လိုꩻဆာသွံမျိုꩻ

"ဂိလာနသုတ် (လိုꩻဆာသွံမျိုꩻ လိုꩻသွံစား)"

ပွိုင်းဝွို့တွမ်ႏ လိုꩻဆာဥပမာႏ ဆရာႏဗွေႏဘုရာꩻ ဟော်ꩻဖေႏ ရဟန်ꩻသီးဖုံႏ တရာꩻနုဲင်းယို- ရဟန်ꩻသီးဖုံႏဟွေး လိုꩻအဆာအဝ်ႏသွံမျိုꩻ- ၁။ လꩻတသီႏဟောဝ်တဲ့နဝ်ꩻ၊ လꩻတဝ်းတသီႏဟောဝ်တဲ့နဝ်ꩻ အီႏသီဒျာႏရင်ꩻရင်ꩻ၊ ၂။ မဉ်ႏလꩻတသီႏဟောဝ်နဝ်ꩻ သီတဝ်း- မဉ်ႏလꩻတဝ်းတသီႏဟောဝ်နဝ်ꩻ သီ၊ ၃။ လꩻတသီႏဟောဝ်တဲ့နဝ်ꩻ၊ တလꩻတဝ်းတဲ့နဝ်ꩻ အီႏဟောဝ်ချာဒျာႏရင်ꩻ၊ အဝ်ႏသွံမျိုꩻနုဲင်းနဝ်ꩻသွူ။ ရဟန်ꩻသီးဖုံႏဟွေး- လိုꩻဆာယင်ဟန်ႏနဝ်ꩻ ဆရာႏမဉ်ကျနုဲင်းမုဲင်ꩻကျ၊ တသီႏမဉ်ဟောဝ်နုဲင်းမုဲင်ꩻဟောဝ်၊ လွမ်ꩻလာꩻနုဲင်းမုဲင်ꩻခန်းတဲ့ယဝ်း တလꩻတဝ်း သီထိုꩻဒျာႏတဲ့အောဝ်ႏ။ လိုꩻဆာယင်ဟန်ႏနဝ်ꩻ မဉ်ႏတလွမ်ꩻလာꩻတဝ်း၊ မဉ်ႏတမော့ꩻတဝ်း ဆရာႏဟောဝ်၊ တသီႏဟောဝ်နဝ်ꩻသီ၊ မဉ်ႏလွမ်ꩻလာꩻဗာႏ၊ မဉ်ႏမော့ꩻဆရာႏဟောဝ်၊ တသီႏဟောဝ်နဝ်ꩻ သီတောဝ်း။ လိုꩻဆာယင်ဟန်ႏနဝ်ꩻ လွမ်ꩻလာꩻတဲ့နဝ်ꩻ၊ တလွမ်ꩻလာꩻတဝ်းတဲ့နဝ်ꩻ၊ မော့ꩻဆရောႏဟောဝ်၊ မော့ꩻတသီႏဟောဝ်တဲ့နဝ်ꩻ၊ တမော့ꩻတဝ်းတဲ့နဝ်ꩻ အီႏဟောဝ်ချာဒျာႏရင်ꩻရင်ꩻနောဝ်ꩻသွူ။ ရဟန်ꩻသီးဖုံႏဟွေး- ဥပမာႏ ဗွန်ပီနဝ်ꩻနေနေ၊ လောကကိုယို လိုꩻအဝ်ႏသွံမျိုꩻ၊ သွံမျိုꩻကရိုꩻနဝ်ꩻ- ၁။ လိုꩻယင်ဟန်ႏနဝ်ꩻ ဝုဲင်ႏဗာႏဘုရာꩻတဲ့နဝ်ꩻ၊ ဝုဲင်ႏဗာႏတဝ်းတဲ့နဝ်ꩻ၊ နာႏဗာႏတရာꩻတဲ့နဝ်ꩻ၊ နာႏဗာႏတဝ်းတရာꩻတဲ့နဝ်ꩻ မာꩻနုဲင်းမုဲင်ꩻမုဲင်ꩻခန်းတဲ့ယဝ်း တထွာနွောင်ꩻတောဝ်း ရဟန္တာႏ။ ၂။ လိုꩻယင်ဟန်ႏနဝ်ꩻ မဉ်ႏဝုဲင်ႏဗာႏတဝ်းဘုရာꩻ၊ မဉ်ႏနာႏဗာႏတဝ်းတရာꩻနဝ်ꩻ ထွာနွောင်ꩻတဝ်း ရဟန္တာႏ၊ မဉ်ႏဝုဲင်ႏဗာႏဘုရာꩻ၊ မဉ်ႏနာႏဗာႏတရာꩻနောဝ်ꩻ ထွာနွောင်ꩻရဟန္တာႏ။ ၃။ လိုꩻယင်ဟန်ႏနဝ်ꩻ ဝုဲင်ႏဗာႏတဝ်းဘုရာꩻတဲ့ယဝ်း၊ နာႏဗာႏတဝ်း တရာꩻတဲ့ယဝ်း ပါႏရမီႏဗွေ၊ အခိန်ထွာလဲဉ်းရဟန္တာႏ 'ပစ္ဆိမဘဝိက-သံႏသရာႏကို ဝွေꩻယို ထွာအဆုဲင်ꩻသွတ်ꩻ'လဲဉ်းသွူတဲင် နမ်းတွမ်ႏနမ်း သေအားထွုတ်ဒျာႏတရာꩻ၊ သေမာꩻဒျာႏကုသိုလ်ႏ၊ သꩻမဉ်မာꩻတောဝ်း အကုသိုလ်ႏ၊ သေပယ်ႏထိုꩻဒျာႏ နမ်းကျင်ꩻကုဲင် ကာယဒုစရဲက်၊ ဖြောင်းကျင်ꩻကုဲင် ဝစီဒုစရဲက်၊ သꩻကျင်ꩻကုဲင် မနော်ꩻဒုစရဲက်။ သေမာꩻဒျာႏ နမ်းကျင်ꩻဟောဝ် ကာယသုစရဲက်၊ ဖြောင်းကျင်ꩻဟောဝ် ဝစီသုစရဲက်၊ သꩻကျင်ꩻဟောဝ် မနော်ꩻသုစရဲက်၊ ကွပ်ပွိုးနမ်းတွမ်ႏနမ်း သေအားထွုတ်ဒျာႏတရာꩻ၊ သေမာꩻဒျာႏ ကုသိုလ်ႏနုဲင်းနဝ်ꩻတွော့ꩻ ဝုဲင်ႏဗာႏဘုရာꩻတဲ့နဝ်ꩻ၊ ဝုဲင်ႏဗာႏတဝ်း ဘုရာꩻတဲ့နဝ်ꩻ၊ နာႏဗာႏတရာꩻတဲ့နဝ်ꩻ၊ နာႏဗာႏတဝ်းတဲ့နဝ်ꩻ ပါႏရမီႏဗွေအာ အခိန်ႏထွာ ရဟန္တာႏနဝ်ꩻမꩻ ထွာနွောင်ꩻဒျာႏ ရဟန္တာႏနောဝ်ꩻသွူ။ ရဟန်ꩻသီးဖုံႏဟွေး- မဉ်ႏနာႏဗာႏ (သုတ်၊ အဘိဓမ္မာႏ၊ ဝိနယ်ꩻ)တရာꩻမꩻ ထွာလꩻရဟန္တာႏ၊ မဉ်ႏနာႏဗာႏတဝ်း တရာꩻနောဝ်ꩻ ထွာနွောင်ꩻတဝ်း ရဟန္တာႏ၊ ကွပ်ပွိုးလိုꩻအစားယို ယံကနာႏဗာႏတရာꩻ၊ ဖေႏကထွာနွောင်ꩻ ရဟန္တာႏနောဝ်ꩻမꩻ ခွေဘုရာꩻနမ်းနမ်းတဲ့ ဟော်ꩻဖေႏဗာႏတရာꩻ၊ တပဲ့ꩻသီးတဲ့ ဟော်ꩻဖေႏဗာႏတရာꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ ဂိလာနသုတ်)