ရဟန်ꩻသီးအပရိဟာနိယ
"ပဌမသတ္တကသုတ် (ရဟန်ꩻသီးအတွက်တာႏ အပရိဟာနိယ တရာꩻနွုတ်ꩻပါꩻ)" အွိုးခꩻတလဲင်ႏ- နီဗွေႏဘုရာꩻအဝ်ႏအုံ ရာႏဇဂျိုဟ်ႏခမ်း၊ ဂိဇ္ဈကုဋ်ကောင်လောင်းအတွင်ꩻ ဟော်ꩻဖေႏဗွေႏရဟန်ꩻသီး တရာꩻနုဲင်းယို- "ရဟန်ꩻသီးဖုံႏဟွေး- ခွေအီႏဟော်ꩻဖေႏသီ 'တဆွုတ်ယွုတ်နွောင်ꩻတဝ်း-အပရိဟာနိယတရာꩻ'နွုတ်ꩻပါꩻ၊ နာႏလွသွော့ တရာꩻနဝ်ꩻလုဲင်း၊ စွူဖြွိုးဟောဝ်ခြꩻ-သွင်ႏသꩻလွသွော့ တရာꩻနဝ်ꩻဟုဲင်း" နီဗွေႏဘုရာꩻ မိန်းနုဲင်းနဝ်ꩻတဲင်- "ဟောဝ်သွူ၊ သꩻရေꩻငါႏ၊ နီသွဉ်းသီး နာႏလွဒျာႏ ဗွေႏဩ" ရဟန်ꩻသီးဖုံႏ လောဝ်းချာနုဲင်းနဝ်ꩻသွူ။ "ရဟန်ꩻသီးဖုံႏဟွေး- ၁။ ရဟန်ꩻသီးဖုံႏနဝ်ꩻ အုံကွံ(စီꩻဝွေꩻ)သေႏသေႏသွော့လို့ဝင်ꩻလုဲင်း၊ အလဲင်ႏပေါင်ꩻအာအာ ပေါႏအုံကွံသေႏသေႏနေကလို့ဝင်ꩻနဝ်ꩻ အဝ်ႏစီꩻပွါꩻတိုꩻတက်တာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ရဟန်ꩻသီးဖုံႏဟွေး- ၂။ ရဟန်ꩻသီးဖုံႏနဝ်ꩻ လွောင်ႏလွောင်ႏဗူႏဗူႏ အုံကွံလွသွော့ သံဃာႏကိစ္စလုဲင်း၊ အုံကွံမဉ်ႏထွူမꩻ ထွိုင်ႏသဲင်ꩻဟုဲင်း၊ လွောင်ႏလွောင်ႏဗူႏဗူႏ ပေါႏအဝ်ႏထူႏခွုမ်မာꩻနေက သံဃာႏကိစ္စနဝ်ꩻ အဝ်ႏတိုꩻတက်တာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ရဟန်ꩻသီးဖုံႏဟွေး- ၃။ ရဟန်ꩻသီးဖုံႏနဝ်ꩻ တပညတ်တဝ်းဒွိုန်းကိုနဝ်ꩻ ပညတ်လွမွုန်း၊ ကပညတ်လဲဉ်းကိုတဲ့ ယားကုဲင်ထိုꩻမွုန်း၊ ကပညတ်ခါꩻဒါႏ သိက္ခာႏပုဒ်ဖုံႏနဝ်ꩻအတွိုင်ꩻ ဟောဝ်ဟောဝ်ဒါႏဒါႏ ပေါႏရဟန်ꩻသီး အဝ်ႏလွောက်ꩻနာႏလွဉ်ꩻနေကနဝ်ꩻ အဝ်ႏစီꩻပွါꩻတိုꩻတက်တာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ရဟန်ꩻသီးဖုံႏဟွေး- ၄။ ရဟန်ꩻသီးဖုံႏနဝ်ꩻ ပေါႏအဝ်ႏရိုႏသေႏနေက ဗွေႏဗွန်ဖြား ဗွေႏဗွန်တန် (သံဃာႏအတန်)၊ ပေါႏအဝ်နာႏနေက ဗွေႏဗွန်ဖြား ဗွေႏဗွန်တန် (သံဃာႏအတန်)သီးငေါဝ်းနဝ်ꩻ အဝ်ႏစီꩻပွါꩻတိုꩻတက်တာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ရဟန်ꩻသီးဖုံႏဟွေး- ၅။ ရဟန်ꩻသီးဖုံႏနဝ်ꩻ ပေါႏတလွောက်ꩻလွဉ်ꩻတောဝ်းဒွိုန်းက မာꩻဒါႏဘဝ၊ လောႏဘꩻတဏှာႏအလိုႏနောဝ်ꩻ အဝ်ႏစီꩻပွါꩻတိုꩻတက်တာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ရဟန်ꩻသီးဖုံႏဟွေး- ၆။ ရဟန်ꩻသီးဖုံႏနဝ်ꩻ ပေါႏသꩻအဝ်ႏမဉ်အုံနေက (တခြာကို)ကျောင်ꩻတောႏရꩻနဝ်ꩻ အဝ်ႏစီꩻပွါꩻတိုꩻတက်တာႏလွုမ်ꩻ၊ ဆွုတ်ယွုတ်ခရာႏအဲဉ်ထောဝ်း။ ရဟန်ꩻသီးဖုံႏဟွေး- ၇။ ရဟန်ꩻသီးဖုံႏနဝ်ꩻ တလꩻဖျော်လွဉ်ဒွိုန်း ရဟန်ꩻဟောဝ်သိးဖုံႏ ဖေႏနေးကဖျော်လွဉ်၊ ကဖျော်လွဉ်လဲဉ်း ရဟန်ꩻဟောဝ်သီးဖုံႏ ဖေႏနေးကအုံဗာႏ ချမ်ꩻချမ်ꩻသာႏသာႏ၊ စွုမ်ႏပီးစွုမ်ႏပါꩻ ပေါႏအဝ်ႏမာꩻဖေႏနေကနုဲင်းနဝ်ꩻနဝ်ꩻ အဝ်ႏစီꩻပွါꩻတိုꩻတက်တာႏလွုမ်ꩻ၊ ဆွုတ်ယွုတ်ခရာႏအဲဉ်ထဝ်း"ဗွေႏစဝ်းဘုရာꩻ ဟော်ꩻခါꩻနုဲင်းနဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ သတ္တကနိပါတ်၊ ပဌမသတ္တကသုတ်)[၁][၂]