လိုꩻမူႏမီႏယတ်သွီႏငုတ်

"လိုꩻမူႏမီႏယတ်သွီႏငုတ်ရောႏဂါႏတွမ်ႏ တသီႏနယ်ꩻဖုံႏ" ခြွိုင်ႏသန်ꩻရေꩻဟဝ်၊ သွီႏအာႏမဲဉ်ႏ လိုꩻမူႏပေႏနဝ်ꩻ သက်ပေါႏလꩻ ၁၂-၁၃ နေင်ႏလဲ့ သွီႏလွဉ်စသွူတွော့ꩻ အဝ်ႏလိုႏပေႏဘဝ ထွာလွေꩻခန်းဒျာႏ မူႏနံꩻဘဝနဝ်ꩻသွူ။ ခြွိုင်ႏသန်ꩻရေꩻ ပေါ်ꩻဟတ်တဝ်း၊ သွီႏအာႏကတဗွေတဝ်း လိုꩻမူႏပေႏနဝ်ꩻ သက်လꩻ ၁၄-၁၅နေင်ႏမꩻ သွီႏလွဉ်စလဲ့ အဝ်ႏသွူ။ အမျိုꩻမဲန်ႏမဲန်ႏ ထုံꩻစံႏအတွိုင်ꩻနဝ်ꩻ လိုꩻမူႏသီးယို တဲႏစွဉ်ႏကမူႏနံꩻစ ဗꩻတွိုႏလွေꩻ သက် ၄၅ တွမ်ႏ ၅၀ အခါႏကိုနဝ်ꩻ တလာတလဲင်ႏ သွီႏလွဉ်ဗာႏသွူ။ ညာꩻညာꩻတဖြာꩻနဝ်ꩻ ဗꩻတွိုႏလွေꩻစွဉ်ႏ သက် ၅၅-သွီႏအဝ်ႏလွဉ်နေလဲ့ အဝ်ႏသွူ။ လိုꩻမူႏသီး သွီႏကလွဉ်တလဲင်ႏလဲင်ႏယိုနဝ်ꩻ အဆေ့ꩻသွတ်ꩻ ၃-နီꩻ အအာသွတ်ꩻ ၅-နီꩻရပ်နဝ်ꩻသွူ။

လိုꩻမူႏသီးယို အခိန်ႏအရွယ်ႏတွိုႏလဲန်း၊ သွီႏလွဉ်ဗာႏဖိုလဲန်းတွော့ꩻ တလာတလဲင်ႏ မီႏတလွဉ်ဒွုမ်လဲ့နဝ်ꩻ၊ လွဉ်ဆေ့ꩻငါႏတွော့ꩻ ၃-နီꩻတဗွေတဝ်း လို့ထိုꩻလဲ့နဝ်ꩻ၊ ၅-နီꩻဗွေသွူတဲ့ အဝ်ႏလွဉ်တိတ်ꩻတိတ်ꩻ မွူးနီꩻအာလွဉ်ထာꩻလဲ့နဝ်ꩻ ထွာလဲန်းသွူ မီႏယပ်ရောႏဂါႏတမျိုꩻမျိုꩻသွူ။ ခိန်ႏလွဉ်တွိုႏသွူတဲ့ မီႏတလွဉ်တဝ်းတစိꩻစိꩻနဝ်ꩻ ဟဲ့ꩻ"မီးယတ်ငုတ်ရောႏဂါႏ"သွူ။ အဝ်ႏလွဉ်ဒျာႏလဲ့ လွဉ်မွူးနီꩻဆေ့ꩻငါႏ၊ လွဉ်တနီꩻနီꩻ တလဲင်ႏလဲင်ႏယို မီႏဆေ့ꩻငါႏနဝ်ꩻ သွီႏတလို့တဝ်းတဲင် ထွာဒါႏမီႏယတ်သွီႏသေင်၊ (မီးယပ်သွေးပုပ်၊ မီးယပ်သွေးကျန်)ရောႏဂါႏသွူ။ ငတ်ꩻနီꩻဗွေသွူတဲ့ မီႏအဝ်ႏလွဉ်ထဲင်းထဲင်း၊ လွဉ်မွူးနီႏ မီႏအာလွဉ်ꩻထာꩻ၊ လွဉ်တလဲင်ႏလဲင်ႏ တနီꩻနီꩻယို မီႏအာလွဉ်ꩻထာꩻနဝ်ꩻ ဟဲ့ꩻ"မီးယတ်သွီႏလွဉ်ꩻ(မီးယပ်သွေးလွန်)ရောႏဂါႏသွူ။ လိုꩻမူႏသီးနဝ်ꩻ ပွိုင်းဝွို့တွမ်ႏသွီႏခရာႏတဲင် ခံႏစာꩻဗာႏ မော့ꩻဗာႏဝွေႏဒနာႏအမျိုꩻမျိုꩻဖုံႏလဲ့ အဝ်ႏတွော့ꩻ ဝွေႏဒနာႏလက္ခဏာႏအလွောက်ꩻ မီႏယပ်ရောႏဂါႏအလင်ဖုံႏလဲ့ အဝ်ႏအာတန်သွူ။ လိုꩻမူႏသီးယို တလာတလဲင်ႏ သွီႏကလွဉ်ဗာႏနဝ်ꩻ အသက်အရွယ်ႏကတွိုႏဒါႏ၊ ကမဲန်ႏဒါႏလိုꩻမူႏနဝ်ꩻ ဝွေꩻသီးပိုခြုံ (သားအိမ်)ယို နေးအီသန္ဓေႏတာႏ ဗီဇနိယာမသဘာဝတရာꩻ ဖျင်ဆင်သေꩻခါꩻ အုံပွေါးကျိုႏဆွုမ်ႏ လိုꩻခိုစွိုးသွူ။ ပိုဝါꩻကတအဲန်ထဝ်း အခိန်ႏအခါႏမဲန်ႏ လိုꩻခိုစွိုးကတနွို့သော့ꩻတဝ်း လိုꩻမူႏသီးပိုခြုံနဝ်ꩻ အမွူးနီꩻလွဉ်ꩻ၊ အသက်လွဉ်ꩻထိုꩻတွော့ꩻ သေင်ဖြွို့ကုဲင်ထိုꩻ၊ ပြင်ꩻလင်ꩻထိုꩻသွူ။ ပေါႏသင်ဖြွို့ပြင်ꩻထိုꩻသွူလဲ့ ထန်ႏလင်ꩻထိုꩻဗာႏသွူ။ သွီႏသေင်ကထန်ႏလင်ꩻထိုꩻနုဲင်းယိုနဝ်ꩻ ဟဲ့ꩻ"ရာႏသီႏသွီႏလင်ꩻ"၊ "ဓမ္မတာႏသွီႏလင်ꩻ"နုဲင်းနဝ်ꩻသွူ။

