ရာႏဂနွို့ခြူ သꩻတဒူ
"သင်္ဂါရဝသုတ် (ရာႏဂနွို့ခြူ သꩻတဒူတောင်ꩻတောဝ်း)"
အွိုးခꩻတလဲင်ႏ "သင်္ဂါရဝ"ပုဏ္ဏာꩻတဖြာꩻ လွဉ်ထေ့ဗွေႏဘဘုရာꩻ၊ ရီနီဗွေႏဘုရာꩻနုဲင်းယို- "ဩဗွေႏဂေါတမ- ခွေသွဉ်းပြန်ႏ (ပေႏတင်ႏ)နေင်ႏပေါင်ꩻညသွူတဲ့ ယလဲင်ႏလဲင်ႏ အွဉ်ႏဖေင်ꩻထိုꩻဒျာႏ၊ တွိုႏယင်ဟန်ႏနဝ်ꩻ တပြန်ႏညဗာႏတဝ်းတဲ့ သမ်းတောင်ꩻစဲင်းစဲ့တန်ဒျာႏ၊ ပွိုးထမုဲင်ꩻခရာႏနောဝ်ꩻဗွေႏ"ရီဗွေႏဘုရာꩻနုဲင်းနောဝ်ꩻ။ ဗွေႏဘုရာꩻရိုꩻ- "တကာႏသင်္ဂါရဝဟွေး- ထီကအဝ်ႏတကောက်ꩻကိုနဝ်ꩻ မဉ်ႏသော့ꩻမွိုင် မေ့ဖွန်ႏမွိုင် တဒူထိုꩻစွဉ်ႏ၊ ထီကိုနဝ်ꩻ ထွားသော့ꩻလွိုးထီႏဒွုမ်၊ အနုဲင်းနဝ်ꩻနေနေ လိုꩻသီးယို တဏှာႏရာႏဂ လောဘမဉ်ႏထွာလွဉ်သွူနဝ်ꩻ သꩻတဗော့ꩻထိုꩻ၊ သꩻတဒူထိုꩻ၊ အခိန်ႏနဝ်ꩻနဝ်ꩻ နီအကျိုꩻဟောဝ် ဝင်ꩻအကျိုꩻတာႏ တသေယူႏယာႏတဝ်း၊ အမွေးအမဲဉ်ႏ သေတဝ်း၊ ကွပ်နဝ်ꩻမꩻ "သꩻတဒူ၊ သꩻစွူတဝ်း"တဲင် အွဉ်ႏဖေင်ꩻထိုꩻ နုဲင်းနောဝ်ꩻသွူ။ နဝ်ꩻလွုမ်ꩻတကာတဝ်း "ဒေါႏသꩻမဉ်ႏထွာတဲ့ တွမ်ႏထီလျားဗို့ꩻ ဗြောက်ဗြောက်နဝ်ꩻ ပီဝင်ꩻ"စတဲင် နုဲင်းနဝ်ꩻဖုံႏယင်၊ သꩻချမ်ꩻသာႏတဝ်း၊ သꩻရောင်းတဝ်း၊ သꩻကြောင်းတဝ်း၊ သꩻစွူတဝ်း နဝ်ꩻဖုံႏတဲ့ သꩻတဒူနေနေတွော့ꩻ နာꩻပေႏတင်ႏနဝ်ꩻ နာꩻပြန်ႏမဉ်ညနုဲင်းမုဲင်ꩻည အွဉ်ႏဖေင်ꩻထိုꩻစွဉ်ႏသနယ်၊ မဉ်ႏပြန်ႏတဝ်းထဲင်းဟ ဒေါ့ꩻခရာႏ အမျိုꩻအဝ်ႏဒွုမ်ဟောင်း"ဗွေႏဘုရာꩻ သျင်ꩻနယ်နုဲင်းနောဝ်ꩻသွူ။ "သဘော်ꩻပေါက်လဲဉ်းသွူဗွေႏ၊ ယလဲင်ႏလဲင်ႏ တပြန်ႏညဗာႏတဝ်းတဲ့ သမ်းအဝ်ႏတောင်ꩻဒျာႏနောဝ်ꩻ ကွပ်ပွိုးထမုဲင်ꩻအီဗွေႏ" သင်္ဂါရဝပုဏ္ဏာꩻ ရီထဲင်းယင်းနုဲင်းနောဝ်ꩻသွူ။ "တကာႏသင်္ဂါရဝ- နာꩻယူႏယွယွစံꩻမွိုင်၊ ဥပမာႏ- ထီတကောက်ꩻကိုနဝ်ꩻ သော့ꩻတဝ်းထမုဲင်ꩻမုဲင်ꩻ၊ ထီစွူဖြွိုးပေႏဒျာႏ၊ တလီꩻတဲ့ တမာꩻတသွိုးတဝ်း၊ လိုꩻတဲ့ တမာꩻတသွိုးတဝ်း၊ ထီအဝ်ႏစွူဖြွိုးဒျာႏ၊ "ထီစွူဖြွိုးကို ထွားသော့ꩻလွိုးထီႏစွဉ်ႏ"သနယ်ႏ။ အနုဲင်းနဝ်ꩻနေနေ၊ လိုꩻသီးယို တဏှာႏရာႏဂ လောဘမဉ်ႏထွာတဝ်းနဝ်ꩻ သꩻတဗော့ꩻတဝ်း၊ သꩻတဒူတဝ်း၊ အခိန်ႏနဝ်ꩻနဝ်ꩻ နီအကျိုꩻဟောဝ် ဝင်ꩻအကျိုꩻတာႏ သေယူႏဒျာႏ၊ အမွေးအမဲဉ်ႏသေဒျာႏ၊ ကွပ်နဝ်ꩻမꩻ "သꩻတဒူတဝ်း၊ သꩻစွူဒျာႏ"တဲင် အွဉ်ႏဖေင်ꩻထိုꩻတောဝ်းနောဝ်ꩻသွူ။ နဝ်ꩻလွုမ်ꩻတကာႏတဝ်း "ဒေါႏသꩻမဉ်ႏထွာတဝ်း၊ သꩻမဉ်ႏလျားတဝ်းနဝ်ꩻ ဗွန်ဒျာႏထီခွꩻ၊ ပီဒျာႏထီစွူ"စတဲင်နုဲင်းနဝ်ꩻဖုံႏတဲ့ သꩻချမ်ꩻသာႏဒျာႏ၊ သꩻရောင်းဒျာႏ၊ သꩻကြောင်းဒျာႏ၊ သꩻစွူဒျာႏ-စတဲင်နုဲင်းနဝ်ꩻဖုံႏတဲ့ သꩻစွူ-သꩻကြောင်းနေနေတွော့ꩻ နာꩻပေႏတင်ႏနဝ်ꩻ တပြန်ႏညဗာႏတဝ်းစွဉ်ႏတဲ့ အဝ်ႏတောင်ꩻဒျာႏနဝ်ꩻသနယ်"ဗွေႏဘုရာꩻ သျင်ႏစဲင်းဖေႏနုဲင်းနောဝ်ꩻသွူ။ နီဗွေႏဘုရာꩻဟော်ꩻပါ "ဗောဇ္ဈာင်နွုတ်ꩻပါခရာႏ၊ တွိုႏအီနိဗ္ဗာန်ႏခရာႏတဲင်" ငအွီႏအဲင်စွဉ်ႏထာꩻ၊ ထွာလွဉ်စွဉ်ႏဒျာႏ ဗုဒ္ဓဘာႏသာႏ ဥပါႏသကာႏတဖြာꩻနောဝ်ꩻသွူ။ (သုတ္တန်ႏပိဋကတ်၊ မဟာဝဂ္ဂသံယုတ်၊ သင်္ဂါရဝသုတ်)[၁][၂]