ယွုမ်းယိုꩻဝင်ꩻငဝ်း
"သတ္တဇဋိလသုတ် (လိုꩻယွုမ်းယိုꩻဝင်ꩻငေါဝ်း တသေတဝ်း အမွေးအမဲဉ်ႏ)"
အွိုးခꩻတလဲင်ႏ နီဗွေႏဘုရာꩻအဝ်ႏအုံ ကျောင်ꩻပုဗ္ဗာရုံကိုအတွင်ꩻ မွူးဟာတန်ပသာႏ ချိန်ႏခါႏကာႏလနဝ်ꩻ ကျွꩻထန်ႏကျောင်ꩻငွါ၊ အုံတဲင်ဒင်ႏထာꩻထွိုး၊ အဝ်ႏဒေါ့ꩻရီတွမ်ႏ ပသေနဒီခွန်တန်ကောသလနောဝ်ꩻသွူ။ အတွင်ꩻနဝ်ꩻခါ "ပြေင်အော့ꩻဆွက်ႏဆွာꩻ၊ စူမီႏဆွာꩻ၊ ခင်ႏမီႏဆွာꩻ၊ အွာနေးကထိုမ်း၊ အီတွမ်ႏဝွေꩻသီးအခြွိုင်းအခြိုꩻ၊ ရသေ့ꩻဖုံႏနဝ်ꩻနွုတ်ꩻပါꩻ၊ နိဂဏ္ဌတက္ကတွဉ်ꩻဖုံႏနဝ်ꩻ နွုတ်ꩻဖြာꩻ၊ အစေလကတက္ကတွဉ်ꩻဖုံႏနောဝ်ꩻနွုတ်ꩻဖြာꩻ၊ တိတ္ထိတက္ကတွဉ်ꩻနွုတ်ꩻဖြာꩻ၊ ပရိဗိုဇ်တက္ကတွဉ်ꩻနွုတ်ꩻဖြာꩻဖုံႏနဝ်ꩻ တွမ်ႏဗွေႏဘုရာꩻ မဗော့ꩻမညာꩻ တစွိုꩻထွူတစွိုꩻ ကာႏလွေꩻ-ကာႏလွေꩻနောဝ်ꩻသွူ။ ပသေနဒီခွန်ကောသလနဝ်ꩻ အဝ်ႏဗွေႏဘုရာꩻထျꩻ ထွိုင်ႏလွေꩻထေ့ နိဂဏ္ဌတက္ကတွဉ်ꩻ၊ အစေလကတက္ကတွဉ်ꩻ၊ တိတ္ထိသီး၊ ပရိဗိုဇ်တက္ကတွဉ်ꩻသီးထျꩻ၊ အုံလင်ꩻဟံႏလောင်း ခေါက်ဝုဲင်ႏရိုႏရိုႏသေႏသေႏ တိတ္ထိတက္ကတွဉ်ꩻထွူတဲင် - "ခွေသွဉ်းနဝ်ꩻ ပသေနဒီ ကောသလခွန် ဗွေႏဩ၊ ခွန်တန်ပသေနဒီကောသလ-ကရိုꩻနဝ်ꩻ ခွေသွဉ်းယိုသွူ ဗွေႏဩ"လောဝ်းပါနုဲင်းနောဝ်ꩻ။ နောဝ်ꩻထွူတွော့ꩻ သဲင်ꩻအုံလင်ꩻချာ ဗွေႏဘုရာꩻထျꩻ၊ လောဝ်းဗွေႏဘုရာꩻနုဲင်းယို- "ဩဗွေႏ- ပုဂ္ဂိုလ်ႏကထွာ ရဟန္တာႏဖုံႏနဝ်ꩻ 'တိတ္ထိတက္ကတွဉ်ꩻ'ဖုံႏနဝ်ꩻတဲ့ပါ ဗွေႏဩ" "တကာႏခွန်တန်ဟွေး- လိုꩻအုံလမ်းအုံပါႏ၊ လိုꩻအုဲင်ႏဒျာႏပိုမာ၊ လိုꩻစံႏစာꩻဒျာႏ မဲ့အာႏရွုံႏ၊ နားအာႏရွုံႏ၊ နေ့ꩻဖူအာႏရွုံႏ၊ ဖြေꩻအာႏရွုံႏ၊ (အခွေါင်းအရွ သာႏယာႏမုꩻ) နမ်းအာႏရွုံႏ၊ လိုꩻလောႏဘꩻတဏှာႏ အောဝ်ႏသား၊ လိုꩻကိလေႏသာႏအောဝ်ႏသားဖုံႏနဝ်ꩻ 'ပါꩻယို ထွာရဟန္တာႏ၊ ပါꩻနဝ်ꩻ ထွာရဟန္တာႏ'ကရိုꩻနဝ်ꩻ တသေနွောင်ꩻတောဝ်းလာꩻလာꩻ၊ လိုꩻစားနဝ်ꩻကရိုꩻ ပါꩻယို ထွာရဟန္တာႏ၊ ပါꩻနဝ်ꩻ ထွာရဟန္တာႏ'နဝ်ꩻ အဒေါ့ꩻတမွိုꩻလဲႏကွို့ꩻထာꩻ။ တကာႏခွန်တန်ဟွေး- ရဟန္တာႏအရန်း တွမ်ႏရိုꩻမွုန်းတဝ်း သီႏလအရန်းငါမဉ်ႏတဲ့ 'ပါꩻယို သီႏလအဝ်ႏ၊ ပါꩻနဝ်ꩻသီႏလအဝ်ႏ'ကရိုꩻနဝ်ꩻ သီႏလအဝ်ႏနုဲင်းနုဲင်းဝင်ꩻသား၊ အုံညီꩻညညလို့ဝင်ꩻမꩻသေ၊ ပေါႏကွိုက်ꩻတနီꩻနီနီꩻ အုံညီꩻတဆူးတဆင်ႏလွုမ်ꩻနဝ်ꩻ 'ပါꩻယိုသီႏလအဝ်ႏ၊ ပါꩻနဝ်ꩻသီႏလအဝ်ႏ'ကရိုꩻနဝ်ꩻ အွဉ်ႏသတိꩻမꩻသေ၊ ပေါႏအွဉ်ႏသတိꩻတဝ်းနဝ်ꩻ တသေနွောင်ꩻတောဝ်း။ တကာႏခွန်တန်ဟွေး- လောကလိုꩻအခမ်းယိုနဝ်ꩻ လိုꩻရိုꩻရိုꩻသာꩻသာꩻ၊ လိုꩻသွုန်ႏစွဉ်ႏ၊ လိုꩻသꩻစွဉ်ႏသား ဆေ့ꩻပေႏ၊ ဖေႏဝင်ꩻကထင်းတန်တဲင် နေးအနယ်ꩻအမျိုꩻမျိုꩻမာꩻနယ်၊ အုံလဲဉ်နယ်၊ ကျင်ꩻလဲဉ်နယ်၊ အနမ်းအထန်ႏနဝ်ꩻ အပွုံႏသူႏတောႏကောင်ꩻ၊ အသꩻကိုနဝ်ꩻ လောႏဘꩻ ဒေါႏသꩻ မောႏဟꩻ မာႏန ကိလေႏသာႏ အဝ်ႏဗွေဗောႏစွဉ်ႏထာꩻ၊ နဝ်ꩻဖုံႏနဝ်ꩻ လိုꩻသေလိုꩻဒါႏ လိုꩻဉာဏ်ႏပညာႏသားဖုံႏမꩻသေ၊ လိုꩻယွုမ်းယိုꩻဝင်ꩻငေါဝ်း၊ လိုꩻပညာႏတအဲဉ်ထဝ်းသားဖုံႏနဝ်ꩻ တသေနွောင်ꩻတဝ်း"ဗွေႏစောဝ်းဘုရာꩻ သျင်ꩻနယ်ချာဖေႏနုဲင်းနဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ သတ္တဇဋိလသုတ်)[၁][၂]