ယူးလစ်ꩻမျိုꩻ-လိုꩻလစ်ꩻစား

"မူသိကသုတ် (ယူးလစ်ꩻမျိုꩻ-လိုꩻလစ်ꩻစား)" နီဗွေႏဘုရာꩻဟော်ꩻဖေႏ ဗွေႏရဟန်ꩻသီးဖုံႏ တရာꩻနုဲင်းယို- ရဟန်ꩻသီးဖုံႏဟွေး- ယူးအဝ်ႏလစ်ꩻမျိုꩻ၊ လစ်ꩻမျိုꩻကရိုꩻနောဝ်ꩻ- ၁။ ဂါဓံ ကတ္တာ နော ဝသိတာ - ဒိုအဖူꩻ၊ အုံသော့ꩻတဝ်း ၂။ ဝသိတာ နော ဂါဓံ ကတ္တာ - အုံသော့ꩻ၊ ဒိုတဝ်းအဖူꩻ ၃။ နေဝ ဂါဓံ ကတ္တာ နော ဝသိတာ - ဒိုတဝ်းအဖူꩻ၊ အုံသော့ꩻတဝ်း ၄။ ဂါဓံ ကတ္တာ စ ဝသိတာ စ - အဖူꩻတဲ့ဒို၊ အုံတဲ့အုံသော့ꩻ ယူးအဝ်ႏလစ်ꩻမျိုꩻ နုဲင်းနောဝ်ꩻသွူ။ ရဟန်ꩻသီးဖုံႏဟွေး- လိုꩻတဲ့ ဗွန်ပီယူးနဝ်ꩻနေနေ၊ လိုꩻတဲ့ အဝ်ႏလစ်ꩻမျိုꩻ၊ လိုꩻလစ်ꩻမျိုꩻကရိုꩻနောဝ်ꩻ- ၁။ လောကကိုယို ပုဂ္ဂိုလ်ႏယင်ဟန်ႏနဝ်ꩻ 'သွဉ်ဗာႏသုတ်၊ ဂါႏထာႏ၊ ဥဒါန်း၊ ဣတိဝုတ်၊ ဇာတ်'စတဲင်နုဲင်းနဝ်ꩻ၊ ကွဲႏတွော့ꩻ ဝွေꩻနဝ်ꩻ သေတဝ်း 'ဒုက္ခသစ္စာႏ၊ သမုဒယသစ္စာႏ၊ နိရောဓသစ္စာႏ၊ မဂ္ဂသစ္စာႏ'အမွေးအမဲဉ်ႏအတွိုင်ꩻ သေတဝ်း၊ ပုဂ္ဂိုလ်ႏယိုစားနဝ်ꩻ တွမ်ႏယူး'ဒိုအဖူꩻ-အုံသော့ꩻတဝ်း'နဝ်ꩻ ဗွန်ဝင်ꩻနဝ်ꩻသွူ။ ရဟန်ꩻသီးဖုံႏဟွေး- ၂။ လောကကိုယို ပုဂ္ဂိုလ်ႏယင်ဟန်ႏနဝ်ꩻ သွဉ်ဗာႏတဝ်းပိဋကတ် 'သုတ်၊ ဂါႏထာႏ၊ ဥဒါန်း၊ ဣတိဝုတ်၊ ဇာတ်'စတဲင်နုဲင်းနဝ်ꩻ၊ ကွဲႏတွော့ꩻ ဝွေꩻနဝ်ꩻ သေထီႏ 'ဒုက္ခသစ္စာႏ၊ သမုဒယသစ္စာႏ၊ နိရောဓသစ္စာႏ၊ မဂ္ဂသစ္စာႏ'အမွေးအမဲဉ်ႏအတွိုင်ꩻ သေတရာꩻ၊ ပုဂ္ဂိုလ်ႏယိုစားနဝ်ꩻ တွမ်ႏယူး'အုံသော့ꩻ-ဒိုတဝ်းအဖူꩻ'နဝ်ꩻ ပီဝင်ꩻနောဝ်ꩻသွူ။ ရဟန်ꩻသီးဖုံႏဟွေး- ၃။ လောကကိုယို ပုဂ္ဂိုလ်ႏယင်ဟန်ႏနဝ်ꩻ 'သုတ်၊ ဂါႏထာႏ၊ ဥဒါန်း၊ ဣတိဝုတ်၊ ဇာတ်'စတဲင်ပိဋကတ်ဖုံႏနဝ်ꩻတဲ့ သွဉ်ဗာႏတောဝ်း၊ ဝွေꩻနဝ်ꩻနဝ်ꩻ 'ဒုက္ခသစ္စာႏ၊ သမုဒယသစ္စာႏ၊ နိရောဓသစ္စာႏ၊ မဂ္ဂသစ္စာႏ'အမွေးအမဲဉ်ႏအတွိုင်ꩻ တရာꩻတဲ့ သေတဝ်း၊ ပုဂ္ဂိုလ်ႏယိုစားနဝ်ꩻ တွမ်ႏယူး'ဒိုတဝ်းအဖူꩻ-အုံသော့ꩻတဝ်း'နဝ်ꩻ ဗွန်ပီဝင်ꩻနဝ်ꩻသွူ။ ရဟန်ꩻသီးဖုံႏဟွေး- ၄။ လောကကိုယို ပုဂ္ဂိုလ်ႏယင်ဟန်ႏနဝ်ꩻ 'သုတ်၊ ဂါႏထာႏ၊ ဥဒါန်း၊ ဣတိဝုတ်၊ ဇာတ်'စတဲင်ပိဋကတ်ဖုံႏနဝ်ꩻတဲ့ သွဉ်ဗာႏ၊ 'ဒုက္ခသစ္စာႏ၊ သမုဒယသစ္စာႏ၊ နိရောဓသစ္စာႏ၊ မဂ္ဂသစ္စာႏ'အမွေးအမဲဉ်ႏအတွိုင်ꩻ တရာꩻတဲ့ သေဒျာႏ၊ ပုဂ္ဂိုလ်ႏယိုစားနဝ်ꩻ တွမ်ႏယူး'အဖူꩻတဲ့ဒို-အုံတဲ့အုံသော့ꩻ'နဝ်ꩻ ဗွန်ဝင်ꩻနဝ်ꩻသွူ။ ယူးလစ်ꩻမျိုꩻအကိုနဝ်ꩻ- 'အဖူꩻတဲ့ဒိုတဝ်း၊ အုံတဲ့အုံသော့ꩻတဝ်း'ယူးနဝ်ꩻတမျိုꩻနဝ်ꩻ အလွꩻသွတ်ꩻ၊ အညမ်းသွတ်ꩻ၊ ကုဲင်းထွာဒါႏ ညောႏဆာႏနောဝ်ꩻသွူ။ ပုဂ္ဂိုလ်ႏလစ်ꩻမျိုꩻအကိုနဝ်ꩻ- 'လိတ်ပညာႏသွဉ်တဝ်း၊ ကျင်ꩻတဝ်း၊ သေတဝ်းကုသိုလ်ႏ၊ အကုသိုလ်ႏ'လိုꩻနဝ်ꩻတမျိုꩻနဝ်ꩻ အလွꩻသွတ်ꩻ၊ အညမ်းသွတ်ꩻ၊ ကုဲင်းထွာဒါႏ ငါးရုဲင်ꩻဆာႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ စတုက္ကနိပါတ်၊ မူသိကသုတ်)