သက္ကာရသုတ်

"သက္ကာရသုတ်(လူႏ ပူႏဇောႏပစ္စေꩻလစ်ꩻပါꩻအကျောင်ꩻ)"

အွိုးခꩻတလဲင်ႏ နီဗွေႏဘုရာꩻ အဝ်ႏအုံသာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ ခွန်နင်ꩻတကာႏ ရာႏဇာႏသဌေꩻ ပစ္စေꩻလစ်ꩻပါꩻ လူႏခါꩻသံဃာႏ အာမွေးငါႏနောဝ်ꩻသွူ။ ပစ္စေꩻလစ်ꩻပါꩻကရိုꩻနဝ်ꩻ- "သင်္ကန်ꩻ၊ သွမ်ꩻ၊ ကျောင်ꩻ၊ တသီႏ"နောဝ်ꩻလစ်ꩻမျိုꩻဖုံႏသွူ။ ပစ္စေꩻလစ်ꩻပါꩻ ကလွိုင်ႏအာငါႏ အကျောင်ꩻတရာꩻနဝ်ꩻ ခွန်နင်ꩻတကာႏ ရာႏဇာႏသဌေꩻ လိုꩻဖြေꩻလိုꩻစာ-စတဲင်လိုꩻဖုံႏနဝ်ꩻ ကေႏညိုႏမွေးဘုရာꩻ၊ ရိုႏသေႏမွေးသံဃာႏတွော့ꩻ နေးတွမ်ႏစေႏတနာႏ သဒ္ဓါႏတရာꩻ လူႏလွပစ္စေꩻလစ်ꩻပါꩻနုဲင်းနောဝ်ꩻဖုံႏသွူ။ တွိုႏဘုရာꩻ တပဲ့ꩻသံဃာႏဖုံႏနဝ်ꩻ ပစ္စေꩻလစ်ꩻပါꩻလွိုင်ႏအာ၊ အဝ်ႏတွမ်ႏအလွိုတဲ့ သာႏသနာႏထန်ႏသား 'ပူရဏကဿပ၊ မက္ခလိဂေါသာလ၊ အဇိတကေသကမ္ဗလ၊ ပကုဓကစ္စာယန၊ သဉ္စယဗေလဋ္ဌပုတ္တ၊ နိဂဏ္ဌနာဋပုတ္တ' တိတ္ထိတက္ကတွဉ်ꩻ ဆရာႏတန်ယိုသူဖြာꩻတွမ်ႏ အတပဲ့ꩻဖုံႏနဝ်ꩻ ပစ္စေꩻလစ်ꩻပါꩻ ခြောမွေးမုဲင်းစွဉ်ႏထာꩻနောဝ်ꩻသွူ။ တကာႏခွန်နင်ꩻ ဝင်ꩻကကေႏညိုႏ ဘုရာꩻတွမ်ႏသံဃာႏ ဝင်ꩻကလူႏဒါႏ ဘုရာꩻတွမ်ႏသံဃာႏဖုံႏနောဝ်ꩻ ဝွေꩻသီးဟွုန်ဟဝ်တဝ်း၊ ဝွေꩻသီးတကေး၊ ဝွေꩻသီးလွꩻထီႏဘုရာꩻ၊ လွꩻထွားသံဃာႏဖုံႏနောဝ်ꩻသွူ။ ကွပ်နဝ်ꩻမꩻ ဒုံကိုတရိုꩻတဝ်း၊ ဝေင်ꩻကိုတရိုꩻတဝ်း၊ မုဲင်ꩻကိုကိုတရိုꩻတဝ်း ပေါႏဝွေꩻသီးထီႏသွူ ရဟန်ꩻသံဃာႏနဝ်ꩻ နေးတွမ်ႏငေါဝ်းအကျံꩻသွတ်ꩻ၊ နေးတွမ်ႏငေါဝ်းအဝွေႏသွတ်ꩻ ခွန်းထွမ်၊ "အီႏနက်သီ နုဲင်းယိုကွေး၊ အီႏမာꩻသီ သီကွေး"ခွန်းဒိုႏနုဲင်းနဝ်ꩻ၊ အံႏနွောင်ꩻရဟန်ꩻသံဃာႏ၊ မာꩻသျုတ်တရေင် ရဟန်ꩻသံဃာႏအမျိုꩻမျိုꩻ၊ ရဟန်ꩻသီးဖုံႏ ယိန်းအုံတေ့ꩻယိန်းခွန်း၊ ယိန်းယွုန်းယိန်းဒိုႏစွဉ်ႏနောဝ်ꩻသွူ။ ပွိုးနဝ်ꩻမꩻ ရဟန်ꩻသံဃာႏသီးဖုံႏနဝ်ꩻ ယွုန်းယောသယ်ꩻခံႏ အာလဲင်ႏငါႏလဲဉ်းသွူတဲင် ပွိုင်ႏပွိုင်ႏနောဝ်ꩻ လွေꩻလောဝ်းဗာႏစွဉ်ႏ ဗွေႏဘုရာꩻ- "ဩဗွေႏ ဘုရာꩻမျတ်ဗွေႏဩ- တိတ္ထိတက္ကတွဉ်ꩻဖုံႏနဝ်ꩻ မော့ꩻနီသွဉ်းသီး မုဲင်ꩻကိုကိုတဲ့ယဝ်း ခွန်းနီသွဉ်းသီး၊ ဒိုႏနီသွဉ်းသီး၊ အံႏနွောင်ꩻနီသွဉ်းသီး၊ မာꩻသျုတ်တရေင်နီသွဉ်းသီး ဗွေႏဩ" ရဟန်ꩻသီးဖုံႏ လော၀်းလွနုဲင်းနောဝ်ꩻသွူ။ နီဗွေႏဘုရာꩻရိုꩻ- "ဒုံကိုတရိုꩻတဝ်း၊ ဝေင်ꩻကိုတရိုꩻတဝ်း၊ မုဲင်ꩻကိုကိုတရိုꩻတဝ်း မဉ်ႏမော့ꩻလွဉ် 'ချမ်ꩻသာႏ'၊ မဉ်ႏမော့ꩻဗာႏ'ဒုက္ခ'နဝ်ꩻ ကမော့ꩻဗာႏ ထာꩻချမ်ꩻသာႏတွမ်ႏ ထာꩻဒုက္ခယိုနဝ်ꩻ ကွပ်ခွေမွေးတဝ်း၊ ပွိုးဝွေꩻမွေးတဝ်း၊ ကွပ်ပွိုးခန္ဓာႏငတ်ꩻပါꩻဒျာႏ၊ ခန္ဓာႏငတ်ꩻပါꩻ မဉ်ႏတအဲဉ်ထဝ်းနဝ်ꩻ အီႏမော့ꩻကဲ့ ထာꩻချမ်ꩻသာႏ၊ အီႏတလူႏဗာႏကဲ ထာꩻဒုက္ခနုဲင်းမုဲင်ꩻ" အံႏဖြာႏခန်းဒျာႏ ခန္ဓာႏသိမ်ꩻ၊ ခန္ဓာႏငိမ်ꩻနုဲင်းနောဝ်ꩻသွူ။ (သုတ္တန်ႏပိဋကတ်၊ ခုဒ္ဒကပါဌပါဠိတောႏ၊ သက္ကာရသုတ်)