ရွဉ်ခံꩻလွိုင်ႏ ထွာလိုꩻကေန်ꩻ
"အပုတ္တကသုတ် (ရွဉ်ခံꩻလွိုင်ႏအာ အဗွေႏထွာလိုꩻကေန်ꩻ)"
အွိုးခꩻတနီꩻ မွူးနွောင်းတိန်ႏတိန်ႏ အခိန်ႏနဝ်ꩻတွင်ꩻ ခွန်တန်ပသေနဒီကောသလ လဝ်းနီဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- ဟန်ႏနီꩻ သာဝတ္ထိခမ်းကို သဌေꩻတန်တဖြာꩻသီထိုꩻ၊ အပိုအဲဉ်ထဝ်းတဖြာꩻဖြာꩻတဲင် အရွဉ်ခံꩻဖုံႏနဝ်ꩻ ခွေသွဉ်းလꩻလို့၊ ခံꩻခြေင်ခြေင်မဉ်ႏတဲ့ 'အဝ်ႏသွစ်ꩻသဲန်'ဗွေႏဩ၊ ရွဉ်ထဲင်းက အီႏအဝ်ႏကားမုဲင်ꩻဟောင်းသနယ်။ ပါꩻသဌေꩻနဝ်ꩻ စေꩻတန်ဗွေႏ၊ လူႏတဝ်းထာꩻ၊ ဒွိုႏအံႏဒျာႏဟူနေ့ꩻ၊ အွꩻကွို့ꩻဒဲဉ်ထီ၊ ကꩻကွို့ꩻဆဲင်ꩻသောဝ်ႏ၊ ပြောဝ်ႏပြီႏယယိတန်၊ ခင်ႏဖါႏငါတဲ့ ထိုမ်းတဝ်း၊ လိုႏလွေꩻညာꩻထာꩻတဲ့ ထိုမ်ႏလဲႏကွို့ꩻ သေလောယယိပေႏဗွေႏဩ" လောဝ်းဗွေႏဘုရာꩻနုဲင်းနဝ်ꩻ၊ ဗွေႏဘုရာꩻရိုꩻ- တကာႏကလောဝ်းငေါဝ်းနဝ်ꩻ မွေးဒျာႏ၊ ဝွေꩻကခြွေဗာႏထာꩻနဝ်ꩻ ဝွေꩻလူႏဗာႏဖို 'တဂ္ဂရသိခီ-ပစ္စေကဗုဒ္ဓါႏ'သွမ်ꩻ၊ လူႏထွူတွော့ꩻ ဝွေꩻဟွုန်မာႏချာ၊ 'ခါးလားကလူႏ ပစ္စေကဗုဒ္ဓါႏနဝ်ꩻ မဉ်ႏဖေႏအံႏ ခွေလိုꩻဖုံႏနဝ်ꩻ မွေးထဲင်း၊ ဝွေꩻသီး ကေꩻဇူꩻတင်ႏခွေ၊ မာꩻမွေးဖေႏ ခွေထာꩻမာꩻ၊ ခွေလူႏပါꩻသူꩻနဝ်ꩻ လို့ခြေင်'ဝွေꩻဟွုန်မာႏချာနုဲင်းနဝ်ꩻ။ တကာႏခွန်တန်ဟွေး- ကုသိုလ်ႏ၊ အကုသိုလ်ႏသီးအမျိုꩻနဝ်ꩻ အကျိုꩻပငါပရာꩻဒျာႏ၊ ကွပ်လူႏပစ္စေကဗုဒ္ဓါႏတဲင် ကုသိုလ်ႏနဝ်ꩻအကျိုꩻဖေႏတွော့ꩻ ခြွေခြာႏချမ်ꩻသာႏ၊ ကွပ်ဝွေꩻဟွူန်မာႏချာတဲင် ပွိုးဝွေꩻသꩻ-အဝ်ႏအဟောဝ် ပြောင်ꩻလုဲင်ႏထိုꩻအကုဲင်တွော့ꩻ အဟောဝ်ဟောဝ်စားဖုံႏနဝ်ꩻ မဉ်အံႏတဝ်း၊ မဉ်ကွဉ်ကꩻတဝ်း၊ မဉ်အံႏတောဒျာႏ အညမ်းညမ်းစား၊ မဉ်ကွဉ်ကꩻတောဒျာႏ အညမ်းညမ်းစား၊ မဉ်အုံအဝ်ႏ လွေꩻသဲင်ꩻတောဒျာႏ အညမ်းညမ်းစား၊ သေန်ႏတောဒျာႏ ထာꩻကွီအံႏသားနောဝ်ꩻသွူ။ တကာႏခွန်တန်ဟွေး- ဝွေꩻဝေးခိုပိုနဝ်ꩻ အဝ်ႏညီꩻဝွေꩻ၊ ငမ်းသꩻပါꩻပေႏနဝ်ꩻ လꩻထိုꩻဝွေꩻရွဉ်ခံꩻ အမွေႏတဲင် ဝွေꩻမာꩻသီတေ့ꩻထိုꩻပါꩻပေႏနဝ်ꩻ၊ ကွပ်နဝ်ꩻမꩻ ထဲ့ဗာႏငါးရုဲင်ꩻ၊ တွိုႏဆုဲင်ꩻဆုဲင်ꩻ ဘဝမုဲင်ꩻဘဝမုဲင်ꩻတဲ့ယဝ်း ထွာလိုꩻ'အပုတ္တက-လိုꩻပိုအဲဉ်ထဝ်း'နုဲင်းနောဝ်ꩻသွူ။ တကာႏခွန်တန်ဟွေး- ထီမဉ်စွူနုဲင်းမုဲင်ꩻစွူ၊ မဉ်အာနုဲင်းမုဲင်ꩻအာ ပေါႏအဝ်ႏဒျာႏလဲင်းနာ၊ လိုꩻလွေꩻတလꩻတဝ်းနဝ်ꩻ လိုꩻတအွꩻဗာႏတဝ်း၊ ထာꩻလျားလာသေ့ꩻခြေင်ထိုꩻဒျာႏ၊ အနုဲင်းနဝ်ꩻနေနေ လိုꩻမဉ်ခြွေနုဲင်းမုဲင်ꩻခြွေတဲ့ယဝ်း ပေါႏတလူႏတဝ်းထာꩻ၊ ပေါႏတလွူးတဝ်းမွိုးဖါနဝ်ꩻ တထွာတဝ်းကုသိုလ်ႏ၊ ဝင်ꩻတလꩻရိုမ်းတဝ်း၊ ဝွေꩻတာႏတဲ့ အကျိုꩻတထွာတဝ်း၊ ဝင်ꩻတာႏတဲ့ အကျိုꩻတအာတဝ်း၊ မဉ်ႏသီတနီꩻခါ ထွာတောဒျာႏ ဝင်ꩻတခြိုꩻ၊ ဝွေꩻထာꩻလို့ခြေင်ထိုꩻဒျာႏ။ တကာႏခွန်တန်ဟွေး- ကွပ်ပွိုးနဝ်ꩻမꩻ ခြွေခြာႏချမ်ꩻသာႏသွူဟ အံႏတဲ့အံႏ၊ ထူႏတဲ့ထူႏ၊ လူႏတဲ့လူႏမꩻ ဘဝယိုဘဝငါ နီတွက်ဝင်ꩻတာႏ အကျိုꩻချမ်ꩻသာႏ လꩻနွောင်ꩻနောဝ်ꩻသွူ"။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ အပုတ္တကသုတ်)[၁][၂]