လောကယိုခါလိုꩻသီအာ
"ပလောကသုတ် (လောကယိုခါ လိုꩻသီအာ၊ ခမ်းကုဲင်ထီဖျꩻ အကျောင်ꩻတရာꩻ)"
မော့ꩻနဝ်ꩻခါ- ပုဏ္ဏာꩻခြွေတဖြာꩻ ထင်ႏထေ့ဗွေႏဘုရာꩻ၊ လောဝ်းဗွေႏဘုရာꩻနုဲင်းယို- "ဩဗွေႏဂေါတမ- ဟွူန်ဗာႏလိုꩻဖြားအစ ကဒေါ့ꩻနဝ်ꩻ လိုꩻခမ်းယိုနဝ်ꩻ နုဲင်းစွဉ်ႏအဝီစိငါးရုဲင်ꩻခမ်း၊ လိုꩻအာဗွေဗိတ်နေးစွဉ်ႏ-တဲ့၊ တွိုႏယိုခါနဝ်ꩻ လိုꩻဆေ့ꩻရွောင်ရွောင်ရင်ရင်၊ ဒုံပေႏတဲ့ နုဲင်းစွဉ်ႏဒုံမွေးဒွုမ်၊ ဒုံတန်တဲ့ နုဲင်းစွဉ်ႏဒုံတန်မွေးဒွုမ်၊ ဝေင်ꩻတဲ့ နုဲင်းစွဉ်ႏဝေင်ꩻမွေးဒွုမ်၊ ကထွာဗာႏနုဲင်းနဝ်ꩻနဝ်ꩻ အထျꩻအထောင်ꩻ အကျောင်ꩻတရာꩻ အဝ်ႏနုဲင်းမုဲင်ꩻဗွေႏဩ" "ပုဏ္ဏာꩻဟွေး- လိုꩻယိုခါဖုံႏနဝ်ꩻ တရာꩻတမဲဉ်ႏတဝ်းဒွုမ်၊ နေးတွမ်ႏထာꩻတတရာꩻတဝ်း (အဓမ္မ)တဲင် ထူႏသိမ်ꩻဝင်ꩻထာꩻ၊ တခွန်ꩻထာꩻ၊ စွန်ပါꩻ၊ နေးတွမ်ႏလောဘလွဉ်ꩻချိုꩻ (ဝိသမလောဘ)တဲင် နိစ္စက်ဝင်ꩻ၊ အံႏနွောင်ꩻဝင်ꩻ၊ နေးတွမ်ႏတရာꩻမဲ့ခေ့ꩻ အကျင်ꩻမာႏ(မိစ္ဆာဓမ္မ)တဲင် လꩻငါနီငါ၊ အံႏဗာႏငါနီငါ၊ ဟောဝ်ငါနီငါ၊ ပါꩻမဉ်ထွာနုဲင်းမုဲင်ꩻထွာ၊ မာꩻတငါတငီစွဉ်ႏထာꩻ၊ ကွပ်ပွိုးထူႏသီမ်ꩻဝင်ꩻထာꩻ၊ နိစ္စက်ပါꩻ၊ အံႏနွောင်ꩻပါꩻ၊ မာꩻငါငီထာꩻတဲင် ကခံႏဗာႏသားနဝ်ꩻ ခံႏနွောင်ꩻဒွုမ်တွော့ꩻ ထွိုင်ႏနက်ချာ (တောႏလန်ႏချာ)ထွာစဲ့ꩻပွယ်ꩻ၊ ခွေသီနာꩻသီ၊ နီသီဝင်ꩻသီ၊ ကွပ်ပွိုးတွိုက်ꩻလို့ဝင်ꩻတဲင် စဲ့ꩻသားပါ၊ အရပ်သားပါ သီအာငါႏတွော့ꩻ လိုꩻဆေ့ꩻထိုꩻဗာႏ၊ လိုꩻကဆေ့ꩻထိုꩻဗာႏ အကျောင်ꩻတရာꩻကိုနဝ်ꩻ 'ကွပ်ပွိုးတွိုက်ꩻလို့ဝင်ꩻ'နဝ်ꩻတဲ့ ထွာ(သတ္ထန္တရကပ်)အကျောင်ꩻတရာꩻ တပါꩻနေနေသွူ။ ပုဏ္ဏာꩻဟွေး- လိုꩻယိုခါဖုံႏနဝ်ꩻ တရာꩻတမဲဉ်ႏတဝ်းဒွုမ်၊ နမ်းကျင်ꩻတမဲဉ်ႏတဝ်းဒွုမ်၊ (ကာယဒုစရဲက်သားကဲဉ်းအာ) ဖြောင်းကျင်ꩻတမဲဉ်ႏတဝ်းဒွုမ် (ဝစီဒုစရဲက်သားကဲဉ်းအာ)၊ သꩻကျင်ꩻတမဲဉ်ႏတဝ်း (မနော်ꩻဒုစရဲက်သားကဲဉ်းအာ)၊ သီႏလအဲဉ်ထဝ်းဒွုမ်၊ မေတ္တာႏထာꩻရက်၊ ကရုဏာႏထာꩻသညင်ꩻအဲဉ်ထဝ်းဒွုမ်သား အာလွဉ်တဲင် သꩻခိုးလျားအာ၊ သꩻဒုက္ခအာ၊ နမ်းဒုက္ခအာ။ ကွပ်နဝ်ꩻမꩻ ရာႏသီႏဥတုတဲ့ မဲဉ်ႏဒွုမ်၊ အခိန်ႏတမွေးတဝ်းတဲ့ ထီတန်၊ တလီꩻသန်၊ ထီအီခြွဉ်ႏ၊ လမ်းပြင်ꩻ၊ လမ်းတေင်၊ လိုꩻသီအာ၊ ခမ်းခေါင်ႏ၊ ခမ်းလော့တဝ်း၊ လို့ပ်ꩻထာꩻလꩻတဝ်း၊ လုပ်ꩻထာꩻထွာတဝ်း၊ အံႏမထာꩻတဲင် လိုꩻသီအာငါႏတွော့ꩻ လိုꩻဆေ့ꩻထိုꩻဗာႏ၊ လိုꩻကဆေ့ꩻထိုꩻဗာႏ အကျောင်ꩻတရာꩻကိုနဝ်ꩻ 'ကွပ်ပွိုးဥတုမဲဉ်ႏတဝ်း၊ လုပ်ꩻထာꩻထွာတဝ်း၊ အံႏမသီထာꩻ' နဝ်ꩻတဲ့ ထွာ(ဒုဗ္ဘိက္ခန္တရကပ်)အကျောင်ꩻတရာꩻ တပါꩻနေနေသွူ။ ပုဏ္ဏာꩻဟွေး- လိုꩻဖုံႏထွိုင်ႏသီအာတဲင် အလွီးနွုမ်ꩻသေင်တန်၊ ဖီးဖူꩻလောႏ၊ ဘီလူꩻလောႏတဲင် လိုꩻဖုံႏမော့ꩻတောကပ်ရောႏဂါႏ၊ ဆာအာꩻ သီအာ၊ ကွပ်ပွိုးသီအာတွမ်ႏ ကပ်ရောႏဂါႏနဝ်ꩻတဲင် လိုꩻဆေ့ꩻထိုꩻ၊ လိုꩻကဆေ့ꩻထိုꩻဗာႏအကျောင်ꩻတရာꩻကိုနဝ်ꩻ 'ကွပ်ပွိုးမော့ꩻ ကပ်ရောႏဂါႏ'နဝ်ꩻတဲ့ ထွာ(ရောဂန္တရကပ်)အကျောင်ꩻတရာꩻ တပါꩻနေနေသွူ။ ပုဏ္ဏာꩻနဝ်ꩻ ကထင်ႏဟွူန်ဗာႏ ဗွေႏဘုရာꩻသျင်ꩻနယ် အခရာႏနဝ်ꩻတဲင် ဟွုန်ငမ်းသꩻဝꩻ၊ သံႏဝွေႏဂလꩻတွော့ꩻ နွို့သော့ꩻစွဉ်ႏ ဗုဒ္ဓဘာႏသာႏ၊ ထွာစွဉ်ႏဒျာႏ ဥပါႏသကာႏတဖြာꩻနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ ပလောကသုတ်)[၁][၂]