ရောင်ငါႏထာꩻဘုရာꩻဝါးသဲင်ꩻ
"ယသောဇသုတ်(ရဟန်ꩻဖုံႏ ရောင်ငါႏထာꩻ၊ ဗွေႏဘုရာꩻဝါးသဲင်ꩻချာ)"
အွိုးခꩻတလဲင်ႏ နီဗွေႏဘုရာꩻအဝ်ႏအုံ သာဝတ္ထိ ကျောင်ꩻဇေႏတဝွန်ႏကိုအတွင်ꩻ "ဗွေႏစင်ꩻယသောဇ"အွဉ်ငါ ပါတွမ်ႏရဟန်ꩻ စုစုခြွဉ်း အပါꩻငတ်ꩻရျာꩻဖုံႏနဝ်ꩻ အီႏလွဉ်ဝုဲင်ႏ ကန်းတော့ꩻဗွေႏဘုရာꩻတဲင် ဖျော်လွဉ်ကျောင်ꩻ ဇေႏတဝွန်ႏကိုနောဝ်ꩻသွူ။ စင်ꩻပေႏဖုံႏနဝ်ꩻ မော့ꩻအသွꩻပေႏဖုံႏတဲင် သꩻရောင်းသꩻရေꩻ စွော့ꩻတက်လို့ဝင်ꩻ၊ 'ကိန်ꩻယိုလုဲင်း၊ ကိန်ꩻနဝ်ꩻဟုဲင်း' အဝ်ႏဒါခင်ႏလမ်းဖုံႏတွော့ꩻ ဒေါ့ꩻရီလို့ဝင်ꩻ၊ စင်ꩻဖုံႏသမ်းအာ သင်ႏစွဉ်ႏအောႏအောႏအာႏအာႏ၊ ငေါဝ်းသန်လွဉ်ꩻငါႏနောဝ်ꩻသွူ။ နီဗွေႏဘုရာꩻ နာႏလꩻဒွုမ်တစိꩻစိꩻတဲင် ဟဲ့ꩻလွဉ်ဗွေႏအာနန္ဒာႏ၊ ရီစွဉ်ႏဒျာႏနုဲင်းယို- "ယိုအာနန္ဒာႏ- ပီစွဉ်ႏစံႏငါး နုဲင်းစွဉ်ႏထပေႏသား ရီမ်လို့ဝင်ꩻထပေႏ၊ မယေန်ႏကေႏတဝ်းငါႏ၊ ရောင်အောႏအာႏထာꩻသူꩻနဝ်ꩻ ပါꩻမုဲင်ꩻဖုံႏဟောင်း" "ထဉ်ႏအာဂန္တုက ဗွေႏယသောဇသီးတွမ်ႏ စင်ꩻပေႏကျောင်ꩻကို မော့ꩻဖိုဒွုမ်လို့ဝင်ꩻ၊ ဒါခင်ႏလမ်းတွင်ꩻ ပျောႏငါႏ ရောင်အောႏအာႏဒျာႏ ဗွေႏဩ၊ အုံတဆင်ႏမဲ့ꩻ အီႏလွဉ်ဝုဲင်ႏကန်းတော့ꩻ ဗွေႏဘုရာꩻဗွေႏဩ" "အာနန္ဒာႏ- လွေꩻစွဉ်ႏယိုခါခါဟုဲင်း၊ လွေꩻဟဲ့ꩻလွဉ် အာဂန္တုက ယသောဇသီးသူꩻ" ထွိုင်ႏဖျော်လွဉ် ဗွေႏဘုရာꩻငါတဲင် ယေန်ကတစ်ꩻဒျာႏ၊ ဗွေႏဘုရာꩻရိုꩻ- "ရဟန်ꩻသီးဖုံႏဟွေး- သီလွေꩻထိုꩻခန်းလုဲင်း၊ ခွေဝါးထိုꩻသီး၊ သီဖုံႏနဝ်ꩻ အုံခွေထျꩻယို လꩻတောဝ်း၊ သီရောင်ငါႏထာꩻ" ဗွေႏယသောဇ လောဝ်းချာရိုႏရိုႏသေႏသေႏ ဗွေႏဘုရာꩻနုဲင်းယို- "ဗွေႏဘုရာꩻ ကမိန်းအတွိုင်ꩻ နီသွဉ်းသီး ထိုꩻဒျာႏဗွေႏဩ" ရိုႏရိုႏသေႏသေႏ ဝုဲင်ႏဘုရာꩻထွူ သဲင်ꩻထိုꩻဗာႏစွဉ်ႏ စွုမ်ႏပါꩻပါꩻ၊ ဝွေꩻဗွေႏသီး အပါꩻငတ်ꩻရျာꩻဖုံႏနဝ်ꩻ လွေꩻဆိုႏဝါႏ ဝဂ္ဂုမုဒါႏ ထီခြောင်တန်ထျꩻ၊ မာꩻယို့ꩻယꩻဗာႏ ကျောင်ꩻဝါႏနောဝ်ꩻသွူ။ ဆိုႏဝါႏဟာ ဗွေႏယသောဇ ဖေႏဩဝါဒနုဲင်းယို- "ဗွေႏသီးဖုံႏဟွေး- ဗွေႏဘုရာꩻသူꩻနဝ်ꩻ ဒေါသကိလေႏသာႏ ပယ်ႏခွါႏထိုꩻလဲဉ်း၊ အမျိုꩻသꩻလျားဒါႏထာꩻ မွေးတဝ်း၊ အပါႏဒျာႏနီဒျာႏ၊ နီယယေန်ႏကေႏ၊ နီဖေႏကလိန်ႏမာႏ၊ နီဖေႏနေးကထွာ ရဟန္တာႏ၊ ဆရာႏဗွေႏဘုရာꩻ စွော်စွော်ဝါးထိုꩻညာꩻနီဒျာႏ၊ ကျိုꩻစာꩻမွေးမွေးတရာꩻ ဗွေႏသီးဖုံႏနော"ဖေႏဩဝါဒနုဲင်းနောဝ်ꩻသွူ။ ဝါႏထွိုင်ႏကျွစ်နဝ်ꩻ ဗွေႏဘုရာꩻကျွꩻလွေꩻ ဝေႏသာႏလီႏခမ်း၊ လွေꩻအုံအကျောင်ꩻတခြာ၊ ဗွေႏဘုရာꩻနေးတွမ်ႏဉာဏ်ႏ ကထွိုင်ႏထွားနဝ်ꩻ သွံလာဝါႏတွင်ꩻ စင်ꩻအပါꩻငတ်ꩻရျာꩻ ထွာလို့စွဉ်ႏရဟန္တာႏ၊ ဗွေႏဘုရာꩻထွဉ်ႏ လွေꩻပင်ꩻလွဉ်၊ "ကဟဲ့ꩻအလဲင်ႏရီးနဝ်ꩻ ဝါးလင်ꩻ၊ ကပင်ꩻအလဲင်ႏယိုနဝ်ꩻ အီႏအံႏဖြာႏ၊ ရဟန္တာႏ"ဖုံႏနဝ်ꩻသွူ။ (သုတ္တန်ႏပိဋကတ်၊ ဥဒါနပါဠိ၊ နန္ဒဝဂ်၊ ယသောဇသုတ်)[၁][၂]