လိုꩻယွဲးတွမ်ႏစီꩻပွါꩻရေꩻ
"လိုꩻယွဲးတွမ်ႏစီꩻပွါꩻရေꩻ" စီꩻပွါꩻရေꩻကရိုꩻနဝ်ꩻ သဘာဝအနေႏ ဗိုန်ပီဒျာႏ တွမ်ႏအထင်ႏထို(တိုꩻတက်)၊ အပြွူႏဖြိုလွိုင်ႏကွုန်ꩻ၊ အအောင်ႏမျင်ႏ-နုဲင်းနဝ်ꩻဖုံႏသွူ၊ လိုꩻကရိုꩻယိုနဝ်ꩻ ကတူႏမိုးထင်ႏမို့ꩻ အဝ်ႏမဉ်ဆို့ꩻလွ အောင်ႏမျင်ႏမုꩻတံꩻခွဉ်ႏထွန်ႏလွဉ်းလွဉ်း၊ ကွပ်နဝ်ꩻမꩻ ဖေႏကစီꩻပွါꩻတိုꩻတက်ယိုနဝ်ꩻ ထွာဒျာႏလိုꩻသီးဂုဏ်ႏအထီအသွီႏတန်ရင်ꩻသွူ။ မန်းနဲင်ႏငံႏအကို လိုꩻတွိုင်ꩻသီး ကအီႏမာꩻဒါႏ ယံဖေႏနေးကစီꩻပွါꩻထင်ႏထိုအီတာႏနဝ်ꩻ အခွင်ꩻအရေꩻတသွုန်သွုန် အဝ်ႏလွဒျာႏပငါပရာꩻဖုံႏ၊ တနယ်ꩻမဉ်ႏဒေါ့ꩻဗာႏလဲ့ တသက်လိုမ်းမꩻ ပေါႏကွို့ꩻတလဲင်ႏအခွင်ꩻအရေꩻဟဝ်ယို ဖေႏနေးကလွစ်ထိုꩻမွုန်းစူနဝ်ꩻ အရေꩻတန်မွေးငါႏနဝ်ꩻသွူ။ လိုꩻယွဲးဘဝနဝ်ꩻ ထွာအာႏရဲင်ꩻဗွေခိန်ႏ၊ ဘဝအတာႏ ထာꩻအင်းမိုးချက်မွူးရောင်ႏတောင်ႏစခိန်ႏ၊ ရေႏမိုးဘဝကဝ်ႏထွန်ႏထျꩻတဲင် ထွာအဝ်ႏထူႏအာႏခိန်ႏတွင်ꩻသွူ၊ အဝ်ႏထူႏအာႏကျာꩻယို ရဲဉ်ꩻသေꩻခါꩻဟဝ်ဟဝ်မꩻ ခင်ႏကာလဲ့အီႏစွို့ꩻ၊ အောင်ႏမျင်ႏမုꩻလဲ့ အီႏတရေꩻနဝ်ꩻသွူ။ ကွပ်နဝ်ꩻမꩻ လိုꩻယွဲးဘဝအတွင်ꩻ အထျꩻအွဉ်ႏ တွမ်ႏဉာဏ်ႏအထီအသွီႏ၊ နမ်းစိုန်ꩻအာႏတွမ်ႏ ထာꩻဝါႏသနာႏ၊ သꩻကဝင်ႏစာꩻထာꩻရာꩻအလောင်းထွူတဲင် အဝ်ႏလိုႏတဲႏဆို့ꩻလွငါႏ ဘဝအင်းမိုးချက်နဝ်ꩻသွူ၊ ဖေႏနေးကစီꩻပွါꩻယံကချမ်ꩻသာႏရိုꩻနဝ်ꩻတဲင် လိုꩻကစီꩻပွါꩻသားတွိုင်ꩻနဝ်ꩻ ချမ်ꩻသာႏလွငါႏ-မဲ့ꩻ အီႏယူႏဗာႏနုဲင်းနဝ်ꩻသွူ။ ကရိုꩻဒါႏ "ချမ်ꩻသာႏ"နဝ်ꩻအကိုနဝ်ꩻ သုံꩻဖခေါ်နေးလို့ဝင်ꩻ "သꩻချမ်ꩻသာႏ၊ နမ်းချမ်ꩻသာႏ"နုဲင်းနဝ်ꩻလဲ့ အဝ်ႏလိုႏအွဉ်ႏသတိꩻပါငါႏ၊ ကွပ်နဝ်ꩻမꩻ အစီꩻပွါꩻ(လွိုင်ႏကွုန်ꩻ)၊ အချမ်ꩻသာႏ၊ အအောင်ႏမျင်ႏ-ယို ထွာဒျာႏလိုꩻယွဲးသီး အနာႏဂတ်ကဝ်ႏထွန်ႏတန်သွူ၊ ကဝ်ႏထွန်ႏနဝ်ꩻနဝ်ꩻ ဖေႏနေးကထွာဗာႏမွုန်း ထာꩻယူႏစိက္ကူꩻကဝ်ႏထွန်ႏလွုမ်ꩻတွော့ꩻ တာႏဝွန်ႏကအဝ်ႏလိုႏလွူးခါꩻ အစိုန်ꩻသတ္တိ ဂုဏ်ႏအင်္ဂါႏဖုံႏ ဖေႏနေးကပြွူႏဖြိုလွဉ်နဝ်ꩻ ထွာဒျာႏလိုꩻယွဲးတွိုင်ꩻသီးတာႏဝွန်ႏဒျာႏရင်ꩻသွူ။ သက်ရွယ်ႏမဉ်ႏထာႏဝခိန်ႏသူꩻ အီႏစီꩻပွာꩻအောင်ႏမျင်ႏဗာႏအမန်ႏသွူ၊ သꩻပညာႏအကိုနဝ်ꩻ အင်းမိုးချက်အရန်း-ကရိုꩻဒါႏ ထာꩻယူႏထာꩻတွေꩻ အဝ်ႏတဗာႏသွူ၊ နမ်းတွမ်ႏနမ်း အာႏကလꩻဒါႏကဝ်ႏထွန်ႏနဝ်ꩻ ထွာအင်းမိုးချက်နဝ်ꩻရင်ꩻသွူ၊ လောကအကို ထာꩻအောင်ႏမျင်ႏတွမ်ႏ ထာꩻထဲ့သွုမ်ꩻသီးနဝ်ꩻ အဝ်ႏစပ်ဆွိုင်ꩻဒျာႏ တွမ်ႏထာꩻအင်းမိုးအလောင်းနဝ်ꩻသွူ၊ ကလꩻဗာႏအောင်ႏမျင်ႏမုꩻနဝ်ꩻ အောင်ႏမျင်ႏရေꩻတဖူꩻအကို တရန်းထွူတရန်း ယံကခီႏထင်ႏနွောင်ꩻ တမာနွောင်ꩻအစိုန်ꩻအာႏအဝ်ႏမꩻကရိုꩻနဝ်ꩻ ထီႏဗာႏနုဲင်းနဝ်ꩻသွူ။ လိုꩻယွဲးဘဝတွင်ꩻယို အင်းမိုးချက်ကဝ်ႏထွန်ႏ အဝ်ႏလိုႏအဝ်ႏစဲင်းစဲင်းသေꩻခါꩻငါႏ၊ အထူꩻတဗာႏ လိုꩻဘဝအခွဲးအကျုံႏကနပ်လဲဉ်းသား၊ လိုꩻကဝါႏသနာႏ လွူꩻထွားဟော်ꩻလိတ်လုဲင်ꩻသား၊ လိုꩻထူႏဒါႏအသောင်အရင်ꩻ ဘဝသွဉ်ခန်ꩻသား လိုꩻယွဲးနုဲင်းနဝ်ꩻဖုံႏနဝ်ꩻ သꩻအာႏရုံႏအကို အဝ်ႏလိုႏထီႏစဲင်းစဲင်းသေꩻခါꩻကရီးငါႏ ဘဝကဝ်ႏထွန်ႏနဝ်ꩻသွူ။ လိုꩻယွဲးဘဝအတွင်ꩻယို အဝ်ႏလိုႏအွဉ်ႏခါꩻငါႏ အင်းမိုးချက်တန်တန်အာအာစား၊ ဖေႏနေးကစီꩻပွါꩻထင်ႏထိုအီ ကံႏဉာဏ်ႏဝီရိယဖုံႏနဝ်ꩻ အကျိုꩻဖေႏလွဉ်ꩻတတွာတွာလို့ဝင်ꩻသွူ၊ ကံႏ-ကရိုꩻနဝ်ꩻ အတိတ်ကံႏ ပစ္စုပ္ပန်ႏကံႏ အဝ်ႏနီမျိုꩻနုဲင်းနဝ်ꩻတဲင် အတိတ်ကံႏနဝ်ꩻ ထွာယီးနယ်ချာဖေႏ အွိုးတခိန်ႏတွင်ꩻ ကမာꩻလင်ꩻခါꩻဗာႏ ထာꩻမာꩻသီးအကျိုꩻတွိုႏခြောင်ꩻမုꩻနဝ်ꩻသွူ။ ပစ္စုပ္ပန်ႏကံႏ-ကရိုꩻနဝ်ꩻ ယိုခါဘဝ ကအဝ်ႏမာꩻဒါႏထာꩻမာꩻနဝ်ꩻသွူ၊ ကံႏ-ကရိုꩻဒါႏငဝ်းငွါ ဝေါဟာရယိုနဝ်ꩻ အဝ်ႏပါဠိငဝ်း "ကမ္မ"ပြောင်ꩻလွဉ်ဒျာႏတဲင် "ထာꩻမာꩻ"အဓိပ္ပါယ်ႏ လꩻနုဲင်းနဝ်ꩻသွူ၊ ကွပ်နဝ်ꩻမꩻ ကံႏမဉ်ႏမဉ်ဟဝ်ထာꩻတဲ့ ထာꩻမာꩻအဝ်ႏလိုႏဟဝ်၊ "ထာꩻမာꩻ"ကရိုꩻနဝ်ꩻလဲ့ သꩻထာꩻမာꩻ-မနော်ꩻကံႏ၊ ဖြောင်းထာꩻမာꩻ-ဝစီကံႏ၊ နမ်းထာာꩻမာꩻ-ကာယကံႏ အဝ်ႏယင်းသိုမ်မျိုꩻနုဲင်းနဝ်ꩻသွူ။ သꩻထာꩻမာꩻကရိုꩻနဝ်ꩻ ထာꩻယူႏထာꩻကျမ်ႏဟဝ်၊ ထွာဒျာႏ မာꩻဒုက္ခတဝ်းဝင်ꩻတဲင် ကျမ်ႏစဲႏယူႏ ရေႏမိုးထေ့ဒျာႏ နမ်းဖေႏကတိုꩻတက်စီꩻပွါꩻရာꩻနုဲင်းနဝ်ꩻဒျာႏ၊ ကမဲဉ်စီꩻပွါꩻဒါႏထာꩻလိုꩻယွဲးတွိုင်ꩻသီးနဝ်ꩻ သꩻမဲဉ်စီꩻပွါꩻ၊ သꩻမဲဉ်ထင်ႏထို၊ သꩻမဲဉ်တရုဲင်ထင်ဖုံႏယို ဖွီဖွီသွောင်သွောင် တလျူလျူအဝ်ႏဗာႏမꩻလꩻသွူ၊ "တနီꩻခါ ခွေယို