ရပ်ပဲ့စ်သွစ်ꩻပါꩻ
"အက္ခဏသုတ် (ရပ်ပဲ့စ်သွစ်ꩻပါꩻ-တရာꩻလꩻတဝ်း)" ရဟန်ꩻသီးဖုံႏဟွေး- အထီႏအဟွူန်ဆေ့ꩻ ပုထုဇဉ်ႏဖုံႏနောဝ်ꩻရိုꩻ- 'လောက ကဖေႏအပ်ဒါႏ အခွင်ꩻအရေꩻ အဝ်ႏဒျာႏ၊ လောကကိုယို မာꩻအမျိုꩻမုဲင်ꩻ လꩻဒျာႏ'ဒေါ့ꩻဖွီထာꩻနုဲင်းနဝ်ꩻ၊ ပုထုဇဉ်ႏနဝ်ꩻ 'မာꩻခွင်ꩻလꩻမကောင်၊ လꩻတဝ်းမကောင်'သေတဝ်း။ ရဟန်ꩻသီးဖုံႏဟွေး- မာꩻခွင်ꩻတလꩻတဝ်း၊ ကံကျင်ꩻခွင်ꩻလꩻတဝ်း၊ အခိန်ႏခါႏတမွေးတဝ်း၊ အခွင်ꩻသာႏတဖေႏတဝ်း၊ အခေႏအနေႏ တဖေႏတဝ်းနဝ်ꩻ အဝ်ႏသွစ်ꩻမျိုꩻ၊ သွစ်ꩻမျိုꩻကရိုꩻနောဝ်ꩻ- ၁။ လောကကိုယို ဘုရာꩻနမ်းအဝ်ႏဒျာႏ၊ တရာꩻတဲ့ဟော်ꩻဒျာႏ၊ ကွဲႏတွော့ꩻ ဝွေꩻနဝ်ꩻ လင်ꩻထဲ့ဒျာႏငါးရုဲင်ꩻ၊ ထင်ꩻထဲ့ငါးရုဲင်ꩻခိန်ႏနဝ်ꩻ အကျင်ꩻဟောဝ် ကလꩻမီမဂ်ဖိုလ်ႏ၊ ကုသိုလ်ႏတရာꩻနဝ်ꩻ ဝွေꩻမာꩻတလꩻတဝ်း၊ ယိုနဝ်ꩻ လꩻမဂ်ဖိုလ်ႏတာႏ (ပထမ)အခိန်ႏခါႏ မွေးတဝ်း။ ၂။ လောကကိုယို ဘုရာꩻနမ်းအောဝ်ႏဒျာႏ၊ တရာꩻတဲ့ဟော်ꩻဒျာႏ၊ ကွဲႏတွော့ꩻ ဝွေꩻနောဝ်ꩻ အဝ်ႏထွာဒျာႏ တိရစ္ဆာန်ႏ၊ အဝ်ႏထွာ တိရစ္ဆာန်ႏခိန်ႏနဝ်ꩻ အကျင်ꩻဟောဝ် ကလꩻအီမဂ်ဖိုလ်ႏ၊ ကုသိုလ်ႏတရာꩻနောဝ်ꩻ ဝွေꩻမာꩻတလꩻတဝ်း၊ ယိုနဝ်ꩻ လꩻမဂ်ဖိုလ်ႏတာႏ (ဒုတိယ)အခိန်ႏခါႏ မွေးတဝ်း။ ၃။ လောကကိုယို ဘုရာꩻနမ်းအဝ်ႏဒျာႏ၊ တရာꩻတဲ့ဟော်ꩻဒျာႏ၊ ကွဲႏတွော့ꩻ ဝွေꩻနောဝ်ꩻ အဝ်ႏထွာဒျာႏ ပိတ္တာႏ၊ အဝ်ႏထွာ ပိတ္တာႏခိန်ႏနဝ်ꩻ အကျင်ꩻဟောဝ် ကလꩻအီမဂ်ဖိုလ်ႏ၊ ကုသိုလ်ႏတရာꩻနဝ်ꩻ ဝွေꩻမာꩻတလꩻတဝ်း၊ ယိုနဝ်ꩻ လꩻမဂ်ဖိုလ်ႏတာႏ (တတိယ)အခိန်ႏခါႏ မွေးတဝ်း။ ၄။ လောကကိုယို ဘုရာꩻနမ်းအောဝ်ႏဒျာႏ၊ တရာꩻတဲ့ဟော်ꩻဒျာႏ၊ ကွဲႏတွော့ꩻ ဝွေꩻနောဝ်ꩻ အဝ်ႏထွာဒျာႏ အသညသတ်ဗျဟ္မာႏ (အဝ်ႏဒျာႏနမ်းပွိုင်လွုမ်ꩻ)၊ အဝ်ႏထွာ အသညသတ်ဗျဟ္မာႏခိန်ႏနဝ်ꩻ အကျင်ꩻဟဝ် ကလꩻအီမဂ်ဖိုလ်ႏ၊ ကုသိုလ်ႏတရာꩻနဝ်ꩻ ဝွေꩻမာꩻတလꩻတဝ်း၊ ယိုနဝ်ꩻ လꩻမဂ်ဖိုလ်ႏတာႏ (စတုတ္ထ)အခိန်ႏခါႏ မွေးတဝ်း။ ၅။ လောကကိုယို ဘုရာꩻနမ်းအဝ်ႏဒျာႏ၊ တရာꩻတဲ့ဟော်ꩻဒျာႏ၊ ကွဲႏတွော့ꩻ ဝွေꩻနောဝ်ꩻ အဝ်ႏထွာဒျာႏ လိုꩻရွိုင်ꩻ၊ ရဟန်ꩻသံဃာႏ တအဲဉ်ထဝ်းအရပ်၊ တသေတဝ်းထာꩻရာꩻရာꩻ၊ ဝွေꩻအဝ်ႏထွာ လိုꩻရွိုင်ꩻခိန်ႏနဝ်ꩻ အကျင်ꩻဟောဝ် ကလꩻအီမဂ်ဖိုလ်ႏ၊ ကုသိုလ်ႏတရာꩻနဝ်ꩻ ဝွေꩻမာꩻတဒါႏတဝ်း၊ ယိုနဝ်ꩻ လꩻမဂ်ဖိုလ်ႏတာႏ (ပဉ္စမ)အခိန်ႏခါႏ မွေးတဝ်း။ ၆။ လောကကိုယို ဘုရာꩻနမ်းအဝ်ႏဒျာႏ၊ တရာꩻတဲ့ဟော်ꩻဒျာႏ၊ ကွဲႏတွော့ꩻ ဝွေꩻနဝ်ꩻ အယူႏမာႏ အဝ်ႏထွာဒျာႏ မိစ္ဆာႏဒိဋ္ဌိတဲင် အကျင်ꩻဟောဝ် ကလꩻအီမဂ်ဖိုလ်ႏ ကုသိုလ်ႏတရာꩻနဝ်ꩻ ဝွေꩻတမာꩻတဝ်း၊ ယိုနောဝ်ꩻ လꩻမဂ်ဖိုလ်ႏတာႏ (ဆဋ္ဌမ)အခိန်ႏခါႏ မွေးတဝ်း။ ၇။ လောကကိုယို ဘုရာꩻနမ်းအဝ်ႏဒျာႏ၊ တရာꩻတဲ့ဟော်ꩻဒျာႏ၊ ကွဲႏတွော့ꩻ ဝွေꩻနဝ်ꩻ ထွာဒျာႏလိုꩻနားတအွိုင်၊ ထွာဒျာႏလိုꩻလိုꩻတအာႏတွော့ꩻ အကျင်ꩻဟောဝ် ကလꩻအီမဂ်ဖိုလ်ႏ၊ ကုသိုလ်ႏတရာꩻနဝ်ꩻ ဝွေꩻမာꩻတဒါႏတဝ်း၊ ယိုနဝ်ꩻ လꩻမဂ်ဖိုလ်ႏတာႏ (သတ္တမ)အခိန်ႏခါႏ မွေးတဝ်း။ ၈။ ဝွေꩻနဝ်ꩻ လိုꩻတအွိုင် တအာႏမွေးတဝ်း၊ ကွဲႏတွော့ꩻ ဝွေꩻကထွာလိုꩻတွင်ꩻနဝ်ꩻ ဘုရာꩻပွင်ꩻခိန်ႏမွေးတဝ်း၊ (သာႏသနာႏခေ့ꩻခိင်ႏဒျာႏ)တဲင်တွော့ꩻ အကျင်ꩻဟောဝ် ကလꩻအီမဂ်ဖိုလ်ႏ ကုသိုလ်ႏတရာꩻနဝ်ꩻ တမာꩻဗာႏတဝ်း၊ ယိုနဝ်ꩻ လꩻအီမဂ်ဖိုလ်ႏတာႏ (အဋ္ဌမ)အခိန်ႏခါႏ မွေးတဝ်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ အဋ္ဌကနိပါတ်၊ အက္ခဏသုတ်)[၁][၂]