လိုꩻယွဲးတွမ်ႏပေါင်ꩻကွိုက်ꩻရေꩻ
"လိုꩻယွဲးတွမ်ႏပေါင်ꩻကွိုက်ꩻသွုပ်ဆွိုက်ရေꩻ" လိုꩻကရိုꩻယိုနဝ်ꩻ အချင်ꩻချင်ꩻ အဝ်ႏပေါင်ꩻကွိုက်ꩻလို့ဝင်ꩻတွင်ꩻတဲင် ထွာဒျာႏ တန်ပြွူႏထင်ႏထိုလွဉ် သတ္တဝါႏတမျိုꩻတန်သွူ၊ တဲႏကလွူးစခိန်ႏကာႏ တွမ်ႏအာႏရုံႏခံႏအင်္ဂါႏဖုံႏ ပြန်ႏချာအီဒါႏ အသဘော်ꩻအဝ်ႏနုဲင်းနဝ်ꩻ၊ လွူးထွူလꩻအနီꩻပေါင်ꩻတွင်ꩻနဝ်ꩻ အခိန်ႏတွိုင်ꩻ ကဲဉ်းအာအာ အဝ်ႏအဗေင်ႏလွုမ်ꩻ၊ ကသာႏကဆဲင်ႏရာꩻအာႏရုံႏဖုံႏနဝ်ꩻ အပြန်ႏချာအဲဉ်ထဝ်းဒွိုန်း-မဉ်ႏရိုꩻနုဲင်းနဝ်ꩻတဲ့ လꩻဒျာႏနဝ်ꩻသွူ။ လိုꩻပေႏထွိုင်ႏလꩻအလာခိန်ႏနဝ်ꩻ ပြန်ႏချာဒါႏလွဉ်စသွူ တွမ်ႏအမဲ့၊ အငဝ်းသင်ႏအွိုးမုဲင်ꩻလဲ့ ထိုမ်ႏစံꩻဒါႏစသွူ၊ အခွေါင်းအရွ အသာႏယာႏ'တသာႏယာႏတဝ်း၊ ပနဲဉ်ႏချော်ꩻတွမ်ႏအကျမ်ꩻတရမ်ꩻ၊ အသူသဲင်တွမ်ႏ အစဝ်ႏခွꩻကဒဲ့ꩻ-စတဲင်ယိုစားဖုံႏ ပြန်ႏချာဒါႏလွသွူ တွမ်ႏအထာꩻလိုႏ'တလိုႏတဝ်း အပုံႏအငုဲင်ꩻဖုံႏနဝ်ꩻသွူ။ ကွပ်ပွိုးဆီႏအေႏစဝ်ႏထိုꩻ အဟွမ်ဗီတဲင် အမဲဉ်လꩻတဝ်းတွော့ꩻ ခြဝ်အငဝ်းငွိုးထာꩻ၊ ထွိုင်ႏလွမ်ဖေႏယင်း တွမ်ႏအဗီကြောင်းနဝ်ꩻ ပြန်ႏချာလွဉ်ဒါႏစွဉ်ႏ အဲ့ꩻတနွာႏအမဲ့ မာꩻအငဝ်းရောင်ထာꩻ၊ ပယွုမ်းထာꩻ၊ တွမ်ႏထာꩻသာႏယာႏမုꩻနုဲင်းနဝ်ꩻသွူ၊ အရွယ်ႏထွိုင်ႏလꩻနီနေင်ႏခိန်ႏနဝ်ꩻ သေဖန်းဖြယ် ပြန်ႏချာဒါႏလွဉ်စွဉ်ႏ နမ်းကအဝ်ႏခွဲးကျုံႏခွိုꩻဒါႏ အခွေါင်းအရွဖုံႏနဝ်ꩻသွူ။ လိုꩻနားဟွိုန်ꩻသားဖုံႏ ကချောက်တေ့ꩻဒါႏလိုꩻပေႏသားနဝ်ꩻ ထွာဗွောင်ဖေႏ သွုပ်ဆွိုက်ခွင်ꩻတဖူꩻတဲင် အရေꩻတန်မွေးငါႏသွူ၊ အသက်နီနေင်ႏရပ်တွင်ꩻနဝ်ꩻ ပြန်ႏချာဒါႏလွကွို့ꩻ နိစ်သက်မဲဉ်လꩻခရာႏတွမ်ႏ တနိစ်သက်တမဲဉ်လꩻတဝ်းဖုံႏလွုမ်ꩻ၊ အသက်သိုမ်နေင်ႏထွိုင်ႏလွိုခိန်ႏနဝ်ꩻ သက်ဗိုန်ရွယ်ႏဗိုန်အစွိုꩻလောင်းယို သွုပ်ဆွိုက်လူႏလုဲင်ႏဒါႏစသွူ၊ တဲႏအရွယ်ႏသက်တဆီလွို ကအိုပ်လို့ဒါႏ သက်ဗိုန်ရွယ်ႏဗိုအစွိုꩻလောင်းနဝ်ꩻ ထွာအရေꩻတွိုႏတချက်တန်နဝ်ꩻသွူ။ အရွယ်ႏသက်တဆီလွိုသား အကလူꩻပုံႏစံႏ၊ အကွဉ်အကꩻ၊ ကသုံꩻဒါႏတခြိုꩻဖုံႏ၊ အဒေါ့ꩻအဖြဝ်ႏတွမ်ႏ အသဘော်ꩻထာꩻယူႏ၊ အသꩻထာꩻဝင်ႏစာꩻဖုံႏနဝ်ꩻ ထွာစွဉ်ႏဒျာႏ ခေတ်တမွန်ႏမဲ့ငါဖုံႏသွူ၊ လိုꩻပေႏဘဝ ကပြန်ႏချာဒါႏ သွုပ်ဆွိုက်ရေꩻ' တမာရေꩻဖုံႏအကိုနဝ်ꩻ အဝ်ႏလိုႏငါႏ လိုꩻတန်သီး အွဉ်ႏနယ်ဖေႏအနမူႏနာႏ၊ သွဉ်သင်ဆုံꩻမꩻ၊ ယီးအွဉ်ႏနယ်ဖေႏတဖူꩻဖုံႏနဝ်ꩻသွူ။ ဆုဲင်ꩻဘဝချမ်ꩻသာႏအီ တရာꩻသွစ်ꩻပါꩻ၊ (၈)ပါꩻကရိုꩻနဝ်ꩻ- (၁) ဖွီသွောင်တလျူ ထာꩻသောင်ႏသာအဝ်ႏ၊ (၂) ကလꩻထွူလဲဉ်းဒါႏ တခြိုꩻဥစ္စာႏဖုံႏယို အွဉ်ႏသိမ်ꩻဟဝ်ဟဝ် (၃) နွို့သော့ꩻသွꩻခြာတွမ်ႏ (၄) ဆေ့ရေးဒါႏ (၅) ထာꩻယွုမ်းအံႏသဒ္ဓါႏအဝ်ႏ (၆) သီႏလအဝ်ႏ (၇) စွဉ်ꩻကြယ်ꩻဖေႏဗဲင်းဒါႏဝင်ꩻ (၈) ခင်ႏလမ်းတွိုင်ꩻ ထာꩻသေနာႏအဝ်ႏ-သုတေသနအဘိဓာန်ႏကျမ်ꩻကို အွဉ်ႏနယ်ခါꩻနုဲင်းနဝ်ꩻသွူ။ နဝ်ꩻမꩻ နွို့ꩻသော့ꩻသွꩻခြာတွမ်ႏ၊ သွꩻခွလွိုင်ႏနဝ်ꩻ လောကီꩻစီꩻပွာꩻရေꩻတာႏ အရေꩻတန်ငါႏအကျောင်ꩻ စဲင်းစဲ့ဟဝ်ငါႏနဝ်ꩻသွူ၊ လောကနီတိကျမ်ꩻကိုလဲ့ (က) လိုꩻသွꩻခွꩻတအဲဉ်ထဝ်းသားနဝ်ꩻ မာꩻနုဲင်းမုဲင်ꩻ လꩻနွောင်ꩻထာꩻချမ်ꩻသာႏ၊ (ခ) လိုꩻချမ်ꩻသာႏတအဲဉ်ထဝ်းနဝ်ꩻ မာꩻနုဲင်းမုဲင်ꩻ မာꩻနွောင်ꩻကုသိုလ်ႏ (ဂ) လိုꩻကုသိုလ်ႏတအဲဉ်ထဝ်းနဝ်ꩻ မာꩻနုဲင်းမုဲင်ꩻလꩻနွောင်ꩻနိဗ္ဗာန်ႏ-အွဉ်ႏနယ်ခါꩻနုဲင်းနဝ်ꩻတဲင် ဖေႏကတွိုႏနွောင်ꩻအီနိဗ္ဗာန်ႏနဝ်ꩻ သွꩻခွဟဝ်အဝ်ႏယိုလဲ့ အထျꩻထျꩻ အဝ်ႏပါသော့ꩻအရေꩻတန် အခန်ꩻကိုတန်သွူ။ ဗွေႏဩဘာသ (တဲမ်း) သွꩻသိုမ်ဖြာꩻကရိုꩻနဝ်ꩻ (၁) တဖြာꩻတွမ်ႏတဖြာꩻ ခွဲးကျုံႏလွေꩻသဲင်ꩻသွို ဒေါ့ꩻရီဖိုသွꩻ (၂) အံႏငီꩻဗာႏဖိုလို့ဝင်ꩻဒဲဉ်တွော့ꩻ ထွာသွꩻခွဖဉ်းမွိုတ် (၃) တခြိုꩻဥစ္စာႏကထိုꩻမားတွင်ꩻ ကလွဉ်စွဲးကမ်းပွေါးထွားကိုဒါႏသွꩻ (၄) အုံသွိုလို့ဝင်ꩻကျောင်ꩻ၊ ခွုမ်ဆိုးလွူꩻငီꩻဗာႏဖိုဝင်ꩻ၊ သွꩻအဝ်ႏတကျောင်ꩻချင်ႏထန်ႏ (၅) သွꩻအုံငီꩻကံကျင်ꩻသွိုဗာႏလို့ဝင်ꩻတရာꩻ ထွာဆရာႏဗိုန်လို့ဝင်ꩻနဝ်ꩻသွူ။ ဟိတောပဒေသ သွꩻခွလစ်ꩻမျိုꩻအကိုနဝ်ꩻလဲ့- (က) အဝ်ႏသꩻအင်လွူးလင်ꩻပိုမူႏ အဝ်ႏထွာတထွူလဲဉ်းသွꩻ (ခ) အီႏမင်္ဂလာႏတာႏ ရီဖြောင်သေꩻခါꩻလဲဉ်း ပနံ၊ မမွိုးမဖါ-စတဲင် သွꩻ (ဂ) ခွိုꩻဆက်တကုဲင်တဝ်းတွော့ꩻ အစဲဉ်ႏအဆက်ကအဝ်ႏထွာဒါႏသွꩻခွ (ဃ) တခြိုꩻဥစ္စာႏထွိုင်ႏထိုꩻမားခိန်ႏ ကလွဉ်ပွေါးထွား ရဲးဖေႏဒါႏသွꩻခွ-နုဲင်းနဝ်ꩻဖုံႏသွူ။ သွꩻခွဟဝ်သီးဖုံႏ အင်္ဂါႏအဝ်ႏ(၈)ပါꩻ- (၁) ဖေႏဒါႏ တခြိုꩻဝတ္ထု အီႏဖေႏပါꩻကယပ်ꩻစားမျိုꩻ (၂) မာꩻဖေႏ အီႏမာꩻကယပ်ꩻငါႏ ဝတ္တရာꩻမျိုꩻ (၃) သယ်ꩻခံႏနွောင်ꩻငါႏလွဉ်ꩻမွေးစွဉ်ႏ (၄) အမုꩻကလိုႏအွဉ်ႏပလို့ꩻခါꩻစားယို ဖေႏကပေါႏမွုန်းနဝ်ꩻ အွဉ်ႏပလို့ꩻခါꩻဒါႏ (၅) အမုꩻကလိုႏအွဉ်ႏပလို့ꩻခါꩻဖေႏစားယို ဖေႏကပေါႏမွုန်းနဝ်ꩻ အွဉ်ႏပလို့ꩻခါꩻဖေႏဒါႏ (၆) မဉ်ႏမော့ꩻခွဲးလွဉ်ဘေꩻရန်ႏခိန်ႏ အွဉ်ႏကုဲင်ဒါႏတဝ်းလိုꩻ (၇) တခြိုꩻဥစ္စာႏထွိုင်ႏခြေား ထွိုင်ႏဆင်ꩻရယ်ꩻခိန်ႏနဝ်ꩻ ထီႏဖွီထင်းပေါ်ꩻတဝ်း-နုဲင်းနဝ်ꩻဖုံႏသွူ။ လောကအကိုယို တဖြာꩻတွမ်ႏတဖြာꩻ မဉ်ႏခွဲးကျုံႏလွဉ်သွူ ကိစ္စအရေꩻတန်တဗာႏဗာႏနဝ်ꩻ ကအာႏကွိုꩻဗာႏလွိုဒါႏ သွꩻခွဟဝ်နဝ်ꩻတဲးတဲ့ အခြေားတန်၊ ကဆော့ဆာထာꩻခိန်ႏ ကေားကထွားဖေႏနီသားယိုလဲ့ မတ်ဗာႏဒျာႏ သွꩻခွဟဝ်သွူ၊ ကအဝ်ႏလွိုင်ႏခြွေခိန်ႏနဝ်ꩻ သွꩻခွလွိုင်ႏအာလဲ့ ကထွိုင်ႏအံႏမအံႏအဝ်ခိန်ႏနဝ်ꩻ ထိုမ်ႏသွꩻတလꩻတဝ်း-ကုဲင်းထွာဒါႏထဲင်းနုဲင်းနဝ်ꩻသွူ၊ နီခွဲးကျုံႏလွဉ်ထာꩻဒုက္ခခိန်ႏ အွဉ်ႏကုဲင်တဝ်းနီတွော့ꩻ ကစွဲးကမ်းဖေႏဒါႏသွꩻခွနဝ်ꩻ မတ်ဗာႏသွꩻဟဝ်နဝ်ꩻသွူ။ သွꩻခွကျင်ꩻဝတ်ငတ်ꩻပါꩻနဝ်ꩻလဲ့ အဝ်ႏနေကဒွိုန်းဒျာႏ၊ (က) အဝ်ႏလိုႏမုဲင်ꩻခါလဲ့ ဖေႏဗဲင်းစွဲးကမ်းဒျာႏအသွꩻခွ (ခ) ပေါင်ꩻကွိုက်ꩻသွုပ်ဆွိုက်ဒျာႏ တွမ်ႏနမ်းတရန်းချင်ႏ (ဂ) မာꩻဖေႏဝင်ꩻကစီꩻပွာꩻနဝ်ꩻ နေးဒျာႏတွမ်ႏသꩻထာꩻလိုႏဗွေဗွေ (ဃ) ဒေါ့ꩻဒျာႏငဝ်းရက်တဲင် ကျိုꩻစာꩻဒျာႏ ဖေႏကထန်ႏခတ်ꩻထိုꩻမွုန်းလို့ဝင်ꩻ (င) အွဉ်ႏသေႏသေႏဒျာႏ သွုန်ႏစွဉ်ႏသꩻစွဉ်ႏ-နုဲင်းနဝ်ꩻဖုံႏသွူ။ လောကအကို အထီအသွီႏတဗာႏ ကဖေႏနွောင်ꩻဒါႏ အတန်သွတ်ꩻ သꩻငိမ်ꩻခွꩻရျူႏနဝ်ꩻ အဝ်ႏဗော့ꩻဒျာႏ လိုꩻတွိုင်ꩻသီး တွမ်ႏစူတယောင်းအရန်းလွုမ်ꩻသွူ၊ နဝ်ꩻနဝ်ꩻ အလင်မွေးတဝ်း ထွာဒျာႏ ဖဉ်းမွိုတ်ခရာႏဟဝ်ငါႏ သွꩻခွဖုံႏဒျာႏ၊ လောကအကို အရေꩻမဉ်ႏတွိုႏ ပေါႏလွိုတဲင်သွꩻခွဟဝ် စွဲးကမ်းမွေးမွေး ကအဝ်ႏရံႏခူခူခါခါသားနဝ်ꩻ တမုဲင်ꩻမုဲင်ꩻငါ လွိုးရတအဝ်ႏနွောင်ꩻတဝ်းဒွုမ်သွူ။ ပေႏခါခိန်ႏတွင်ꩻ ဖူးဝေး၊ ဖူးခိုဖူးမူႏ-ဖူးပိုဝေးပိုဖုံႏနဝ်ꩻ ထွာသက်ရွယ်ႏဗိုန်သွꩻခွဖုံႏတန်သွူ၊ အုံကျောင်ꩻတဲင် ကထွိုင်ႏသွဉ်လိတ်ခိန်ႏနဝ်ꩻ သွꩻခွအတန်ꩻဗိုန်သားဖုံႏ၊ သွꩻခွကျပ်သွိုလို့ဝင်ꩻလိတ်ဖုံႏ၊ သွꩻခွကခွုမ်ဆိုးငီꩻဝင်ꩻဖုံႏ၊ သွꩻခွမာꩻငီꩻလို့ဝင်ꩻ ရုဲင်ꩻတသွိုးသွုပ်ဆွိုက်ရေꩻ-စတဲင် အဝ်ႏအစားစားနဝ်ꩻသွူ။ ကထွိုင်ႏတွိုႏထာꩻမာꩻခွင်ႏခိန်ႏနဝ်ꩻ သွꩻခွထာꩻမာꩻဗိုန်၊ သွꩻခွအရာႏဗိုန်၊ သွꩻခွရပ်ကွက်ဗိုန်၊ သွꩻခွဝါႏသနာႏဗိုန်၊ သွꩻခွကံကျင်ꩻဘာႏသာႏရေꩻဗိုန်၊ သွꩻခွနဲင်ႏငံႏရေꩻဗိုန်၊ သွꩻခွလိတ်လုဲင်ꩻဗိုန်-စတဲင် အဝ်ႏလွဉ်အဒဝ်ႏဒဝ်ႏသွူ၊ သွꩻခွလွိုင်ႏ သွꩻခွခြေားဖုံႏနဝ်ꩻ ကွပ်ဘဝကံကျမ္မာႏတဲ့ တမွေးတဝ်း၊ ကွပ်ပွိုးတံꩻခိုꩻဗွေႏတဖြာꩻတဖြာꩻ ဖန်ဆင်ꩻဖေႏတဲ့ တမွေးတဝ်း၊ အမဲဉ်ႏတဗာႏနဝ်ꩻတဲးတဲ့ ကွပ်ပွိုးစွဉ်ႏ နီနမ်းပေါင်ꩻကွိုက်သွုပ်ဆွိုက်မုꩻ တဟဝ်တဝ်းမꩻ ထွာဗာႏနုဲင်းနဝ်ꩻဒျာႏသွူ။ ဘဝသက်တန်ꩻတဗာႏအကို ပွိုင်းဝွို့တွမ်ႏအခွဲးအကျုံႏအလောင်း ထွာဒျာႏအဝ်ႏလိုႏထူႏ ဘဝသွဉ်ခန်ꩻတမျိုꩻနုဲင်းနဝ်ꩻဒျာႏ၊ ဘ၀ကရိုꩻယို အုံတဖြာꩻလွုမ်ꩻနဝ်ꩻ တဗွေစွုမ်ႏနွောင်ꩻတဝ်း၊ ပေါင်ꩻကွိုက်သွုပ်ဆွိုက်တွမ်ႏ လိုꩻပေါင်ꩻအာမꩻ အီႏထွာလွဉ်နွောင်ꩻ ဘ၀ဗွေစွုမ်ႏပျောႏသွင်ႏခရာႏနဝ်ꩻသွူ။ မဉ်ႏဒင်ႏပျꩻနယ်ဗာႏ ဒေးကာနဲစ်စီ အနယ်ꩻဖေႏလိုꩻကျွိုက်အာ၊ လောက်ꩻနယ်ꩻနဝ်ꩻ- သꩻဝင်ႏစာꩻမွေးမွေးသွော့ ဝင်ꩻလိုꩻလင်ဖုံႏအလောင်း၊ ပယွုမ်းသွော့၊ လောကအကို ကတလေ့သွတ်ꩻအငဝ်းနဝ်ꩻ ထွာဒျာႏ ဝင်ꩻလင်ကဟဲ့ꩻဒါႏ နီမဉ်ꩻအခိန်ႏကရိုꩻနဝ်ꩻ အွဉ်ႏသတိꩻသွော့၊ တဖဲ့ꩻသား ကအဝ်ႏဒေါ့ꩻငဝ်းတွင်ꩻနဝ်ꩻ အွဉ်ႏထွူႏထွူႏတွုမ်တွုမ်နာႏသွော့၊ ဖေႏအာႏသွော့ ဖေႏနေးတဖဲ့ꩻသား ကဒေါ့ꩻသွော့ဝွေꩻသီးခရာႏ၊ ကျမ်ႏထွို့ꩻသွော့ အွိုးတဖဲ့ꩻသား သꩻကဝင်ႏစာꩻဒါႏအဖဲ့ꩻန၀်ꩻသွူ။ အွိုးတဖဲ့ꩻသား အနမ်းတွမ်ႏအနမ်း ဖေႏနေးကထင်းတန်နဝ်ꩻ ကျမ်ႏမာꩻသွော့၊ ကမာꩻနုဲင်းယိုနဝ်ꩻ မာꩻသꩻနမ်းတွမ်ႏသꩻပါပါ၊ ပညာႏသျင်ႏသီးထာꩻလိုႏအလꩻ ဖေႏနေးကထွာသွꩻခွအရေꩻကိုနဝ်ꩻ အွဉ်ႏဗာႏအဖျင်သဘော်ꩻ၊ မဉ်ႏအွဉ်ႏသေတွမ်ႏထဲမ်ဖေႏသွꩻခွသီးထာꩻလိုႏနဝ်ꩻ အရေꩻတွိုႏမွေးစွဉ်ႏနဝ်ꩻသွူ။ ထာꩻပယွုမ်းနဝ်ꩻ ထွာဒျာႏအဖျင်သဘော်ꩻ အပုံႏအငုဲင်ꩻတဗာႏတန်သွူ၊ လိုꩻပယွုမ်းတဖြာꩻနဝ်ꩻ ထွာအွဉ်ႏနယ် လွောက်ꩻလွဉ်ꩻဒျာႏ၊ လက်ခံႏဒျာႏ၊ နိစ်သက်ဒျာႏ၊ သာႏယာႏစွုမ်းသွိုꩻဒျာႏ-ကရိုꩻဒါႏ လက္ခဏာႏဖုံႏသွူ၊ ဟဲ့ꩻနေးအမဉ်ꩻထွူတဲင် ဒေါ့ꩻရီလို့ဝင်ꩻ၊ ဝွေꩻကဒေါ့ꩻငဝ်းယို နာႏထွူႏထွူႏတွုမ်တွုမ်ဖေႏ၊ အံႏဖြာႏခရာႏမဉ်ႏအဝ်ႏလဲ့ ဟွုန်ဟွုန်ဟဝ်ဟဝ် အံႏဖြာႏဖေႏ၊ ခွုင်းတဲင်ဝွေꩻသီး အထီအသွီႏဟဝ်ဖုံႏယို