မဲ့ခေ့ꩻမဲ့လေ
"အန္ဓသုတ် (မဲ့ခေ့ꩻ-မဲ့လေ၊ သူႏသေထာꩻ-သူႏသေတဝ်းထာꩻ)"
နီဗွေႏဘုရာꩻ ဟော်ꩻဖေႏဗွေႏရဟန်ꩻသီး တရာꩻနုဲင်းယို- ရဟန်ꩻသီးဖုံႏဟွေး- ၁။ အန္ဓော ပုဂ္ဂလော- လိုꩻမဲ့ခေ့ꩻလို့နီပင် ၂။ ဧကစက္ခု ပုဂ္ဂလော- လိုꩻမဲ့ထီႏထာꩻတပင်လွုမ်ꩻ ၃။ ဒွိစက္ခု ပုဂ္ဂလော- လိုꩻမဲ့ထီႏလို့နီပင်၊ လောကကိုယို လိုꩻအဝ်ႏသွံမျိုꩻ နုဲင်းနောဝ်ꩻသွူ။ ရဟန်ꩻသီးဖုံႏဟွေး- လိုꩻယင်ဟန်ႏနဝ်ꩻ တလꩻတဝ်းဒွိုန်း တခြိုꩻဥစ္စာႏနဝ်ꩻ ဖေႏကလꩻလွဉ်၊ ကလꩻထွူလဲဉ်းနဝ်ꩻ ဖေႏနေးကယိန်းအာအာလွဉ်နဝ်ꩻ ထီႏတဝ်းအကွက်၊ မာꩻသူႏသေတဝ်း၊ ဖေႏကထွာမွုန်း အကုသိုလ်ႏ၊ ဖေႏကထွာကုသိုလ်ႏနဝ်ꩻ မာꩻသူႏသေတဝ်း၊ အကုသိုလ်ႏဖေႏကေဆ့ꩻထိုꩻ၊ ကုသိုလ်ႏမျိုꩻဖေႏကအာနဝ်ꩻ မာꩻသူႏသေတဝ်း၊ (ထီႏတဝ်းအကွက်) လိုꩻယိုစားနဝ်ꩻ ဟဲ့ꩻ'အန္ဓ-လိုꩻမဲ့ခေ့ꩻနီပင်'နောဝ်ꩻသွူ။ ရဟန်ꩻသီးဖုံႏဟွေး- လိုꩻယင်ဟန်ႏနဝ်ꩻ တလꩻတဝ်းဒွိုန်း တခြိုꩻဥစ္စာႏ ဖေႏကလꩻလွဉ်၊ ကလꩻထွူလဲဉ်းနဝ်ꩻ ဖေႏနေးကယိန်းအာလွဉ်နဝ်ꩻ မာꩻဒါႏဒျာႏ၊ (ထီႏဒျာႏအကွက်) ကွဲႏတွော့ꩻ ဖေႏကထွာမွုန်း အကုသိုလ်ႏ၊ ဖေႏကထွာဒျာႏ ကုသိုလ်ႏနဝ်ꩻ မာꩻသူႏသေတဝ်း၊ အကုသိုလ်ႏဖေႏကဆေ့ꩻထိုꩻ၊ ကုသိုလ်ႏမျိုꩻ ဖေႏကအာနဝ်ꩻ မာꩻဒါႏတောဝ်း၊ (ထီႏတဝ်းအကွက်) ထီႏဒျာႏစီꩻပွါꩻရေꩻတာႏလွုမ်ꩻ၊ ကုသိုလ်ႏရေꩻတာႏနဝ်ꩻ ထီႏတောဝ်း၊ ထီႏတဖဲ့ꩻလွုမ်ꩻတဲင် လိုꩻယိုစားနဝ်ꩻ ဟဲ့ꩻ'ဧကစက္ခု-လိုꩻမဲ့ထီႏထာꩻတပင်လွုမ်ꩻ'နောဝ်ꩻသွူ။ ရဟန်ꩻသီးဖုံႏဟွေး- လိုꩻယင်ဟန်ႏနဝ်ꩻ တလꩻတဝ်းဒွိုန်း တခြိုꩻဥစ္စာႏ ဖေႏကလꩻလွဉ်၊ ကလꩻလဲဉ်းဒါႏ တခြိုꩻဥစ္စာႏ ဖေႏကယိန်းအာလွဉ်တဲ့ မာꩻသူႏသေ (ထီႏအကွက်)၊ ဖေႏကထွာမွန်ုး အကုသိုလ်ႏ၊ ဖေႏကထွာကုသိုလ်ႏနဝ်ꩻတဲ့ မာꩻသူႏသေဒျာႏ၊ အကုသိုလ်ႏဖေႏကဆေ့ꩻထိုꩻ၊ ကုသိုလ်ႏမျိုꩻ ဖေႏကအာနဝ်ꩻတဲ့ မာꩻသူႏသေဒျာႏ၊ (ထီႏဒျာႏအကွက်)စီꩻပွါꩻရေꩻတဲ့ ထီႏဒျာႏ၊ ကုသိုလ်ႏတာႏတဲ့သေတဲင် လိုꩻယိုစားနဝ်ꩻ ဟဲ့ꩻ'ဒွိစက္ခု-လိုꩻမဲ့ထီႏလို့နီပင်'နောဝ်ꩻသွူ။ ရဟန်ꩻသီးဖုံႏဟွေး- စီꩻပွါꩻရေꩻတာႏတဲ့ မဲ့ညာႏအဲဉ်ထဝ်းတဲင် တသူႏသေတဝ်း၊ ကုသိုလ်ႏရေꩻတဲ့ မဲ့ပညာႏတအဲဉ်ထဝ်းတွော့ꩻ မာꩻဒါႏတဝ်း (ထီႏတဝ်းအကွက်နီဖဲ့ꩻ) ဝင်ꩻကဟဲ့ꩻ 'အန္ဓ-လိုꩻပညာႏမဲ့ခေ့ꩻ'နဝ်ꩻ ဘဝယို-ဘဝငါ သွုမ်ꩻခြေင်အာစွဉ်ႏ နီဖဲ့ꩻနောဝ်ꩻသွူ။ ရဟန်ꩻသီးဖုံႏဟွေး- လိုꩻယင်ဟန်ႏနဝ်ꩻ ထာꩻတရာꩻပါ၊ ထာꩻတရာꩻတဝ်းပါ နေးတွမ်ႏအနယ်ꩻနီမျိုꩻ ထုမ်ႏကျံႏ၊ ထိုမ်ႏအံႏတဲင် အကုသိုလ်ႏဖဲ့ꩻအာ၊ အဟောဝ်ဖဲ့ꩻဆေ့ꩻ၊ ထဲ့တလေ့ꩻသော့ꩻဗာႏဒျာႏ ငါးရုဲင်ꩻသူꩻသွူ။ ရဟန်ꩻသီးဖုံႏဟွေး- နေးတွမ်ႏထာꩻတရာꩻရာꩻ၊ ရိုꩻရိုꩻသာꩻသာꩻ ကျိုꩻစာꩻဒျာႏတွမ်ႏနမ်းအာႏ၊ ဉာဏ်ႏအာႏ၊ ဝီရိယအာႏတဲင် ကြောင်းကြောင်းစင်စင် ကလꩻလွဉ်ဒါႏ တခြိုꩻဥစ္စာႏနဝ်ꩻ အံႏတဲ့ အံႏရျူႏရျူႏ၊ လူႏတဲ့ လူႏစင်စင်တွော့ꩻ ခန္ဓာႏကုဲင် တွိုႏကီဒျာႏလူꩻခမ်း၊ ကွပ်နဝ်ꩻမꩻ လိုꩻမဲ့ခေ့တွမ်ႏ လိုꩻထီႏတပင်လွုမ်ꩻနောဝ်ꩻ လဲ့ꩻဖုဲင်း အုံတဝင်ဝင်၊ ပေါင်ꩻကွိုက်ꩻဒျာႏသွော့ လိုꩻထီနီပင်သားနဝ်ꩻနော" ဗုဒ္ဓေါဘုရာꩻ မိန်းခါꩻနုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ အန္ဓသုတ်)[၁][၂]