လိတ်ပအိုဝ်ႏညိမ်ꩻချံꩻရေꩻ(၃)
"လိတ်ပအိုဝ်ႏညိမ်ꩻချံꩻရေꩻ အလင်္ကာႏ(၃)" "ဒီမိုကရေသီ"ကတူႏစဲဉ်ႏဆꩻလကို အပဲစ်ဖေႏကကင်ꩻ အမင်ꩻဖေႏကလွစ်နဝ်ꩻ မဉ်ႏကျံႏစဲႏပွစ်အွောင် ဖြောင်ဒေါင်ဗာႏ သွိုန်ႏသꩻရာႏ ခြူႏခြီႏခြောက်ခြꩻဖုံႏနဝ်ꩻ ယိုခါခါ နီပအိုဝ်ႏအတာႏ တဲမ်းလိတ်သား မဲဉ်ဒေါ့ꩻဖေႏကျံႏဉာဏ်ႏလွေꩻငါႏ လိတ်ပအိုဝ်ႏ ညိမ်ꩻချံꩻရေꩻအလင်္ကာႏ မညီႏတညီႏပေႏနဝ်ꩻ စေဖွင်ꩻခွင်ꩻဖေႏသွော့နဝ်ꩻသွူဩ။ ပွိုးတမုဲင်ꩻတွော့ꩻ နီခွိုꩻပအိုဝ်ႏလိတ်လုဲင်ꩻ အငဝ်းကစွီႏထန်ႏ၊ အဗင်ႏကဖြော့ဖြဲဉ်ကဲစ် နွန်ႏတနဲဉ်ဒင်ႏဒါႏ လိတ်မဲ့ငါလောင်းနဝ်ꩻ တွမ်ႏအငဝ်းတညီႏလꩻတဝ်း တိန်ႏခင်ႏလောင်ꩻဖုံႏယယောက်ꩻနဝ်ꩻ ဗွိုန်ပီဝင်ꩻသွူ၊ ကွပ်မာꩻတဲပ်(ခြွူႏတွောင်း)ဖေႏအနားသား သေႏသေႏချာႏချာႏ(တိတိကျကျ)တအဝ်ႏသဲင်ꩻတဝ်းနဝ်ꩻမꩻ အပေႏပꩻ အမွူးဒေါ့ꩻ အပင်အလာႏ ကထန်ႏလွဉ်နဝ်ꩻတဲ့ ခွေ-မွံꩻ တမျိုꩻ၊ ခွေ-တုဲင်တစား အံႏဒါႏကီလဲ့ အလွီးကင်ꩻ အရသာႏဖွီပြာ ဗူႏဗန်ႏအဝ်ႏထွာသဲင်ꩻဗာႏနဝ်ꩻသွူ။ တဖြာꩻသꩻဆန္ဒယို စွဉ်ႏတွိုင်ꩻ၊ မဲဉ်ႏတွိုင်ꩻ၊ စွို့ꩻတွိုင်ꩻလဲ့ တမဲဉ်ႏကြွို့ꩻတဝ်း ဝင်ꩻသꩻ၊ တနꩻကြွို့ꩻတဝ်းဝင်ꩻသွိုန်ႏအမျာꩻ၊ ကအွဉ်ႏထွော့သေꩻခါꩻဒါႏ ဘောင်တဖွောင်ꩻကိုယို နွို့သော့ꩻတွိုင်ꩻ တတွမ်ႏ(နွမ်ႏ)ကြွို့ꩻတဝ်းရင်ꩻရင်ꩻနဝ်ꩻ သဘာဝတရာꩻ နိယာမတန်ဒျာႏရင်ꩻသွူ၊ နီကကျွိုက်တွိုင်ꩻလဲ့ ဝင်ꩻတဲ့ꩻသွီႏကြွို့ꩻတဝ်း၊ ဝင်ꩻကဟွိုန်အွီႏတွိုင်ꩻလဲ့ တမဲဉ်ႏသꩻကြွို့ꩻတဝ်း နီဖြောင်းဖြေꩻအရသာႏ၊ နီဆန္ဒတွမ်ႏ ဝင်ꩻထာꩻထင်းနဝ်ꩻ တထပ်ချင်ႏ အီႏတနꩻသွူးစွဉ်ႏနဝ်ꩻ တယိုꩻတဝ်းလာꩻလာꩻရင်ꩻသွူ။ "ထာꩻသေ အဝ်ႏလိတ်ကိုဒါႏ၊ ထာꩻလိန်ႏမာႏ အဝ်ႏလိတ်ကိုလွဉ်"တဲ့ဟွေး အဝ်ႏမွေးမဲဉ်ႏဒျာႏရင်ꩻ၊ မဉ်ႏထွားနုဲင်း "နီလိတ်ပအိုဝ်ႏ"ဗျူဟာ လုဲင်ꩻကွက်ꩻကကဲစ်ꩻတဲမ်းမုဲင်ဒင်ႏဒါႏ လိတ်စောင်ႏမဲ့ငါလောင်းကီသူꩻနဝ်ꩻ အနယ်ꩻဖြားစားစား၊ တဲမ်းထွားဒျာႏ ဖြာꩻမျိုꩻမျိုꩻနဝ်ꩻ ကွပ်အဝ်ႏထွုမ်ႏလွဝင်ꩻ အခြွဉ်း(အပေါင်း)လက္ခဏာႏတန်ဒျာႏရင်ꩻနဝ်ꩻသွူ၊ ပညာႏသျင်ႏသီးယို ကွဲးထိုမ်ႏ၊ ကွဲးဆုဲင်း၊ ကွဲးအွောင်၊ ကွဲးလန် အမဲဉ်ႏတွမ်ႏအမာႏ၊ အစွို့ꩻတွမ်ႏအလွယ်ꩻ၊ အကွယ်ꩻတွမ်ႏအတရွို့ꩻ မဉ်ႏဗွို့ꩻတဲ့သေ၊ မဉ်ႏစေတဲ့ ထီႏဒျာႏရင်ꩻရင်ꩻသွူ။ တဲမ်းလိတ်သား ထွိုင်ႏထီႏဗာႏ လိတ်မဲ့ငါလောင်းကီ "နီပအိုဝ်ႏလိတ်လုဲင်ꩻ အပွိုင်ခြုံခြွိုင်းခြိုꩻ"တန်ယို သꩻရေꩻဗာႏလွိုႏလွိုႏ၊ သꩻပေႏဗာႏလွိုႏလွိုႏ သွိုန်ႏသꩻရာႏအဖြေႏနဝ်ꩻ အဝ်ႏထွာသဲင်ꩻဒျာႏ ပုစ္ဆာႏဒွိဟတန်နဝ်ꩻသွူ၊ "လိတ်လုဲင်ꩻအရေꩻ"ယို ထွာသဲင်ꩻ ခွိုꩻသက်တသာႏဖြွီꩻတလီးစွဉ်ႏကီလဲ့ မဉ်ႏထွားအနယ်ꩻယိုတွိုင်ꩻတွိုင်ꩻနဝ်ꩻ ခွိုꩻတဖွေါင်ꩻကမ်း အီႏတဉ်ႏခွေါင်ဗာႏနဝ်ꩻ တယိုꩻတဝ်းလာꩻလာꩻနဝ်ꩻသွူ။ လိုꩻယဟန်ႏနဝ်ꩻ လိတ်ပအိုဝ်ႏယို စွုမ်ႏတဝ်းဒွိုန်းတွော့ꩻ မဲဉ်ထဲမ်၊ လိုꩻယဟန်ႏနဝ်ꩻ ကွပ်မဲဉ်ႏသော့ꩻတဝ်း သဒ္ဒါႏဝါကျတွော့ꩻ မဲဉ်ဖျင်၊ လိုꩻယဟန်ႏနဝ်ꩻ ငမ်းလွောင်ႏဗူႏရေꩻကုဲင်တွော့ꩻ မဲဉ်အွဉ်ႏစွူစွူ၊ ကွဲးညည အထွားသား၊ အသွဉ်သားယို တထွာတဝ်း လိုꩻဒါႏလိတ်ပအိုဝ်ႏ၊ ထွာတေားစွဉ်ႏ "လိုꩻအွူးဟွူ"နဝ်ꩻ တရာꩻခံႏနဝ်ꩻ ပါꩻမုဲင်ꩻဟောင်း? အသွဉ်သားနဲ့? အထဲမ်သားနဲ့? အဖျင်သားနဲ့? တဲမ်းလိတ်သား မဉ်ဖေႏကျံႏဉာဏ်ႏနဝ်ꩻ လွောင်ႏဗူႏဖြွမ်းညီꩻသွူဝင်ꩻတွော့ꩻ မာꩻဗာႏနုဲင်းမုဲင်ꩻ? အီႏမာꩻနုဲင်းမုဲင်ꩻနဝ်ꩻ သꩻရက်စွိုးခွိုꩻ သꩻထီႏလိုꩻမျိုꩻ အွဉ်ႏဗွိုန်ပီဝင်ꩻတွော့ꩻ လိုႏထုမ်ႏညီꩻလဲဉ်းဝင်ꩻအဖြေႏမဲဉ်ႏနဝ်ꩻသွူ။ မဉ်ႏဆုဲင်း အွောင်လန်ဖွတ်ꩻထွားလွေꩻဒျာႏ "နီလိတ်ပအိုဝ်ႏ"အနယ်ꩻယိုခါနဝ်ꩻ တဲမ်းလိတ်သား မဲ့လဲင်ꩻကွင်တဗန်ႏနေးစွဉ်ႏ၊ တဲမ်းလွဉ်ꩻဗာႏ အဖြုံႏမုဲင်ꩻ၊ စူꩻလွဉ်ꩻဗာႏ အမျိုꩻမုဲင်ꩻ ထွာအီတေားစွဉ်ႏ ထာꩻယပ်ꩻသꩻတန်နဝ်ꩻသွူ၊ တဲမ်းလိတ်သားနဝ်ꩻ လိုꩻဒါႏ၊ လိုꩻသေ၊ လိုꩻကျင်ႏ၊ လိုꩻလျင်ႏ၊ လိုꩻပညာႏသျင်ႏ တမွေးဗာႏတဝ်းတဲင် တစင်းနွို့ꩻဒေါ့ꩻသော့ꩻဖေႏတဝ်းနဝ်ꩻသွူ။ တဲမ်းလိတ်ဝါႏသနာႏ၊ ဟောꩻလိတ်အာႏတလာ ထွားလိတ်အာႏသန်တဲင် ကလွူꩻဟောꩻထွားဗာႏ လိတ်စောင်ႏယဟန်ႏဟန်ႏ ဟောꩻတဒါႏတဝ်း လိတ်ငဝ်းရာႏတဲ့ အဝ်ႏကျုံႏဗာႏ၊ တထီႏဖိုတဝ်း လိတ်ဖြုံႏဆန်ꩻဆိဉ်ꩻတဲ့ အဝ်ႏထီႏဗာႏအာငါႏ၊ ထွားလိတ်အရသာႏပြာထိုꩻဗာႏ အလဲင်ႏလဲင်ႏအခြွိုက်ခြွိုက်နဝ်ꩻသွူ။ နီခွိုꩻလိတ်ပအိုဝ်ႏ ယိုတွိုင်ꩻတွိုင်ꩻနဝ်ꩻ ပအိုဝ်ႏပို စွုမ်ႏပါꩻ/ဖြာꩻမဉ်ႏတဲ့ တဲမ်းတဒါႏတဝ်း၊ ဟောꩻတဒါႏတဝ်းသား အဝ်ႏအာတန်နေကဒွုန်း၊ လိုꩻယဟန်ႏလဲ့ လိတ်ပအိုဝ်ႏငါမဉ်ႏတဲ့ တသေငါꩻတဝ်းဒွုန်းလဲ့ အဝ်ႏဗွေဗောႏထာꩻနဝ်ꩻသွူ၊ လိုꩻလမ်းမꩻ မွေးတဝ်း၊ ပုဂ္ဂိုလ်ႏလိုꩻကျောင်ꩻ ယပါꩻပါꩻ အောင်ႏလဲဉ်းအကြီး၊ ဓမ္မာစရိယလဲ့ လိတ်ပအိုဝ်ႏစွုမ်ႏဖြုံႏ တဲမ်းတဒါႏဒွုန်းတဲ့အဝ်ႏ၊ လိုꩻပေႏတွမ်ႏရိုꩻမွိုန်း လိုꩻတန်ယဟန်ႏမဉ်ႏတဲ့ လိတ်ပအိုဝ်ႏနဝ်ꩻ အဖြေင်းနဲ့-အဗွာနဲ့ ခါႏလုဲင်ႏခွယ်ꩻချာꩻဒါႏတဝ်းဒွုန်း၊ တာႏဝွန်ႏတအဝ်ႏတဝ်း လိုꩻအညတရတွမ်ႏရိုꩻမွိုန်း ကထူႏတာႏဝွန်ႏဒါႏ "လိတ်လုဲင်ꩻတွမ်ႏယေန်ႏငဲးရေꩻ"ယဖြာꩻဖြာꩻနဝ်ꩻ တဲမ်းငါလိတ်ပအိုဝ်ႏတဲ့ စွုမ်ႏဖြုံႏတစွိုꩻတဝ်းဖုံႏနဝ်ꩻ တဲမ်းလိတ်သားနမ်း အဝ်ႏကျုံႏတလူႏဗာႏ အမွေးမဲဉ်ႏနဝ်ꩻသွူ။ နီလိတ်ပအိုဝ်ႏယို မဲဉ်ႏတမဲဉ်ႏတဝ်း၊ စွုမ်ႏတစွုမ်ႏတဝ်း ကအဝ်ႏဒင်ႏပျꩻတဲမ်းနယ်လွေꩻ၊ ဝွေႏဖန်ႏနယ်လွေꩻ၊ ပုံႏဖောႏနယ်လွေꩻဒါႏ တပါꩻတမျိုꩻမျိုꩻ၊ တဖြာꩻတစားစားနုဲင်းယိုနဝ်ꩻ ထွာထွိုက်ထွာသင်ꩻဒျာႏရင်ꩻသွူ၊ ကွဲးတွော့ꩻ "ဆရာႏအာ တဲႏဘုရာꩻထွာယို့"ငဝ်းအတွိုင်ꩻ လိတ်မဲ့ငါလောင်း "လိတ်ပအိုဝ်ႏ"နဝ်ꩻ အဝ်ႏတဲမ်းလွေꩻဒျာႏ ပါꩻ/ဖြာꩻမျိုꩻမျိုꩻနဝ်ꩻ ထွားဟောꩻလိတ်ပအိုဝ်ႏပိုလီꩻ ဆꩻလဖုံႏယို မဲ့ကွင်၊ သꩻဓာတ်တဲ့ ထဲ့ထိုꩻအီဒါႏ တဲမ်းလိတ်သား ထာꩻထီႏအဝ်ႏနုဲင်းနဝ်ꩻသွူ။ စိန်ꩻစာꩻယူႏလွေꩻစံꩻလဲ့ အဝ်ႏဖြောင်လွေꩻဒျာႏ တဲမ်းလိတ်ဆရာႏသီး ကတဲမ်းလိတ်ဖြုံႏသူꩻ ကွပ်တဗွိုန်ပီတဝ်းဝင်ꩻတွော့ꩻ ထွားလိတ်သားလဲ့ မုဲင်တောင်ꩻဗာႏ၊ စူꩻလွဉ်ꩻဗာႏ အဖြုံႏမုဲင်ꩻ ယူႏသူႏသေတဝ်းတွော့ꩻ ကွဲးညည သꩻတမဲဉ်ထွားတဝ်းဒွုမ် လိတ်ပအိုဝ်ႏဖုံႏနဝ်ꩻသွူ၊ "လိတ်ပအိုဝ်ႏ"ယို မဲဉ်ႏတမဲဉ်ႏတဝ်း၊ စွုမ်ႏတစွုမ်ႏတဝ်း၊ တဲမ်းလိတ်သား တဝွေႏဖန်ႏဒါႏတဝ်း၊ ကွဲးတွော့ꩻ ဖေႏကထွာလွေꩻငါ "တမူ"စနစ်နဝ်ꩻတဲ့ အဝ်ႏထောက်ခံႏလွေꩻဒျာႏရင်ꩻရင်ꩻသွူ။ ခွေါင်းဝွို့တွမ်ႏ "လိတ်ပအိုဝ်ႏ"တာႏဝွန်ႏအွဉ်ငါ ကဆဲင်ႏဒါႏ ပုဂ္ဂိုလ်ႏသေလျင်ႏ ဒါႏကျင်ႏသားဖုံႏဩ- ပိုလီꩻမဲ့နား ဖေႏကကွင် ဖေႏကတရွို့ꩻလွယ်ꩻထိုꩻဗာႏမွိုန်းနဝ်ꩻ "လိတ်ပအိုဝ်ႏ"ယို "တမူ"စနစ်ဖေႏကထွာ အဝ်ႏလိုႏခြွူႏတွောင်းလဲဉ်းရင်ꩻသွူဩ၊ ပအိုဝ်ႏပိုလီꩻ ခေတ်ယိုခါ ထွားလိတ်ပအိုဝ်ႏ၊ ဟောꩻလိတ်ပအိုဝ်ႏ၊ လွူꩻလိတ်ပအိုဝ်ႏ၊ သꩻရက်ချာခွိုꩻလိတ်ပအိုဝ်ႏ၊ သꩻမဲဉ်သွဉ်ဒျာႏ လိတ်ပအိုဝ်ႏ အာႏကောင်းပေႏလဲဉ်းလဲ့ မဉ်ႏအဝ်ႏလွေꩻစွူစွူ အနယ်ꩻဗျူဟာကွင်ကယ်နုဲင်းယိုနဝ်ꩻ "လိတ်ပအိုဝ်ႏ"တွမ်ႏနီပိုလီꩻအနာႏဂတ်သူꩻ စိန်ꩻစာꩻကိုသော့ꩻရုမ်း တဖြောင်တဝ်းရင်ꩻနဝ်ꩻသွူဩ။ "ဟောꩻတဝ်းလိတ်သား၊ ဒါႏတဝ်းလိတ်ပအိုဝ်ႏသား ယံထိုꩻမား"အနယ်ꩻမဲဉ်ႏအနမ်းအခြုံ နီတပုံႏဖောႏဖေႏနွောင်ꩻတဝ်းဒွုန်းနဝ်ꩻ "လိတ်ပအိုဝ်ႏ"ယို မဲ့ꩻပိုလီꩻ ဒါႏလွေꩻတဝ်းတဖြုံႏဖြုံႏနဝ်ꩻသွူ၊ နုဲင်းယို ဖေႏကထွာဗာႏမွိုန်းနဝ်ꩻ ဖြွမ်းဗူႏညီႏတူႏ လွောင်ႏဗူႏခြွဉ်းသွူဝင်ꩻ သꩻရက်ပိုလီꩻဖုံႏတဲင် "လိတ်ပအိုဝ်ႏ"အပွိုင်ခြုံယို အဝ်ႏလိုႏမွဉ်းလွုမ်း ခြွူႏတွောင်းစဲင်းစဲင်းတဲပ်တဲပ် အခိန်ႏတွိုႏလဲဉ်းရမွော့ဟွေး- "လိတ်ယိုတဖြုံႏ မဲဉ်ႏတဝ်း၊ စွုမ်ႏတဝ်း၊ အဝ်ႏလိုႏထဲမ်၊ အဝ်ႏလိုႏဗဲ့"တဲမ်းဒင်ႏနယ်ဗော့ꩻ လိတ်စောင်ႏလိတ်မဲ့ငါလောင်းနဝ်ꩻ တတွိုႏခြောင်ꩻတဝ်ႏသွူ၊ မာꩻကွင်အီထဲင်း ပအိုဝ်ႏပိုလီꩻမဲ့၊ မာꩻတရွို့ꩻခေင်ႏထိုꩻဒါႏထဲင်း ပအိုဝ်ႏပိုလီꩻဆꩻဓာတ်နဝ်ꩻသွူ။ ထွာသွူပအိုဝ်ႏပိုလီꩻ နုဲင်းလိုꩻဝေင်ꩻသူꩻ ပေါႏရိုꩻသွူ "လိတ်ပအိုဝ်ႏ"နဝ်ꩻ သꩻတဝင်ႏစာꩻတဝ်းလာꩻလာꩻ၊ ပုဂ္ဂိုလ်ႏတရက်တဝ်းစွိုး တဟွိုန်နွိုးတဝ်းခွိုꩻ အဝ်ႏအာတန်ဒျာႏနဝ်ꩻသွူ။ ပအိုဝ်ႏပိုလီꩻ အွိုး-ဒုံတောꩻကို ယိုခါလဲ့ ဗော့ꩻဗော့ꩻဗွိုန်ပီထိုꩻလဲဉ်း လိုꩻဝေင်ꩻ၊ လွꩻသွဉ်၊ လွꩻထွား၊ လွꩻဟောꩻ၊ လွꩻလွူꩻထိုꩻလို့လဲဉ်းဖုံႏနဝ်ꩻသွူ၊ သွဉ်လိတ်ကျောင်ꩻ(စာသင်ကျောင်း)မဉ်ႏပေ့ꩻထွူ အီႏသွဉ်သွုပ်ငါလွေꩻ လိတ်ပအိုဝ်ႏခိန်ႏနဝ်ꩻ တဲမ်းလိတ်သား သꩻယပ်ꩻကယ်ꩻထဲင်း ပဲစ်တံႏသားအဝ်ႏခံသော့ꩻ "ထောင်ႏ"ကိုနဝ်ꩻသွူ။ ပအိုဝ်ႏပိုလီꩻ လိုꩻယွဲးဖုံႏနဝ်ꩻ သꩻမဲဉ်သွဉ်၊ သꩻမဲဉ်ဒါႏ၊ သꩻမဲဉ်သေ၊ သꩻကမဲဉ်ရက်ဒါႏ လိတ်ပအိုဝ်ႏအလောင်းယို အာႏဆေ့ꩻလဲဉ်းသွူ၊ "သွဉ်သွော့၊ ဟောꩻသွော့၊ အွဉ်ႏတန်ႏဖိုꩻသွော့ လိတ်ပအိုဝ်ႏဖုံႏမွိုင်"ကေားဒေါ့ꩻသားဖြောင်းနဝ်ꩻ လဲင်ꩻပတဲင်ႏလဲဉ်းသွူ နုဲင်းအော်လန်လဲ့ ဝွေꩻသီးသꩻထာꩻယူႏ တအုဲင်ႏလက်ခံႏတဝ်းနဝ်ꩻ တာႏဝွန်ႏအဝ်ႏဒါႏ ပုဂ္ဂိုလ်ႏသီး အဝ်ႏဖြေႏသျင်ꩻဖေႏနုဲင်းမုဲင်ꩻဟောင်း? "သွဉ်တဝ်းလꩻတဝ်း၊ ထင်ႏတဝ်းလꩻတဝ်း"မိန်းနေးဗာႏ၊ ထွဉ်ႏနေးဗာႏ၊ တွဲႏတံႏနေးဗာႏ၊ ပဲစ်တံႏနေးဗာႏလဲဉ်း အခေတ်သွိုန်ႏသိုႏ သꩻဓာတ်သွီႏထီပြာ ပအိုဝ်ႏပိုလီꩻအာဖုံႏ ကဉ်းအာအာနဝ်ꩻသွူ၊ မဉ်ႏသွဉ်တဝ်း လိတ်ပအိုဝ်ႏနဝ်ꩻ ရွဉ်ပဲစ်တံႏ(၁၀၀၀)၊ သုဲင်ꩻကာꩻစက်(၅)စက် ဖေႏဗာႏဒင်ႏဗာႏ ကထေလွေꩻဒါႏ စီꩻကန်ꩻချက်စားနဝ်ꩻလဲ့ ယရပ်အဝ်ႏထီႏဗာႏအာမွေးငါႏနဝ်ꩻသွူ။ "ခွိုꩻလိတ်လုဲင်ꩻခြွိုင်းခြိုꩻ"ယို တဖြာꩻပဲင်ႏဥစ္စာႏတခြိုꩻ တမွေးတဝ်း၊ တစွိုးခွိုꩻလွုမ်းပဲင်ႏဆဲင်ႏတခြိုꩻဥစ္စာႏဒျာႏတဲင် နေးတွမ်ႏတစွိုးခွိုꩻလုမ်းလုမ်း ဖြွမ်းဗူႏသွူဝင်ꩻမꩻ မဉ်ႏမွဉ်းလွေꩻ၊ ဖျင်လွေꩻနဝ်ꩻ "လိတ်ပအိုဝ်ႏညိမ်ꩻချံꩻရေꩻ အလင်္ကာႏ"ယို အီႏတလေ့အွီႏနွိုးဟွမ်တသေႏအကျောင်ꩻ-။ တဲမ်းလိတ်သား နေးတွမ်ႏဉာဏ်ႏဆေ့ꩻဆားစီပေႏတဲင် မဲဉ်ဖေႏကျံႏဉာဏ်ႏလွေꩻငါႏနုဲင်းယိုသွူဩ။ "မဉ်ႏမွေးတဲ့ ထူႏနေး၊ မဉ်ႏမာႏတဲ့ ထူႏတဝ်းအပဲစ်စားကွေး"[၁][၂]