ယွိုႏဆွိုင်ꩻဖေႏ

"ယွိုႏဆွိုင်ꩻဖေႏနွောင်ꩻခန်းဝင်ꩻ နီပအိုဝ်ႏလိုꩻမျိုꩻ အသꩻရာႏသွုန်ႏထီမွိုင်" "သမဂ္ဂါနံ တပေါ သုခေါ"နီဗွေႏဘုရာꩻကဟောꩻခါꩻဒါႏ ဒေႏသနာႏတောႏမျတ်အတွိုင်ꩻ "မဉ်ႏလွောင်ႏဗူႏနဝ်ꩻ ချံꩻသာႏငါႏ"တဲ့ ကွပ်နဝ်ꩻမꩻ နီခွိုꩻပအိုဝ်ႏသီး ဖေႏကချံꩻသာႏနဝ်ꩻ အဝ်ႏလိုႏလွောင်ႏဗူႏငါႏဝင်ꩻနဝ်ꩻသွူ။ မဉ်ႏအွော့ꩻထန်ႏချာ သမဲင်ꩻစေးလာႏ လိတ်မဲ့ငါဖုံႏနဝ်ꩻ နီပအိုဝ်ႏယို တယ်ႏထောင်ႏအဝ်ႏလဲဉ်းသွူ တွမ်ႏခမ်းသုဝဏ္ဏဘူမိ သုဲင်ꩻထုံႏလဲ့ ကုဲင်ပြင်ꩻဗာႏချာ ထိုꩻမားတငါ တွိုႏအနာ နီခမ်းထီ ထွာထိုꩻဗာႏဝင်ꩻခမ်း၊ နီသမဲင်ꩻထွာတောဗာႏ ဝင်ꩻသမဲင်ꩻနဝ်ꩻ ပအိုဝ်ႏမျိုꩻစွုမ်ႏဖြာꩻ ရမွော့အဝ်ႏသေထွꩻဒျာႏဝင်ꩻသွူ။ ပွိုင်းလဲင်ႏ သုဝဏ္ဏဘူမိကရိုꩻနဝ်ꩻ ထုဲင်ꩻ၊ လဝ်ꩻ၊ အဲန်အိုနီးသျား၊ ကမ္ဘောဒီးယား၊ မန်း-စစွဉ်ႏ ခမ်းထီသူဖြုံႏယို ထွာဒျာႏသုဝဏ္ဏတွိုင်ႏ၊ ပအိုဝ်ႏခွန်အုပ်ချုပ်ရေꩻစူဆꩻလလွဉ်းလွဉ်းနဝ်ꩻသွူ၊ ယိုခါနဝ်ꩻ ထွာလွဉ်တောလဲဉ်းနုဲင်းမုဲင်ꩻ၊ ပွိုးတမုဲင်ꩻ၊ ပါႏတမုဲင်ꩻ၊ အဝ်ႏနုဲင်းမုဲင်ꩻဟောင်း ဟဝ်ယူႏသေနာႏငါႏလဲဉ်းဝင်ꩻသွူ။ နဝ်ꩻသွူကာႏတဝ်း ဝေင်ꩻရန်ႏကုန်ႏ မင်္ဂလာဒုံ၊ တောင်သူကုန်းရပ်ကွက်ဖုံႏနဝ်ꩻ ပွိုင်းလဲင်ႏခါ ပအိုဝ်ႏဒုံဒျာႏသွူ၊ မဲင်ꩻခမ်းနယ်ႏ ဝေင်ꩻမောႏလမဲင်ႏ၊ မုဒုံ-ယိုဖုံႏလဲ့ ပအိုဝ်ႏဒုံဒျာႏ၊ ထုဲင်ႏခမ်းကို မုဲင်းအောꩻ၊ မုဲင်းဟောင်သွဉ်၊ ဟွေးတရောပ်၊ ဟွေးခန်း၊ ဒုံနာပါꩻပဲက်ဖုံႏနဝ်ꩻလဲ့ ထွာဒျာႏပအိုဝ်ႏဒုံ၊ ပအိုဝ်ႏခူဝေင်ꩻဖုံႏဒျာႏကွေႏကွေႏလဲ့ ယိုခါ ပအိုဝ်ႏသီးနဝ်ꩻဖုံႏ လဲဉ်းလွေꩻအွိုးမုဲင်ꩻ၊ ပအိုဝ်ႏဖြားကတယ်ႏထောင်ႏခါꩻ ဒုံဆောင်ႏဝေင်ꩻဖုံႏယို အလဲဉ်းလွေꩻလို့လဲဉ်းမုဲင်ꩻ။ ခြုံꩻခြောင်ဝပ်ကွဉ်ႏ တရွေꩻတရိုꩻတဝ်း၊ စင်းသင်းကောင်ခယ်ႏတရွေꩻတရိုꩻတဝ်း၊ ဝေင်ꩻတောင်ႏကီꩻကိုဖုံႏတရိုꩻတဝ်း ခွိုꩻပအိုဝ်ႏမွိုးဖြားဖါဖြားသီး ကတယ်ႏခါꩻပွိုင်းလဲင်ႏ ဒုံဆောင်ႏခူဝေင်ꩻဖုံႏနဝ်ꩻလဲ့ ယိုခါ ပအိုဝ်ႏမျိုꩻကွဲးဆေ့ꩻဆေ့ꩻသဲင်ꩻ၊ လိုꩻမျိုꩻလင်ဖုံႏ ကွဲထူႏအာအာလွဉ်သော့ꩻလဲဉ်း ခင်ႏလမ်းနဝ်ꩻ အဝ်ႏထီႏဗာႏအာလဲဉ်းနေနေသွူ။ ယိုခါ နီမဉ်ႏတရက်တဝ်း နီပိုလီꩻဆꩻချာလဲ့ ထဲင်းနေင်ႏပေါင်ꩻလစ်ꩻငတ်ꩻဆီ တရျာꩻကိုသူꩻ မဲ့ꩻနီပအိုဝ်ႏပိုလီꩻဖုံႏ ခင်ႏလမ်းအုံ ကွင်ထိုꩻဒါႏသွူ၊ နီသွို့ꩻခြံဟံႏယာႏဖုံႏလဲ့ ထွာထိုꩻလို့ဒါႏ ဝင်ꩻထာꩻခြိုꩻဖုံႏနဝ်ꩻသွူ၊ ယိုခါ ခွိုꩻပအိုဝ်ႏဖုံႏ ကအဝ်ႏတယ်ႏထောင်ႏသေꩻခါꩻဒါႏ ကျောင်ꩻကန်ႏစေႏတီႏ တရောပ်ဖုံႏအစ တွိုႏဆုဲင်ꩻချာခန်းစွဉ်ႏလဲ့ ယံထွာဗာႏပုဲင်ႏ ဝင်ꩻလင်ထာꩻခြိုꩻ၊ ယံထွာစွူစွူဒျာႏ နီပအိုဝ်ႏလိုꩻမျိုꩻအမွီႏနဝ်ꩻ နီအဝ်ႏလိုႏဖွောင်ꩻရဲပ်ထိန်ꩻသိမ်ꩻဟဝ်ဟဝ်ငါႏသွူ။ ပေါႏနီမဉ်ႏအံႏစာထိုꩻစွူစွူဒျာႏ နီသွို့ꩻခြံယာႏ၊ လမ်းပါႏ၊ လမ်းခင်ဖုံႏနဝ်ꩻ တွိုႏတနီꩻခါ နီပအိုဝ်ႏလိုꩻမျိုꩻ ခင်ႏလမ်းအုံကွဲးခြေားဆေ့ꩻသဲင်ꩻထွူ မဲ့ꩻနီလိုꩻမျိုꩻယို အခြုဲင်းခင်ႏလမ်းခိꩻတဝ်းဒွုမ်သွူ၊ ယံကဖင်းထဲင်း၊ ခြုဲင်းထဲင်းဗာႏမွုန်းဒွုမ်နဝ်ꩻ ကထွာစွိုးခွိုꩻကို အွဉ်ငါသားသီးတယဝ်း၊ ကထွာလိုꩻသေလိုꩻဒါႏ ပညာႏအဝ်ႏသားသီးတယဝ်း၊ နီပအိုဝ်ႏခမ်းသားသီးဒျာႏတရိုꩻတဝ်း နေးတွမ်ႏထာꩻသေဉာဏ်ႏအဝ်ႏအဝ်ႏတဲင် အဝ်ႏလိုႏထွားဒေါ့ꩻခြုဲင်းဖေႏသေ အုံအဝ်ႏထိန်ꩻသိမ်ꩻလွေꩻငါႏဝင်ꩻသွူ။ ယိုခါတွင်ꩻ ကအဝ်ႏထွာစွိုးခွိုꩻအွဉ်ငါသီးယို ယံထွာဗာႏပုဲင်ႏ နုဲင်းကမာႏအမာႏပွိုင်းလဲင်ႏနဝ်ꩻ ထွူႏထွူႏတွုမ်တွုမ်အဝ်ႏလိုႏယူႏစဉ်ꩻစာꩻမာꩻလွေꩻငါႏသွူ။ မဉ်ႏထွားဒျာႏ နုဲင်းနီပအိုဝ်ႏ အခေႏနေႏယိုခါနဝ်ꩻ ဟွုန်တွိုႏသꩻကိုတဝ်းဒွုန်းငါႏသွူ၊ တွမ်ႏသꩻစေႏတနာႏ၊ ဝါႏသနာႏပါပါတွော့ꩻ ကအီႏထွိုင်ႏအွဉ်ငါဖေႏဒျာႏ အွဉ်ငါ တရျားရျားသားနဝ်ꩻ ဆေ့ꩻခြေားငါႏ၊ ပေါႏခြွေပသာႏ၊ ပေါႏဒါႏလွိုသွူဝင်ꩻ တစူးတစိꩻပေႏငါလဲ့ ဒေါ့ꩻရီစွော့ꩻရိုမ်း လဲင်ꩻလꩻဒွုမ်တဲ့ အဝ်ႏထီႏဗာႏအာငါႏသွူ၊ ဖေႏကျံႏဉာဏ်ႏသော့ꩻရိုမ်းငါတဲ့ လက်ခံႏတဝ်းဒွုမ်ဖုံႏတွော့ꩻ အွဉ်ႏဆွော့ꩻလို့ဒျာႏ အနျာႏကဲဉ် ပငါပရာꩻဖုံႏနဝ်ꩻသွူ။ ထာꩻမာꩻထာꩻဒါႏကရိုꩻယို ဒါႏလွိုယံလွိုလဲဉ်းဝင်ꩻကရိုꩻနဝ်ꩻ တအဲဉ်ထဝ်း၊ သေင်ႏမွူးတဲ့ ထိုလွိုဝင်ꩻ တအဲဉ်ထဝ်းကရိုꩻနဝ်ꩻ အဝ်ႏလိုႏသေအွဉ်ႏသတိငါႏသွူ၊ ကုလသမဂ္ဂသူꩻတဲ့နဝ်ꩻ၊ အုပ်ချုပ်ခမ်းထီ အစိုႏရသီးတဲ့နဝ်ꩻ ဝင်ꩻအဝ်ႏအွဉ်ႏနေးဗာႏတွမ်ႏ ဖေႏအကျံႏဉာဏ်ႏသားတဲင် တွိုႏယိုနဝ်ꩻ အုပ်ချုပ်ဒျာႏလွုမ်ꩻ ဒုံဆောင်ႏ၊ အွိုင်ႏ၊ နယ်ႏအရန်းပဉ်ထဲင်းတွော့ꩻ ရိုꩻဗာႏနုဲင်းနဝ်ꩻဟောင်း။ ကွပ်နဝ်ꩻမꩻ ခေတ်အဝ်ႏယံ၊ အခွင်ꩻအဝ်ႏတခြင်တွင်ꩻ နုဲင်းယိုခါနဝ်ꩻ အဝ်ႏလိုႏလွောင်ႏဗူႏငါႏ နီစွိုးခွိုꩻလိုꩻမျိုꩻ၊ ခမ်းဒေါမ်ခမ်းကောင်ယိုတဲ့ ဖေႏကအဝ်ႏ ထွာငါတအိုဝ်ႏငါနဝ်ꩻ ကအွဉ်ခွုမ်မာꩻသား၊ လိုꩻသေလိုꩻဒါႏသီး အဝ်ႏလိုႏထွားခူခူ၊ အဝ်ႏလိုႏထီႏဆွာꩻဆွာꩻ၊ အဝ်ႏလိုႏဒေါ့ꩻရီဝင်ꩻ ခွုမ်မာꩻခန်းသွူ။ နီကအွဉ်ခွုမ်မာꩻ အခိန်ႏတွင်ꩻကိုယို နီသမဲင်ꩻဟဝ် ဖေႏကအဝ်ႏကုဲင်သေꩻနဝ်ꩻ အထျꩻအဝ်ႏငါႏ နီကခွုမ်မာꩻ ထာꩻမာꩻစွို့ꩻစွဉ်ႏမုꩻအလောင်း၊ နီရုဲင်ꩻတသွိုးမု၊ တလျူသွောင်ဖွီမု၊ အစွန်ꩻထီဗွေအဝ်ႏမုအလောင်းဖုံႏယို အဝ်ႏလိုႏအွဉ်ႏအထျꩻ မာꩻလွေꩻငါႏသွူ။ အွဉ်ငါခွုမ်မာꩻသွူ လိုꩻအမျာꩻလဲ့ မဉ်ႏအံႏတန်၊ ဗေင်ႏတန်၊ ဒေါ့ꩻတန်ခြေင်လွုမ်ꩻထာꩻ၊ တွိုႏထာꩻမာꩻ မဉ်ႏတမာꩻတန်ခါꩻတဝ်းစွိုးခွိုꩻ လိုꩻမျိုꩻတာႏနဝ်ꩻ သမဲင်ꩻစေးလာႏလောင်းနဝ်ꩻတဲ့ အရောင်ႏတခွို့ အဝ်ႏကုဲင်လူးဗာႏတဝ်းသွူ။ အဝ်ႏလိုႏအွဉ်ငါယံယံ၊ အွဉ်ကွင်ပုဲင်ႏတဖူꩻ၊ ထွို့ꩻတရွို့ꩻကွင်ကယ်ပုဲင်ႏဝင်ꩻသွီႏ၊ ဝင်ꩻအဝ်ႏကွင်တဖူꩻ မဲ့အဝ်ႏဗန်ႏသား၊ အဝ်ႏလိုႏဟဲ့ꩻစွီႏသော့ꩻရော့ꩻရော့ꩻဖေႏ တဖူꩻဟဝ်ကို၊ စိမ်စွဉ်ႏအဗွာ၊ အတနျာႏ၊ နုဲင်းဒျာႏခမ်းဒေါမ်ခမ်းကောင် အစခွိုꩻပအိုဝ်ႏဖဝ ဖေႏကတရေꩻညီꩻညီꩻဝင်ꩻအတာႏ နီအွဉ်ခွုမ်မာꩻသားယို တွမ်ႏစေႏတနာႏမဲ့ဖြုံႏ အဝ်ႏလိုႏထွား၊ တွမ်ႏနားအဝ်ႏလိုႏနာႏ၊ တွမ်ႏသꩻစာႏနာႏ အဝ်ႏသꩻရာႏသွုန်ႏထီ အဝ်ႏလိုႏချင်းထွူ အဝ်ႏလိုႏတဲ့ꩻခဝ်းအွီႏ၊ သွီႏခဝ်းငါႏလဲဉ်းဝင်ꩻသွူ။ ဆရာႏတောႏတန် အစုပ်စုပ်၊ ခွန်တန်အစုမ်ꩻစုမ်ꩻ တထွို့ꩻဗူႏနွောင်ꩻတဝ်းဒွိုန်းဒါႏ၊ မဟမဟာႏ နီခွိုꩻသွီႏကြာꩻမု ပျဿနာႏယို အဝ်ႏကုဲင်နီစုပ် နီခေတ်နီခိန်ႏ ဖေႏကလွောင်ႏဗူႏချာနွောင်ꩻခန်းနဝ်ꩻ နီလိုꩻယွဲးခွိုꩻသွုပ်တသာသီး တွမ်ႏသꩻဓာတ်ယံယံ၊ တွမ်ႏစွန်ꩻထီထင်ထင်တွော့ꩻ ကျိုꩻစာꩻဖျင်ဖျင်၊ ထွို့ꩻဗူႏလꩻလꩻလွေꩻခန်းသွော့ စွိုးခွိုꩻသီႏ၊ စွိုးခွိုꩻလိတ်တမူနဝ်ꩻ နီမာꩻခန်းဝင်ꩻ၊ ထွိုင်ႏမာꩻခန်းဝင်ꩻမွိုင်။ ခေတ်တခြင်တွင်ꩻခိန်ႏခါႏ ခေတ်သာႏခိန်ႏတွင်ꩻ နီအဝ်ႏလိုႏထွို့ꩻဗူႏငါႏလဲဉ်းဝင်ꩻ၊ ခေတ်မဉ်ႏသာႏတဝ်းခိန်ႏမဲ့ꩻ နီလိုꩻမျိုꩻယို ထွာထိုꩻခြေင်ဝင်ꩻထာꩻအံႏမျောႏဆာႏ၊ ဝင်ꩻခင်ႏဖါႏ ယမ်းခြောင်ꩻတန်နဝ်ꩻသွူ၊ မွိုက်ခွိုက်အဝ်ႏမာꩻနွောင်ꩻတွင်ꩻ၊ အခွင်ꩻအဝ်ႏဟဝ်တွင်ꩻ အချင်ꩻချင်ꩻလဲ့ မွိုက်ခွိုက်သေနာႏယောင်းလူႏလုဲင်ႏဝင်ꩻစူတွင်ꩻ၊ နီအဝ်ႏလိုႏသုံꩻဖျင်ꩻတဝ်းဒွုမ်အခိန်ႏ၊ နီအဝ်ႏလိုႏမာꩻမွေးမွေးလဲဉ်း စွိုးခွိုꩻတာႏ၊ ငမ်းငါႏအခွင်ꩻရေꩻဖုံႏသွုမ်ꩻခြေင်ပျင်ႏလို့နဝ်ꩻသွူ။ နီပအိုဝ်ႏ ခမ်းကောင်ခမ်းဒေါမ်ယို အဝ်ႏလိုႏသေနာႏလူႏလုဲင်ႏငါႏလဲဉ်းဝင်ꩻ၊ ချꩻခန်းဝင်ꩻ မာန်ႏမာႏနဖုံႏထွူ ဆွန်ꩻစူမွိုင်မွိုင်ခန်းဝင်ꩻ၊ လိုꩻမျိုꩻ အရွီးအခိုႏတဲ့ထွာ၊ လိုꩻမျိုꩻကတူႏတဲ့မွေးမွေး နီလိတ်မူယို အွဉ်ဝင်ꩻအွဉ်ႏဆွိုင်ꩻမွိုင်မွိုင်ခန်းဝင်ꩻ၊ နီလိုꩻမျိုꩻကတူႏ အသဲင်ꩻယိုလဲ့ အွဉ်ႏဝင်ꩻဆꩻပြဝ်ႏမွိုင်မွိုင်ခန်း၊ အွဉ်ဝင်ꩻယွိုႏဆွိုင်ꩻမွိုင်မွိုင်ခန်း နီပအိုဝ်ႏစွိုးခွိုꩻ အသွီႏထီအသꩻရာႏမောင်ꩻနဝ်ꩻ- နမ်းသꩻနီပါꩻ ယံချံꩻသာႏထွူ ထွို့ꩻလွောင်ႏဗူႏနွောင်ꩻချာခန်း ပအိုဝ်ႏလိတ်မူ တမူချင်ꩻနဝ်ꩻ ဆုတောင်ꩻလွေꩻဒျာႏသွူ။