လိုꩻလော်လိုꩻလွင်ꩻ ထဲ့သူမ်ꩻဖျင်ꩻ
မွိုးဖာထွဉ်ႏအံႏလဲ့ တလꩻတဝ်း၊ အမျိုꩻသာꩻရေꩻလဲ့ ကွိုꩻတလꩻတဝ်း၊ ဒုံဆောင်ႏကိစ္စလဲ့ သုံꩻတလꩻတဝ်း လိုꩻလော်လိုꩻလွင်ꩻနဝ်ꩻ ထွာစွဉ်ႏကီလိုꩻလဲ့ တတွာနုဲး တိရစ္ဆာန်ႏငါလဲ့ အသုံꩻတကျတဝ်း၊ အသက်ဆွာꩻစွဉ်ႏလဲ့ အသုံꩻတဝင်ႏတဝ်း၊ အသက်ဆွာꩻထာꩻနဝ်ꩻ ဆွာꩻငခြေင်ထာꩻလွုမ်ꩻနေား။ လိုꩻစားနဝ်ꩻ သဲင်ꩻမာꩻလို့ဟူ၊ သဲင်ꩻမာꩻထွူႏဟံႏ၊ သဲင်ꩻယမ်းသီ သဲင်ꩻယမ်းကုဲဗော့ꩻ ဖိုးပနားဆာႏ၊ သဲင်ꩻအေႏတဗော့ꩻသဲင်ꩻဆီႏတဗော့ꩻ လယ်ႏဗော့ꩻထာꩻ လောကလိုꩻခမ်းကိုလွုမ်ꩻနေား။ ဖိုးပနား၊ တိရစ္ဆာန်ႏနဝ်ꩻ ထုဲအီလုဲႏဒါႏ၊ ဒင်ႏအီလေား ထွဉ်ႏအံႏလꩻ၊ အသုံꩻကျ၊ ဖိုးပနားအေႏနဝ်ꩻမာꩻအီလꩻ ဟံႏဆာႏ၊ မာꩻဟဝ်အီဟံႏဩဇာႏ၊ မာꩻလွူးအီလꩻဒွိုန်းက လိုꩻအမျာꩻ၊လိုꩻလော်လိုꩻလွင်ꩻနဝ်ꩻ ကွိုꩻထာꩻမုဲꩻလဲ့ တလꩻတဝ်း၊ ထွာစွဉ်ႏလိုꩻလွိုလိုꩻပိုႏလွုမ်ꩻနေား။ အသက်တအဲဉ်ထဝ်း တခေါ့ꩻမွူး၊ မောက်ကြင်ꩻမွူး၊ မောက်စောက်ꩻမွူးဖုံႏနဝ်ꩻ လိုꩻအမျာꩻသုံꩻလꩻ၊ လိုꩻအမျာႏအံႏလွဉ်ꩻဗာႏအရာႏ၊ အဆေ့ꩻသွတ်ꩻ အပင်၊အမွူးနဝ်ꩻ မာꩻအီလꩻဒွိုန်းက သိုႏနေား။ လိုꩻလော်လိုꩻလွင်ꩻနဝ်ꩻ နုဲးတခေါ့ꩻမွူး၊မောက်ကြင်ꩻမွူးငါတဲ့ အသုံꩻမဉ်ႏတကျတဝ်း၊ အမီႏသီငါလဲ့ အမာꩻပင်ႏပန်ꩻဗော့ꩻထဲင်း လိုꩻဆချာ၊ မာꩻလို့ဗော့ꩻထဲင်း လိုꩻဆချာရွဉ်လွုမ်ꩻနေား။ ချင်္သေ့ꩻသီးနဝ်ꩻ သတ္တဝါႏပေႏပေႏလဲ့ ထေဗာႏအာႏ၊ သတ္တဝါႏတန်တန်လဲ့ ထေဗာႏအာႏ၊ "ယိုနဝ်ꩻ အပေႏတဲင် ထေတဝ်းအာႏ၊ ယိုနဝꩻအတန်မွော့ꩻ ထေဗာႏအာႏ"စားနဝ်ꩻ တအဲဉ်ထဝ်း။ထေဗာႏဗိုန်ဗိုန်ဝင်ꩻ။ ယံဖေႏကလꩻ နိဗ္ဗာန်ႏနဝ်ꩻ လုံ့လဝီရိယအဝ်ႏနဝ်ꩻမꩻ လꩻနေား။လုံ့လဝီရိယမိဉ်ႏကင်ꩻနဝ်ꩻ တလꩻနွောင်ꩻတဝ်း။ နမ်းအကျိုꩻ၊ အမျိုꩻသာꩻအကျိုꩻယံကအဝ်ႏ၊ ယံကစီꩻပွာꩻတဲင် ကမာꩻဒါႏ၊ ကခွုမ်ဒါႏ အဖဲ့ꩻနဝ်ꩻ အားထွုတ်လွသွော့နေား။ လုံ့လဝီရိယနအဲဉ်ထဝ်းလိုꩻနဝ်ꩻ တောမ်ႏရိုꩻမွုန်း အမျာꩻအကျိုꩻ နမ်းအတွက်၊ နမ်းအကျိုꩻငါလဲ့ တပြဲ့ꩻစုံႏတဝ်း။