မွေႏတောႏကက္ကူႏ

မွေႏတောႏကက္ကူႏ (အိန်းကလေတ်: Kakku Pagoda) စေႏတီႏတောႏဘုရာꩻယို အဝ်ႏဒျာႏ ဖြဝ်ꩻခမ်းနယ်ႏ အခဝ်နဝ် ဝေင်ꩻနယ်ႏတောင်ႏကီꩻ အခဝ်နဝ် ပအိုဝ်ႏဒေႏသ ဝေင်ꩻနယ်ႏဖြယ်ကျောက်တလွုံꩻတန်ကိုသွူ။

မွေႏတောႏကက္ကူႏစေႏတီႏတောႏ

ဘုရာꩻသမဲင်ꩻအအဲဉ်ႏ

ခလား ခရစ်နေင်ႏ လုဲင်ႏအဝ်ႏတောဝ်ႏခိန်ႏ ဘီစီ(၃၀၇)ဗာႏယို အိန္ဒိယခမ်း၊ မဇ္စျိမဒေႏသ၊ မကဓတွိုင်ꩻ၊ ပါဋလိပုတ်ခမ်းကို ယို အွဉ်ႏအာႏကွိုꩻ သီရိဓမ္မာႏ သောကခွန် တဲင် သျင်ႏမဟာႏမောဂ္ဂလိ ပုတ္တတိဿ မထေရ် ယိုအွဉ်ငါလွေꩻ ခန်း ဗွေႏရဟန်ꩻ တာရေဉ် တဲင် အဝ်ႏမာꩻလွေꩻခန်းဒျာႏ တတိယအလဲင်ႏ သင်္ဂါယနာႏဒင်ႏပွယ်ꩻသွူ။ သင်္ဂါယနာႏဒင်ႏပွယ်ꩻမိဉ်းထွူနဝ်ꩻ အထိမ်ꩻတဗာႏအနေႏ ကွတ်ꩻတွိုင်ꩻကွတ်ꩻဌာႏနကိုယို အွဉ်ႏစွꩻလွေꩻခန်း မာꩻလေသာႏသနာႏအစွိုꩻတဲင် တယ်ႏကိုꩻကွဲႏ လွေꩻခန်း စေႏတီႏ ( ၈၄၀၀၀ ) ဆူႏ နဝ်ꩻသွူ။

အွဉ်ႏစွꩻလွေꩻဒါႏ မာꩻလေသာႏသနာႏအစွိုꩻနဝ်ꩻ ကွတ်ꩻတွိုင်ꩻကွတ်ꩻဌာႏန ကို တဲင် သုဝဏ္ဏဘူမိခမ်းထီ (မျန်မာခမ်းကို) ယိုလဲ့ꩻ အဝ်ႏပါဒျာႏနဝ်ꩻသွူ။ သုဝဏ္ဏဘူမိခမ်း သာႏသနာႏအစွိုꩻအွဉ်ငါနဝ်ꩻ သျင်ႏသောနတွမ်ႏ သျင်ႏဉတ္တရ ဒျာႏသွူ။ သုဝဏ္ဏဘူမိခမ်း သာႏသနာႏစွိုꩻနဝ်ꩻ ပင်ꩻလွဉ်ခန်း ကအဝ်ႏဒါႏ အိန္ဒိယခမ်း ၊ မဇ္စျိမဒေႏသ ကို ဗွေႏမျတ်ဘုရာꩻ ဓာတ်တောႏ တဲင် တယ်ႏပူႏဇောႏခန်း စေႏတီႏဘုရာꩻဖုံႏနဝ်ꩻ ကက္ကူႏဒေႏသကိုယို လဲ့ ပူႏဇောႏပင်ꩻလွဉ်ခန်း ဓာတ်တောႏတဲင် တယ်ႏကိုꩻကွဲႏခန်း ဒျႏ မွေႏတောႏကက္ကူႏ အသောကစေႏတီႏ ယိုသွူ။ နဝ်ꩻအခိန်းခါႏယို မွေႏတောႏကက္ကူႏ ကိုယို ပူႏဇောႏပင်ꩻကျွဓာတ်တောႏပွယ်ꩻယို အောဝ်ႏဖိုဒျာႏသွူ။

ပေါက္ကံႏစိုး၊ အလောင်ꩻစီတူခွန်(အေဒီ ၁၁၇၄-၁၂၁၁) ယိုထွိုမ်း ခန်း ဖောင်ႏစကြာႏတဲင် လယ်ႏတယ်ႏကိုꩻကွဲႏခန်း စေႏတီႏဘုရာꩻ ဖုံႏနဝ်ꩻသွူ။ ကက္ကူႏဒေႏသကိုယိုလဲ့ꩻ ဓာတ်တောႏဖုံႏတွမ်ႏ ရတနာႏအစွိုးစွိုး ဖုံႏယို ဌာႏပနာႏတယ်ႏပူႏဇောႏလွေꩻခန်း ဖောင်ႏတောႏဆွိုက်စေႏတီႏကိုယိုသွူ။ အလောင်ꩻစီတူခွန်စိုးယို ပင်ꩻကျွပူႏဇောႏ ဓာတ်တောႏပွယ်ꩻယို အဝ်ႏဗာႏဖိုဒျာႏနဝ်ꩻသွူ။

ဓာတ်ပွုံႏဖုံႏ

• 
  မွေႏတောႏကက္ကူႏဘုရာꩻစေႏတီႏ မုဒ်ငွာ
• 
  မွေႏတောႏကက္ကူႏဘုရာꩻ သာႏသနာႏဟံႏနယ်ႏ နွို့ငွါ တꩻခါꩻ
• 
  မွေႏတောႏကက္ကူႏဘုရာꩻစေႏတီႏ ၊ တောင်ႏကီꩻ ၊ ဖြဝ်ꩻခမ်းနယ်ႏ ၊ မျန်မာခမ်းထီ