ပိုခြုံအကို သွီႏသေင်ဖုံႏယို မီႏထန်ႏလင်ꩻလို့ထိုꩻမꩻ ထွာတဝ်းမီႏယတ်ရောႏဂါႏ တမျိုꩻမျိုꩻ၊ အုံထာꩻဟဝ်သွူ။ မီႏတထန်ႏလို့တဝ်း၊ မီႏအဝ်ႏကုဲင်နဝ်ꩻ သေင်သံးသံးသော့ꩻထဲင်း ပိုခြုံကိုတဲင် သွီႏသေင်တအွို၊ သွီႏသေင်လွီးဖုံႏယို နွို့သော့ꩻနမ်းတဗာႏလုမ်း သွီႏဟဝ်ကိုတွော့ꩻ သꩻတနွော့ꩻ သꩻတဖုံဒါႏ၊ သီႏမူꩻတအော့ꩻထွူဒါႏ၊ အုံထာꩻသꩻစွူတဝ်း၊ သꩻဟဝ်တဝ်းသွူ။ ယဖြာꩻဖြာꩻနဝ်ꩻ နုဲင်းစွဉ်ႏပယောဂ ဗွို့ꩻယောင်ႏယောင်ႏ၊ အီႏဗားအီႏကွင်နေးစွဉ်ႏ ယောင်ႏယောင်ႏသွူ။ ကွပ်နဝ်ꩻမꩻ လိုꩻမူႏသီးယို သွီႏလွဉ်မွူးနီꩻ ပေါႏအီႏတွိုႏ၊ မီႏအံႏအာငါႏ ထာꩻရသာႏခွꩻ၊ မီႏအံႏအာငါႏ အရသာႏတချꩻ၊ မီႏအုံခွꩻညငါႏထာꩻနဝ်ꩻ သွီႏခယ်ꩻထိုꩻတဲင် သွီႏတန်ႏလွဉ်သွူတဲ့ လွဉ်တဝ်း၊ မီႏလွဉ်လဲ့ လွဉ်လို့တဝ်းတွော့ꩻ ထွာဒါႏမီႏယတ်သွီႏသေင်ႏခံရောႏဂါႏသွူ။ ခံႏစာꩻဗာႏဒါႏ ဝွေႏဒနာႏနုဲင်းကတဲမ်းနယ်ကီနဝ်ꩻအတွိုင်ꩻသွူ။ သွီႏအီႏလွဉ်ခိန်ႏ၊ သွီႏအဝ်ႏလွဉ်တွင်ꩻ မီႏအံႏအာငါႏ ထာꩻရသာႏလျား၊ ရသာႏဆျာႏဖုံႏ၊ မီႏလိုပ်ꩻရွိုးမာꩻရွိုး၊ အုံတင်းညငါႏ ယာခိုးနဝ်ꩻ သွီႏပြာလွဉ်ꩻတဲင် သွီႏလွဉ်အာလွဉ်ꩻဒါႏ၊ ထွာဒါႏ မီႏယတ်သွီႏလွဉ်ꩻရောႏဂါႏသွူ။ ကွပ်နဝ်ꩻမꩻ လိုꩻမူႏသီးယိုနဝ်ꩻ တလာတလဲင်ႏ သွီႏအဝ်ႏလိုႏထန်ႏလင်ꩻ အခန်ꩻတွိုင်ꩻမဲန်ႏမဲန်ႏသွူ။ ကွပ်အကျောင်ꩻတစွိုးတဲင် သွီႏခိန်ႏလွဉ် တလွဉ်တဝ်းလဲ့နဝ်ꩻ၊ လွဉ်ဒျာႏလဲ့ လွဉ်ဆေ့ꩻငါႏတွော့ꩻ တလို့တဝ်းလဲ့နဝ်ꩻ ဖေႏကလွဉ်မဲန်ႏ၊ ဖေႏကလွဉ်လို့နဝ်ꩻ အံႏဗာႏတသီႏသွူ။ ရွမ်ဖြုဲင်ꩻယိုနဝ်ꩻ ဖေႏခါꩻအမဉ်ꩻ "မီႏယတ်သွီႏငုတ်ရောႏဂါႏတွမ်ႏ တသီႏနယ်ꩻဖုံႏ"နုဲင်းနဝ်ꩻတဲင် ယိုနဝ်ꩻ အီႏတဲမ်းနယ်လွေꩻယင်း မီႏယတ်သွီႏငုတ် တသီႏနယ်ꩻဖုံႏသွူ။

