သဒ္ဓါႏလက္ခဏာႏ

"သုဘူတိသုတ် (နီဗွေႏဘုရာꩻဟော်ꩻနယ်ဖေႏ ဗွေႏသုဘူတိတရာꩻ သဒ္ဓါႏလက္ခဏာႏ)" "ရဟန်ꩻသုဘူတိဟွေး- ၁။ သာႏသနာႏတောႏကိုယို ရဟန်ꩻ(တပါꩻ)နဝ်ꩻ သီႏလအဝ်ႏ၊ လွောက်ꩻနာႏဘုရာꩻစီꩻကန်ꩻ (ပါတိမောက်)၊ အကျင်ꩻ (အာစာရ)ဟောဝ်၊ လွေꩻသဲင်ꩻ (ဂေါစရ)ရော့ꩻ၊ အပဲ့စ်ပေႏပေႏတဲ့ ငမ်းမွေးစွဉ်ႏဒျာႏတဲင် ထိန်ꩻတီသိက္ခာႏ ယိုဖုံႏနဝ်ꩻ 'လိုꩻသဒ္ဓါႏတရာꩻအဝ်ႏ'အပွုံႏပတ်လက္ခဏာႏဖုံႏသွူ။ ၂။ ရဟန်ꩻနဝ်ꩻနဝ်ꩻ အထီႏအဟွူန်အာ၊ ထိုမ်ႏရွမ်အထီႏအဟွူန်၊ သွဉ်ဗာႏအာတရာꩻ၊ (မာꩻဗာႏအာလိတ်)၊ ဒါႏအွံခါꩻအာတန်၊ အဝ်ႏရွစ်ကုဲင်းတန်၊ မတ်ယူႏခါꩻသꩻကို၊ နေးတွမ်ႏပညာႏသေဖြောင်၊ ယိုဖုံႏနဝ်ꩻတဲ့ 'လိုꩻသဒ္ဓါႏတရာꩻအဝ်ႏ'အပွုံႏပတ်လက္ခဏာႏဖုံႏနေနေသွူ။ ၃။ ရဟန်ꩻနဝ်ꩻနဝ်ꩻ ဖူးဝေးဟောဝ်အဝ်ႏ၊ သွꩻပေႏဟောဝ်အဝ်ႏ၊ ငို့ထေ့ပုဂ္ဂိုလ်ႏဟောဝ်၊ ယိုဖုံႏနောဝ်ꩻတဲ့ 'လိုꩻသဒ္ဓါႏအဝ်ႏ'အပွုံႏပတ်လက္ခဏာႏဖုံႏနေနေသွူ။ ၄။ ရဟန်ꩻနဝ်ꩻနဝ်ꩻ ဆွုံꩻမꩻယိုꩻ၊ သူႏသေထာꩻ လိန်ႏမာႏ၊ သယ်ꩻခံႏဒါႏ၊ ရိုႏရိုႏသေႏသေႏ ခံႏထူႏငေါဝ်းဆွုံꩻမꩻ၊ ယိုဖုံႏနဝ်ꩻတဲ့ 'လိုꩻသဒ္ဓါႏအဝ်ႏ'အပွုံႏပတ်လက္ခဏာႏဖုံႏနေနေသွူ။ ၅။ ရဟန်ꩻနဝ်ꩻနဝ်ꩻ မာꩻဖေႏဒါႏ သံဃာႏကိစ္စ၊ မာꩻထာꩻလွꩻတောဝ်း၊ အီႏမာꩻဗာႏထမုဲင်ꩻ သူႏသေ၊ မာꩻတဲ့မာꩻနွောင်ꩻ၊ ယိုဖုံႏနဝ်ꩻတဲ့ 'လိုꩻသဒ္ဓါႏတရာꩻအဝ်ႏ'အပွုံႏပတ်လက္ခဏာႏဖုံႏနေနေသွူ။ ၆။ ရဟန်ꩻနဝ်ꩻနဝ်ꩻ ဝါႏသနာႏတရာꩻ၊ ဒေါ့ꩻထာꩻဖုဲင်ႏနာႏ၊ သꩻပါမွေးစွဉ်ႏ သုတ် အဘိဓမ္မာ ဝိနယ်ꩻ၊ ယိုဖုံႏနဝ်ꩻတဲ့ 'လိုꩻသဒ္ဓါႏတရာꩻအဝ်ႏ'အပွုံႏပတ်လက္ခဏာႏဖုံႏနေနေသွူ။ ၇။ ရဟန်ꩻနဝ်ꩻနဝ်ꩻ အဝ်ႏကျိုꩻစာꩻပယ်ႏထိုꩻ အကုသိုလ်ႏ၊ အဝ်ႏသောင်ႏသာမာꩻမွေး ကုသိုလ်ႏ၊ မာꩻသေႏသေႏကုသိုလ်ႏ၊ ယိုဖုံႏနဝ်ꩻတဲ့ 'လိုꩻသဒ္ဓါႏအဝ်ႏ'အပွုံႏပတ်လက္ခဏာႏနေနေသွူ။ ၈။ ရဟန်ꩻနဝ်ꩻနဝ်ꩻ သꩻကိုကထွာဒါႏ မျက်မောက်ဘဝယိုခါ အုံချမ်ꩻချမ်ꩻသာႏသာႏနွောင်ꩻအီ ဈာန်ႏလစ်ꩻပါꩻနဝ်ꩻ လိုႏမုဲင်ꩻခါလꩻ၊ ယိုနဝ်ꩻတဲ့ 'လိုꩻသဒ္ဓါႏတရာꩻအဝ်ႏ'အပွုံႏပတ်လက္ခဏာႏနေနေသွူ။ ၉။ ရဟန်ꩻနဝ်ꩻနဝ်ꩻ အုံဖိုဘဝပေါင်ꩻအာ ယူႏချာနွောင်ꩻ၊ တဘဝတရိုꩻတဝ်း (ကားမုဲင်ꩻဘဝဝ)ဘဝတသိန်ꩻခန်းတဲ့ယဝ်း ယူႏချာနွောင်ꩻ၊ ထီႏချာလို့၊ ထွာနုဲင်းယို ထွာနုဲင်းနဝ်ꩻ-စတဲင်နုဲင်းနဝ်ꩻ သေချာလို့၊ ယိုနဝ်ꩻတဲ့ 'လိုꩻသဒ္ဓါႏတရာꩻအဝ်ႏ'အပွုံႏပတ်လက္ခဏာႏနေနေသွူ။ ၁၀။ ရဟန်ꩻနဝ်ꩻနဝ်ꩻ နေးတွမ်ႏမဲ့ ဒိဗ္ဗစက္ခုတဲင် သတ္တဝါႏသီတွင်ꩻ၊ သတ္တဝါႏကွုတ်တွင်ꩻ၊ ဒုစရဲက်၊ သုစရဲက် ထွိုက်ရာꩻလွေꩻထွာ သေလို့၊ ယိုနဝ်ꩻတဲ့ 'လိုꩻသဒ္ဓါႏတရာꩻအဝ်ႏ'အပွုံႏပတ်လက္ခဏာႏနေနေသွူ။ ၁၁။ ရဟန်ꩻသုဘူတိဟွေး- ရဟန်ꩻနဝ်ꩻနဝ်ꩻ အာသဝေါတရာꩻ (လောဘ ဒိဋ္ဌိ မောဟ)လို့တဲင် လꩻအရဟတ္တဖိုလ်ႏ၊ တွိုႏရဟန္တာႏအရန်း၊ ယိုနဝ်ꩻတဲ့ 'လိုꩻသဒ္ဓါႏတရာꩻအဝ်ႏ'အပွုံႏပတ်လက္ခဏာႏနေနေသွူ။ သုဘူတိ လောဝ်းဗွေႏဘုရာꩻနုဲင်းယို- "ဩဗွေႏ- 'ရဟန်ꩻသဒ္ဓ'ယိုနဝ်ꩻ ပွုံႏပတ်လက္ခဏာႏ တဆီပုဲင်တဗာႏနဝ်ꩻ ဗွေလို့ဗွေႏဩ" ဗွေႏဘုရာꩻရိုꩻ- "သာႏဓု-သာႏဓု သုဘူတိ၊ ပေါႏနဝ်ꩻတဲ့ နာꩻအုံညီꩻသွော့ ရဟန်ꩻသဒ္ဓနဝ်ꩻနော၊ နာꩻတွမ်ႏရဟန်ꩻသဒ္ဓနဝ်ꩻ ဆုဲင်ꩻချာမီႏမဉ်လွဉ်ယင်း ခွေထျꩻတဲ့ လꩻဒျာႏနော"ဗုဒ္ဓေါဗွေႏဆရာႏ ဖေႏစွဉ်ႏအခွင်ꩻသာႏနုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ ဧကာဒသကနိပါတ်၊ သုဘူတိသုတ်)