လုံးနဂါꩻပတ်ဘုရာꩻ

လုံးနဂါꩻပတ်ဘုရာꩻယိုနောဝ်ꩻ အောဝ်ႏဒျာႏဝေင်ꩻနယ်ႏပင်လောင်ꩻ အွိုင်ႏဘန်းဖြာ ဒုံလုံးနဂါꩻပတ်ထျꩻ နောဝ်ꩻသွူ။

လုံးနဂါꩻပတ် ကဟဲ့ꩻဖန်ဗာႏဒါႏ အကျောင်ꩻသမဲင်ꩻနောဝ်ꩻ နဂါꩻခမ်း ထီကိုအွိုးဆꩻလသူꩻနောဝ်ꩻ နဂါꩻမွူး တွမ်ႏနဂါꩻထီးနီဗာႏ ထင်ႏလွဉ်လိုꩻခမ်း ဖန်ဆင်ꩻလုံးတူႏဗွိုန်ပီနဂါꩻကတူႏသွူ။ နဂါꩻထီးနောဝ်ꩻ ပတ်လုံးဆꩻကီတရန်း နဂါꩻမွူးနောဝ်ꩻပတ်လုံးဆꩻလတရန်းတွော့ꩻ နဂါꩻခမ်းကိုကအောဝ်ႏဒါႏ ဘုရာꩻဓာတ်တောႏ မွေႏတောႏ စွယ်ႏတောႏဖုံႏယို ထင်ႏဌာႏပနာႏသော့ꩻလိုꩻခမ်း လုံးတန်လောင်းနောဝ်ꩻသွူ။

ထွိုင်ႏတွိုႏသက္ကရာဇ်နေင်ႏ ၁၁၀၀ -အတွင်ꩻနောဝ်ꩻ ဒုံဆောင်ႏခမ်းအောဝ်ႏတဒုံ ဒုံကိုနောဝ်ꩻ တခဲင်၊ တကာင်၊တမါင်၊တတွီ ကမဉ်ꩻဒါႏမုဆိုꩻတဖူးဝေးဝင်ꩻလစ်ꩻနောဝ်ꩻအောဝ်ႏသွူ။ တွိုႏတနီꩻ မုဆိုꩻတဖူးဝေး ဝင်ꩻလစ်ꩻ လယ်ႏထွုမ်ႏခꩻထာꩻသောင်ꩻထာꩻသားတခြာတန်ကို ထွိုင်ႏလꩻသဲင်ꩻတောဝ်း ထာꩻသားဖုံႏတဲင် တွော့ꩻ လွေꩻတွမ်လုဲင်ႏငွီႏထီခြောင်ထျꩻ ဒွေါ့ꩻတကွို့ꩻထွူငွီႏနျာႏ ရေႏဒွိုႏအံႏသွူနောဝ်ꩻ ကေတန်တဗာႏဖျော် လွဉ်စွော့ꩻဝွေꩻသီးထျꩻတဲင် ထူႏအငွီႏတွမ်သော့ꩻတောင်းပွို နဲစ်လောႏလွင်းခန်းဝင်ꩻတွော့ꩻ ဖျော်လွေꩻ တွိုႏခန်းလုံးတန်ထျꩻ ကထွိုင်ႏတွိုႏလုံးတန်ထျꩻနောဝ်ꩻ ကေတန်ကခြေင်းဒါႏဝွေꩻသီးယို အောဝ်ႏလွိုႏလွိုႏ ကာႏကာႏ ထိုꩻမားထိုꩻချာနောဝ်ꩻသွူ။

