လိုꩻသီးအသက်ဒွေါင်ႏငါႏ

"အရကသုတ် (လိုꩻသီးအသက်ဒွေါင်ႏငါႏ)" "ရဟန်ꩻသီးဖုံႏဟွေး- အွိုးစခါ ဆရာႏသူႏတောႏကောင်ꩻ ပေါႏဖိုတဖြာꩻ၊ အမဉ်ꩻ'အရက'၊ ဆရာႏအရကနဝ်ꩻ အတပဲ့ꩻအဝ်ႏအာတန်၊ ဆရာႏအရကနဝ်ꩻ ဟော်ꩻဖေႏ အတပဲ့ꩻဖုံႏတရာꩻနုဲင်းယို- သူႏတောႏကောင်ꩻသီးဖုံႏဟွေး- နီလိုꩻသီးအသက်ယို အုံဗာႏဆေ့ꩻငါႏ၊ နီလိုꩻသီးအသက်ယို ဒွေါင်ႏငါႏ၊ နီလိုꩻသီးအသက်ယို လို့မွိုင်ငါႏ၊ ထွိုင်ႏစင် သက်ကဒွေါင်ႏတဲ့ ဆင်ꩻရယ်ꩻဒုက္ခသမ်းအာ၊ သမ်းရွိုးလွားဗာႏအာ၊ နဝ်ꩻဖုံႏနဝ်ꩻ နေးတွမ်ႏထာꩻသေပညာႏ ယူႏဒါႏဒါႏသွော့ဟုဲင်း၊ လိုႏနဲစ်မာꩻငါႏကုသိုလ်ႏ-လိုႏကျင်ꩻငါႏ အကျင်ꩻမျတ်ကွေး၊ နီယိုနဝ်ꩻ အုံလွဉ်လဲဉ်းသန္ဓေႏ၊ လိုꩻပေါႏအုံသန္ဓေႏထွူနဝ်ꩻ အဝ်ႏကုဲင်ထာꩻသီလွုမ်ꩻ၊ သီတဝ်းနဝ်ꩻ အဲဉ်ထဝ်းတဖြာꩻဖြာꩻ။ နီလိုꩻသီးအသက်ယို အုံဗာႏဆေ့ꩻငါႏ၊ ဒွေါင်ႏငါႏ၊ လို့မွိုင်ငါႏ၊ ယံကသေနာႏ ဥပမာႏနယ်က- ၁။ ဥပမာႏ- မွူးရောဝ်ꩻခိုႏစောဝ်းစောဝ်းနဝ်ꩻ တသံꩻထီ အဝ်ႏမီꩻနာ၊ တသံꩻထီမီꩻနာနဝ်ꩻ သဲစ်မွူးကထန်ႏ၊ သဲ့စ်မွူးရောင်းကဗာႏတဲ့ ဟူႏထဲ့ထိုꩻမားမွိုင်မွေးစွဉ်ႏထာꩻ၊ နီလိုꩻသီးအသက်တွမ်ႏ တသံꩻထီနဝ်ꩻ ဗွန်ပီလို့ဝင်ꩻ ထိုꩻမားမွိုင်ငါႏ။ ၂။ ဥပမာႏခꩻတမျိုꩻနဝ်ꩻ- ခမ်းလော့တန်၊ ခမ်းရာႏလင်ꩻဗာႏထီ၊ ထီတဆဲစ်ꩻကီ၊ သဲစ်ကတဆဲစ်ꩻကီတဲ့ ထဲ့ချာထီကို၊ ထိုꩻမားစွဉ်ႏဒျာႏ၊ နီလိုꩻသီးသက်တဲ့ ပီပဲ့နုဲင်းထီတဆဲစ်ꩻကီ ထဲ့ချာထီကိုနဝ်ꩻနေနေ ထိုꩻမားမွိုင်ငါႏ။ ၃။ ဥပမာႏခꩻတမျိုꩻနဝ်ꩻ- တွမ်ႏခွဉ်းတောင်ꩻတွဲႏထီ၊ သဲ့စ်ကဒဲင်ႏကီခွဉ်းတဲ့ ခွဉ်းခြောင်ꩻထီကိုနဝ်ꩻ ထိုꩻမားစွဉ်ႏဒျာႏ၊ နီလိုꩻသီးသက်တဲ့ ပီပဲ့နုဲင်းခွဉ်းခြောင်ꩻ ထီကိုနဝ်ꩻနေနေ၊ ထိုꩻမားမွိုင်ငါႏ။ ၄။ ဥပမာႏခꩻတမျိုꩻနဝ်ꩻ- ထီတန် အဝ်ႏကောင်နာထဲ့လင်ꩻ၊ ထာꩻအီႏကပါလွဉ်ꩻဒါႏ ထီကိုနဝ်ꩻ အထဲ့မွိုင်ငါႏ၊ နီလိုꩻသီးသက်တဲ့ ပီပဲ့နုဲင်းထာꩻအီႏ ကပါလွဉ်ꩻထီကိုနဝ်ꩻနေနေ သꩻထဲ့မွိုင်ငါႏ။ ၅။ ဥပမာႏခꩻတမျိုꩻနဝ်ꩻ- အဝ်ႏဖြောင်းကို ပထူထန်ႏယုဲင်ꩻထီနဝ်ꩻ တညတဝ်း တဆင်ႏပေႏဒျာႏ၊ နီလိုꩻသီးသက်တဲ့ ပီပဲ့ယုဲင်ꩻထီ ကအဝ်ႏဖြောင်းကို ပထူႏထန်ႏနဝ်ꩻနေ၊ တညတဝ်း တဆင်ႏပေႏဒျာႏ။ ၆။ ဥပမာႏခꩻတမျိုꩻနဝ်ꩻ- ဗွိုင်းခင်တန်လျား တနီꩻမွူးမွူး၊ ဗွိုင်းခင်တန်လျား တနီꩻမွူးကိုနဝ်ꩻ ဝေါင်းသော့ꩻစဉ်ႏစျꩻ (တခို့ခယ်ႏခူꩻ)ငါ၊ တလဲင်ႏချင်ꩻ တအီခြစ်ꩻ၊ ဖြေင်းကရစ်ꩻထိုꩻမားစွဉ်ႏ၊ နီလိုꩻသီးသက်တဲ့ ပီပဲ့နုဲင်းစဉ်ႏစျꩻ တအီခြစ်ꩻနဝ်ꩻနေနေ၊ သီမားမွိုင်ငါႏ။ ၇။ ဥပမာႏခꩻတမျိုꩻနဝ်ꩻ- ဖိုးတဗာႏနောဝ်ꩻ ပါꩻစွီႏလွေꩻ ဖိုးဖို့ꩻခင်ႏလမ်း၊ ဖိုးခင်ႏကာနဝ်ꩻ တကာထွူတကာ ကွဲဗော့ꩻငါငါလွေꩻ ဖိုးဖို့ꩻခင်ႏလမ်းသူꩻ၊ ဖိုးနဝ်ꩻ အီႏသီဗာႏသေႏချာႏ၊ နီလိုꩻသီးတဲ့ ပီပဲ့နုဲင်းဖိုးနဝ်ꩻနေနေ၊ တနီꩻထွူတနီꩻ ကွဲဗော့ꩻငါငါလွေꩻ သင်ႏခဲင်ꩻ၊ နီလိုꩻသီးတဲ့ အီႏသီဗာႏသေႏချာႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ သတ္တကနိပါတ်၊ အရကသုတ်)