မီႏယတ်သွီႏငုတ်တသီႏနယ်ꩻဖုံႏ

• ၁။ လိုꩻမူႏသီး သွီႏအခိန်ႏလွဉ် တလွဉ်တဝ်းတွော့ꩻ တလာထွူတလာ မိဉ်ႏငုတ်ထိုꩻမားထိုꩻလဲ့နဝ်ꩻ၊ လွဉ်လဲ့ အလွိုးမီႏတလို့တဝ်း၊ အလွိုးမီႏအဝ်ႏကုဲင်ထိုꩻ ယဟန်ႏလဲ့နဝ်ꩻ မီႏထွာနုဲင်းယိုနဝ်ꩻ ပေါႏအခိန်ႏမွူးနီꩻအီႏတွိုႏလဲ့ ဖက်ꩻပိုမ်းကောင် (ကြိတ်မှန်)မွူး ပဉ္စငတ်ꩻပါꩻယို တဒွေါ့ꩻပဲစ်ꩻပဲစ်ꩻထွူတွော့ ထွားတသီႏနမ်း ချင်းသော့ꩻထီ ခြွူသိုမ်ထီတထီတွော့ꩻ တသီႏခြွူထီ ၆-စေားအံႏဟန်ႏအိုနဝ်ꩻ သော့ꩻတွမ်ႏတဝတ်ꩻ (တမူ)ထီစေားတွော့ꩻ အံႏဖေႏသွော့ တနီꩻ ၂-လဲင်ႏနေား၊ တဝတ်ꩻထီမီႏအဲန်ထဝ်းလဲ့ ပေါႏအီႏလင်းလင်ꩻ တသီႏဖွိုင်ꩻနဝ်ꩻ ချင်းသော့ꩻဗော့ꩻ တောင်းလျက်ꩻထန်ꩻလဲ့ လꩻဒျာႏသွူ။ မီႏခြွူတွမ်ႏတောင်းလျက်ꩻထန်ꩻနဝ်ꩻ ပေါႏအီႏခွꩻလဲ့ တသီႏသတန်ႏကိုနဝ်ꩻ သော့ꩻတွမ်ႏတသာႏဆေ့ꩻဆေ့ꩻတွော့ꩻ အွꩻသွော့နေား၊ ကြိတ်မှန် (ဖက်ꩻပိုမ်းကောင်)ယိုနဝ်ꩻ ခြွူနေးတဝ်းတွော့ꩻ သွတ်ꩻပသာႏ ကြူးအံႏနေးလဲ့ လꩻဒျာႏသွူ။ အံႏမူတသဉ်နေးဒဲန်လဲ့ လꩻဒျာႏသွူႏ ဖက်ꩻပိုမ်းကောင်ယိုနဝ်ꩻ လိုꩻမူႏသီးတာႏ ထွာငါႏတသီႏတဲင် အဝ်ႏလိုႏဆို့ꩻခါꩻ၊ လွူးခါꩻငါႏလမ်းသောင်လံးထျꩻသွူ။ ပေါႏဆို့ꩻဗာႏသွူတလဲင်ႏလဲ့ ပေါႏထီစိုႏနဝ်ꩻ အဝ်ႏဒေါ့ꩻဒျာႏသေႏသေႏသွူ။ ပေါႏခံးခါနဝ်ꩻ တမွူးမွူးယို အပုံတန်၊ အဆုံꩻတန်တန်ဒျာႏသွူ။
• ၂။ လိုꩻမူႏသီး ရာႏသီႏသွီႏခိန်ႏလွဉ် တလွဉ်တဝ်းတွော့ꩻ မီႏထိုꩻမားထိုꩻနဝ်ꩻ ဖက်ꩻပိုမ်းကောင် ပဉ္စငတ်ꩻပါꩻ အယာႏခဉ်ႏ တခန်ရပ်ယို သော့ꩻတွမ်ႏထီ ၃-ပလဲင်ꩻ၊ ခြွူသိုမ်ထီတထီ ဖေႏကအဝ်ႏကုဲင် တပလဲင်ꩻတွော့ꩻ တသီႏခြွူထီ တပလဲင်ꩻနဝ်ꩻ သော့ꩻတွမ်ႏဒဝ်ကတူႏ (အရက်ဦးရေ)ထာဝပလဲင်ꩻတွော့ꩻ ချင်းသော့ꩻပါ တဝတ်ꩻထီ ဖေႏကနွိုးပါသာႏသာႏနေား၊ ထောင်းသော့ꩻပါတွမ်ႏ ဇာတိဖိုလ်ႏရာႏ တဖြုံႏတွော့ꩻ စဲးခါꩻသွော့နေား၊ ပေါႏအီႏအွꩻလဲ့ တရွူꩻသွူတဲင် အွꩻတလဲင်ႏ ၂-စေားအံႏဟန်ႏအို၊ အွꩻဖေႏတနီꩻ ၃-လဲင်ႏနဝ်ꩻ ၃-နီꩻ ၄-နီꩻငါလဲ့ သွီႏပေါႏလွဉ်ဒျာႏသွူ။