မုဆိုꩻတဖူးဝေးဝင်ꩻလစ်ꩻ ကအုံသေႏသူႏဒါႏလုံးတန်ထျꩻနောဝ်ꩻ မော့ꩻပါခန်းဘုရာꩻ စေႏတီႏလုံး တန်လောင်းတဲင် မုဆိုꩻဖုံႏနောဝ်ꩻ ဝွေꩻသီးမာꩻမုဆိုꩻထာꩻမာꩻယို လူꩻတန်တကျွိုက်တောဝ်းအကျောင်ꩻ သတိ သံဝေႏဂလꩻနုဲင်းနောဝ်ꩻတဲင် “ယိုမာငါ အွဉ်ႏကုဲင်ထိုꩻမုဆိုꩻထာꩻမာꩻတွော့ꩻ နီကံကျင်ꩻလွေꩻဒျာႏသီႏလ နီထိမ်ꩻသိမ်ꩻပျုပျင်ႏပါဘုရာꩻစေႏတီႏ နီခံႏထူႏဒျာႏငေါဝ်းသစ္စာႏသွူ။ ကွပ်နီသစ္စာႏမဲဉ်ႏဒျာႏတဲင် နျာႏကတပွတ်ꩻထိုꩻလဲဉ်းဒါႏငွီႏဖုံႏယို ယံကမွန်ချာသွော့ꩻ” အဓိဋ္ဌာန်ႏချခါꩻနုဲင်းနောဝ်ꩻတဲင် ငွီႏဖုံႏယို လွေꩻအွဉ်ႏစွꩻချာယင်းထီခြောင်ကို ငွီႏဖုံႏအသက်မွန်ချာယင်းနောဝ်ꩻသွူ။

ဘုရာꩻစေႏတီႏယို ပထမလဲင်ႏကပျုပျင်ႏဒါႏပုဂ္ဂိုလ်ႏနောဝ်ꩻ မုဆိုꩻတဖူးဝေးဝင်ꩻလစ်ꩻ၊ ဒုတိယလဲင်ႏ ကပျုပျင်ႏဖေႏဒါႏပုဂ္ဂိုလ်ႏ ဗွေႏဗွန်ကျောင်ꩻထီဗွာ ဒင်ႏပါယင်းဘုရာꩻထီꩻ ကပျုပျင်ႏဒါႏနေင်ႏနောဝ်ꩻ ၁၂၃၃ဗာႏ သေထွꩻဗာႏနုဲင်းယိုသွူ။

လုံးနဂါꩻပတ်ဘုရာꩻထျꩻ ထူꩻချာꩻချက် (ထူꩻဆန်ꩻ)

၁။ လုံးနဂါꩻပတ်တန်ယို တဲက်ကီလနောဝ်ꩻ အောဝ်ႏပေကွတ်ꩻဆီ(၉၀)၊အတဝွိုန်ꩻနောဝ်ꩻ အောဝ်ႏတရျာꩻ လစ်ꩻဆီနွတ်ꩻပေ (၁၄၇)၊အခင်ႏထျꩻဆꩻလနောဝ်ꩻ အောဝ်ႏနီဆီလစ်ꩻပေ (၂၄) ပုဲင်၁၀လက်မလွုမ်ꩻသွူ။

၂။ လုံးတန်ယို ဆꩻကီတွမ်ႏဆꩻလအငီႏတောဝ်းဝင်ꩻရိုꩻကီလဲ့ တလီꩻသန်၊ ဟံႏသီႏသွိုး၊ ခမ်းတန်စစွဉ်ႏ ဘေႏအန္တရာယ်ႏထွာလွဉ်ခန်းတယောဝ်း လုံးတန်ယို ကုဲင်ပြင်ꩻတောဝ်းအကျောင်ꩻ။

၃။ ဘုရာꩻဓာတ်တောႏဖုံႏယို အောဝ်ႏနဂါꩻခမ်းပင်ꩻလွဉ်တဲင်တွော့ꩻ မဉ်ႏတွိုႏဝါႏခေါင်ႏလာ (မွေးတဝ်းလဲ့) တောႏလင်ꩻလာနောဝ်ꩻ ထီထန်ႏလွဉ် ဖြွဉ်ကီတွိုႏဘုရာꩻခင်ႏထျꩻ (ထီကန်ႏဗွေစွဉ်ႏတဟာချင်ꩻ)၊ ထီခါးလားကအီႏထန်ႏတနီꩻနောဝ်ꩻ တလီꩻထန်ႏလွဉ်ရီးရီးသွူ။

၄။ မုဆိုꩻတဖူးဝေးဝင်ꩻလစ်ꩻ ကဓိဋ္ဌာန်ႏခါꩻငေါဝ်းသစ္စာႏထီကန်ႏနောဝ်ꩻ ဗꩻတွိုႏဟန်းသနီꩻ ထီခြောင်ကို ကအောဝ်ႏသော့ꩻဒါႏ ငွီႏမန်ႏသမျ နျာႏတပွတ်ꩻလို့ဒျာႏနောဝ်ꩻသွူ။