအနွောင်ꩻ၊ မဲဉ်လိုꩻအာလဲ့ လိုႏဖေႏကအနယ်ꩻ၊ ဖေႏကနွောင်ꩻလꩻဝင်ꩻနယ်ꩻ နီမိဉ်ႏတထိုမ်ႏခါꩻတဝ်းနဝ်ꩻ ခေတ်မုဲင်ꩻမုဲင်ꩻလဲ့ တနွောင်ꩻလꩻတဝ်းသွူ၊ နယ်ꩻပညာႏ၊ သွဉ်တန်ꩻဖုံႏလဲ့ အဝ်ႏလိုႏယူႏသော့ꩻဖေႏပါငါႏအကျောင်ꩻ-တွမ်ႏမေတ္တာႏတဲင်-