• ၃။ တသီႏမီႏယတ်သွီႏငုတ်နယ်ꩻ ထဲင်းတနယ်ꩻနဝ်ꩻ ဟန်ႏဆျာယာႏရွီး (ဒန့်သလွန်မြစ်)ယို မူတွမ်ႏတသာႏတွော့ꩻ ချင်းအွꩻဖေႏနဝ်ꩻလဲ့ ပေါႏဒျာႏနေနေရိုꩻနဝ်ꩻသွူ။ အွꩻတလဲင်ႏခွိုင်းမုဲင်ꩻ၊ အွꩻတနီꩻခွိုင်းမုဲင်ꩻလဲင်ႏနဝ်ꩻ တဒေါ့ꩻပါတဝ်းတဲင် ချင်းအွꩻဒျာႏသွော့နေား၊ အွꩻအာအာလဲ့ အလွဥဉ်တအဲန်ထဝ်းသွူ။
• ၄။ တသီႏမီႏယတ်သွီႏငုတ်နယ်ꩻ ထဲင်းတနယ်ꩻနဝ်ꩻ ယမ်းဖြေꩻ (ရှားစောင်းလက်ပပ်)ဟမ်းဆားဆားယို သွယ်ꩻပဉ်ဗေင်ႏဗေင်ႏတွော့ꩻ သော့ꩻတွမ်ႏခဲန်ႏပေႏ (ဖက်ဖစ်ပွမ်း)ဖွန်ႏ၊ ပခေါ်ဖုံႏတဲင် ဒွိုႏအံႏသွော့ ဟန်ႏအိုထီနေား၊ ဒွိုႏအံႏတရွေးသွော့တဝင်ꩻ ၃-နီꩻနေား၊ ဟန်ႏအိုထီတသီႏယိုနဝ်ꩻ မီႏယတ်သွီႏငုတ်၊ သွီႏတလွေꩻလို့တဝ်း၊ သွီႏသေင်ခံတွော့ꩻ ကထွာဒါႏ ယာႏပသꩻဖုံႏ၊ အတနျာႏ အတညိုႏကွက် အဖြောင်းကွက် ကပေါႏဒါႏဖုံႏ၊ မဲ့ငါဗိုမ်းဖော်ꩻလွဉ်ꩻဖုံႏ-စတဲင် မီႏယတ်သွီႏသေင်ကမာꩻထွာဒါႏ လက္ခဏာႏဖုံႏနဝ်ꩻ ဟဝ်နွောင်ꩻလို့သွူ။ ယမ်းဖြေꩻယိုနဝ်ꩻ အကျိုꩻဟော်ꩻလꩻစွုမ်ႏငါႏ၊ ရောႏဂါႏအလင် သွီႏတိုꩻ၊ ဆွတ်ꩻဆွုမ်ႏယော့ꩻဖုံႏ၊ ဆီႏခြောက်၊ ဆီႏဆိ၊ ဆီႏတနျာႏ၊ ဆီႏဆေ့ꩻရောႏဂါႏဖုံႏလဲ့ ဟဝ်အီနွောင်ꩻလို့သွူ။
• ၅။ ပအိုဝ်ႏဟဲ့ꩻ ရူးတထေႏ၊ မန်းဟဲ့ꩻ (ကျွဲနှာခေါင်းချိတ်၊ ကြက်မောက်ဆူးပြန်)ပဉ္စငတ်ꩻပါꩻယို ပသေကြောင်းကြောင်း တဒွေါ့ꩻပဲစ်ꩻပဲစ်ꩻထွူတွော့ꩻ ထောင်းသော့ꩻဆိုမ်ႏကြောင်းကြောင်းကိုတဲင် ပေါႏရပဲစ်ꩻလဲန်းလဲ့ စေ့ꩻအထီတွော့ꩻ ရူးတထေႏသတ္တုထီ တစေားအံႏဟန်ႏအိုယို တွမ်ႏမောက်ꩻဖါးဖျောႏထီ တကောက်ꩻ ရော်ꩻသွူတဝင်ꩻတွော့ꩻ အီႏဗေင်ႏမွူးဟာခိုႏနဝ်ꩻ အွꩻတရွေးဖေႏသွော့တဝင်ꩻ ၃-ဟာငါနေား၊ လိုꩻမူႏသွီႏငုတ်၊ သွီႏထိုꩻမားလွုမ်ꩻတကာႏတဝ်း ကလွဉ်ဒါႏ နီသိုမ်လာတလဲင်ႏစားနဝ်ꩻလဲ့ မဲန်ႏလွဉ်ပါယင်းဒျာႏသွူ။

ရူးတထေႏ သတ္တုထီယိုနဝ်ꩻ ဆီႏရိ၊ ဆီႏခြောက်-စတဲင် ဆီႏရောႏဂါႏအမျိုꩻမျိုꩻဖုံႏလဲ့ ဟဝ်အီဒျာႏသွူ။ မောက်ꩻဖါးဖျောႏထီ ကရိုꩻနဝ်ꩻ မောက်ꩻဖါးထီ တသာႏသိကျာꩻ၊ ထီ-သိုမ်မျိုꩻယို ချင်းသော့ꩻရော်ꩻတဝင်ꩻတွော့ꩻ ကထွာလဲန်းသွူဖျောႏထီ၊ အရသာႏဆျာႏနွိုးနဝ်ꩻ ဟဲ့ꩻမောက်ꩻဖါးဖျောႏထီသွူ။

• ၆။ မီႏယတ်သွီႏငုတ်တသီႏနယ်ꩻ ထဲင်းတနယ်ꩻနဝ်ꩻ မေ့တရင်းတဆ၊ မောက်ကြဲင်ႏမဉ် ထေထွူအခူꩻတဆ၊ တောင်းလျက်ꩻထန်ꩻတဆ၊ စမုံနက်တဆ၊ ပခေါ်ဖို့ꩻမဉ်ထွူတဆ၊ တသီႏယိုဖုံႏနဝ်ꩻ ထောင်းပဲစ်ꩻညီꩻတဝင်ꩻတွော့ꩻ သော့ꩻထီဆေ့ꩻဆေ့ꩻ၊ တွမ်ႏမေႏဝုဲင်ꩻဝုဲင်ꩻ ဒွိုႏယိုႏညီꩻသွော့တဝင်ꩻနေား၊ ထွူနဝ်ꩻ သော့ꩻခါꩻပလဲင်ꩻငွါလုဲင်းကိုတဲင် အံႏသွော့တလဲင်ႏ တစေားနေင်းထီနွိုး၊ အံႏသွော့ တနီꩻ ၃-လဲင်ႏနေား၊ ၃-နီꩻ၊ ၄-နီꩻငါလဲ့ မီႏသွီႏပေါႏလွဉ်ဒျာႏသွူ။

စမုံနက်ယို မီႏငိုးမိဉ်အွဉ်ပသာႏနေးနဝ်ꩻ အံႏဟံးပေါင်းအွီႏသွူ။

• ၇။ လိုꩻမူႏသီး ရာႏသီႏသွီႏတမဲန်ႏတဝ်း၊ သွီႏလွဉ်ဆေ့ꩻငါႏ၊ သွီႏလွဉ်လို့တဝ်းစားနဝ်ꩻဖုံႏနဝ်ꩻ ပအိုဝ်ႏဟဲ့ꩻ "အောင်ႏလျာပေႏ"၊ မန်းဟဲ့ꩻ"ဧကရာဇ်"ယို အတုဲင်တရိုꩻတဝ်း၊ အစော့ꩻဆားတရိုꩻတဝ်း မီႏသွတ်ꩻကြူးအံႏခွိုꩻခွိုꩻလဲ့နဝ်ꩻ၊ ဒွိုႏအိုမ်းနေးလဲ့နဝ်ꩻ မီႏအံႏဖေႏခွိုꩻခွိုꩻနဝ်ꩻ သွီႏလွဉ်ဟဝ်၊ သွီႏလွဉ်မဲန်ႏယင်းဒျာႏသွူ။

အောင်ႏလျာပေႏနဝ်ꩻ အတုဲင်ဗွာ၊ အတုဲင်တသီး အဝ်ႏ ၂-မျိုꩻတဲင် ပထမကျောင်ꩻတန်တောင်ႏကီꩻ အပေါက်ꩻဖဲ့ꩻထင်ꩻ ကနွို့နဝ်မုခ်ဦးထျꩻတွို့ꩻနဝ်ꩻ အတုဲင်တသီးစား အဝ်ႏတမွူးသွူ။

