လိုႏယူႏမာႏတောဝ်း

"နီပအိုဝ်ႏလိုꩻမျိုꩻ ထင်ႏထိုရေꩻတာႏ လိုႏယူႏမာႏတောဝ်း" နီပအိုဝ်ႏဒေႏသကို ပညာႏရေꩻအခန်ꩻကဏ္ဍယို ထင်ႏထိုလွဉ်ညငါႏဒွိုန်း၊ စအီႏဗꩻငါနုဲင်းယိုနောဝ်ꩻ အယားသားဖုံႏ ပဉ်ဖုံႏပဉ်စွိုꩻ အောဝ်ႏချိုꩻလွဉ်လဲဉ်း တွမ်ႏအနယ်ꩻပေါင်ꩻစွုမ်ႏ၊ အောဝ်ႏထွုမ်ႏလွဉ်ပျဿနာႏ နီပအိုဝ်ႏလိုꩻမျိုꩻအခါႏတဲင် နေးတွမ်ႏသတိꩻ နီအောဝ်ႏလိုႏထိန်ꩻသိမ်ꩻခါꩻ၊ နီအောဝ်ႏလိုႏထွားဆွာꩻဆွာꩻ၊ ပိုလီꩻစွိုးခွိုꩻတာႏ အနာႏဂတ်တဗာႏအကို နီပအိုဝ်ႏယို ဖေႏကထဲ့ဖွိုႏထိုꩻမွိုန်းနောဝ်ꩻ ပညာႏရေꩻယို ထွာအထျꩻနောဝ်ꩻသွူ။ လိုꩻတဖြာꩻ၊ အစွိုꩻအဗူႏတဗာႏ အောင်ႏမျင်ႏရေꩻအတာႏနောဝ်ꩻ ကျိုꩻစာꩻခွုမ်မာꩻလွေꩻ တယပ်ꩻတောဝ်းရိုꩻကီလဲ့ အဆာႏဆွာꩻ ကအီႏထိန်ꩻသိမ်ꩻဗာႏ အောင်ႏမျင်ႏမုꩻယိုနောဝ်ꩻ တယိုꩻတောဝ်း၊ ပညာႏအောဝ်ႏမꩻလꩻ၊ ထာꩻသေဗဟုသုတအောဝ်ႏမꩻ ထွာနွောင်ꩻတဲင် ခွိုင်းကားတဲင် အနီꩻအရင်ꩻဖုံႏအကို ပညာႏရေꩻအနီꩻအရင်ꩻယို အီႏလꩻဗာႏ ထွာဒျာႏအယပ်ꩻအခုဲင်ႏသွတ်ꩻတဲင် ဒုံတွိုင်ꩻ၊ အွိုင်ႏတွိုင်ꩻ၊ နီကလꩻထွူလဲဉ်းဒါႏ ပညာႏရေꩻ လိတ်သွဉ်ကျောင်ꩻဖုံႏယိုနောဝ်ꩻ အောဝ်ႏလိုႏအွဉ်ႏငါႏ အတန်ႏဖိုꩻနောဝ်ꩻသွူ။ ပညာႏယိုနောဝ်ꩻ မာꩻတန်အီနီနာꩻ မာန်ႏမာႏနမွေးတောဝ်း၊ အွဉ်ႏမွေးနမ်း နိစ္စက်အံႏနွောင်ꩻအီဝင်ꩻတာႏမွေးတောဝ်း၊ ယားကုဲင်အီချာ စွိုးခွိုꩻလိုꩻမျိုꩻဘာႏသာႏ၊ သာႏသနာႏတာႏမွေးတောဝ်း၊ ပညာႏယိုနောဝ်ꩻ မာꩻတရေꩻဒျာႏ လိုꩻလောက မာꩻထင်ႏထိုꩻအီဒျာႏ နီလိုꩻမျိုꩻတာႏတဲင် သွဉ်မွေးမွေးသွဉ်ဗꩻဗꩻ၊ မဉ်ႏဒါႏလꩻတနီꩻခါ ထီႏထွားချာ နီပအိုဝ်ႏရပ်ရာႏ ဖေႏအာႏ နီပအိုဝ်ႏလိုႏတန် မာꩻယံချာနီစွိုးခွိုꩻမꩻ သဲင်ꩻထွာလိုꩻဘဝ တာႏဝွန်ႏကေႏ ကွိုင်ႏတန်ႏလꩻနောဝ်ꩻသွူ။ မဉ်ႏထောင်ထွားချာ မြန်မာခမ်းသမဲင်ꩻကို ပအိုဝ်ႏယိုနောဝ်ꩻ ကွပ်ပွိုးစွဉ်ႏ လွောင်ႏဗူႏမုꩻအာႏဟောဝ်၊ ထာꩻသေပညာႏအောဝ်ႏတဲင် အောဝ်ႏဖိုလဲဉ်း တွမ်ႏနမ်းပဲင်ႏနီခမ်းထီလဲ့ တဖဲ့ꩻနောဝ်ꩻ ဝင်ꩻကထီႏတခေင်ႏဒါႏနီ၊ ဝင်ꩻကတကေးဒါႏနီသား လွဉ်နွို့ယားတွမ်ႏမူဝါဒအမျိုꩻမျိုꩻ၊ ပါꩻသွေꩻကုဲင်ထိုꩻ တွမ်ႏတခြိုꩻတစားစားတွော့ꩻ အနာလွို ပအိုဝ်ႏပိုနီနာꩻ ထွာချာထိုꩻဗာႏ ဝင်ꩻလိုꩻမျိုꩻအာႏဏာႏ စူခြဲမ်ဆꩻလနောဝ်ꩻ နီပအိုဝ်ႏခွိုꩻနွယ်ႏ တခွိုꩻလွုမ်းအတာႏ ထွာအီငါႏသွဉ်ခန်ꩻနောဝ်ꩻသွူ။ နီပအိုဝ်ႏယို တယ်ႏစွဉ်ႏအစွူႏထဲ့ပြာႏ အာႏဏာႏထဲ့ပြင်ꩻ နောဝ်ꩻမာꩻချာ မြန်မာခမ်းနဲင်ႏငံႏရေꩻကို ပါဖိုတောဝ်းတလဲင်ႏလဲင်ႏ၊ ဒေါ့ꩻခွင်ꩻအောဝ်ႏတောဝ်းတစွိုးစွိုး၊ ပေါႏလွိုထာꩻတလွိုး တွမ်ႏထာꩻငွိုးနောဝ်ꩻ အခွင်ꩻအရေꩻတမုဲင်ꩻလဲ့ အဲဉ်ထောဝ်း၊ ပါꩻမုဲင်ꩻလဲ့ တစွီႏစူတောဝ်းနီပအိုဝ်ႏဘဝနောဝ်ꩻသွူ။ လိုꩻရက်ခွိုꩻအွဉ်ငါယံ နီပအိုဝ်ႏလိုꩻဒါႏ ခေါင်းဆောင်တန် အရန်းရန်းဖုံႏနောဝ်ꩻ စွိုးခွိုꩻနဲင်ႏငံႏရေꩻအတာႏ နေးရွဉ်၊ ထေအာႏ တွူႏတရန်ငါ နေင်ႏပေါင်ꩻအာ လာပေါင်ꩻညဆွာꩻမꩻ တယ်ႏစနေင်ႏ ၁၉၉၁-ဗာႏလꩻလွဉ်စခန်း အထူꩻဒေႏသ(၆) နီပအိုဝ်ႏရပ်ရာႏ၊ နေင်ႏ ၂၀၀၈-ဗာႏကို နဲင်ႏငံႏတောႏ အခေႏခံႏဥပဒေႏကို ဗွိုန်ပီဝင်ꩻလိုꩻမျိုꩻ လꩻနုဲင်းနုဲင်း နမ်းပဲင်ႏအုပ်ချွုတ်ခွင်ꩻ(၃)ဝေင်ꩻနယ်ႏနောဝ်ꩻသွူ။ ယိုမာꩻငါ ဖေႏကနွောင်ꩻထဲင်းယင်းလဲ့ အထျꩻအောဝ်ႏဒျာႏ ခမ်းသားမွိုးဖါသီး ဖေႏအာႏမုꩻတွမ်ႏ ထောက်ခံႏမုꩻ သေချာကေꩻဇူꩻတရာꩻဖုံႏနောဝ်ꩻသွူ။ နီလမ်းကို ထင်ႏထိုရေꩻနောဝ်ꩻ နီနမ်းတွမ်ႏနီလမ်းကို မာꩻချာမꩻလꩻ၊ နီလိုꩻမျိုꩻထင်ႏထိုရေꩻတာႏလဲ့ နီလိုꩻတန်တွမ်ႏ နီခမ်းသားမွိုးဖါ ကျိုꩻစာꩻချာမꩻ ထင်ႏထိုအောင်ႏမျင်ႏလꩻနောဝ်ꩻသွူ။ မဉ်ႏထွားနီလိုꩻမျိုꩻဆေ့ꩻအာနောဝ်ꩻ တွမ်ႏနီကလꩻ နမ်းပဲင်ႏအုပ်ချွုတ်ခွင်ꩻယို လွောက်ꩻဖက်တောဝ်း၊ တန်ႏတူႏတောဝ်း ရိုꩻဗာႏနုဲင်းနောဝ်ꩻသွူ။ ကွပ်စွဉ်ႏခမ်းသားမွိုးဖါသီး ထောက်ခံႏဖေႏအာႏသော့ꩻဖေႏမဲနောဝ်ꩻမꩻ နေင်ႏ ၂၀၁၀-ဗာႏ လွိုက်ရွေꩻပွယ်ꩻတဲ့နောဝ်ꩻ၊ ၂၀၁၅-ဗာႏ လွိုက်ရွေꩻပွယ်ꩻတဲ့နောဝ်ꩻ ဒဲ့ꩻထူႏလꩻဝင်ꩻစွိုးခွိုꩻအောင်ႏပွယ်ꩻ၊ မဉ်ႏတွိုႏနေင်ႏ ၂၀၂၀-ဗာႏ ကအီႏမာꩻလွေꩻယင်းဒါႏ ပါတီစွုမ်ႏ လွိုက်ရွေꩻပွယ်ꩻယို ဖေႏကဒဲ့ꩻထူႏနွောင်ꩻယင်း စွိုးခွိုꩻအောင်ႏပွယ်ꩻနောဝ်ꩻ ဖူးဝေးမွိုးဖါသီး အခေႏခံႏတွမ်ႏ စွိုးခွိုꩻသꩻဓာတ်တွော့ꩻ ယံကထောက်ခံႏဖေႏသွော့ စွိုးခွိုꩻမဲကရိုꩻနောဝ်ꩻ နေးတွမ်ႏမေတ္တာႏ စေႏတနာႏ တန်တန်အာအာတဲင် ဖေႏသေဗာႏ ခမ်းသားမွိုးဖါသီးဖုံႏသွူ။ ကွပ်ပွိုးနောဝ်ꩻမꩻ မဉ်ႏတွိုႏနေင်ႏ ၂၀၂၀-ဗာႏ လွိုက်ရွေꩻပွယ်ꩻယိုတဖြုံႏနောဝ်ꩻ ယူႏစဲင်းစဲင်း၊ ထီႏထွားဆွာꩻဆွာꩻ နီပအိုဝ်ႏအနာႏဂတ် တဖူꩻရဲဉ်ႏတဲင် နီစွိုးခွိုꩻ မဉ်ႏထီႏချာ၊ နီလိုꩻမျိုꩻ နီပအိုဝ်ႏဘဝကံႏကျမ်ႏမာႏ ဖေႏကထင်ႏထိုငါထဲင်းယင်းနောဝ်ꩻ ဖေႏအာႏထောက်ခံႏသွော့ နီလိုꩻချင်ꩻ၊ နေးတွမ်ႏပညာႏ ယူႏဒါႏဒါႏသွော့ဝင်ꩻအကျောင်ꩻ လောဝ်းဟွိုန်တမာသေꩻဗာႏ လိတ်ထွားသား ဗွေႏ ခွန် နင်ꩻသီးဖုံႏသွူ။