လိုꩻယွဲးတွမ်ႏနဲင်ႏငံႏရေꩻ
"လိုꩻယွဲးတွမ်ႏနဲင်ႏငံႏရေꩻ" လိုꩻသီးအသက်ခြွဉ်းအလꩻ လိုꩻပေႏလိုꩻယွဲး၊ လိုꩻတလောင်ꩻ၊ လိုꩻတန်-ရိုꩻနဝ်ꩻတဲင် အွဉ်ႏထွော့ခန်ꩻခါꩻ အရွယ်ႏသိုမ်ပါꩻနုဲင်းနဝ်ꩻ၊ သက်(၂၇)မာꩻလ သက်(၁၆)မာꩻကီအရွယ်ႏဖုံႏနဝ်ꩻ သာမညအနေႏ တောင်ꩻခါꩻလွ လိုꩻပေႏလိုꩻယွဲး၊ လိုꩻပေႏလိုꩻယွဲးသီးနဝ်ꩻ သꩻရင်ꩻဟဝ်လွဒျာႏ၊ ခံႏနွောင်ꩻလွ အပင်ႏပန်ꩻ၊ ထာꩻထီႏမဲဉ်ႏအဝ်ႏလွဒျာႏ၊ တလျူသွောင်ဖွီတဲင် သꩻမဉ်မာꩻဗွုန်ႏရုဲင်းလွဝင်ꩻဖုံႏနဝ်ꩻသွူ။ ဒေါ့ꩻမဲဉ်ႏဒါႏလွငဝ်း၊ တဲႏထွင်ႏတသာဒါႏလွထာꩻ၊ ထိုမ်ႏလွဒျာႏ လွူးသက်အနယ်ꩻမဲဉ်ႏ၊ ကျိုꩻစာꩻဟဝ်ဟဝ်ဒါႏဒါႏလွဝင်ꩻ၊ ကြောင်းစင်ဗွာလွဒျာႏ၊ သတိဝီရိယအဝ်ႏလွဒျာႏ၊ ကျိုꩻစာꩻရိုꩻသာꩻလွဒျာႏ၊ လိုꩻပေႏလိုꩻယွဲးကိုနဝ်ꩻ ကအဝ်ႏပါသော့ꩻလဲဉ်းဒါႏ ထေကွန်ႏစိုန်ꩻအာႏကိုသား လိုꩻယွဲးထာꩻမာꩻသားဖုံႏ၊ လိုꩻယွဲးလုပ်ꩻလုဲင်းသားဖုံႏ၊ လိုꩻယွဲးကအဝ်ႏသွဉ်နေးကပညာႏ ကျောင်ꩻသားဖုံႏ၊ ကွပ်အကျောင်ꩻအစွိုးစွိုးတဲင် လိုꩻယွဲးတလꩻတဝ်းဒွိုန်း ထာꩻမာꩻသားဖုံႏ၊ လိုꩻယွဲးတမာꩻတဝ်းထာꩻမာꩻသားဖုံႏ၊ ဘဝအုံတဲင်ရေꩻတာႏ ခွုင်းကထွာခွုင်းကကျုံႏ လိုꩻယွဲးအဝ်ႏလွူးအီအနမ်းဖုံႏ-စတဲင် လိုꩻအဆင်းအရန်းစွုမ်ႏ အဝ်ႏပါသော့ꩻလို့နဝ်ꩻသွူ။ လိုꩻသီးအဆင်းအရန်း ကွာႏခေါ်စွဉ်ႏနုဲင်းမုဲင်ꩻမုဲင်ꩻတဲ့ယဝ်း လိုꩻပေႏလိုꩻယွဲးသီး အသꩻဓာတ်ဖုံႏနဝ်ꩻ ဗိုန်ဗိုန်ဒျာႏလို့ဝင်ꩻ၊ အဝ်ႏပဲင်ႏသေꩻခါꩻလွဒျာႏ အာႏမန်ႏခေါ်စား ပငါပရာꩻ၊ အခေႏနေႏဖေႏတဲင် ထေနွောင်ꩻလွစိုန်ꩻအာႏသားလဲ့ အဝ်ႏဒျာႏ၊ အခေႏနေႏတဖေႏတဝ်းတဲင် တထေနွောင်ꩻတဝ်းစိုန်ꩻအာႏသားလဲ့ အဝ်ႏလွဒျာႏနဝ်ꩻသွူ။ နုဲင်းမုဲင်ꩻမုဲင်ꩻခန်းတဲ့ယဝ်း လိုꩻပေႏလိုꩻယွဲးနဝ်ꩻ လိုꩻယွဲးသီးသဘာဝ တောင်ႏခတဆဝ်လွဒျာႏရင်ꩻရင်ꩻသွူ၊ "လိုꩻတန်"ကရိုꩻနဝ်ꩻ အခွဲးအကျုံႏအလꩻ ထီႏပိုန်းလွိုနွောင်ꩻထဲင်းလိုꩻပေႏလိုꩻယွဲးကရိုꩻလဲ့ ခေတ်ကာႏလသီး ကတိုꩻတက်လွဉ်ဒါႏ အခေႏအနေႏဖုံႏအလꩻ လိုꩻယွဲးခေတ်ဟန်ႏနီꩻ ယင်ဟန်ႏသားနဝ်ꩻ ခွုမ်မာꩻစိုန်ꩻထီ အဝ်ႏအာကယ်ꩻလဲဉ်းဒျာႏလိုꩻတန် ထီႏဗာႏနုဲင်းနဝ်ꩻသွူ။ ကွပ်နဝ်ꩻမꩻ နီလိုꩻတန်ဖုံႏ ဖန်ဆင်ꩻဖေႏဗာႏ လိုꩻပေႏအခေႏအနေႏ' အခွင်ꩻအရေꩻဟဝ်၊ အွဉ်ႏရေꩻထွူႏတွုမ်ဖေႏဗာႏ၊ လိုꩻပေႏယွဲးကရိုꩻနဝ်ꩻ သꩻအာႏတက်အဝ်ႏတလာလီꩻထွူလဲဉ်း၊ သꩻမဉ်ထိုမ်ႏစမ်ꩻထာꩻအဝ်ႏ၊ မဉ်လꩻဝင်ꩻလိုꩻအာသီး ထာꩻအွဉ်ႏရေꩻ၊ သꩻဆန္ဒမဉ်စွဉ်ꩻနမ်းကျိုꩻအဝ်ႏ၊ နမ်းအာႏဉာဏ်ႏအာႏ အဝ်ႏဗွေ-စတဲင်နုဲင်းနဝ်ꩻဖုံႏနဝ်ꩻ တဗိုန်တဝ်းတွမ်ႏလိုꩻတန်သီး ထွာအဆန်ꩻလွိုဒါႏအချက်ဖုံႏနဝ်ꩻသွူ။ ဗိုန်ပီနုဲင်းနဝ်ꩻအတွိုင်ꩻ သꩻထာꩻစိက္ကူꩻအဝ်ႏ၊ ခံႏစာꩻဒါႏ၊ မဉ်အုံပျောႏပျောႏတခြင်ခြင်ဒျာႏထာꩻ-စတဲင် ယေဘုယျယင်းလိုႏချက်ဖုံႏနုဲင်းနဝ်ꩻ အဝ်ႏလွဒျာႏပငါပရာꩻ၊ ၂၀၁၄-ဗာႏ(သန်းခေါင်စာႏရင်ꩻ)အလꩻ နပ်လိုꩻအဖြာꩻ တထာႏဝလွိုလွိုနဝ်ꩻ ထွာဒျာႏလိုꩻယွဲးသက်(၂၇)မာꩻလ-ရိုꩻခါꩻနုဲင်းနဝ်ꩻ၊ စာႏရင်ꩻနဝ်ꩻအလꩻ မန်းနဲင်ႏငံႏအကို လိုꩻပေႏလိုꩻယွဲး အဝ်ႏသန်းပေါင်ꩻ(၂၀)လွိုတဲင် ကအဝ်ႏကုဲင်ဒါႏ နပ်လိုꩻအဖြာꩻ တထာႏဝလွိုလွိုနဝ်ꩻ ထွာဒျာႏ လိုꩻပေႏဆားတွမ်ႏ လိုꩻတန်လိုꩻဖြားအရွယ်ႏဖုံႏဒျာႏနဝ်ꩻမꩻ လိုꩻပေႏလိုꩻယွဲးသီးအာႏရင်ꩻယို ထွာအထျꩻကရိုꩻနဝ်ꩻ ထီႏဗာႏနုဲင်းနဝ်ꩻသွူ။ လိုꩻပေႏလိုꩻယွဲးနဝ်ꩻဖုံႏအကို ပေါႏလွိုတဲင် လိုꩻယွဲးလိုꩻပေႏ ကအဝ်ႏသွဉ်နေပညာႏသားတွမ်ႏ လိုꩻပေႏလိုꩻယွဲး ကအဝ်ႏမာꩻထာꩻမာꩻနဲင်ႏငံႏကိုသား ကအဝ်ႏကုဲင်ဒါႏ လိုꩻပေႏလိုꩻယွဲး အသန်းပေါင်ꩻနေးယို အလဲဉ်းလွေꩻထိုꩻမုဲင်ꩻကရိုꩻနဝ်ꩻ ဟဝ်လွူꩻထွားလွငါႏနဝ်ꩻသွူ။ လိုꩻပေႏလိုꩻပွဲး ကတွိုႏလွေꩻဒါႏ ဝင်ꩻခမ်းဖုံႏ၊ လိုꩻပေႏလိုꩻယွဲး ထာꩻမာꩻတဉ်ႏခွေါင်တအဲဉ်ထဝ်းသားဖုံႏ၊ လိုꩻပေႏလိုꩻယွဲး ကအဝ်ႏလွင်ꩻဒျာႏထာꩻဖုံႏ၊ လိုꩻပေႏလိုꩻယွဲး တလဲဉ်းသော့ꩻဒါႏ တဖူꩻမာႏကိုသားဖုံႏ ရအဝ်ႏအာတန်ဒျာႏသွူ။ လိုꩻပေႏလိုꩻယွဲးနဝ်ꩻ ထွာဒျာႏအဗွာစင်စားတန်ဒျာႏ၊ လိုꩻပေႏလိုꩻယွဲး တဖူꩻကမာႏသားယို ဖေႏနေးအတဖူꩻကမဲဉ်ႏချာနဝ်ꩻ နေးသꩻဆွာꩻဆွာꩻ အဝ်ႏလိုႏခွုမ်မာꩻလွေꩻဖေႏငါႏ၊ မဉ်ႏပဲင်ႏဆဲင်ႏသေꩻခါꩻ အာႏရဲင်ꩻသန်လိုꩻပေႏလိုꩻယွဲးသီး အစိုန်ꩻအာႏဖုံႏနဝ်ꩻ အနာႏဂတ်သူꩻ ယီးလေတဆဝ်အီသွူ၊ ကွပ်နဝ်ꩻမꩻ အဆင်းအရန်းမုဲင်ꩻကိုတဲ့ယဝ်း တာႏဝွန်ႏကအဝ်ႏလိုႏထိန်ꩻသိမ်ꩻဟဟဝ်ဒါႏ လိုꩻပေႏလိုꩻယွဲးသီး ကပဲင်ႏဆဲင်ႏသေꩻခါꩻဒါႏ စိုန်ꩻအာႏတလာဗိုန်ဝင်ꩻဖုံႏ ထွာဒျာႏလိုꩻသီးတာႏဝွန်ႏဒျာႏရင်ꩻနဝ်ꩻသွူ။ နဲင်ႏငံႏကရိုꩻနဝ်ꩻ ထွာဒျာႏ ဟံႏနယ်ႏအကွို့ꩻအခဝ် ကအဝ်ႏဒါႏ ခွန်တဖြာꩻလွုမ်ꩻ (မွေးတဝ်းလဲ့) အစိုႏရတစွိုꩻသီး အုပ်ချုပ်မုꩻစူဆꩻယိုသွူ၊ နဲင်ႏငံႏရေꩻကရိုꩻနဝ်ꩻ ကပွိုင်းဝွို့ဒျာႏ တွမ်ႏနဲင်ႏငံႏအရေꩻကိစ္စဖုံႏ၊ အမျိုꩻသာႏအွဉ်ငါ ဗိုလ်ချုပ်အောင်ဆန်း ကဗွောင်သေꩻခါꩻဒါႏ နဲင်ႏငံႏရေꩻအဓိပ္ပါယ်ႏနဝ်ꩻ- "နဲင်ႏငံႏရေꩻ-ကရိုꩻနဝ်ꩻ ထွာဒျာႏထာꩻမာꩻ ကလိုႏခွုမ်မာꩻရိုꩻရိုꩻသာꩻသာꩻ စွို့ꩻစွို့ꩻစွဉ်ႏစွဉ်ႏနုဲင်းနဝ်ꩻဒျာႏ-အကျောင်ꩻ၊ ထွာဒျာႏထာꩻမာꩻ ကလိုႏခွုမ်မာꩻကြောင်းကြောင်းစင်စင်နုဲင်းနဝ်ꩻဒျာႏအကျောင်ꩻ၊ ခမ်းသားလိုꩻအာ စီꩻပွါꩻယံဖေႏကဟဝ် ခွုမ်မာꩻဗာႏနုဲင်းနဝ်ꩻအကျောင်ꩻ၊ ကလိုႏမာꩻဖေႏဒါႏ ခမ်းထီအကို ခမ်းသားလိုꩻသီးဖုံႏ အံႏအွꩻအုံအဝ်ႏရေꩻ၊ ပညာႏရေꩻ၊ စီꩻပွါꩻရေꩻစတဲင်အရေꩻဖုံႏယို ကခွုမ်မာꩻဖေႏနဝ်ꩻ နဲင်ႏငံႏရေꩻသွူသနယ်"ဒေါ့ꩻခါꩻနုဲင်းနဝ်ꩻသွူ။ နဲင်ႏငံႏရေꩻသားတွိုင်ꩻ အဝ်ႏလွူꩻဗာႏသေႏသေႏ၊ အဝ်ႏဖြေ့ꩻဗာႏသေႏသေႏဝါႏဒ၊ အဝ်ႏထွို့ꩻဗူႏဗာႏသေႏသေႏ၊ သဘော်ꩻတရာꩻတွမ်ႏ နမ်းကမော့ꩻ ဖဖေႏကလꩻမွုန်းနဝ်ꩻ အွဉ်ႏဆွိုင်ꩻဖေႏဗာႏ၊ သဘော်ꩻတရာꩻနဝ်ꩻ အကျိုꩻဖေႏကထွာအီဗာႏ နမ်းမော့ꩻ၊ ဘဝကလိုႏအပ်ဒါႏယို ဖေႏကဗွေအီဗာႏ၊ ဖေႏကဖျော်စွဉ်ႏကာယကံႏ တွမ်ႏအခွဲးအကျုံႏတဲင် မွေးတမွေးတဝ်း ထိုမ်ႏစမ်ꩻထွားစဲစ်ဆေꩻဗာႏနဝ်ꩻသွူ။ နဲင်ႏငံႏရေꩻသား ခံႏထူႏချက်ယို အဝ်ႏလိုႏနပ် အဝ်ႏလိုႏမဲဉ်ႏလွတထွူစွဉ်ႏ ကအဝ်ႏထွာကျောင်ꩻသားဘဝကာႏသွူ၊ နဲင်ႏငံႏရေꩻခံႏထူႏချက်တွမ်ႏ ကလွူꩻထွားထိုမ်ႏစမ်ꩻချက်ဖုံႏနဝ်ꩻ ဖေႏနေးကထွူႏတွုမ် ကနပ်ဖြားကယ်ꩻထဲင်းဗာႏ အတခိုႏနဲင်ႏငံႏရေꩻအွဉ်ငါသားသာမညသားနဝ်ꩻသွူ။ ဝါႏဒရေꩻရာႏအလꩻ ဖေႏနေးကမာႏဗာႏမွုန်းတဲင် နဲင်ႏငံႏရေꩻသားတဖြာꩻနဝ်ꩻ ထွာတဝ်းမွဉ်းဖျင်ပြောင်ꩻလုဲင်ႏရေꩻသားတဖြာꩻတွော့ꩻ အဝ်ႏလိုႏထွာဒျာႏ အွော့ꩻဝန်(တောႏလန်ႏ)ရေꩻသားတဖြာꩻဒျာႏသွူ၊ နဲင်ႏငံႏရေꩻသားတွိုင်ꩻ ဖေႏကထွာဒျာႏ လိုꩻခွုမ်သဲဉ်ꩻစွူစွူ နဲင်ႏငံႏရေꩻဝါႏဒတွမ်ႏထာꩻမာꩻစဲဉ်ႏစဲဉ်ႏတဗာႏ မွေးမွေးမဲဉ်ႏမဲဉ်ႏ၊ ဖေႏကထွာဒျာႏ ယွုမ်းအံႏနမ်းဝါႏဒ ထာꩻမာꩻစဲဉ်ႏယို ခမ်းသားလိုꩻအာသီး ဖေႏကလက်ခံႏလွဉ်နဝ်ꩻ ထွို့ꩻဗူႏတမာနွောင်ꩻ၊ နမ်းကျင်ꩻတရာꩻအနေႏ ဖေႏကထွာဒျာႏ ဝင်ꩻလိုꩻအမျာꩻ ထာꩻယွုမ်းအံႏ အာႏကွိုꩻထွိုက်ပုဂ္ဂိုလ်ႏနုဲင်းနဝ်ꩻသွူ။ နဲင်ႏငံႏရေꩻသား ထာꩻထာꩻထွန်ႏထောက်သိုမ်လီးနဝ်ꩻ ထွာဒျာႏ (က) ထာꩻယွုမ်းအံႏ (ခ) ထွို့ꩻဗူႏရေꩻစိုန်ꩻအာႏ (ဂ) နမ်းကျင်ꩻတရာꩻ-နုဲင်းနဝ်ꩻဖုံႏသွူ၊ ပါတီတဗာႏတဗာႏ တဖူꩻစဲဉ်ႏဖုံႏနဝ်ꩻ သဘော်ꩻတရာꩻရေꩻရာႏ ခွေါင်ခံႏဗာႏ၊ နဲင်ႏငံႏရေꩻအကို အုံနောင်တဝ်းပါꩻတွော့ꩻ ကျံႏမာꩻနွောင်ꩻဗာႏ တခြင်ခြင်၊ စီꩻပွာꩻရေꩻအကို(လဲ့) နမ်းတွမ်ႏနမ်း အာႏကွိုꩻယွုမ်းအံႏချာဗာႏနဝ်ꩻသွူ။ ရဲးရဲပ်စွိုꩻခွိုꩻရေꩻအကိုနဝ်ꩻ(လဲ့) နမ်းတွမ်ႏနမ်းအာႏကွိုꩻချာတဲင် ရဲးရဲပ်နွောင်ꩻချာဗာႏ၊ နဲင်ႏငံႏရေꩻပါတီတွိုင်ꩻနဝ်ꩻ မဟာမိတ်အဝ်ႏလွဒျာႏ၊ ကိစ္စကအီႏခြွဉ်းဗူႏ ယာႏယီႏမဟာမိတ်တွမ်ႏ တွမ်ႏလိုꩻသꩻတဆွော့ꩻလꩻတဝ်းသားခန်းတဲ့ယဝ်း နမ်းတွမ်ႏနမ်း သꩻတဆွော့ꩻတဝ်းသားနဝ်ꩻ ငမ်းဗာႏချာလွဒျာႏနဝ်ꩻသွူ။ နဲင်ႏငံႏပါတီမုဲင်ꩻမုဲင်ꩻခန်းတဲ့ယဝ်း ပေါႏမဟာမိတ်နုဲင်းယို တအဲဉ်ထဝ်းနဝ်ꩻ တတဉ်ႏခွေါင်နွောင်ꩻတဝ်း၊ နဲင်ႏငံႏရေꩻသားဖုံႏနဝ်ꩻ ကမာꩻဗာႏနဲင်ႏငံႏအရေꩻအကျောင်ꩻဖုံႏအကို ထွာဒျာႏ ယံကလꩻအာႏဏာႏ၊ ဖေႏကချုပ်နွောင်ꩻခမ်းထီ၊ နဲင်ႏငံႏဖေႏကလွိုင်ႏကွုန်ꩻလွဉ်၊ ခမ်းသားထီသားဖုံႏ ဖေႏကလꩻဗွေဗွေအခွင်ꩻအရေꩻ၊ ဖေႏကအုံအဝ်ႏဗာႏ ငိမ်ꩻငိမ်ꩻချမ်ꩻချမ်ꩻ-နုဲင်းနဝ်ꩻဖုံႏဒျာႏသွူ၊ ကမာꩻနဲင်ႏငံႏရေꩻအကိုယိုလဲ့ အရေꩻတန်ငါႏ စေႏတနာႏအဝ်ႏလိုႏမဲဉ်ႏနဝ်ꩻသွူ။ အရေꩻတန်ငါႏ ထာꩻယွုမ်းအံႏအဝ်ႏလိုႏမဲဉ်ႏ၊ ခမ်းသားလိုꩻအာအလောင်း သꩻသဘော်ꩻအွဉ်ႏဗာႏ ဖေႏကဟဝ်လွဉ်၊ ဖေႏကတိုꩻတက်လွဉ်၊ ဖေႏကစီꩻပွါꩻလွဉ်-နုဲင်းနဝ်ꩻသွူ၊ နဲင်ႏငံႏရေꩻကိုနဝ်ꩻ အရေꩻတန်ငါႏ တမာချက်၊ ဆောႏခြဝ်ချက်၊ တဲက်တွန်ꩻဖုံႏ ဖေႏကမဲဉ်ႏသွူ၊ ခွုင်းတဲင်နဲင်ႏငံႏရေꩻပါတီဖုံႏနဝ်ꩻ ဖေႏနေးကလꩻနဲင်ႏငံႏရေꩻအာႏဏာႏနဝ်ꩻ အဝ်ႏကျိုꩻစာꩻဗာႏသေႏသေႏဒျာႏရင်ꩻသွူ။ နဲင်ႏငံႏရေꩻပါတီတွိုင်ꩻ နေးတွမ်ႏအနယ်ꩻတနယ်ꩻနယ်ꩻတဲင် ဖေႏနေးကလꩻနဲင်ႏငံႏရေꩻအာႏဏာႏနဝ်ꩻ အဝ်ႏရေႏမိုးအဝ်ႏကျိုꩻစာꩻလွသေႏသေႏဒျာႏရင်ꩻ၊ ကကျိုꩻစာꩻလွနုဲင်းယိုလဲ့ သဘာဝဒျာႏရင်ꩻ၊ ကထွာစူခွုမ်အထျꩻထျꩻနဝ်ꩻ နဲင်ႏငံႏရေꩻအာႏဏာႏတန်ဒျာႏ၊ နဲင်ႏငံႏရေꩻပါတီသားအတာႏ အာႏဏာႏနဝ်ꩻ အစွူႏလဲ့ ထွာနွောင်ꩻအီဒါႏသွူ၊ နဲင်ႏငံႏရေꩻတွမ်ႏဘာႏသာႏရေꩻယို ထာꩻမာꩻကိုနဝ်ꩻ ဖဗာႏလို့ဝင်ꩻလဲ့ အသဘော်ꩻနဝ်ꩻ အွဉ်ႏဆွိုင်ꩻဗာႏလို့ဝင်ꩻသွူ။ နဲင်ႏငံႏရေꩻသားနဝ်ꩻ လိုႏမွေးငါႏ ခံႏနွောင်ꩻအာႏ၊ နဲင်ႏငံႏရေꩻတဖူꩻလောင်း မဉ်ႏခွဲးကေားသွမ်ꩻသဲ့ꩻသားလဲ့ တွမ်ႏထာꩻပယွုမ်းခံႏနွောင်ꩻဗာႏ၊ မဉ်ႏခွဲးတွမ်ႏပဋိပက္ခ(ထန်ႏခတ်ꩻလို့ဝင်ꩻ)ဖုံႏလဲ့ အုံတဉ်ႏတနွောင်းနွောင်းနွောင်ꩻဗာႏ၊ နဲင်ႏငံႏရေꩻသားဖုံႏနဝ်ꩻ သတိဝီရိယ လိုႏအဝ်ႏသေႏသေႏ၊ လင်ꩻထာꩻလဲင်တဲင် မဉ်ႏမော့ꩻခြောက်ꩻလဲ့ လင်ꩻတွမ်ႏသတိꩻတွော့ꩻ မဉ်ႏထင်ႏထိုကီဗာႏလဲ့ အွဉ်ႏရေꩻဗာႏ ဖေႏကအွဉ်ႏပလွော့ꩻမာႏမွုန်းမဲ့(ဖေႏကကျွားမာႏမွုန်းထာꩻ)နဝ်ꩻသွူ။ မဉ်ႏနွို့လွေꩻတနွိုင်တန်ကိုခိန်ႏနဝ်ꩻ မာꩻမဲ့ဖွီဖွီ ထွားဗာႏသေႏသေႏ သောင်ရင်ꩻစေႏထွေ ထာꩻသားတန်သီး ဘေꩻအန္တရာယ်ႏနဝ်ꩻသွူ၊ မဉ်ႏထင်ႏကောင်ထိုလောင်းခိန်ႏ ခင်ႏဖေႏကထောက်ထိုꩻမွုန်း အွဉ်ႏသတိꩻဗာႏ၊ မဉ်ႏခွဲးတလူႏလွဉ် ထာꩻဆူႏသေင်ႏနို့လုဲင်းကွန်ႏဖုံႏခိန်ႏလဲ့ တွမ်ႏသတိꩻတရာꩻ အဝ်ႏလိုႏဆင်ႏချင်ႏငါႏနဝ်ꩻသွူ။[၁][၂]