လွေꩻထေ့ထွိုက်ငါႏ ခိန်ႏခါႏသူမျိုꩻ
"ပဌမ သမယသုတ် (လွေꩻထေ့ထွိုက်ငါႏ ခိန်ႏခါႏသူမျိုꩻ)" ရဟန်ꩻတပါꩻနဝ်ꩻ လွေꩻထေ့ဗွေႏဘုရာꩻ၊ ဝုဲင်ႏဘုရာꩻထွူခါ ရီပါနုဲင်းယို- "ဩဗွေႏ ဘုရာꩻမျတ်ဗွေႏဩ- ရဟန်ꩻတပါꩻနဝ်ꩻ ဒေါ့ꩻသꩻရေꩻဖေႏဒါႏလိုꩻ၊ ဒေါ့ꩻသꩻဆွော့ꩻဖေႏဒါႏလိုꩻ၊ ဒေါ့ꩻသꩻတလာ(ဒေါ့ꩻအာႏတက်)ဖေႏဒါႏလိုꩻ၊ ကဟောဝ်ဆယ်ꩻကပ် ရဟန်ꩻမျတ်၊ ရဟန်ꩻဒါႏနဝ်ꩻနဝ်ꩻ ခိန်ႏခါႏအဝ်ႏကားမုဲင်ꩻမျိုꩻ ဗွေႏဩ" "ရဟန်ꩻဟွေး- ခိန်ႏခါႏအဝ်ႏသူမျိုꩻ၊ သူမျိုꩻကရိုꩻနောဝ်ꩻ- ၁။ သာႏသနာႏကိုယို ရဟန်ꩻ(တပါꩻ)နောဝ်ꩻ အုံထာꩻလောႏဘꩻထွာ၊ သꩻအဝ်ႏယူႏမွိုင်းဒျာႏ ကာႏမဂွုဏ်ႏ အာႏရွုံႏငတ်ꩻပါꩻ၊ ကာမရာႏဂနိစ္စက်တဲင် အုံထာꩻယူႏပက်နာႏ၊ သꩻဖေႏကယူႏမွုန်း ကာႏမဂွုဏ်ႏနောဝ်ꩻ အီႏမာꩻဗာႏနုဲင်းမုဲင်ꩻသေတဝ်း၊ ပေါႏထွာနုဲင်းနဝ်ꩻနဝ်ꩻ လိုႏလွေꩻထေ့ရဟန်ꩻဒါႏ၊ ပေါႏလောဝ်းနယ်နဝ်ꩻ ရဟန်ꩻဒါႏ အီႏဟော်ꩻဖေႏတရာꩻ (အသုဘကမ္မဋ္ဌာန်ꩻ)၊ ယိုနဝ်ꩻ ဟောဝ်လွေꩻထေ့ငါႏ ပဌမအခိန်ႏအခါႏနောဝ်ꩻသွူ။ ၂။ သာႏသနာႏကိုယို ရဟန်ꩻ(တပါꩻ)အုံထာꩻဒေါႏသꩻထွာ၊ ဒေါႏသꩻနိစ္စက်တွော့ꩻ အုံထာꩻယူႏပက်နာႏ၊ အီႏမာꩻဗာႏနုဲင်းမုဲင်ꩻသေတဝ်း၊ ပေါႏထွာနုဲင်းနဝ်ꩻ လိုႏလွေꩻထေ့ငါႏ ရဟန်ꩻဒါႏ၊ ပေါႏလောဝ်းနယ်နဝ်ꩻ ရဟန်ꩻအီႏ အီႏဟော်ꩻဖေႏတရာꩻ (မေတ္တာႏကမ္မဋ္ဌာန်ꩻ)ယိုနဝ်ꩻ ထွာဟောဝ်လွေꩻထေ့ငါႏ ဒုတိယအခိန်ႏခါႏနဝ်ꩻသွူ။ ၃။ သာႏသနာႏကိုယို ရဟန်ꩻ(တပါꩻ)န၀်ꩻ အုံထာꩻလွꩻသေႏသေႏ တခေင်ꩻသေႏသေႏထာꩻ၊ သꩻလွꩻ-သꩻတခေင်ꩻနိစ္စက်တဲင် အုံထာꩻယူႏပက်နာႏ၊ အီႏမာꩻဗာႏနုဲင်းမုဲင်ꩻသေတဝ်း၊ ပေါႏထွာနုဲင်းနဝ်ꩻနဝ်ꩻ လိုႏလွေꩻထေ့ငါႏ ရဟန်ꩻဒါႏ၊ ပေါႏလောဝ်းနယ်နဝ်ꩻ ရဟန်ꩻဒါႏ အီႏဟော်ꩻဖေႏတရာꩻ (ထိနမိဒ္ဓဝိနောဒနကမ္မဋ္ဌာန်ꩻ-ကမ္မဋ္ဌာန်ꩻပယ်ႏထိုꩻ သꩻလွꩻ၊ သꩻတခေင်ꩻ)ယိုနဝ်ꩻ ဟောဝ်လွေꩻထေ့ငါႏ တတိယအခိန်ႏခါႏနောဝ်ꩻသွူ။ ၄။ သာႏသနာႏကိုယို ရဟန်ꩻ(တပါꩻ)နဝ်ꩻ အုံထာꩻသꩻလော်လယ်၊ သꩻနောင်ႏတကော့ꩻမာႏ၊ သꩻလော်လယ်ဥဒ္ဓစ္စ၊ သꩻနောင်ႏတကော့ꩻမာႏ-ကုက္ကုစ္စနိစ္စက်တွော့ꩻ အုံထာꩻယူႏပက်ငါႏ၊ အီႏမာꩻဗာႏနုဲင်းမုဲင်ꩻသေတဝ်း၊ ပေါႏထွာနုဲင်းနဝ်ꩻနဝ်ꩻ လိုႏလွေꩻထေ့ငါႏ ရဟန်ꩻဒါႏ၊ ပေါႏလောဝ်းနယ်ရဟန်ꩻဒါႏနဝ်ꩻ အီႏဟော်ꩻဖေႏတရာꩻ၊ (သမထကမ္မဋ္ဌာန်ꩻ) ယိုနဝ်ꩻ ဟောဝ်လွေꩻထေ့ငါႏ စတုတ္ထအခိန်ႏခါႏနောဝ်ꩻသွူ။ ၅။ သာႏသနာႏကိုယို ရဟန်ꩻ(တပါꩻ)နဝ်ꩻ အုံထာꩻသꩻသံသယထွာ ရတနာႏသွံပါꩻလောင်း၊ သꩻသံသယ ဝိစိကိစ္ဆာနိစ္စက်တဲင် အုံထာꩻယူႏပက်နာႏ၊ အီႏမာꩻဗာႏနုဲင်းမုဲင်ꩻသေတဝ်း၊ ပေါႏထွာနုဲင်းနဝ်ꩻနဝ်ꩻ လိုႏလွေꩻထေ့ငါႏ ရဟန်ꩻဒါႏ၊ ပေါႏလောဝ်းနယ်နဝ်ꩻ ရဟန်ꩻဒါႏ အီႏဟော်ꩻဖေႏတရာꩻ (ရတနာႏသွံပါꩻ ဂွုဏ်ႏကေꩻဇူꩻ) ယိုနဝ်ꩻ ဟောဝ်လွေꩻထေ့ငါႏ ပဉ္စမအခိန်ႏခါႏနောဝ်ꩻသွူ။ ၆။ သာႏသနာႏကိုယို ရဟန်ꩻ(တပါꩻ)နဝ်ꩻ အုံထာꩻအဝ်ႏစွယ်ꩻလမ်ꩻဒျာႏ နိမိတ်တမျိုꩻမျိုꩻ၊ နိမိတ်နဝ်ꩻနိစ္စက်တွော့ꩻ အုံထာꩻယူႏပက်နာႏ၊ အီႏမာꩻဗာႏနုဲင်းမုဲင်ꩻသေတဝ်း၊ ပေါႏထွာနုဲင်းနဝ်ꩻ လိုႏလွေꩻထေ့ငါႏ ရဟန်ꩻဒါႏ၊ ပေါႏလောဝ်းနယ်နဝ်ꩻ ရဟန်ꩻဒါႏ အီႏဟော်ꩻဖေႏတရာꩻ (အာသဝက္ခယ-လောဘ ဒိဋ္ဌိ မောဟလို့ရာꩻခရာႏ) ယိုနဝ်ꩻ ဟောဝ်လွေꩻထေ့ငါႏ ဆဋ္ဌအခိန်ႏခါႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဆက္ကနိပါတ်၊ ပဌမသမယသုတ်)[၁][၂]