လိုꩻယွဲးငဝ်းအွဉ်ႏဟွုန်
"လိုꩻယွဲးသီး ပဏာမငေါဝ်းအွဉ်ႏဟွုန်"
ဝါႏသနာႏလိတ်လုဲင်ꩻသား ဗွေႏသီးတွမ်ႏ ဝါႏသနာႏဟော်ꩻထွားလိတ်သား ရက်ခွိုꩻဗွေႏသီးဩ၊ နီသွဉ်းသီး ရက်ခွိုꩻပအိုဝ်ႏပေႏလိုꩻယွဲးစွိုꩻ နီဒဲင်ခင်ႏကာ ကထေငါလွေꩻဖေႏဒါႏ "လိုꩻယွဲးအာႏရဲင်ꩻ"လိတ်စောင်ႏ အမုဲင်(၂)ယိုနောဝ်ꩻ ကွပ်စွဉ်ႏမေတ္တာႏစေႏတနာႏ မဲဉ်အွဉ်ႏသေ မဲဉ်အွဉ်ႏဒါႏ မဲဉ်အွဉ်ႏတိုꩻတက်ငါႏ စွိုးခွိုꩻတွမ်ႏလိုꩻမျိုꩻတဲင် အောဝ်ႏအွိုးအယပ်ꩻအခုဲင်ႏ အဖဲ့ꩻဖဲ့ꩻအခေါဝ်ခေါဝ်ကို ခံႏဒုက္ခ ခံႏပင်ႏပန်ꩻတဲင် စုရွမ်ထွုမ်ႏကျံႏ တွူႏတရန် ထွတ်ထေထန်ႏလွဉ်ဖေႏဗာႏ လိတ်စောင်ႏနုဲင်းယိုသွူ။
နီသွဉ်းသီးမေတ္တာႏ သꩻစေႏတနာႏ ကရေꩻခါꩻဒါႏအတွိုင်ꩻ ဝါႏသနာႏလိတ်လုဲင်ꩻဗွေႏသီးတွမ်ႏ ပရိသတ်ထွားလိတ်သားသီး ယံဖေႏအကျိုꩻကထွာ၊ ဖေႏနေးအလိုႏဆန္ဒကဗွေလꩻအီရိုꩻကီလဲ့ ဗွေႏသီးထာꩻလိုႏ မဉ်ႏတတွိုႏမဲဉ်ႏသꩻတောဝ်းနောဝ်ꩻ "မတ်နုဲင်းပိုခို သꩻအောင်ခါႏ၊ ထီႏနုဲင်းပိုယာႏ သꩻရာႏမောင်ꩻတဲင်" အွဉ်ႏစွꩻခွင်ꩻဖေႏသွော့ နီသွဉ်းသီး လိုꩻယွဲးစွိုꩻယိုအကျောင်ꩻ-
နီသွဉ်းသီး ရက်ခွိုꩻပအိုဝ်ႏပေႏ လိုꩻယွဲးစွိုꩻယို အဟွုန်အထီႏ ဗဟုသုတ တလꩻဗွေတောဝ်းဝန်ႏ၊ ထာꩻဒါႏဉာဏ်ႏပညာႏ တခုဲင်ႏဗွေတောဝ်းဖွိုင်ꩻတဲင် ငေါဝ်းရွိုင်ꩻမဉ်ႏပါသော့ꩻ ငွါဆွော့ꩻမဉ်ႏပါငါ၊ အမာႏမဉ်ႏပါရော်ꩻကရိုꩻလဲ့ ကထွာဖူးဝေးမွိုးဖါ သွꩻရက်အာသီးဖုံႏ ထီႏမွုန်းအပဲစ်တဲင် ဖေႏအာႏ၊ နေးတွမ်ႏမေတ္တာႏတွော့ꩻ အွဉ်ႏစွꩻခွင်ꩻဖေႏသွော့အကျောင်ꩻ ရီးသွတ်ꩻအစ ပဏာမအတာႏ အွဉ်ႏဟွုန်လွေꩻရီးဗာႏနုဲင်းနောဝ်ꩻသွူ။
ဟန်ႏနေင်ႏ ၁၃၅၇ (၁၉၉၆)ဗာႏအတွက် နီသွဉ်းသီး ရက်ခွိုꩻပအိုဝ်ႏပေႏလိုꩻယွဲးစွိုꩻ ကစီႏစဲဉ်ႏစုရွမ် ထွတ်ထေဖႏဒါႏ "လိုꩻယွဲးအာႏရဲင်ꩻ"အမုဲင်(၂)လိတ်စောင်ႏယို အောင်ႏအောင်ႏမျင်ႏမျင်ႏ ကထန်ႏလွဉ်ဗာႏနုဲင်းယိုနောဝ်ꩻ ကွပ်စွဉ်ႏခံႏထူႏလွေꩻ ဆရာႏ(လိုꩻတန်)သီးအဆုံꩻအမꩻ၊ အုံကွူႏလွေꩻ ဖူးဝေးမွိုးဖါသီး အဟေ့ꩻခွꩻ၊ ခံႏထူႏလွေꩻ ရုဲင်းဖက်စွိုးခွိုꩻ သွꩻရက်စွိုꩻသီး အကူႏအညီႏတဲင် လိတ်စောင်ႏထန်ႏလွဉ်ဗာႏနုဲင်းယိုသွူ။
နေးတွမ်ႏသꩻရက်ခွိုꩻတဲင် ကဖေႏအာႏစွဲးကိုဒါႏ နုဲင်းယိုနဝ်ꩻ ကထွာနီသွဉ်းသီး ပအိုဝ်ႏပေႏလိုꩻယွဲးစွိုꩻယို သꩻကိုစွုမ်းသွိုꩻ အာႏကွိုꩻနစ်သက် အာႏတက်ခရာႏ ကေꩻဇူꩻတင်ႏငါႏအကျောင်ꩻ-နေးတွမ်ႏကတဝေဒီ မင်္ဂလာႏ လောဝ်းဟွုန်နယ်ချာဗာႏနုဲင်းယိုသွူ။
မဉ်ႏတွိုႏယင်း နေင်ႏလေနေင်ႏငါသူꩻတဲ့ နေးတွမ်ႏစေႏတနာႏဗွာဗွာ သꩻရက်ခွိုꩻအာအာတဲင် တလာကိုထပ် ဖေႏအာႏကူႏညီႏ စွဲးကိုထဲင်းမပ်မပ်သွော့ဝင်ꩻအကျောင်ꩻ နီသွဉ်းသီးလိုꩻယွဲးစွိုꩻ အာႏကွိုꩻအုံနောင် လောဝ်းဟွုန်ဖြောင်သေꩻဗာႏယင်း နုဲင်းနောဝ်ꩻသွူ။