တွမ်ႏနမ်းတွမ်ႏသꩻ ကဖောႏထန်ႏကဒင်ႏဖေႏအဂုဏ်ႏစတဲင်နဝ်ꩻ ထွာဒျာႏထဲမ်ဖေႏ ကေားကမဉ်လꩻဒါႏ ဝင်ꩻတောင်ꩻမုဲင်သား ထာꩻလိုႏထာꩻမဲဉ်လꩻနဝ်ꩻသွူ။ မဉ်ႏအဝ်ႏလိုႏထေဖေါႏအံႏဖြာႏ အွိုးတဖဲ့ꩻသားလောင်း ကအဝ်ႏဒါႏ ကားတဲင်ထင်းတန်ခရာႏ အထီအသွီႏဂုဏ်ႏဖုံႏနဝ်ꩻ အစျꩻအကင်အွဉ်ႏကုဲင်မွုန်းတဝ်း၊ ဖြောင်းထွူႏမွုန်းတဝ်း၊ ဖေႏနေးကထွာသွꩻခွတာႏ အွဉ်ႏသေႏသေႏသွုန်ႏစွဉ်ႏသꩻစွဉ်ႏ၊ သစ္စာႏအဝ်ႏအဝ်ႏနဝ်ꩻ အရေꩻတန်မွေးငါႏ၊ ကထန်ႏခတ်ꩻတွမ်ႏဝွေꩻနဝ်ꩻ ထွာဒျာႏ သစ္စာႏအဲဉ်ထဝ်း၊ ကဉ်းမာꩻကွို့ꩻထာꩻဖုံႏနဝ်ꩻသွူ၊ နမ်းထာꩻပယွုမ်းယို ဖေႏကထွာဒျာႏသွော့ ထာꩻပယွုမ်းအကျိုႏဆွုမ်ႏမျိုꩻနဝ်ꩻသွူ။ ဟိတောပဒေသအကိုနဝ်ꩻ အွဉ်ႏနယ်ခါꩻ သွꩻခွသီးအပဲစ်(၇)မျိုꩻသွူ၊ (၁) အကျောင်ꩻခရာႏ ကအဝ်ႏလိုႏအွဉ်ႏပလို့ꩻဗိစ်ꩻခါꩻနဝ်ꩻ ထေဖေါႏဗွောင်နယ်(ဝင်ꩻ) (၂) ကွီတမွိုꩻတမာꩻဒါႏထာꩻ (၃) အွဉ်ႏတဝ်းထာꩻစာႏနာႏ မာꩻယူႏပက်ကျမ်ꩻထမ်ꩻ(ဝင်ꩻ) (၄) သꩻဓာတ်စွူဖြွိုးတဝ်း (၅) ဒေါသတန်(သꩻလျားမွိုင်း)ထာꩻ (၆) စွို့ꩻစွဉ်ႏတဝ်းမဲဉ်ႏတဝ်း (၇) မွိုင်းဒျာႏတောႏလောင်ꩻထာꩻ မက်ဒျာႏအမွန်းအပျောႏ-စတဲင်နုဲင်းနဝ်ꩻဖုံႏသွူ။ လိုꩻတွိုင်ꩻနိစ်သက်လွဒါႏ အင်္ဂါႏဖုံႏနဝ်ꩻ- (က) ဉာဏ်ႏဟဝ်ကယ်ꩻလဲဉ်းဝင်ꩻ (ခ) သွုပ်ဆွိုက်ရေꩻချော်ꩻပြေ (ဂ) မာꩻသျုက်တရေင်တဝ်း လိုꩻလောင်ႏလင် (ဃ) တရာꩻတွောင်းတွောင်းငီႏငီႏ (င) ယေန်တေ့ꩻပငဲမ်ႏ (စ) သꩻဓာတ်ထာꩻခွုမ်ပဆိုးအဝ်ႏ (ဆ) စွဲးကမ်းဒါႏဝင်ꩻ (ဇ) သꩻဖြုံႏထိုတဝ်း (ဈ) ပေါင်ꩻကွိုက်ꩻယိုꩻ (ဉ) အွဉ်ႏဒါႏအထွူႏအတွုမ် (ဋ) ထာꩻငမ်းထာꩻဝင်ꩻသꩻအဝ်ႏ (ဌ) ပီပဲ့ဒျာႏလိုꩻခို (ဍ) ရိုꩻသာꩻဒျာႏ (ဎ) ကြောင်းစင်ဒျာႏ (ဏ) မာꩻဒုက္ခဒါႏတဝ်း(ဝင်ꩻ) (တ) ဒေါ့ꩻငဝ်းအကိုလိမ္မာႏဒျာႏ (ထ) ရွို့ꩻရန်ႏဒါႏတဝ်းဝင်ꩻလင် (ဒ) ရက်သညင်ꩻဒါႏ(ဝင်ꩻ) (ဓ) ယွုမ်းအံႏသꩻဆွောꩻလꩻ (န) တွမ်ႏလိုꩻလောင်ႏလင် အဆင်ႏပြေႏပြေႏ အုံအဝ်ႏဒါႏ (ပ) အွဉ်ငါဖေႏနွောင်ꩻ(ဝင်ꩻ) (ဖ) ပျောႏသွင်ႏဒါႏထာꩻ (ဗ) ခွုမ်မာꩻခြွဉ်းငီꩻဝင်ꩻဒါႏ (ဘ) မဲဉ်လꩻပညာႏ (မ) သꩻဝင်ႏစာꩻမုꩻဗိုန်ဝင်ꩻ (ယ) သꩻဝင်ႏစာꩻခရာႏဟဝ် (ရ) ထိန်ꩻတီဒါႏဣန္ဒြေႏ (လ) အွဉ်ႏသဘော်ꩻတနꩻလို့ဝင်ꩻ (ဝ) လက်ခံႏနွောင်ꩻဝင်ꩻစွပ်ꩻဝင်ꩻရိုꩻ (သ) သꩻဓာတ်နပ်ဖြား (ဟ) ထာꩻလောက်ꩻကာႏအဲဉ်ထဝ်း (ဠ) ယောင်ꩻဆင်ꩻအဝ်ႏ (အံ) ရုဲင်ꩻတသွိုးငီꩻတွမ်ႏဝင်ꩻလိုꩻအာ (အ) စွူဖြွိုးတန် (အာ) သစ္စာႏအဝ်ႏ (အိ) ကွဉ်ကꩻတဲပ်တဲပ်တော်တော်ဒါႏ-နုဲင်းနဝ်ꩻဖုံႏသွူ။ အင်္ဂါႏ(၃၆)ဗာႏဖုံႏအကို အဗွေအာသွတ်ꩻသားယို သက်အရွယ်ႏကဗိုန်ဝွေꩻအစွိုꩻနဝ်ꩻ လက်ခံႏအွဉ်ႏထွာ သွꩻခွဟဝ်အကျောင်ꩻ၊ အနပ်အတွက်ယိန်းအာအာ ယိန်းထွာထွာသွꩻခွအကျောင်ꩻ-ထီႏဗာႏနုဲင်းနဝ်ꩻတဲင် လိုꩻယွဲးသီးဖုံႏ ကမဉ်လꩻဒါႏသွꩻခွဟဝ်-ကလျာဏမိတ္တသားဖုံႏနဝ်ꩻ ကရိုꩻဒါႏအထီအသွီႏနုဲင်းနဝ်ꩻဖုံႏ ဖေႏနေးကဗွေစွုမ်ႏနဝ်ꩻ နေးတွမ်ႏအနယ်ꩻအမျိုꩻမျိုꩻ အဝ်ႏလိုႏကျိုꩻစာꩻလွငါႏကရိုꩻနဝ်ꩻ ဖေႏသေဗာႏ လိုꩻယွဲးသီးအနယ်ꩻဟဝ်အနယ်ꩻယံဖုံႏနုဲင်းနဝ်ꩻသွူ။[၁][၂]