ရွဉ်ခံꩻအဲဉ်ထဝ်းကေန်ꩻတဝ်း
"ဒလိဒ္ဒသုတ် (ရွဉ်ခံꩻအဲဉ်ထဝ်း၊ ကွဲႏတွော့ꩻ လိုꩻကေန်ꩻမွေးတဝ်း)"
အွိုးခꩻတလဲင်ႏ- နီဗွေႏဘုရာꩻအဝ်ႏအုံ ရာႏဇဂျိုဟ်ႏခမ်း၊ ကျောင်ꩻဝေဠုဝွန်ႏကိုအတွင်ꩻ ခြုဲင်းဖေႏရဟန်ꩻသီးဖုံႏနုဲင်းယို- အွိုးစခါ- ဝေင်ꩻရာႏဇဂျိုဟ်ႏကိုယိုနဝ်ꩻ သညင်ꩻခရာႏ တကာႏတဖြာꩻ ထာꩻရာꩻအဲဉ်ထဝ်း ဒုက္ခ၊ ထဲ့လအရန်းဖွိုႏ၊ ကွဲႏတွော့ꩻ ဝွေꩻနဝ်ꩻ- - သဒ္ဓါႏတရာꩻအဝ်ႏ၊ ယွုမ်းအံႏရတနာႏသွံပါꩻတွမ်ႏ ကံႏ-ကံႏအကျိုꩻ၊ - သီႏလတရာꩻအဝ်ႏ၊ သီႏလငတ်ꩻပါꩻတရာꩻ အဝ်ႏတဉ်ႏသေႏသေႏ၊ - သုတတရာꩻအဝ်ႏ၊ နာႏကုဲင်းတရာꩻ ရွမ်ခါꩻထီႏသေ၊ - စာဂတရာꩻအဝ်ႏ၊ ဒုက္ခဆင်ꩻရယ်ꩻတဲ့ယဝ်း လူႏမူꩻလူႏပယ်ꩻနေး၊ - ပညာႏဉာဏ်ႏအဝ်ႏ၊ သေအဟောဝ်အကုဲင်၊ သေကုသိုလ်ႏ အကုသိုလ်ႏ ကွပ်နောဝ်ꩻမꩻ ဝွေꩻနောဝ်ꩻ 'မဉ်ႏထွားရွဉ်ခံꩻနဝ်ꩻ အဲဉ်ထဝ်း၊ ထွာလိုꩻကေန်ꩻ-ဒလိဒ္ဒ၊ မဉ်ႏထွားတွမ်ႏတရာꩻနဝ်ꩻ တရာꩻငတ်ꩻပါꩻအဝ်ႏ၊ ခြွေခြာႏဓမ္မ-အဒလိဒ္ဒ'၊ ပွိုးနဝ်ꩻမꩻ ခန္ဓာႏကုဲင်လီ ဝွေꩻထွိုင်ႏသီနဝ်ꩻ တွိုႏကီထင်ႏ 'တာဝတိံသာႏ'လူꩻခမ်း၊ တရေꩻလဲဉ်းစွဉ်ႏလူꩻလင်၊ အချွေႏအရံႏအာလဲဉ်းစွဉ်ႏလူꩻလင်၊ လူလင်ဖုံႏ တကေးဝွေꩻ၊ 'လိုꩻမွ-ထွာလူꩻ'ရိုꩻလွသွမ်ꩻသဲ့ꩻ ကဲ့ꩻရဲ့ꩻဝွေꩻစတဲင်နုဲင်းနောဝ်ꩻသွူ။ ခွန်သိကျာꩻရိုꩻ- "သီရိုꩻလွသွမ်ꩻသဲ့ꩻ ကဲ့ꩻရဲ့ꩻမွုန်းဝွေꩻနဝ်ꩻဟုဲင်း၊ ဝွေꩻကအဝ်ႏနေ လိုꩻခမ်းခါ ကထွာနေလိုꩻအတွင်ꩻနောဝ်ꩻ ထင်ႏကုဲင်းကျောင်ꩻ၊ ထင်ႏဖွစ်ꩻထင်ႏဖျိုး ရွဉ်အာႏတနွောင်ꩻတဝ်းတဲ့ ဝွေꩻလူႏနေးနမ်းအာႏ၊ မာꩻသံဃာႏဝေယျာဝစ္စ။ ဝွေꩻနဝ်ꩻခါနဝ်ꩻ- ယွုမ်းအံႏမွေးစွဉ်ႏ ဘုရာꩻတရာꩻသံဃာႏ ရတနာႏသွံပါꩻ၊ မာꩻသီတဝ်းဝင်ꩻသက်၊ ထူႏတခွန်ꩻတဝ်းဝင်ꩻထာꩻ၊ ပဲ့စ်မာႏတဝ်းဝင်ꩻပိုမာ၊ ဒေါ့ꩻလိန်ႏဒေါ့ꩻလဲဉ်တဝ်းထာꩻ၊ အွꩻတဝ်းဒေါဝ်သူႏရာႏ၊ နာႏကုဲင်းတရာꩻ ထုမ်ႏရွမ်ခါꩻသုတ-ဓမ္မအဟွုန်အထီႏ၊ လိုꩻဆင်ꩻရယ်ꩻတဲ့ စေႏတနာႏဟောဝ်၊ လူႏမူꩻလူႏပယ်ꩻနေး၊ ယိုနဝ်ꩻ ဒုစရဲက် ဟောဝ်မာꩻတဝ်း၊ ယိုနဝ်ꩻ သုစရဲက်ဟောဝ်မာꩻ၊ ယိုနဝ်ꩻ အကုသိုလ်ႏ အမာꩻဒုက္ခဒါႏလိုꩻ၊ ယိုနဝ်ꩻ ကုသိုလ်ႏ အမာꩻချမ်ꩻသာႏဒါႏလိုꩻ၊ လိုႏမာꩻတဝ်း အကုသိုလ်ႏ၊ လိုႏမာꩻဒျာႏကုသိုလ်ႏ၊ ထာꩻသူႏသေဉာဏ်ႏပညာႏ နုဲင်းနောဝ်ꩻအဝ်ႏ။ လူꩻတာဝတိံသာႏသီးဖုံႏဟွေး- 'သဒ္ဓါႏ၊ သီႏလ၊ သုတ၊ စာဂ၊ ပညာႏ' ကအဝ်ႏဒါႏလိုꩻနဝ်ꩻ ခန္ဓာႏကုဲင်လီ မဉ်ႏသီထင်ႏစူꩻ မဉ်ႏထွာလူꩻနဝ်ꩻ 'တရေꩻလဲဉ်းဝင်ꩻ၊ ဖုဲင်ႏမဲ့လဲဉ်းဝင်ꩻ၊ အချွေႏအရံႏ အာလဲဥဉ်းဝင်ꩻ'ကရိုꩻနဝ်ꩻ အမွေးအမဲဉ်ႏဒျာႏ၊ ဝွေꩻတရာꩻအကျိုꩻဒျာႏ၊ အမျိုꩻထွုံꩻစံႏနုဲင်းနဝ်ꩻဒျာႏ၊ သီတကေးသွမ်ꩻသဲ့ꩻ ကဲ့ꩻရဲ့ꩻခရာႏတလိုႏတောဝ်း။ လူꩻတာဝတိံသာႏသီးဖုံႏဟွေး- လိုꩻယွုမ်းခြေင်းခြဲ့၊ ယွုမ်းတဉ်ႏတွော့ꩻ ရတနာႏသွံပါꩻ လိုꩻသီႏလသားနဝ်ꩻ 'လိုꩻကေန်ꩻမွေးတဝ်း၊ ဝွေꩻသက်ကမွန်နဝ်ꩻ မွန်ခြေင်ထာꩻမွေးတဝ်း၊ သီအဝ်ႏလိုႏထွားနုဲင်းဝွေ၊ သဒ္ဓါႏ၊ သီႏလ၊ သုတ၊ စာဂ၊ ပညာႏတရာꩻယိုငတ်ꩻပါꩻ ယံကဗွေ ယံကခြွေနဝ်ꩻ လိုႏကျိုꩻစာꩻပငါပရာꩻ"နောဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ ဒလိဒ္ဒသုတ်)[၁][၂]