လိုႏမာꩻလိုႏဒေါ့ꩻ
"လိုႏမာꩻလိုႏဒေါ့ꩻတွမ်ႏ လိုႏမာꩻတဝ်းလိုႏဒေါ့ꩻတဝ်း" လိုꩻသီးယိုနဝ်ꩻ နမ်းတာႏတယဝ်း၊ ဝင်ꩻတာႏတယဝ်း လိုႏမာꩻလိုႏဒေါ့ꩻအဝ်ႏ၊ လိုႏမာꩻလိုႏဒေါ့ꩻတဝ်းအဝ်ႏ၊ "လိုႏမာꩻ"ကရိုꩻနဝ်ꩻ နမ်းတာႏထာꩻမာꩻတရိုꩻတဝ်း၊ အမျာꩻ လိုꩻမျိုꩻခမ်းထီတာႏထာꩻမာꩻ တရိုꩻတဝ်း အပဲစ်တအဲဉ်ထဝ်း စီꩻပွာꩻရေꩻထာꩻမာꩻ၊ ခြွိုင်ႏသန်ꩻရေꩻ၊ လွိုင်ႏကွုန်ꩻသာႏယာႏရေꩻထာꩻမာꩻ-စတဲင် ထာꩻမာꩻမျိုꩻဖုံႏလွုမ်ꩻတကာႏတဝ်း ဒါႏန၊ သီႏလ၊ ဘာႏဝနာႏ-စစွဉ်ႏကုသိုလ်ႏထာꩻမာꩻမျိုꩻဖုံႏသွူ။ "လိုႏဒေါ့ꩻ"ကရိုꩻနဝ်ꩻ နမ်းတာႏအရေꩻတရိုꩻတဝ်း၊ ဖူးဝေးစွိုးခွိုꩻရေꩻ၊ ခမ်းထီလိုꩻမျိုꩻအရေꩻတရိုꩻတဝ်း ပေါႏလိုႏရီလဲ့ရိဗာႏ၊ ပေါႏလိုႏဒေါ့ꩻလဲ့ ဒေါ့ꩻဗာႏ၊ လိုႏအွဉ်ႏသေ' လိုႏထွဉ်ႏ' လိုႏခန်ꩻလဲ့ အွဉ်ႏသေဗာႏ'ထွဉ်ႏဗာႏ'ခန်ꩻဗာႏနုဲင်းနဝ်ꩻဖုံႏသွူ။ ဒွေါင်ႏဒွေါင်ႏနဝ်ꩻ အပဲစ်တအဲဉ်ထဝ်း နမ်းတာႏဝင်ꩻတာႏ၊ ခမ်းထီလိုꩻမျိုꩻအကျိုꩻ ကအဝ်ႏဒါႏငဝ်းမျိုꩻဖုံႏသွူ။ "လိုႏမာꩻတဝ်း"ကရိုꩻနဝ်ꩻ နမ်းတာႏ၊ ဝင်ꩻတာႏ အကျိုꩻတအဲဉ်ထဝ်း၊ အပဲစ်ကအဝ်ႏဒါႏ ကာယဒုစရဲက် နမ်းထာꩻမာꩻဖုံႏသွူ။ "လိုႏဒေါ့ꩻတဝ်း"ကရိုꩻနဝ်ꩻ နမ်းတာႏ၊ ဝင်ꩻတာႏ လိုꩻမျိုꩻခမ်းထီတာႏ အကျိုꩻတအဲဉ်ထဝ်း၊ ငဝ်းတမွေးတမဲဉ်ႏတဝ်း၊ ငဝ်းယားကုဲင် ဝင်ꩻထာꩻကျွိုက်ထာꩻရက်၊ ငဝ်းရွိုင်ꩻစွိုင်ꩻ ငဝ်းကျံꩻထံꩻ၊ ငဝ်ႏသိုႏငွါဖျင်ꩻ၊ ငဝ်းဒေါ့ꩻဝင်ꩻမဉ်ꩻဝင်ꩻပွုံႏ တဟဝ်တဝ်း၊ ငဝ်းကဲ့ꩻရဲ့ꩻသဲ့ꩻသွမ်ꩻဝင်ꩻ-စတဲင် နုဲင်းနဝ်ꩻဖုံႏသွူ။ ပွိုင်းဝွို့တွမ်ႏ"လိုႏမာꩻ"ကရိုꩻဒါႏင၀ဝ်းယို မီႏဒေါ့ꩻလုဲင်း မီႏခြုဲင်းဆွာꩻဗာႏထဲင်းနဝ်ꩻ လိုꩻသီးယို နမ်းတာႏအရေꩻ ကအဝ်ႏလိုႏမာꩻဖုံႏယို အခိန်ႏတွမ်ႏအခိန်ႏ၊ အခင်ႏလံးတွမ်ႏအခင်ႏလံး မီႏတမာꩻတဝ်းနဝ်ꩻ လွူးနမ်းမွီႏသက်အရေꩻ၊ လွူးပိုလွူးမာအရေꩻယို စစရာႏရာႏ တဗွေစွုမ်ႏ၊ တလွုမ်းကွုမ်ႏတဝ်းတဲင် မော့ꩻဗာႏခိုးလျားယပ်ꩻသꩻဖုံႏသွူ။ လိုꩻသီးယို မီႏထွာဝင်ꩻမွိုးဝင်ꩻဖါ၊ မီႏထွာဖြားဒုံလိုꩻတန်ဖုံႏလဲ့ ပိုတာႏလီꩻတာႏ၊ ဒုံသားရပ်သားတာႏ ကအဝ်ႏလိုႏမာꩻဖေႏဒါႏ တာႏဝွန်ႏဝတ္တရာꩻ ထာꩻမာꩻအမျိုꩻမျိုꩻအဝ်ႏတဲင် မီႏတမာꩻတဝ်းနဝ်ꩻ တာႏဝွန်ႏဝတ္တရာꩻ တကေႏတဝ်းတွော့ꩻ အနယ်ꩻလွစ်တဝ်း၊ အပဲစ်ကင်ꩻတဝ်း ရိုꩻဗာႏနုဲင်းနဝ်ꩻသွူ။ လိုꩻသီးယို မဉ်ႏထွာ ခွန်လိုꩻတန်အုပ်ချုက်အွိုင်ႏ၊ နယ်ႏ၊ ခမ်းထီဖုံႏလဲ့ လိုꩻထံꩻသာꩻ ခမ်းသားအတာႏ ကအဝ်ႏလိုႏမာꩻဖေႏဒါႏ ပညာႏရေꩻ၊ ခြွိုင်ႏသန်ꩻရေꩻ၊ လွိုင်ႏကွုန်ꩻသာႏယာႏရေꩻ-စတဲင် တာႏဝွန်ႏဝတ္တရာꩻ ထာꩻမာꩻအမျိုꩻမျိုꩻဖုံႏအဝ်ႏတဲင် မီႏတမာꩻဖေႏတဝ်းနဝ်ꩻ တာႏဝွန်ႏဝတ္တရာꩻကေႏတဝ်းတွော့ꩻ အနယ်ꩻလွစ်တဝ်း၊ အပဲစ်ကင်ꩻတဝ်းနေနေသွူ။ ပွိုင်းဝွို့တောမ်ႏ "အဝ်ႏလိုႏဒေါ့ꩻ"ကရိုꩻဒါႏငဝ်းယို မီႏဒေါ့ꩻလုဲင်းမီႏခြုဲင်းဆွာꩻဗာႏထဲင်းနဝ်ꩻ လိုꩻသီးယို နမ်းတာႏအရေꩻ၊ လုပ်ꩻမာꩻဆို့ꩻရုဲင်ရေꩻ၊ ဖြေꩻစာကူꩻကားရေꩻဖုံႏယို အဝ်ႏလိုႏဒေါ့ꩻ မီႏတဒေါ့ꩻတဝ်း၊ အဝ်ႏလိုႏဖြေႏသျင်ꩻ မီႏတဖြေႏသျင်ꩻတဝ်းနဝ်ꩻ ကိစ္စထာꩻမာꩻတထွူတဝ်း၊ ကိစ္စထာꩻမာꩻ အဆင်ႏတပြေႏတဝ်းတဲင် လွူးနမ်းမွီႏသက်၊ လွူးပိုမာအရေꩻယို စစရာႏရာႏ တဗွေစွုမ်ႏတဝ်း၊ တလွုမ်းကွုမ်ႏတဝ်းတွော့ꩻ မော့ꩻဗာႏအယပ်ꩻအခုဲင်ႏ၊ မော့ꩻဗာႏခိုးလျားယပ်ꩻသꩻမျိုꩻသွူ။ လိုꩻသီးယို မီႏထွာဝင်ꩻမွိုးဝင်ꩻဖါ၊ မဉ်ႏထွာဖြားဒုံလိုꩻတန်နဝ်ꩻ ပိုလီꩻလောင်း၊ ဒုံသားရပ်သားအလောင်း အဝ်ႏလိုႏဒေါ့ꩻ အဝ်ႏလိုႏသွဉ် အဝ်ႏလိုႏဖေႏသတိꩻ ပွိုင်းဝွို့တွမ်ႏထာꩻမာꩻ တဟဝ်တဝ်းမျိုꩻယို အဝ်ႏလိုႏရဲး အဝ်ႏလိုႏဆီꩻ ပွိုင်းဝွို့တွမ်ႏထွုံႏစံႏ၊ စီꩻကန်ꩻဖုံႏယို အဝ်ႏလိုႏအွဉ်ႏသေ တာႏဝွန်ႏဝတ္တရာꩻအဝ်ႏတဲင် မီႏတအွဉ်ႏသေတဝ်း၊ မီႏတရဲးဆီꩻတဝ်းနဝ်ꩻ တာႏဝွန်ႏဝတ္တရာꩻကေႏတဝ်းတွော့ꩻ အနယ်ꩻလွစ်တဝ်း၊ အပဲစ်ကင်ꩻတဝ်း ရိုꩻဗာႏနုဲင်းနဝ်ꩻသွူ။ ပွိုင်းဝွို့တွမ်ႏ "လိုႏမာꩻတဝ်း"ကရိုꩻဒါႏငဝ်းယို မီႏဒေါ့ꩻလုဲင်း ခြုဲင်းဆွာꩻဗာႏထဲင်းနဝ်ꩻ လိုꩻသီးယို မီႏထွာလိုꩻသာမညအနေႏနဝ်ꩻ မꩻသီဝင်ꩻသက်၊ ထူႏတခွန်ꩻဝင်ꩻတခြိုꩻ၊ ပဲစ်မာႏဝင်ꩻပိုမာ၊ သုံꩻစွယ်ꩻဒဝ်ထီသူႏရာႏ၊ သုံꩻစွယ်ꩻယာဖြေင်းယာဗွာ၊ ယာမား၊ တောႏလောင်ꩻထာꩻ-စတဲင် ထာꩻမာꩻကခွိုင်းချာနမ်း၊ ထာꩻမာꩻကခွိုင်းငါဝင်ꩻ ထာꩻမာꩻနုဲင်းယိုဖုံႏနဝ်ꩻ လိုႏမာꩻတဝ်းသွူ။ မီႏထွာခွန်လိုꩻတန်လဲ့ အံႏရွဉ်မွဉ်၊ ရွဉ်တံႏ၊ တရာꩻတဝင်ႏတ၀်း အခွဉ်ႏအမျိုꩻဖုံႏ၊ တတန်ႏရာꩻတဝ်း တွမ်ႏအပဲစ်တဲင် ဖေႏပဲစ်ဖေႏတံႏတန်ဝင်ꩻဖုံႏ၊ သိမ်ꩻထူႏတသဉ်ဝင်ꩻခြံဝင်ꩻဟံႏယာႏဖုံႏ-စတဲင်နုဲင်းနဝ်ꩻဖုံႏသွူ။ ပွိုင်းဝွို့တွမ်ႏ"လိုႏမာꩻတဝ်း"ကရိုꩻဒါႏငဝ်းယိုနဝ်ꩻ အီႏတဲမ်းလုဲင်းအီႏခြုဲင်းဆွာꩻခရာႏ တပေါႏအဝ်ႏတဝ်းဒွုမ်၊ ကတဲမ်းနယ်ဒါႏအွိုးချာအတွိုင်ꩻလဲ့ စွုံႏလင်ႏလဲဉ်းဒျာႏတဲင် တဲမ်းနယ်ထဲင်းတဝ်းဒွုမ်သွူ။ ပွိုင်းဝွို့တွမ်ႏ "လိုႏမာꩻလိုႏမာꩻတဝ်း၊ လိုႏဒေါ့ꩻလိုႏဒေါ့ꩻတဝ်း"ငဝ်းယို(၄)ငွါနဝ်ꩻ ခမ်းသားထံꩻသာꩻ လိုꩻသာမညတဖြာꩻအနေႏ တာႏဝွန်ႏမီႏတကေႏတဝ်းနဝ်ꩻ အပဲစ်တပေါႏတန်တဝ်း၊ တပေါႏသုမ်ꩻတိန်အာတဝ်းသွူ။ လိုꩻကထွာဒါႏ ဝင်ꩻအတန် မွိုးဖါဖုံႏ၊ ဆရာႏဖုံႏ၊ ခွန်လိုꩻတန်သီးဖုံႏယို တာႏဝွန်ႏမဉ်ႏတကေႏတဝ်းနဝ်ꩻ အပဲစ်တန် ထွာသုမ်ꩻတိန်အာငါႏသွူ။ လိုꩻသီးယို အဝ်ႏလိုႏမာꩻ မဉ်ႏမာꩻတဝ်း၊ အဝ်ႏလိုႏဒေါ့ꩻ မီႏဒေါ့ꩻတဝ်း၊ အဝ်ႏလိုႏမာꩻတဝ်း မီႏမာꩻ၊ အဝ်ႏလိုႏဒေါ့ꩻတဝ်း မဉ်ႏဒေါ့ꩻနဝ်ꩻ တာႏဝွန်ႏဝတ္တရာꩻတကေႏတဝ်းတဲင် "ဝတ္တံ အပရိပူရေန္တော၊ သီလံ န ပရိပူရတိ"ကရိုꩻဒါႏ တရာꩻဒေႏသနာႏအတွိုင်ꩻ တာႏဝွန်ႏဝတ္တရာꩻ ထာꩻမာꩻဖုံႏယို တကေႏလယ်ႏတဝ်းလိုꩻနဝ်ꩻ တွမ်ႏသီႏလတအဲဉ်ထဝ်းလိုꩻနဝ်ꩻ ဗွိုန်ဝင်ꩻ၊ ပေါႏသီႏလတအဲဉ်ထဝ်းလိုꩻနဝ်ꩻ သꩻစွူတဝ်း၊ ပေါႏသꩻစွူတဝ်းနဝ်ꩻ လꩻနွောင်ꩻတဝ်းနိဗ္ဗာန်ႏ၊ ပေါႏတလꩻတဝ်းနိဗ္ဗာန်ႏနဝ်ꩻ လွစ်ထန်ႏနွောင်ꩻတဝ်း ဝဋ်ဆင်ꩻရယ်ꩻသွူ။ ကွပ်နဝ်ꩻမꩻ လိုꩻသီးယို အာႏကာႏအရန်း ပငါပရာꩻ၊ ပွိုင်းဝွို့တွမ်ႏငဝ်း(၄)ငွါယို အဝ်ႏလိုႏလွောက်ꩻနာႏကျင်ꩻသွုံꩻ၊ အဝ်ႏလိုႏကေႏလယ်ႏငါႏနဝ်ꩻအကျောင်ꩻ တဲမ်းခြုဲင်းနယ်ဗာႏသွူ။[၁][၂]