လꩻအီပညာႏအကျောင်ꩻ၈-မျိုꩻ
"ပညာသုတ် (လꩻအီပညာႏ အကျောင်ꩻသွစ်ꩻမျိုꩻ)" ရဟန်ꩻသီးဖုံႏဟွေး- အကျင်ꩻမျတ် အထျꩻထျꩻနဝ်ꩻ "ပညာႏ-ထာꩻသေ"၊ အကျောင်ꩻသွစ်ꩻမျိုꩻဖုံႏယိုနဝ်ꩻ မဉ်ႏတလꩻတဝ်းပညာႏ-မဉ်ႏတသေနာႏတဝ်းဒွိုန်းတရာꩻတဲ့ 'လꩻအီပညာႏ-သေနာႏအီတရာꩻ'အကျောင်ꩻသွစ်ꩻပါꩻဖုံႏသွူ၊ ပေါႏလꩻ-ပေါႏသေထွူနဝ်ꩻ ဖေႏနေးကယိန်းတိုꩻပွါꩻအာအာ၊ ဖေႏနေးကယိန်းလွိုင်ႏကွုန်ꩻအာအာ၊ ဖေႏနေးကယိန်းပွါꩻငါငါ၊ ဖေႏနေးကစွစ်ꩻစဲစ်ꩻဗွေအာနဝ်ꩻ အကျောင်ꩻယိုသွစ်ꩻမျိုꩻ ထွာအထျꩻထျꩻနောဝ်ꩻသွူ။ ရဟန်ꩻသီးဖုံႏဟွေး- ကလꩻအီပညာႏ-ကသေနာႏအီတရာꩻ အကျောင်ꩻသွစ်ꩻပါꩻကရိုꩻနောဝ်ꩻ- ၁။ သာႏသနာႏတောႏကိုယို ရဟန်ꩻ(တပါꩻ)နဝ်ꩻ အအုံနောင်ဆရာႏဟောဝ်၊ အအုံနောင်သွꩻပေႏဟောဝ်၊ ဝွေꩻအီႏမာꩻထာꩻမာꩻကုဲင် (ကာယဒုစရဲက်)တမျိုꩻမျိုꩻ၊ ဝွေꩻအီႏဒေါ့ꩻ ထာꩻဒေါ့ꩻကုဲင် (ဝစီဒုစရဲက်)တမျိုꩻမျိုꩻ၊ ဝွေꩻအီႏယူႏ ထာꩻယူႏကုဲင် (မနော်ꩻဒုစရဲက်)တမျိုꩻမျိုꩻနဝ်ꩻ ဟွူန်ငမ်း၊ ဟွုန်ဝင်ꩻသꩻမွေးစဉ်ႏ အဆရာႏ၊ ဟွုန်အာႏနာႏမွေးစွဉ်ႏ ဝွေꩻသွꩻပေႏဟောဝ်တဲင် မာꩻတဝ်းအကုသိုလ်ႏ၊ မာꩻဒျာႏကုသိုလ်ႏ၊ ကွပ်နဝ်ꩻမꩻ ယိုနောဝ်ꩻ လꩻအီပညာႏ-သေနာႏအီတရာꩻ 'ပဌမ'အကျောင်ꩻတပါꩻနောဝ်ꩻသွူ။ ရဟန်ꩻသီးဖုံႏဟွေး- ၂။ သာႏသနာႏတောႏကိုယို ရဟန်ꩻနဝ်ꩻနဝ်ꩻ အဝ်ႏအုံနောင်ဆရာႏဟောဝ်၊ အဝ်ႏအုံနောင်သွꩻပေႏဟောဝ်အတွင်ꩻ ကျင်ꩻအကျင်ꩻမျတ်၊ မာꩻကုသိုလ်ႏလွုမ်ꩻတကာႏတောဝ်း ယလဲင်ႏလဲင်ႏနဝ်ꩻ လွေꩻထေ့အဆရာႏထျꩻ၊ လွေꩻထေ့သွꩻပေႏထျꩻထွူခါ ရီပါနုဲင်းယို- 'ဩဗွေႏ- ပါဠိယိုနဝ်ꩻ အရိုꩻထမုဲင်ꩻ၊ ဖေႏအနက်နုဲင်းမုဲင်ꩻနဲ၊ အဓိပ္ပါယ်ႏထန်ႏနုဲင်းမုဲင်ꩻနဲ'ရီနုဲင်းနဝ်ꩻ၊ မဉ်သေမဉ်ဒါႏ ထေပုစ္ဆာႏ၊ မာꩻပျဿနာႏနုဲင်းနဝ်ꩻ။ ဝွေꩻဆရာႏ ဝွေꩻသွꩻပေႏဖုံႏတဲ့ ဗွောင်နယ်လုဲင်းလုဲင်း၊ သျင်ꩻခြုဲင်းစဲင်းစဲ့၊ မာꩻထဲ့ထိုꩻ ဝွေꩻသံသယ၊ ဖျင်စွို့ꩻဖေႏ ထာꩻယူႏမာႏ၊ ကွပ်နဝ်ꩻမꩻ ယိုနဝ်ꩻ လꩻအီပညာႏ-သေနာႏအီတရာꩻ 'ဒုတိယ'အကျောင်ꩻတပါꩻနောဝ်ꩻသွူ။ ရဟန်ꩻသီးဖုံႏဟွေး- ၃။ သာႏသနာႏတောႏကိုယို ရဟန်ꩻနဝ်ꩻနဝ်ꩻ နာႏဗာႏတရာꩻနဝ်ꩻ (သေနာႏစဲင်းစဲ့တရာꩻနဝ်ꩻ)တဲင် နမ်းတဲ့ အုံခေါ်ထိုꩻသွꩻ၊ သꩻတဲ့ ဖညာꩻထိုꩻကိလေႏသာႏ၊ ဝွေꩻလွောက်ꩻနာႏ စီꩻကန်ꩻနဝ်ꩻနီချက်၊ ကွပ်နဝ်ꩻမꩻ ယိုနဝ်ꩻ လꩻအီပညာႏ-သေနာႏအီတရာꩻ 'တတိယ'အကျောင်ꩻတပါꩻနောဝ်ꩻသွူ။ ရဟန်ꩻသီးဖုံႏဟွေး- ၄။ သာႏသနာႏတောႏကိုယို ရဟန်ꩻနဝ်ꩻနဝ်ꩻ သီႏလအဝ်ႏ၊ အုံဟောဝ်ဟောဝ် အုံဒါႏဒါႏ၊ လွောက်ꩻနာႏလွဉ်ꩻဒျာႏ နီဗွေႏဘုရာꩻစီꩻကန်ꩻ၊ 'အပဲ့စ်ပေႏပေႏဒျာႏ၊ အမာႏဆေ့ꩻဆေ့ꩻပေႏတဲ့ယဝ်း ထီႏဖွီတဝ်း၊ မတ်နုဲင်းမေႏ-ရေႏနုဲင်းဘေꩻ'တဲင် အကျင်ꩻဟောဝ်၊ အုံအောဝ်ႏမဲဉ်ႏ၊ ကွပ်နဝ်ꩻမꩻ ယိုနဝ်ꩻ လꩻအီပညာႏ-သေနာႏအီတရာꩻ 'စတုတ္ထ'အကျောင်ꩻတပါꩻနောဝ်ꩻသွူ။ ရဟန်ꩻသီးဖုံႏဟွေး- ၅။ သာႏသနာႏတောႏကိုယို ရဟန်ꩻနောဝ်ꩻနောဝ်ꩻ အဟွူန်အထီႏအာ၊ ရွမ်ခါꩻ အဟွုန်အထီႏ၊ ထိုမ်ႏတွမ်အဟွုန်အထီႏ၊ အထျꩻယံ တရာꩻမျိုꩻ၊ အထဝကျ တရာꩻမျိုꩻ၊ အနာယံကျ တရာꩻမျိုꩻ၊ အဓိပ္ပါယ်ႏဟောဝ်ဟောဝ်၊ အထီဗွေဝန်ႏ၊ ထွိုက်တန်ႏစင်ဗွာ၊ ကထွာအီအကျင်ꩻမျတ် (အာယတနဓါတ်ခန္ဓာႏ၊ သစ္စာႏ)တရာꩻဖုံႏယို နာႏဖိုအာတန်၊ ဒါႏအိုမ်အာတန်၊ ရွစ်သေႏသေႏအာတန်၊ တောင်ꩻခါꩻသꩻကိုအာတန်၊ နေးတွမ်ႏပညာႏ သေနာႏသဘော်ꩻဗွောင်အာတန်၊ ကွပ်နဝ်ꩻမꩻ ယိုနဝ်ꩻ လꩻအီပညာႏ-သေနာႏအီတရာꩻ 'ပဉ္စမ'အကျောင်ꩻတပါꩻနောဝ်ꩻသွူ။ ရဟန်ꩻသီးဖုံႏဟွေး- ၆။ သာႏသနာႏတောႏကိုယို ရဟန်ꩻနောဝ်ꩻနဝ်ꩻ ကျိုꩻစာꩻပယ်ႏထိုꩻမွေး အကုသိုလ်ႏ၊ ကျိုꩻစာꩻမာꩻမွေးစွဉ်ႏကုသိုလ်ႏ၊ မာꩻတဲ့ မာꩻနွောင်ꩻမွေးစွဉ်ႏ၊ ဝီရိယတဲ့ တဉ်ႏခွေါင်မွေးစွဉ်ႏ၊ တန်ꩻတဝ်း ဖုဲင်ႏတဝ်း အွဉ်ႏလွတ်ထိုꩻကုသိုလ်ႏနဝ်ꩻ အဝ်ႏဖိုဖိုတဝ်း၊ ကွပ်နဝ်ꩻမꩻ ယိုနဝ်ꩻ လꩻအီပညာႏ-သေနာႏအီတရာꩻ'ဆဋ္ဌ'အကျောင်ꩻတပါꩻနဝ်ꩻသွူ။ ရဟန်ꩻသီးဖုံႏဟွေး- ၇။ သာႏသနာႏတောႏကိုယို ရဟန်ꩻနဝ်ꩻနဝ်ꩻ ပေါႏတွိုႏလွေꩻ သံဃာႏခြာနဝ်ꩻ ဒေါ့ꩻဗြောဗြောဗြားဗြားတဝ်းထာꩻ (ငေါဝ်းအာမွိုꩻမာꩻ ဒေါ့ꩻစွုမ်ႏစမ်ႏတဝ်းထာꩻ) ငေါဝ်းကခတ်ꩻမဂ်ဖိုလ်ႏ-ငေါဝ်းကုသိုလ်ႏ တမွေးတဝ်းနဝ်ꩻ ဒေါ့ꩻတဝ်း၊ နမ်းတဲ့ ဟော်ꩻတရာꩻ၊ ဝင်ꩻတဲ့ ဝွေꩻတောင်ꩻပြန်ႏ ထွဉ်ႏဟော်ꩻတရာꩻ၊ (ပေါႏဝင်ꩻဟော်ꩻတရာꩻတဲ့ နာႏရိုႏရိုႏသေႏသေႏ) ခါးလားကဒေါ့ꩻပျင်ႏထာꩻနဝ်ꩻ အုံတေ့ꩻတေ့ꩻထာꩻနဝ်ꩻ ဟောဝ်ထဲင်း ယူႏဒျာႏနုဲင်းနောဝ်ꩻ၊ ကွပ်နဝ်ꩻမꩻ ယိုနဝ်ꩻ လꩻအီပညာႏ-သေနာႏအီတရာꩻ 'သတ္တမ'အကျောင်ꩻတပါꩻနောဝ်ꩻသွူ။ ရဟန်ꩻသီးဖုံႏဟွေး- ၈။ သာႏသနာႏတောႏကိုယို ရဟန်ꩻနဝ်ꩻနဝ်ꩻ အုံထာꩻ အဝ်ႏထွားတရာꩻနုဲင်းယို- (က) ယိုနဝ်ꩻ 'ရုပ်၊ ယိုနဝ်ꩻ ထွာအီရုပ် အကျောင်ꩻတရာꩻ၊ ယိုနဝ်ꩻ ရုပ်ဖေ့ထိုꩻမားအီအကျောင်ꩻတရာꩻ' (ခ) ယိုနဝ်ꩻ 'ဝွေႏဒနာႏ၊ ယိုနဝ်ꩻ ထွာအီဝွေႏဒျာႏ အကျောင်ꩻတရာꩻ၊ ယိုနဝ်ꩻ ဝွေႏဒနာႏဖေ့ထိုꩻမားအီ အကျောင်ꩻတရာꩻ' (ဂ) ယိုနဝ်ꩻ 'သညာႏ၊ ယိုနဝ်ꩻ ထွာအီသညာႏ အကျောင်ꩻတရာꩻ၊ ယိုနောဝ်ꩻ သညာႏဖေ့ထိုꩻမားအီ အကျောင်ꩻတရာꩻ' (ဃ) ယိုနဝ်ꩻ 'သင်္ခါႏရ၊ ယိုနဝ်ꩻ ထွာအီသင်္ခါႏရ အကျောင်ꩻတရာꩻ၊ ယိုနောဝ်ꩻ သင်္ခါႏရဖေ့ထိုꩻမားအီ အကျောင်ꩻတရာꩻ' (င) ယိုနဝ်ꩻ 'ဝိညာဏ်ႏ၊ ယိုနဝ်ꩻ ထွာအီဝိညာဏ်ႏ အကျောင်ꩻတရာꩻ၊ ယိုနဝ်ꩻ ဝိညာဏ်ႏဖေ့ထိုꩻမားအီ အကျောင်ꩻတရာꩻ' အုံထာꩻနေးတွမ်ႏဉာဏ်ႏ အဝ်ႏထွား အဝ်ႏဝွေႏဖန်ႏဒျာႏ ဥပါဒါနက္ခန္ဓာႏငတ်ꩻပါꩻ၊ တရာꩻအထွာအကုဲင်နုဲင်းနဝ်ꩻ၊ ကွပ်နဝ်ꩻမꩻ ယိုနဝ်ꩻ လꩻအီပညာႏ-သေနာႏအီတရာꩻ 'အဋ္ဌမ'အကျောင်ꩻတပါꩻနဝ်ꩻသွူ။ ရဟန်ꩻနဝ်ꩻနဝ်ꩻ အသွꩻဖုံႏ အံႏဖြာႏလွနုဲင်းယို- ၁။ "ဝွေꩻဗွေႏယိုနဝ်ꩻ အုံနောင်ဆရာႏဟောဝ်၊ အုံနောင်သွꩻပေႏဟောဝ်၊ ပေါႏဝွေꩻဗွေႏ အီႏမာꩻထာꩻမာꩻကုဲင် တမျိုꩻမျိုꩻနဝ်ꩻ ဟွူန်ငမ်း၊ ဟွုန်ဝင်ꩻသꩻမွေးစွဉ်ႏ အဆရာႏ၊ ဟွုန်အာႏနာႏမွေးစွဉ်ႏ ဝွေꩻဗွေႏသွꩻပေႏဟောဝ်တဲင် မာꩻတောဝ်းအကုသိုလ်ႏ၊ မာꩻဒျာႏကုသိုလ်ႏဟ တိတ်ချဝွေꩻဗွေႏယိုနဝ်ꩻ ကသေထွိုက်တရာꩻနဝ်ꩻ သေဒျာႏရင်ꩻ၊ ကထီႏသင်ꩻတရာꩻနဝ်ꩻ ထီႏသေႏချာႏ"အံႏဖြာႏလွနုဲင်းနဝ်ꩻ။ ကအံႏဖြာႏ နုဲင်းယိုနဝ်ꩻတဲ့ ထွာဒျာႏ ယံကရက်စိုမ်ꩻလို့ဝင်ꩻ၊ ဖေႏကရိုႏသေႏလို့ဝင်ꩻ၊ ယံဖေႏကဟွုန်ဟောဝ်လို့ဝင်ꩻ၊ ဖေႏနေးကလꩻ ရဟန်ꩻတရာꩻ၊ ယံဖေႏနေးကထွာ တဗူႏချင်ႏဒျာႏနောဝ်ꩻသွူ။ ၂။ "ဝွေꩻဗွေႏယိုနဝ်ꩻ- အဝ်ႏအုံနောင်ဆရာႏဟောဝ်၊ အဝ်ႏအုံနောင် သွꩻပေႏဟောဝ်အတွင်ꩻ ကျင်ꩻအကျင်ꩻမျတ်၊ မာꩻကုသိုလ်ႏလွုမ်ꩻတကာႏတဝ်း၊ ရီအဆရာႏ၊ ရီအသွꩻ၊ ပါဠိအနက်အဓိပ္ပါယ်ႏ၊ ဝွေꩻဗွေႏဆရာႏ၊ ဝွေꩻဗွေႏသွꩻတဲ့ ဗွောင်နယ်လုဲင်းလုဲင်း ခြုဲင်းနယ်စဲင်းစဲ့၊ မာꩻထဲ့ထိုꩻ ဝွေꩻဗွေႏသံသယ၊ ဖျင်စွို့ꩻဖေႏ ဝွေꩻဗွေႏထာꩻယူႏမာႏဟ တိတ်ချဝွေꩻဗွေႏယိုနဝ်ꩻ ကသေထွိုက်တရာꩻနဝ်ꩻ သေဒျာႏရင်ꩻ၊ ကထီႏသင်ꩻတရာꩻနဝ်ꩻ ထီႏသေႏချာႏ"အံႏဖြာႏလွနုဲင်းနဝ်ꩻ။ ကအံႏဖြာႏ နုဲင်းယိုနဝ်ꩻတဲ့ ထွာဒျာႏ ယံကရက်စိုမ်ꩻလို့ဝင်ꩻ၊ ဖေႏကရိုႏသေႏလို့ဝင်ꩻ၊ ယံဖေႏကဟွူန်ဟောဝ်လို့ဝင်ꩻ၊ ဖေႏနေးကလꩻ ရဟန်ꩻတရာꩻ၊ ယံဖေႏနေးကထွာ တဗူႏချင်ႏဒျာႏနောဝ်ꩻသွူ။ ၃။ "ဝွေꩻဗွေႏယိုနဝ်ꩻ- နာႏဗာႏတရာꩻနဝ်ꩻ (သေနာႏစဲင်းစဲ့တရာꩻနဝ်ꩻ)တဲင် နမ်းတဲ့ အုံခေါ်ထိုꩻသွꩻ၊ သꩻတဲ့ ဖညာꩻထိုꩻကိလေႏသာႏ၊ ဝွေꩻဗွေႏလောက်ꩻနာႏ စီꩻကန်ꩻနဝ်ꩻနီချက်ဟ တိတ်ချဝွေꩻဗွေႏယိုနဝ်ꩻ ကသေထွိုက်တရာꩻနောဝ်ꩻ သေဒျာႏရင်ꩻ၊ ကထီႏသင်ꩻတရာꩻနဝ်ꩻ ထီႏသေႏချာႏ"အံႏဖြာႏလွနုဲင်းနဝ်ꩻ။ ကအံႏဖြာႏ နုဲင်းယိုနဝ်ꩻတဲ့ ထွာဒျာႏ ယံကရက်စိုမ်ꩻလို့ဝင်ꩻ၊ ဖေႏကရိုႏသေႏလို့ဝင်ꩻ၊ ယံဖေႏကဟွူန်ဟောဝ်လို့ဝင်ꩻ၊ ဖေႏနေးကလꩻ ရဟန်ꩻတရာꩻ၊ ယံဖေႏနေးကထွာ တဗူႏချင်ႏဒျာႏနောဝ်ꩻသွူ။ ၄။ "ဝွေꩻဗွေႏယိုနဝ်ꩻ- သီႏလအဝ်ႏ၊ အုံဟောဝ်ဟောဝ် အဝ်ႏဒါႏဒါႏ၊ လွောက်ꩻနာႏလွဉ်ꩻဒျာႏ နီဗွေႏဘုရာꩻစီꩻကန်ꩻ၊ အပဲ့စ်ပေႏပေႏဒျာႏ-အမာႏဆေ့ꩻဆေ့ꩻပေႏတဲ့ယဝ်း ထီႏဖွီတဝ်း၊ မတ်နုဲင်းမေႏ-ရေႏနုဲင်းဘေꩻတဲင် အကျင်ꩻဟောဝ်၊ အုံအောဝ်ႏမဲဉ်ႏဟ တိတ်ချဝွေꩻဗွေႏယိုနဝ်ꩻ ကသေထွိုက်တရာꩻနဝ်ꩻ သေဒျာႏရင်ꩻ၊ ကထီႏသင်ꩻတရာꩻနဝ်ꩻ ထီႏသေႏချာႏ"အံႏဖြာႏလွနုဲင်းနောဝ်ꩻ။ ကအံႏဖြာႏ နုဲင်းယိုနဝ်ꩻတဲ့ ထွာဒျာႏ ယံကရက်စိုမ်ꩻလို့ဝင်ꩻ၊ ဖေႏကရိုႏသေႏလို့ဝင်ꩻ၊ ယံဖေႏကဟွူန်ဟဝ်လို့ဝင်ꩻ၊ ဖေႏနေးကလꩻ ရဟန်ꩻတရာꩻ၊ ယံဖေႏနေးကထွာ တဗူႏချင်ႏဒျာႏနောဝ်ꩻသွူ။ ၅။ "ဝွေꩻဗွေႏယိုနဝ်ꩻ- အဟွူန်အထီႏအာ၊ ရွမ်ခါꩻအဟွုန်အထီႏ၊ ထိုမ်ႏတွမ်အဟွုန်အထီႏ၊ အထျꩻယံတရာꩻမျိုꩻ၊ အထဝကျတရာꩻမျိုꩻ၊ အနာယံကျ တရာꩻမျိုꩻ၊ အဓိပ္ပါယ်ႏဟောဝ်ဟောဝ် အထီဗွေဝန်ႏ၊ ထွိုက်တန်ႏစင်ဗွာ၊ ကထွာအီအကျင်ꩻမျတ်၊ (အာယတနဓါတ်ခန္ဓာႏ၊ သစ္စာႏ)တရာꩻဖုံႏယို နာႏဖိုအာတန်၊ ဒါႏအိုမ်အာတန်၊ ရွစ်သေႏသေႏအာတန်၊ တောင်ꩻခါꩻသꩻကိုအာတန်၊ နေးတွမ်ႏပညာႏ သေနာႏသဘော်ꩻဗွောင်အာတန်ဟ တိတ်ချဝွေꩻဗွေႏယိုနဝ်ꩻ ကသေထွိုက်တရာꩻနဝ်ꩻ သေဒျာႏရင်ꩻ၊ ကသေသင်ꩻတရာꩻနဝ်ꩻ ထီႏသေႏချာႏ"အံႏဖြာႏလွနုဲင်းနဝ်ꩻ။ ကအံႏဖြာႏ နုဲင်းယိုနဝ်ꩻတဲ့ ထွာဒျာႏ ယံကရက်စိုမ်ꩻလို့ဝင်ꩻ၊ ဖေႏကရိုႏသေႏလို့ဝင်ꩻ၊ ယံဖေႏကဟွူန်ဟဝ်လို့ဝင်ꩻ၊ ဖေႏနေးကလꩻ ရဟန်ꩻတရာꩻ၊ ယံဖေႏနေးကထွာ တဗူႏချင်ႏဒျာႏနောဝ်ꩻသွူ။ ၆။ "ဝွေꩻဗွေႏယုနဝ်ꩻ- ကျိုꩻစာꩻပယ်ႏထိုꩻမွေး အကုသိုလ်ႏ၊ ကျိုꩻစာꩻမာꩻမွေးစွဉ်ႏ ကုသိုလ်ႏ၊ မာꩻတဲ့ မာꩻနွောင်ꩻမွေးစွဉ်ႏ၊ ဝီရိယတဲ့ တဉ်ႏခွေါင်မွေးစွဉ်ႏ၊ တန်ꩻတဝ်း ဖုဲင်ႏတဝ်း အွဉ်ႏလွတ်ထိုꩻကုသိုလ်ႏနဝ်ꩻ အဝ်ႏဖိုဖိုတဝ်းဟ တိတ်ချဝွေꩻဗွေႏယိုနဝ်ꩻ ကသေထွိုက်တရာꩻနဝ်ꩻ သေဒျာႏရင်ꩻ၊ ကသေသင်ꩻတရာꩻနဝ်ꩻ ထီႏသေႏချာႏ"အံႏဖြာႏလွနုဲင်းနဝ်ꩻ။ ကအံႏဖြာႏ နုဲင်းယိုနဝ်ꩻတဲ့ ထွာဒျာႏ ယံကရက်စိုမ်ꩻလို့ဝင်ꩻ၊ ဖေႏကရိုႏသေႏလို့ဝင်ꩻ၊ ယံဖေႏကဟွူန်ဟဝ်လို့ဝင်ꩻ၊ ဖေႏနေးကလꩻ ရဟန်ꩻတရာꩻ၊ ယံဖေႏနေးကထွာ တဗူႏချင်ႏဒျာႏနောဝ်ꩻသွူ။ ၇။ "ဝွေꩻဗွေႏယိုနဝ်ꩻ- ပေါႏတွိုႏလွေꩻ သံဃာႏခြာနဝ်ꩻ ဒေါ့ꩻဗြောဗြောဗြားဗြားတဝ်းထာꩻ (ငေါဝ်းအာမွိုꩻမာꩻ ဒေါ့ꩻစွုမ်ႏစမ်ႏတဝ်းထာꩻ) ငေါဝ်းကခတ်ꩻမဂ်ဖိုလ်ႏ-ငေါဝ်းကုသိုလ်ႏ တမွေးတဝ်းနဝ်ꩻ ဒေါ့ꩻတဝ်း၊ နမ်းတဲ့ ဟော်ꩻတရာꩻ၊ ဝင်ꩻတဲ့ ဝွေꩻတောင်ꩻပြန်ႏ ထွဉ်ႏဟော်ꩻတရာꩻ၊ (ပေါႏဝင်ꩻဟော်ꩻတရာꩻတဲ့ နာႏရိုႏရိုႏသေႏသေႏ) ခါးလားကဒေါ့ꩻပျင်ႏထာꩻနဝ်ꩻ အုံတေ့ꩻတေ့ꩻထာꩻနဝ်ꩻ ဟောဝ်ထဲင်း ယူႏဒျာႏနုဲင်းနဝ်ꩻဟ တိတ်ချဝွေꩻဗွေႏယိုနဝ်ꩻ ကသေထွိုက်တရာꩻနဝ်ꩻ သေဒျာႏရင်ꩻ၊ ကသေသင်ꩻတရာꩻနဝ်ꩻ ထီႏသေႏချာႏ"အံႏဖြာႏလွနုဲင်းနဝ်ꩻ။ ကအံႏဖြာႏ နုဲင်းယိုနဝ်ꩻတဲ့ ထွာဒျာႏ ယံကရက်စိုမ်ꩻလို့ဝင်ꩻ၊ ဖေႏကရိုႏသေႏလို့ဝင်ꩻ၊ ယံဖေႏကဟွူန်ဟဝ်လို့ဝင်ꩻ၊ ဖေႏနေးကလꩻ ရဟန်ꩻတရာꩻ၊ ယံဖေႏနေးကထွာ တဗူႏချင်ႏဒျာႏနောဝ်ꩻသွူ။ ၈။ ဝွေꩻဗွေႏယိုနဝ်ꩻ- အုံထာꩻနေးတွမ်ႏဉာဏ်ႏ အဝ်ႏထွား အဝ်ႏဝွေႏဖန်ႏတရာꩻနုဲင်းယို- - ယိုနဝ်ꩻ ရုပ်၊ ဝွေႏဒနာႏ၊ သညာႏ၊ သင်္ခါႏရ၊ ဝိညာဏ်ႏ။ - ယိုနဝ်ꩻ ထွာအီရုပ်၊ ဝွေႏဒနာႏ၊ သညာႏ၊ သင်္ခါႏရ၊ ဝိညာဏ်ႏ အကျောင်ꩻတရာꩻ။ - ယိုနဝ်ꩻ ရုပ်၊ ဝွေႏဒနာႏ၊ သညာႏ၊ သင်္ခါႏရ၊ ဝိညာဏ်ႏ ဖေ့ထိုꩻမားအီ အကျောင်ꩻတရာꩻ၊ အုံထာꩻနေးတွမ်ႏဉာဏ်ႏ အဝ်ႏထွား အဝ်ႏဝွေႏဖန်ႏဒျာႏ ဥပါဒါနက္ခန္ဓာႏငတ်ꩻပါꩻ တရာꩻအထွာအကုဲင်နုဲင်းနဝ်ꩻဟ တိတ်ချဝွေꩻဗွေႏယိုနဝ်ꩻ ကသေထွိုက်တရာꩻနဝ်ꩻ သေဒျာႏရင်ꩻ၊ ကသေသင်ꩻတရာꩻနဝ်ꩻ ထီႏသေႏချာႏ"အံႏဖြာႏလွနုဲင်းနဝ်ꩻ။ ကအံႏဖြာႏ နုဲင်းယိုနဝ်ꩻတဲ့ ထွာဒျာႏ ယံကရက်စိုမ်ꩻလို့ဝင်ꩻ၊ ဖေႏကရိုႏသေႏလို့ဝင်ꩻ၊ ယံဖေႏကဟွူန်ဟဝ်လို့ဝင်ꩻ၊ ဖေႏနေးကလꩻ ရဟန်ꩻတရာꩻ၊ ယံဖေႏနေးကထွာ တဗူႏချင်ႏဒျာႏနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ အဋ္ဌကနိပါတ်၊ ပညာသုတ်)[၁][၂]