• ၈။ လိုꩻမူႏအတာႏ တသီႏသွီႏလွေꩻမဲန်ႏနယ်ꩻ ထဲင်းတနယ်ꩻနဝ်ꩻ အေင်တသဉ်၊ ဖက်ꩻပိုမ်းကောင်၊ တောင်းလျက်ꩻထန်ꩻ ယို ၃-စွိုး ခြွူရော်ꩻတဝင်ꩻတွော့ꩻ ချင်းအွꩻဖေႏတနီꩻ ၂-၃လဲင်ႏနဝ်ꩻလဲ့ သွီႏတလွဉ်တဝ်း၊ သွီႏငုတ်၊ သွီႏတလို့တဝ်းဖုံႏနဝ်ꩻ ဟဝ်အီနွောင်ꩻသွူ။ ဖက်ꩻပိုမ်းကောင်မီႏအဲန်ထဝ်းနဝ်ꩻ ခြွူအွꩻငါ အေင်တွမ်ႏတောင်းလျက်ꩻထန်ꩻငါလဲ့ လꩻဒျာႏသွူ။ အေင်နဝ်ꩻ သွယ်ꩻနေးပဉ်ဗေင်ႏဗေင်ႏမꩻ ဟဝ်သွူ။
• ၉။ လိုꩻမူႏသီးတာႏ မီႏယတ်သွီႏမဲန်ႏနယ်ꩻ ထဲင်းတနယ်ꩻနဝ်ꩻ ပအိုဝ်ႏဟဲ့ꩻ"ပေန်နျာႏ"၊ မန်းဟဲ့ꩻ"ခုံညင်း"အခူꩻကို အယာႏဗွာယို ထောင်းဖွန်ႏသွူတွော့ꩻ သော့ꩻထီဆေ့ꩻဆေ့ꩻ ဒွိုႏယိုႏတွမ်ႏတောင်းလျက်ꩻထန်ꩻတွော့ꩻ ချင်းအံႏဖေႏ တနီꩻ ၂-၃လဲင်ႏနဝ်ꩻလဲ့ ဟဝ်နေနေသွူႏ "ခုံညင်းစေ့"ကတအဝ်ႏတဝ်းအရပ်နဝ်ꩻ ဖြေꩻပရဘသီႏဆဲင်ႏဝေင်ꩻကိုလဲ့ လꩻဒျာႏသွူ။ ဒွိုႏယိုႏကရိုꩻနဝ်ꩻ ဒွိုႏယိုႏထာꩻမုဲင်ꩻမုဲင်ꩻတယဝ်း မာꩻဝုဲင်ꩻဝုဲင်ꩻဗာႏမေႏ၊ ကွယ်ဖေႏဗာႏသေႏသေႏသွူ။
• ၁၀။ မီႏယတ်သွီႏငုတ် တသီႏနယ်ꩻ ထဲင်းတနယ်ꩻနဝ်ꩻ တမာႏဖေ့ꩻတမတ်၊ တောင်းလျက်ꩻထန်ꩻဖြေင်း တကျပ်ခွယ်ꩻယို သော့ꩻထီပလဲင်ꩻပေႏရပ်တွော့ꩻ ခြွူသေ့ꩻထိုꩻ တထာႏဝထွူ ချင်းအွꩻဖေႏ တနီꩻ ၂-လဲင်ႏနဝ်ꩻလဲ့ သွီႏပေါႏခွုန်ꩻယင်းဒျာႏနေနေသွူ။

၁၁။ လိုꩻမူႏသီးတာႏ မီႏယတ်သွီႏငုတ် တသီႏနယ်ꩻ ထဲင်းတနယ်ꩻနဝ်ꩻ ဖေါက်ꩻနောက်ꩻလာႏသဲင်တွမ်ႏ ပိတ်တချင်ꩻရာႏသဲင် ၂-မျိုꩻယို အယာႏခဉ်ႏတွာ ထောင်းညီꩻတဝင်ꩻတွော့ꩻ ချင်းအွꩻဖေႏတွမ်ႏထီလိုမ်ꩻနဝ်ꩻလဲ့ ပေါႏခွုန်ꩻချာနေနေသွူ။ မီႏထွာဖေါက်ꩻနောက်ꩻတသဉ်နဝ်ꩻ ထောင်းထွူအွဉ်ႏညလꩻတဝ်း၊ တအိုႏဒါႏတဲင် ချင်းထောင်းဗာႏ အံႏတနီꩻတာႏသွူ။

• ၁၂။ လိုꩻမူႏသီး ရာႏသီႏသွီႏ မီႏချုက်မီႏငုတ်နဝ်ꩻ ပစ်ပီရွီး၊ လေညင်ꩻတုဲင်၊ အေင်ဒီႏ၊ ဇာႏတိဖိုလ်ႏရာႏ၊ မေ့တရင်း၊ ဆေꩻပုလဲꩻဒီႏ၊ ဟန်ႏတဟိုဒီႏဖုံႏယို ခွိုင်းကအဝ်ႏ မုဲင်ꩻစွိုးစွိုးတရိုꩻတဝ်း ခြွူတွမ်ႏတောင်းလျက်ꩻထန်ꩻတွော့ꩻ ချင်းအွꩻဖေႏနဝ်ꩻ ဟဝ်ဒျာႏသွူ။