ဖေႏကထွာလွဉ်ဗာႏလိုꩻတရုဲင်ထင်" သꩻဓာတ်ယွုမ်းအံႏချာနမ်းနုဲင်းနဝ်ꩻလဲ့ အဗွေတဗာႏ အဝ်ႏလိုႏအဝ်ႏခါꩻသွူ။ ဝစီကာႏ-ဖြောင်းထာꩻမာꩻကရိုꩻနဝ်ꩻ "ငဝ်းအွီႏ-သျိုႏတမျိုꩻ"ကရိုꩻဒါႏငဝ်းနဝ်ꩻအတွိုင်ꩻ ဖေႏနေးကထွာဒျာႏ ငဝ်းအွီႏငွါသာႏ၊ ငဝ်းဝင်ꩻကဖုဲင်ႏနာႏစားနဝ်ꩻ အဝ်ႏလိုႏကံကျင်ꩻခါꩻ၊ အဝ်ႏလိုႏဒေါ့ꩻဒျာႏ ငဝ်းကမဲဉ်ႏသော့ꩻ တွမ်ႏအင်္ဂါႏလစ်ꩻပါꩻစားငါ၊ နဝ်ꩻလစ်ꩻပါꩻကရိုꩻနဝ်ꩻ- (က) ဒေါ့ꩻဒျာႏဟဝ်ဟဝ်ဒါႏဒါႏ (ခ) ရက်စိုမ်ꩻခရာႏနိစ်သက်ခရာႏအဝ်ႏ (ဂ) မွေးမဲဉ်ႏစွို့ꩻစွဉ်ႏဗာႏ (ဃ) ထဲ့မဲဉ်ႏသော့ꩻသဘာဝတဲင် ထွာလွောက်ꩻနာႏနွောင်ꩻခရာႏအဝ်ႏ။ ကာယကံႏ-နမ်းထာꩻမာꩻကရိုꩻနဝ်ꩻ အလုဲင်းပြꩻမွေးစွဉ်ႏ၊ အဝ်ႏလိုႏမာꩻဒျာႏ ထာꩻမာꩻ ဖေႏကသျုက်တရေင်မွုန်းဝင်ꩻ၊ ဖေႏကယားကုဲင်ဗာႏမွုန်းဝင်ꩻ၊ ဖေႏကထန်ႏခတ်ꩻမွုန်းဝင်ꩻစားနဝ်ꩻငါ၊ ပွိုင်းဝွို့တွမ်ႏကာယကံႏထာꩻမာꩻနုဲင်းယိုနဝ်ꩻ ဒေးကာနဲစ်စီ(တဲမ်း) "အနယ်ꩻဖေႏကပါလွဉ်နာꩻဖဲ့ꩻ"(ကိုနဝ်ꩻ) ကမဉ်စီꩻပွာꩻတိုꩻတက်လွဒါႏ လိုꩻယွဲးတွိုင်ꩻ အဝ်ႏလိုႏလွောက်ꩻနာႏ၊ အဝ်ႏလိုႏကံကျင်ꩻလွဝင်ꩻနဝ်ꩻသွူ။ (၁) ကမာꩻဒါႏ ဖေႏတဖဲ့ꩻသား ကပါလွဉ်နီဖဲ့ꩻတွင်ꩻနဝ်ꩻ သျောင်ႏသွော့ ထာꩻတနွိုင်(ထာꩻထေင်)၊ (၂) လိုꩻတဖြာꩻယို မုဲင်ꩻခါခါခန်းတဲ့ယဝ်း တွမ်ႏဒေါ့ꩻမွုန်းတဝ်း(ဝွေꩻ)အမာႏ၊ (၃) နာꩻမဉ်ႏမာꩻဗာႏစိန်ႏစွော့ꩻလဲ့ ထွူႏထွူႏတွုမ်တွုမ် ဝွန်ႏခံႏမွိုင်မွိုင်ချာသွော့၊ (၄) တဲႏရီးဒျာႏသွော့ တွမ်ႏအွီႏအွီႏသာႏသာႏ၊ (၅) တဖဲ့ꩻသားဖေႏက"အွူ"စွဉ်ႏနဝ်ꩻ ကျိုꩻစာꩻမွိုင်မွိုင်သွော့၊ (၆) တဖဲ့ꩻသားကမဉ်ဒေါ့ꩻယို ဖေႏဒေါ့ꩻကွို့ꩻကွို့ꩻသွော့၊ (၇) "ထာꩻကျမ်ႏစဲႏနဝ်ꩻနဝ်ꩻ ထွာဝွေꩻထာꩻကျမ်ႏစဲႏ"ဖေႏတဖဲ့ꩻသား ကထင်းစွဉ်ႏနုဲင်းနဝ်ꩻ၊ (၈) ဖေႏနေးကအွဉ်ႏနွောင်ꩻ သꩻစေႏတနာႏဟဝ် အုံအွိုးသူꩻသားဖဲ့ꩻစဉ်ꩻစာꩻဒါႏကျင်ꩻစား၊ (၉) ဖေႏနေးကစာႏနာႏဒါႏ တဖဲ့ꩻသားသꩻအွဉ်ႏသဘော်ꩻတွမ်ႏဆန္ဒနဝ်ꩻ ကျိုꩻစာꩻသွော့၊ (၁၀) တဖဲ့ꩻသား ဝွေꩻနမ်းတွမ်ႏဝွေꩻနမ်း ဖေႏနေးသꩻဓာတ်ကထင်းတန်ချာနဝ်ꩻ ပင်ႏထိုဖေႏသွော့၊ (၁၁) နေးတွမ်ႏနာꩻထာꩻကျမ်ႏစဲႏဖုံႏတဲင် ဖေႏနေးကထွို့ꩻငင်ႏနွောင်ꩻ တဖဲ့ꩻသားသီးသꩻအာႏရုံႏနဝ်ꩻ မွဉ်းဖျင်ခါꩻသွော့၊ (၁၂) တဆွာႏဖေႏသွော့ ဝွေꩻသီးသꩻတမဲဉ်ခံႏတဝ်း-နုဲင်းနဝ်ꩻဖုံႏသွူ။ လိုꩻကမဲဉ်စီꩻပွါꩻသားဖုံႏနဝ်ꩻ မာꩻနယ်ဗာႏ ကံႏဖေႏကဟဝ်' ထာꩻမာꩻဖေႏကဟဝ်လွုမ်ꩻတကာႏတဝ်း ဉာဏ်ႏတွမ်ႏဝီရိယဖုံႏလဲ့ သုံꩻတတွာတွာဗာႏလို့ဝင်ꩻသွူ၊ လိုꩻယွဲးတွိုင်ꩻဖုံႏယို ခွုင်းအခိန်ႏကအဝ်ႏ သောင်ႏသာဝင်ꩻတဲင် နမ်းဉာဏ်ႏအထီအသွီႏ ဖေႏနေးကထင်ႏထိုအီနဝ်ꩻ ခွုင်းစိုန်ꩻအာႏကအဝ်ႏ အဝ်ႏလိုႏကျိုꩻစာꩻလွငါႏနဝ်ꩻသွူ။ "ထာꩻမာꩻ"ကရိုꩻဒါႏ ကံႏ၊ "ထာꩻသေထာꩻလိမ္မာႏ ပညာႏလဲ့ဗွေ"ကရိုꩻဒါႏ ဉာဏ်ႏလွုမ်ꩻတကာႏ၊ သောင်ႏသာကျိုꩻစာꩻ-ကရိုꩻဒါႏ ဝီရိယနဝ်ꩻလဲ့ ယံကစီꩻပွါꩻထင်ႏထိုအီတာႏ ထွာအဝ်ႏတဝ်းတလꩻတဝ်း အချက်တန်နဝ်ꩻသွူ။[၁][၂]